جۇڭگو «جۇڭگو مەن ا ق ش - نىڭ ەكونوميكا - ساۋدا قاتىناسىنا قاتىستى ءبىرقانشا ماسەلەدەگى جۇڭگو جاقتىڭ تۇرعىسى» اق تىستى كىتابىن جاريالادى

شينحۋا اگەنتتىگى، 4 - ايدىڭ 9 - كۇنى، بەيجيڭ (تىلشىلەر شيە شيياۋ، ۋاڭ يۇيشياۋ). مەملەكەتتىك كەڭەستىڭ اقپارات كەڭسەسى 4 - ايدىڭ 9 - كۇنى «جۇڭگو مەن ا ق ش - نىڭ ەكونوميكا - ساۋدا قاتىناسىنا قاتىستى ءبىرقانشا ماسەلەدەگى جۇڭگو جاقتىڭ تۇرعىسى» اتتى اق تىستى كىتاپتى جاريالاپ، جۇڭگو مەن ا ق ش - نىڭ ەكونوميكا - ساۋدا قاتىناسىنىڭ فاكتىسىن ايقىنداپ، جۇڭگو جاقتىڭ قاتىستى ماسەلەلەر جونىندەگى ساياساتتىق تۇرعىسىن ءتۇسىندىردى.

اق تىستى كىتاپ العى سوزدەن، سوڭعى سوزدەن تىس، التى بولەكتەن قۇرالعان، جەكە – جەكە مىنالار: جۇڭگو مەن ا ق ش - نىڭ ەكونوميكا - ساۋدا قارىم - قاتىناسىنىڭ ءمانى − ءوزارا پايدا جەتكىزىپ، تەڭ يگىلىككە كەنەلۋ؛ جۇڭگو جاق جۇڭگو مەن ا ق ش - نىڭ ءبىرىنشى كەزەڭدەگى ەكونوميكا - ساۋدا كەلىسىمىن مۇقيات اتقاردى؛ ا ق ش جاق جۇڭگو مەن ا ق ش - نىڭ ءبىرىنشى كەزەڭدەگى ەكونوميكا - ساۋدا كەلىسىمىنىڭ قاتىستى بورىشتارىنا قايشىلىق جاسادى؛ جۇڭگو ەركىن ساۋدا ۇستانىمىن امالياتتا ايگىلەپ، دۇنيە جۇزىلىك ساۋدا ۇيىمىنىڭ ەرەجەسىنە مۇقيات بويسۇنادى؛ سىڭار جاقتىلىق، قورعانىمپازدىق ەكى جاقتى ەكونوميكا - ساۋداسى قارىم - قاتىناسىنىڭ دامۋىنا زيان جەتكىزەدى؛ جۇڭگو مەن ا ق ش تەڭ تۇرعىدا تىلدەسۋ، ءوزارا پايدا جەتكىزۋ سەلبەستىگى ارقىلى ەكونوميكا - ساۋدا الاۋىزدىعىن شەشە الادى.

اق تىستى كىتاپتا بىلاي دەلىندى: جۇڭگو مەن ا ق ش ديپلوماتيالىق قاتىناس ورناتقان 46 جىلدان بەرى ەكى جاقتىڭ ەكونوميكا - ساۋدا قاتىناسى ۇزدىكسىز دامىدى. جۇڭگو مەن ا ق ش - نىڭ ساۋدا سوماسى 1979 - جىلعى 2 ميلليارد 500 ميلليون دوللارعا جەتپەيتىن مولشەردەن 2024 - جىلعى 683 ميلليارد 300 ميلليون دوللارعا جەتتى. الايدا تاياۋ جىلداردان بەرى ا ق ش – نىڭ سىڭار جاقتىلىعى، قورعانىمپازدىعى باس كوتەرىپ، جۇڭگو مەن ا ق ش – نىڭ قالىپتى ەكونوميكا – ساۋدا سەلبەستىگىنە اۋىر دارەجەدە كەدەرگىلىك جاسادى. 2018 - جىلى جۇڭگو مەن ا ق ش - نىڭ ەكونوميكا - ساۋدا قاقتىعىسىنان بەرى ا ق ش جاق جۇڭگونىڭ ا ق ش - عا شىعاراتىن 500 ميلليارد دوللاردان استام ونىمدەرىنەن كەدەن باجىسىن ۇستەمەلەپ الىپ، جۇڭگونى تەجەۋ، سوققى بەرۋ ساياساتىن ۇزدىكسىز شىعاردى. جۇڭگو جاق پارمەندى توتەپ بەرۋ شارالارىن قولدانىپ، مەملەكەت مۇددەسىن باتىل قورعاۋعا ءماجبۇر بولدى. سونىمەن بىرگە، جۇڭگو جاق تالاس - تارتىستى پىكىرلەسۋ، كەڭەسۋ ارقىلى شەشۋ نەگىزگى مايدانىنا باستان - اياق تاباندى بولىپ، ا ق ش - مەن كوپ كەزەكتى ەكونوميكا - ساۋدا كەڭەسىن ورىستەتىپ، ەكى جاقتى ەكونوميكا - ساۋدا قاتىناسىن ورنىقتىرۋعا قۇلشىنۋدا.

