شي جينپيڭ رەسەي فەدەراتسياسى حاۋىپسىزدىك كەڭەسىنىڭ حاتشىسى شويگۋمەن كەزدەستى

مەملەكەت ءتوراعاسى شي جينپيڭ 2 - ايدىڭ 28 - كۇنى تۇستەن كەيىن حالىق سارايىندا رەسەي فەدەراتسياسى حاۋىپسىزدىك كەڭەسىنىڭ حاتشىسى شويگۋمەن كەزدەستى.

سۋرەتتى شينحۋا اگەنتتىگىنىڭ ءتىلشىسى ليۋ ۋەيبيڭ تۇسىرگەن

شينحۋا اگەنتتىگى، 2 - ايدىڭ 28 - كۇنى، بەيجيڭ (ءتىلشى دۇڭ شۋە). 2 - ايدىڭ 28 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا رەسەي فەدەراتسياسى حاۋىپسىزدىك كەڭەسىنىڭ حاتشىسى شويگۋمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن رەسەي − تاۋ - سۋى جالعاسقان دوس كورشى ەلدەر، ونان دا ماڭىزدىسى، سان – ساناقسىز سىن - سىناقتا شىڭدالعان ناعىز دوستار. بيىل مەن پۋتين زۇڭتۇڭمەن ەكى رەت پىكىرلەستىم، جۇڭگو - رەسەي قارىم - قاتىناسىنىڭ دامۋى جونىندە جوعارى دەڭگەيلى جوبا جاساپ، ءبىرقىدىرۋ كەلەلى حالىقارالىق جانە وڭىرلىك ماسەلە جونىندە ىشكەرىلەي پىكىرلەستىم. بيىل − جۇڭگو حالقىنىڭ جاپون شاپقىنشىلارىنا قارسى سوعىسىنىڭ، سوۆەت وداعىنىڭ ۇلى وتان سوعىسىنىڭ جانە دۇنيە ءجۇزىنىڭ فاشيزمگە قارسى سوعىسى جەڭىسكە جەتكەندىگىنىڭ 80 جىلدىعى ءارى بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. وسىنداي ەرەكشە تاريحي مانگە يە جىلدا جۇڭگو - رەسەي قارىم - قاتىناسى ءبىرقىدىرۋ ماڭىزدى كەڭەستىك ءتارتىپتى قارسى الادى. ەكى جاقتىڭ ءار جىگى تىعىز بايلانىستى ساقتاپ، پۋتين زۇڭتۇڭ ەكەۋىمىز كەلىسكەن ورتاق تانىمدى جاپپاي تياناقتاندىرىپ، ماڭگىلىك تاتۋ كورشى، دوس بولۋ، جان - جاقتى، ستراتەگيالىق ىستەستىك جاساۋ، ءوزارا پايدا جەتكىزىپ، سەلبەسىپ، تەڭ يگىلىككە كەنەلۋ سىندى جاڭا داۋىردەگى جۇڭگو - رەسەي قارىم - قاتىناسىنىڭ رۋحاني وزەگىن ساۋلەلەندىرىپ، ستراتەگيالىق سەلبەستىكتى جانە ناقتى سەلبەستىكتى ۇزدىكسىز تەرەڭدەتىپ، ەكى ەلدىڭ بىرگە دامۋىنا، گۇلدەنۋىنە دەم بەرۋى كەرەك. ەكى جاق حالىقارالىق جانە وڭىرلىك ىستەردەگى سايكەسۋدى ۇزدىكسىز كۇشەيتىپ، بريكس ەلدەرىنىڭ جانە شاڭحاي سەلبەستىك ۇيىمىنىڭ رولىن تولىق ساۋلەلەندىرىپ، دۇنيە ءجۇزى وڭتۇستىك ەلدەرىنىڭ ىنتىماعىنىڭ، سەلبەستىگىنىڭ جالپى بەتالىسىن بەكەمدەۋى كەرەك.

شويگۋ پۋتين زۇڭتۇڭنىڭ ءتوراعا شي جينپيڭگە جولداعان ىقىلاستى سالەمىن جەتكىزىپ، مىنالاردى ءبىلدىردى: پۋتين زۇڭتۇڭ ءتوراعا شي جينپيڭمەن شىنايى دوستىعىن جانە تىعىز بايلانىسىن ايرىقشا قاستەرلەيدى. رەسەي - جۇڭگو قارىم - قاتىناسى بۇرىن بولماعان جوعارى دەڭگەيدە تۇر، ەشقانداي 3 - جاققا باعىتتالمايدى. رەسەي - جۇڭگو بىرلەستىگى دۇنيە جۇزىندە ماڭىزدى رول اتقارىپ، ءىرى ەلدەر قارىم - قاتىناسىنىڭ ۇلگىسىن ورناتتى. رەسەي مەن جۇڭگو باستان - اياق ءبىر - بىرىنە سەنىپ، تەڭ تۇرعىدا پىكىرلەسىپ كەلەدى، ەكى ەلدىڭ ستراتەگيالىق سەلبەستىگى ەكى جاقتىڭ ورتاق مۇددەسىنە ۇيلەسەدى. رەسەي جاق ەكى ەل مەملەكەت باسشىلارى كەلىسكەن ماڭىزدى ورتاق تانىمدى شىنايى تياناقتاندىرىپ، جۇڭگومەن سەلبەستىكتى تاباندىلىقپەن كۇشەيتەدى. جۇڭگو جاق ۋكراينا داعدارىسىنىڭ بەيبىت جولمەن شەشىلۋىن باستان - اياق بەلسەنە ىلگەرىلەتىپ كەلەدى، رەسەي جاق مۇنى ەرەكشە القايدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى