جۇڭگو گەولوگيالىق تەكسەرۋ مەكەمەسىنىڭ بۇرىنعى باستىعى جۇڭ زىراننىڭ پارا الۋ، مەملەكەت قۇپيالىعىن قاساقانا شاشۋ دەلوسىنا ءبىرىنشى سوتتا ۇكىم جاريالادى

شينحۋا اگەنتتىگىنىڭ 4 ـ ايدىڭ 16 ـ كۇنى حاڭجوۋدان بەرگەن حابارى. 2025 ـ جىلى 4 ـ ايدىڭ 16 ـ كۇنى، جىجياڭ ولكەسى نيڭبو قالالىق ورتا دارەجەلى حالىق سوت مەكەمەسى ءبىرىنشى سوتتا جاراتىلىستىق بايلىق مينيسترلىگى پارتگرۋپپاسىنىڭ بۇرىنعى مۇشەسى، جۇڭگو گەولوگيالىق تەكسەرۋ مەكەمەسى پارتگرۋپپاسىنىڭ بۇرىنعى شۋجيى، مەكەمە باستىعى جۇڭ زىراننىڭ پارا الۋ، مەملەكەت قۇپيالىعىن قاساقانا شاشۋ دەلوسىنا اشىق ۇكىم شىعارىپ، ايىپكەر جۇڭ زىراندى پارا الۋ قىلمىسى بويىنشا 12 جىلدىق مەرزىمدى قاماۋ جازاسىنا ۇكىم ەتتى، وعان قوسا 2 ميلليون يۋان اقشالاي ايىپ سالدى، مەملەكەت قۇپيالىعىن قاساقانا شاشۋ قىلمىسى بويىنشا 2 جىلدىق مەرزىمدى قاماۋ جازاسىنا ۇكىم ەتىلىپ، 13 جىلدىق مەرزىمدى قاماۋ جازاسى اتقارىلاتىن بولدى، وعان قوسا 2 ميلليون يۋان اقشالاي ايىپ سالىنادى؛ جۇڭ زىراننىڭ پارا الۋ قىلمىسىنان تاپقان مال - مۇلىك پەن ونىڭ ءوسىمى زاڭ بويىنشا قۋزاپ قايتارىپ الىنىپ، مەملەكەت قازىناسىنا تاپسىرىلادى.

تەكسەرۋ ارقىلى مىنالار انىقتالدى: 2011 - جىلدان 2023 - جىلعا دەيىن ايىپكەر جۇڭ زىران جۇڭگو گەولوگيالىق تەكسەرۋ مەكەمەسى پارتگرۋپپاسىنىڭ ورىنباسار شۋجيى، ورىنباسار مەكەمە باستىعى، بۇرىنعى مەملەكەت جەر بايلىعى مينيسترلىگىنىڭ باس ينجەنەرى، بۇرىنعى مەملەكەت جەر بايلىعى مينيسترلىگى پارتگرۋپپاسىنىڭ مۇشەسى، جاراتىلىستىق بايلىق مينيسترلىگى پارتگرۋپپاسىنىڭ مۇشەسى، جۇڭگو گەولوگيالىق تەكسەرۋ مەكەمەسى پارتگرۋپپاسىنىڭ شۋجيى، مەكەمە باستىعى قاتارلى قىزمەت قولايلىلىعىنان جانە قىزمەت ۇقىعىنان، ورنىنان قالىپتاسقان قولايلى شارت - جاعدايدان پايدالانىپ، قاتىستى ورىندار مەن جەكەلەردىڭ كاسىپورىن تيجاراتى، نىسانداردى كوتەرمەگە الۋ قاتارلى ىستەرىنە كومەكتەسەدى، العان زاڭسىز مال - مۇلكى حالىق اقشاسىنا سىندىرعاندا 23 ميلليون 560 مىڭ يۋاننان اسقان. 2019 - جىلى جۇڭ زىران مەملەكەت قۇپيالىعىن ساقتاۋ زاڭىنداعى بەلگىلەمەلەرگە قايشىلىق جاساپ، قۇپيا دارەجەلى قۇجاتتاردى بىلمەۋگە ءتيىستى ادامداردىڭ كورۋىنە جانە ساقتاۋىنا تاپسىرادى، ءىسى اۋىر.

نيڭبو قالالىق ورتا دارەجەلى حالىق سوت مەكەمەسى بىلاي دەپ قارايدى: ايىپكەر جۇڭ زىراننىڭ ارەكەتى پارا الۋ قىلمىسىنا، مەملەكەت قۇپيالىعىن قاساقانا شاشۋ قىلمىسىنا جاتادى، ونىڭ العان پارا سوماسى ەرەكشە كوپ، مەملەكەت قۇپيالىعىن قاساقانا شاشۋ ءىسى اۋىر، زاڭ بويىنشا جازالاۋ ءارى قىلمىستارىن قوسىپ جازالاۋ كەرەك. ول دەلوعا الىنعاننان كەيىن قىلمىسىن قاز - قالپىندا مويىنداپ، دەلونى ءبىر جاقتى ەتۋ ورگانى ءالى يگەرمەگەن ءبىر ءبولىم پارا الۋ قىلمىس فاكتتەرىن ىرىقتىلىقپەن تاپسىرعاندىقتان، قىلمىسىن تانىپ، وكىنگەندىكتەن، زاڭسىز ولجانى بەلسەنە قايتارعاندىقتان، پاراعا العان زاڭسىز اقشانى، زاڭسىز ولجانى تۇگەلدەي قايتارىپ العاندىقتان، زاڭ بويىنشا جەڭىل جازالاۋعا بولاتىندىعىن ەسكەرە وتىرىپ، سوت جوعارىداعى ۇكىمدى شىعاردى.

كەلۋ قاينارى: حالىق تورابى