اق تىستى كىتاپتا مىنالار اتاپ كورسەتىلدى: ا ق ش جاق جۋىقتا ىلگەرىندى - كەيىندى ”ا ق ش ءبىرىنشى ورىندا تۇراتىن“ ساۋدا - قارجى قوسۋ ساياساتى ەسكەرتپە حاتى مەن ”ا ق ش ءبىرىنشى ورىندا تۇراتىن“ ساۋدا ساياساتى بايانداماسىنىڭ اتقارىلۋىنان ۇزىندىلەردى جاريالاپ، جۇڭگو ونىمدەرىنە نورمادان تىس كەدەن باجىسىن جاپپاي ۇستەمەلەپ سالدى، فەنتاني سياقتى ماسەلەلەردى سىلتاۋ ەتىپ جۇڭگودان ۇستەمەلەپ كەدەن باجىسىن الدى، ”تەڭ كەدەن باجىسىن“ الدى ءارى ىلگەرىلەگەن تۇردە %50 تىك كەدەن باجىسىن ۇستەمەلەپ الدى، جۇڭگونىڭ تەڭىز ىستەرى، زات اينالىمى جانە كەمە جاساۋ كاسىبىنە قاراتا پورت اقىسىن الۋ سياقتى 301 تەكسەرۋ - شەكتەۋ شارالارىن ورتاعا قويدى. كەدەن باجىسى سياقتىلاردى حاۋىپ - قاتەر ەتكەن، قىسىم جاساعان وسى شەكتەۋ شارالارى قاتەلىك ۇستىنە قاتەلىك ۇستەپ، ا ق ش - نىڭ تيپتىك سىڭار جاقتىلىق، زورەكەرلىك ءمانىن تاعى ءبىر رەت اشكەرەلەپ، بازار شارۋاشىلىعىنىڭ زاڭدىلىعىنا، كوپ جاقتىلىققا قايشى كەلدى، بۇل جۇڭگو مەن ا ق ش - نىڭ ەكونوميكا - ساۋدا قاتىناسىنا اۋىر ىقپال جاسايدى. جۇڭگو جاق حالىقارالىق زاڭنىڭ نەگىزگى پرينسيپتەرىنە جانە زاڭدارعا، زاڭ ەرەجەلەرگە نەگىزدەلىپ، قاجەتتى قارسى شارا قولداندى.

اق تىستى كىتاپتا مىنالار ءبىلدىرىلدى: جۇڭگو جاق باستان - اياق جۇڭگو - ا ق ش ەكونوميكا - ساۋدا قارىم - قاتىناسىنىڭ ءمانى − ءوزارا پايدا جەتكىزىپ، تەڭ يگىلىككە كەنەلۋ دەپ قارايدى. دامۋ كەزەڭى، ەكونوميكالىق ءتۇزىمى ۇقسامايتىن ەكى ءىرى ەل رەتىندە، جۇڭگو مەن ا ق ش - نىڭ ەكونوميكا - ساۋدا سەلبەستىگى بارىسىندا الاۋىزدىقتار مەن قاقتىعىستاردىڭ تۋىلۋى قالىپتى، مۇنداعى شەشۋشى ءتۇيىن ءبىر - ءبىرىنىڭ وزەكتى مۇددەسى مەن كوڭىل ءبولىپ وتىرعان كەلەلى ماسەلەلەرىنە قۇرمەت ەتىپ، پىكىرلەسۋ، كەڭەسۋ ارقىلى ماسەلەنى ۇيلەسىمدى شەشۋ ءادىسىن تابۋ كەرەك. ساۋدا سوعىسىندا جەڭىمپاز بولمايدى، قورعانىمپازدىقتىڭ شىعار جولى جوق. جۇڭگو مەن ا ق ش - نىڭ ءوز الدىنا تابىسقا جەتۋى ءبىر - بىرىنە حاۋىپ توندىرمەيدى، قايتا وراي بولماق. ا ق ش جاقتىڭ جۇڭگو جاقپەن ءبىر باعىتتا ىلگەرىلەپ، ەكى ەل مەملەكەت باسشىلارىنىڭ تىلدەسۋىندە كورسەتىلگەن بەتالىس، ءوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىككە كەنەلۋ پرينسيبى بويىنشا، تەڭ تۇرعىدا تىلدەسۋ، كەڭەسۋ ارقىلى اركىم ءوزى ءجىتى قاداعالاپ وتىرعان ىستەردى شەشىپ، جۇڭگو – ا ق ش ەكونوميكا - ساۋدا قارىم - قاتىناسىنىڭ اقاۋسىز، ورنىقتى، باياندى دامۋىن بىرگە ىلگەرىلەتۋىن ءۇمىت ەتەمىز.

كەلۋ قاينارى: حالىق تورابى