ا ق ش – نىڭ 12 ناقتى تۇلعاسى ەكسپورتتى باسقارۋ – تەجەۋ تىزىمدىگىنە ەنگىزىلەدى 

شينحۋا اگەنتتىگىنىڭ 4 – ايدىڭ 9 – كۇنى بەيجيڭنەن بەرگەن حابارى. ساۋدا مينيسترلىگى 4 – ايدىڭ 9 – كۇنى ۇقتىرۋ جاريالاپ، ا ق ش فوتونيكس سەرىكتەستىگى قاتارلى ا ق ش - نىڭ 12 ناقتى تۇلعاسىن ەكسپورتتى باسقارۋ – تەجەۋ تىزىمدىگىنە ەنگىزۋدى ۇيعارعان.

ۇقتىرۋعا ساي، ا ق ش – نىڭ اتالعان 12 ناقتى تۇلعاسىنا اسكەري جانە حالىقتىق ماقساتتا بىردەي قولدانۋعا بولاتىن زاتتاردى ەكسپورت ەتۋگە تيىم سالىنادى؛ قازىر ورىستەتىلۋ ۇستىندەگى ەكسپورتقا قاتىستى قيمىلدار توقتاتىلۋى كەرەك. ەرەكشە جاعدايدا، ءسوزسىز، ەكسپورت ەتۋ قاجەت بولسا، ەكسپورت ەتۋشى جاق ساۋدا مينيسترلىگىنە ءوتىنىش تاپسىرۋى كەرەك. بۇل حابارلاندىرۋ 2025 – جىلى 4 – ايدىڭ 10 – كۇنى ساعات 12 دەن ءبىر مينۋت وتكەندە رەسمي اتقارىلادى.

ساۋدا مينيسترلىگىنىڭ اقپارات مالىمدەمەشىسى بىلاي دەدى: مەملەكەتتىڭ حاۋىپسىزدىگى مەن مۇددەسىن قورعاۋ، قىرعىنداعىش قارۋ – جاراقتىڭ تارالۋىنان ساقتانۋ قاتارلى حالىقارالىق بورىشىن ادا ەتۋ ءۇشىن، «جۇڭحۋا حالىق رەسپۋبليكاسىنىڭ ەكسپورتتى باسقارۋ زاڭى» جانە «جۇڭحۋا حالىق رەسپۋبليكاسىنىڭ اسكەري جانە حالىقتىق ماقساتتا بىردەي قولدانۋعا بولاتىن زاتتاردى ەكسپورت ەتۋدى باسقارۋ ەرەجەسى» قاتارلى زاڭ – تۇزىمدەردەگى بەلگىلەمەلەرگە ساي، ساۋدا مينيسترلىگى ۇقتىرۋ شىعارىپ، ا ق ش – نىڭ 12 ناقتى تۇلعاسىن ەكسپورتتى باسقارۋ – تەجەۋ تىزىمدىگىنە ەنگىزۋدى ۇيعارىپ، ولارعا اسكەري جانە حالىقتىق ماقساتتا بىردەي پايدالانۋعا بولاتىن زاتتاردى ەكسپورت ەتۋگە تيىم سالدى. بۇل ناقتى تۇلعالاردا جۇڭگونىڭ مەملەكەت حاۋىپسىزدىگى مەن مۇددەسىن زياندايتىن ارەكەتتەر ساقتالىپ وتىرعان بولۋى مۇمكىن، ءارقانداي ەكسپورت ەتۋشىنىڭ جوعارىدا ايتىلعان بەلگىلەمەگە قايشى كەلۋىنە بولمايدى.

كەلۋ قاينارى: حالىق تورابى