14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 14 - ءماجىلىسى بەيجيڭدە وتكىزىلدى

«حالىق گازەتى»، 2 - ايدىڭ 24 – كۇنى، بەيجيڭ (ءتىلشى پىڭ بو). 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 14 – ءماجىلىسى 2 - ايدىڭ 24 – كۇنى تۇستەن بۇرىن بەيجيڭدەگى حالىق سارايىندا ءبىرىنشى جالپى جيىنىن وتكىزدى. كوميتەت باستىعى جاۋ لىجي باسقاردى.

تۇراقتى كوميتەت قۇرامىنداعىلاردان 162 ادام جيىنعا قاتىناستى، جيىنعا قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.

جيىن مەملەكەتتىك حالىق قۇرىلتايى نەگىزگى زاڭ جانە زاڭدار كوميتەتىنىڭ مەڭگەرۋشى مۇشەسى شين چۇنيىڭ جاساعان حالىقتىق شارۋاشىلىقتى جەبەۋ زاڭى جوباسىنا وزگەرىس ەنگىزۋ جاعدايى جونىندەگى مالىمەتتى تىڭدادى. جوبانىڭ 2 - رەت قارالعان نۇسقاسىندا پارتيا ورتالىق كوميتەتىنىڭ جوعارى دەڭگەيدەگى سوتسياليستىك بازار شارۋاشىلىعى ءتۇزىلىسىن ورناتۋ، حالىقتىق شارۋاشىلىقتىڭ دامۋ ورتاسىن ساپالىلاندىرۋ سياقتى تالاپتارى ونان ارى ايگىلەندى؛ مەملەكەتتىك كەڭەس پەن اۋدان دارەجەلىدەن جوعارى جەرگىلىكتى حالىق ۇكىمەتتەرى مەرزىم بويىنشا دارەجەلەس حالىق قۇرىلتايى تۇراقتى كوميتەتىنە حالىقتىق شارۋاشىلىقتىڭ دامۋىن جەبەۋ جاعدايىنان مالىمەت بەرەدى دەگەن مازمۇن قوسىلدى؛ زاڭمەن جونگە سالۋدى قامتاماسىز ەتۋگە قاتىستى مازمۇندار ونان ارى تولىقتىرىلدى جانە كەمەلدەندىرىلدى؛ قاتىستى بەلگىلەمەلەردى قوسۋ كاسىپتىك قوعامداردىڭ، ساۋدا قوعامدارىنىڭ حالىقتىق شارۋاشىلىقتىڭ دامۋىن جەبەۋدەگى رولىن ساۋلەلەندىرەدى، ت. ب.

مەملەكەتتىڭ اۋە كەڭىستىگىنە يەلىك ۇقىعى مەن حالىقتىق اۆياتسيا ۇقىعىن قورعاۋ، حالىقتىق اۆياتسيا قيمىلىنىڭ حاۋىپسىز، ءتارتىپتى جۇرگىزىلۋىن قامتاماسىزداندىرۋ، حالىقتىق اۆياتسيا قيمىلىنا قاتىستى جاقتاردىڭ زاڭدى ۇقىق - مۇددەسىن قورعاۋ، حالىقتىق اۆياتسيا ىستەرىنىڭ جوعارى ساپالى دامۋىن جەبەۋ ءۇشىن، مەملەكەتتىك كەڭەس حالىقتىق اۆياتسيا زاڭىنا وزگەرىس ەنگىزۋ جوباسىن قاراۋعا ۇسىنۋ جونىندەگى كەڭەس جوباسىن العا قويدى. مەملەكەتتىك كەڭەستىڭ تاپسىرۋىمەن قاتىناس - تاسىمال مينيسترلىگىنىڭ مينيسترى ليۋ ۋەي تۇسىنىك جاسادى.

وسى كەزەكتى تۇراقتى كوميتەت جيىنىنىڭ ماڭىزدى ءبىر مىندەتى 14 - كەزەكتى مەملەكەتتىك حالىق قۇرىلتايىنىڭ 3 – ءماجىلىسىن اشۋعا دايىندىق كورۋ. جيىن مەملەكەتتىك حالىق قۇرىلتايى تۇراقتى كوميتەتىنىڭ قىزمەت بايانداماسى نۇسقاسىن قارادى، كوميتەت باستىقتارى ءماجىلىسى قاراۋعا ۇسىنعان 14 - كەزەكتى مەملەكەتتىك حالىق قۇرىلتايى 3 - ءماجىلىسىنىڭ كەڭەستىك ءتارتىپ جوباسى، ءتوراعالار القاسى مەن باس حاتشىنىڭ ەسىمدىگى جوباسى، سىرتتاي قاتىناسۋشىلاردىڭ ەسىمدىگى جوباسى سياقتى كەڭەستىك جوبالاردى قارادى.

جيىن مەملەكەتتىك حالىق قۇرىلتايى تۇراقتى كوميتەتى ۋاكىلدەردىڭ تولىمدىلىعىن تەكسەرۋ كوميسسياسىنىڭ مەڭگەرۋشى مۇشەسى ياڭ شياۋچاۋ جاساعان ءىشىنارا ۋاكىلدەردىڭ ۋاكىلدىك تولىمدىلىعى جونىندەگى بايانداماسىن تىڭدادى.

جيىن تاعى مىندەتكە تاعايىنداۋ، مىندەتتەن قالدىرۋ جوباسىن قارادى.

مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارلارى لي حۇڭجۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، حاۋ ميڭجين، ساي دافىڭ، حى ۋەي، ۋ ۋەيحۋا، تيە نيڭ، پىڭ چيڭحۋا، جاڭ چيڭۋەي، لوساڭ جياڭسۇن، شوكىرات زاكىر، باس حاتشى ليۋ چي ماجىلىسكە قاتىناستى.

مەملەكەتتىك كەڭەستىڭ مۇشەسى چىن ي - چين، ەڭ جوعارى حالىق سوتى مەكەمەسىنىڭ باستىعى جاڭ جۇن، ەڭ جوعارى حالىق پروكۋراتۋراسىنىڭ باس پروكۋرورى يىڭ يۇڭ، مەملەكەتتىك باقىلاۋ - تەكسەرۋ كوميتەتىندەگى جاۋاپتى جولداستار، مەملەكەتتىك حالىق قۇرىلتايى ارناۋلى كوميتەتتەرىنىڭ مۇشەلەرى، ولكەلىك، اۆتونوميالى رايوندىق، توتە قاراستى قالالىق حالىق قۇرىلتايى تۇراقتى كوميتەتتەرىندەگى جاۋاپتى جولداستار، تەتە ولكە دارەجەلى ءىشىنارا قالالاردىڭ حالىق قۇرىلتايى تۇراقتى كوميتەتتەرىندەگى نەگىزگى جاۋاپتى جولداستار، قاتىستى تاراۋلارداعى جاۋاپتى جولداستار قاتارلىلار جيىنعا سىرتتاي قاتىناستى.

كەلۋ قاينارى: حالىق تورابى