شي جينپيڭ يندونەزيانىڭ زۇڭتۇڭى پرابوۋومەن جۇڭگو مەن يندونەزيانىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگى، 4 - ايدىڭ 13 - كۇنى، بەيجيڭ. 4 - ايدىڭ 13 - كۇنى مەملەكەت ءتوراعاسى شي جينپيڭ يندونەزيانىڭ زۇڭتۇڭى پرابوۋومەن ءوزارا قۇتتىقتاۋ تەلەگرامماسىن جولداپ، جۇڭگو مەن يندونەزيانىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: جۇڭگو مەن يندونەزيا _ اراسىن تەڭىز ءبولىپ جاتقان جاقسى كورشىلەر، تاعدىرلاس جاقسى سەرىكتەر.

ديپلوماتيالىق قارىم - قاتىناس ورناتقان 75 جىلدان بەرى ەكى جاق ءبىر جاعادان باس، ءبىر جەڭنەن قول شىعارىپ، شىنايى سەلبەسىپ، ەكى ەل قارىم - قاتىناسى باياندى دامىدى، جۇڭگو مەن يندونەزيانىڭ دوستىعى جۇرت جۇرەگىنە تەرەڭ ۇيالادى. بىلتىر مەن زۇڭتۇڭ مىرزامەن 2 رەت ديدارلاسىپ، ءوزارا مەملەكەتتىڭ دامۋ كەلەشەگىن باتىل قولداپ، ءوز وسىزامانداندىرۋ جولىمىزبەن قول ۇستاسا ويداعىداي ءجۇرىپ، وڭىرلىك جانە دۇنيە جۇزىلىك ىقپالعا يە جۇڭگو - يندونەزيا تاعدىرلاس ورتاق تۇلعاسىن قۇرىپ، ەكى جاقتى قارىم - قاتىناستىڭ تاعى دا تىڭ ساتىعا كوتەرىلۋىنە جەتەكشىلىك ەتۋگە ءبىر اۋىزدان ماقۇل بولدىق.

شي جينپيڭ بىلاي دەپ باسا دارىپتەدى: جۇڭگو مەن يندونەزيا ەكەۋى دە وركەندەپ كەلە جاتقان ءىرى ەلدەر جانە ”دۇنيە جۇزىلىك وڭتۇستىكتىڭ“ ماڭىزدى كۇشى، ەكى جاقتىڭ سەلبەستىگى ستراتەگيالىق مانگە جانە دۇنيە جۇزىلىك ىقپالعا يە. مەن جۇڭگو - يندونەزيا قارىم - قاتىناسىنىڭ دامۋىنا ايرىقشا ءمان بەرەمىن، زۇڭتۇڭ مىرزامەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعىن قۇتتىقتاۋدى وراي ەتىپ، ەكى ەلدىڭ جان - جاقتى ستراتەگيالىق سەلبەستىگىن ونان ارى تەرەڭدەتىپ، كوپ جاقتى ستراتەگيالىق سايكەسۋدى كۇشەيتىپ، جۇڭگو - يندونەزيا تاعدىرلاس ورتاق تۇلعاسىنىڭ داۋىرلىك ءمانىن ۇزدىكسىز بايىتىپ، وركەندەپ كەلە جاتقان ءىرى ەلدەردىڭ شىنايى ىنتىماعىنىڭ ۇلگىسىن، بىرگە دامۋدىڭ ۇلگىسىن، وڭتۇستىك - وڭتۇستىك سەلبەستىگىنىڭ اتويشىسىن سومداپ، ادامزاتتىڭ العا باسۋ ىستەرىن بىرگە جەبەۋدى قالايمىن.

پرابوۋو قۇتتىقتاۋ تەلەگرامماسىندا مىنالاردى ءبىلدىردى: جۇڭگو مەن يندونەزيانىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى بايلانىسىمەن مەن يندونەزيا ۇكىمەتى مەن يندونەزيا حالقى اتىنان ءتوراعا شي جينپيڭدى جانە جۇڭگو حالقىن شىن جۇرەكتەن قۇتتىقتايمىن.

يندونەزيا مەن جۇڭگونىڭ دوستىعىنىڭ تامىرى تەرەڭدە جاتىر، ەكى ەلدىڭ سەرىكتەستىك قارىم - قاتىناسىنىڭ ومىرشەڭدىك كۇشى مىعىم.

ەكى جاقتىڭ ساياسي، ەكونوميكا، گۋمانيتارلىق، تەڭىز ايدىنى، حاۋىپسىزدىك سىندى ”بەس ۇلكەن تىرەك“ سەلبەستىگى ۇزدىكسىز جەدەل ىلگەرىلەدى. مەن ەكى ەلدىڭ سەلبەستىگىن ۇزدىكسىز تەرەڭدەتىپ، ەكى ەل حالقىنىڭ دوستىق دانەكەرىن بەكەمدەپ، دۇنيە ءجۇزىنىڭ بەيبىتشىلىگى مەن ورنىقتىلىعىنا بەلسەندى ۇلەس قوسۋدى شىن جۇرەكتەن ءۇمىت ەتەمىن.

كەلۋ قاينارى: حالىق تورابى