«شي جينپيڭنىڭ ەكونوميكا ماقالالارىنان تاڭدامالىلاردىڭ» 1 - تومى باسپادان شىعىپ تاراتىلدى

شينحۋا اگەنتتىگى، 3 - ايدىڭ 2 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتىنىڭ پارتيا تاريحىن جانە قۇجات زەرتتەۋ ورنى قۇراستىرعان «شي جينپيڭنىڭ ەكونوميكا ماقالالارىنان تاڭدامالىلاردىڭ» 1 - تومى جۋىقتا ورتالىق قۇجات باسپاسىندا باسپادان شىعىپ، بۇكىل ەلدە تاراتىلدى.

پارتيا 18 - قۇرىلتايىنان بەرى قاتاڭ دا كۇردەلى حالىقارالىق ورتا جانە ەل ىشىندەگى جاپالى دا اۋىر رەفورما، دامۋ، ورنىقتىلىق مىندەتى الدىندا شي جينپيڭ جولداستى ۇيىتقى ەتكەن پارتيا ورتالىق كوميتەتى اۋقىمدى باقىلاۋعا، جالپى جاعدايدى كوزدەۋگە، ناقتى ءىس ىستەۋگە تاباندى بولىپ، پارتيانىڭ ەكونوميكالىق قىزمەتكە ستراتەگيالىق جوباسىن جانە ءبىر تۇتاس باسشىلىعىن جاپپاي كۇشەيتىپ، ەكونوميكالىق قىزمەتتىڭ زاڭدىلىعى جونىندەگى تانىمدى ۇزدىكسىز تەرەڭدەتىپ، ءبىرقىدىرۋ جاڭا ۇستانىم، جاڭا يدەيا، جاڭا ستراتەگيانى العا قويىپ، ەلىمىزدىڭ ەكونوميكالىق دامۋدا تاريحي تابىستارعا قول جەتكىزۋىنە، تاريحي وزگەرىستەر تۋىلۋىنا جەتەكشىلىك ەتىپ، شي جينپيڭ ەكونوميكالىق يدەياسىن قالىپتاستىردى. شي جينپيڭ ەكونوميكالىق يدەياسى − شي جينپيڭ جاڭا ءداۋىر جۇڭگوشا سوتسياليزم يدەياسىنىڭ ماڭىزدى قۇرامداس بولىگى، جاڭا داۋىردەگى ەكونوميكالىق دامۋدىڭ امالياتتىق تاجىريبەلەرىنىڭ جۇيەلى نازاريالىق تۇجىرىمى، جۇڭگو كوممۋنيستىك پارتياسىنىڭ سوتسياليستىك ەكونوميكالىق دامۋ جولى جونىندە قاجىماي ىزدەنىس جاساۋىندا قالىپتاسقان باعالى يدەيالىق جاۋھارى، جۇڭگوشا سوتسياليستىك ساياسي ەكونوميكانىڭ جاڭا ءورىسىن اشىپ، ماركسيزمدىك ساياسي ەكونوميكانى بايىتۋعا، دامىتۋعا ماڭىزدى ءتول ۇلەس قوسىپ، ەلىمىز ەكونوميكاسىنىڭ جوعارى ساپالى دامۋىن ىلگەرىلەتۋگە، اۋىر حاۋىپ - قاتەر مەن سىن - سايىسقا عىلمي توتەپ بەرۋگە، جاپپاي سوتسياليستىك وسىزاماندانعان مەملەكەت قۇرۋعا وتكىر يدەيالىق قارۋ ازىرلەدى.

«شي جينپيڭنىڭ ەكونوميكا ماقالالارىنان تاڭدامالىلاردىڭ» 1 - تومىنا شي جينپيڭ جولداستىڭ 2012 - جىلى 11 - ايدان 2024 - جىلى 12 - ايعا دەيىنگى مەزگىلدەگى ەكونوميكالىق قۇرىلىس جونىندەگى ەڭ ماڭىزدى، ەڭ نەگىزگى شىعارمالارى ۋاقىت ءتارتىبى بويىنشا قۇراستىرىلىپ، بايانداما، ءسوز، لەكسيا، نۇسقاۋ، بەكىتۋ سياقتى جالپى 74 شىعارما ەنگىزىلگەن. ءبىر ءبولىم شىعارما تۇڭعىش رەت اشىق جاريالانىپ وتىر.

«شي جينپيڭنىڭ ەكونوميكا ماقالالارىنان تاڭدامالىلاردىڭ» 1 - تومىنىڭ باسپادان شىعىپ تاراتىلۋى بۇكىل پارتيانىڭ، بۇكىل ەلدەگى ءار ۇلت حالقىنىڭ شي جينپيڭ جاڭا ءداۋىر جۇڭگوشا سوتسياليزم يدەياسىن، اسىرەسە، شي جينپيڭ ەكونوميكا يدەياسىن ىشكەرىلەي ۇيرەنۋىنە، دايەكتىلەندىرۋىنە قۇزىرلى وقۋلىق ازىرلەدى، قالىڭ كادرلار مەن بۇقارانىڭ ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، پارتيا 20 - قۇرىلتايىنىڭ جانە پارتيا 20 - كەزەكتى ورتالىق كوميتەتى ەكىنشى، ءۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، ورنىقتىلىق بارىسىندا ىلگەرىلەۋ سىندى قىزمەت نەگىزگى اۋەنىنەن جازباي، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىن جەدەل ورناتىپ، جوعارى ساپالى دامۋدى تىڭعىلىقتى ىلگەرىلەتىپ، رەفورمانى اناعۇرلىم جاپپاي تەرەڭدەتىپ، زەيىن - زەردەنى، كۇش - قۋاتتى شوعىرلاندىرىپ، قايراتتانا العا ۇمتىلىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋ ءۇشىن ىنتىماقتاسا كۇرەس جۇرگىزۋىندە كەلەلى مانگە يە.

كەلۋ قاينارى: حالىق تورابى