تيجارات ەتۋ دەرەۋ توقتاتىلادى! ۇكىمەت جاق حابارلاندىرۋ جاريالادى: مىناداي بۇيىمدار تولىمسىز 

مەملەكەتتىك ءدارى – دارمەكتى باقىلاۋ – باسقارۋ مەڭگەرمەسىنىڭ 4 – ايدىڭ 14 –كۇنى شىعارعان حابارلاندىرۋىنا قاراعاندا، 2024 – جىلى مەملەكەت بويىنشا بەزەنۋ بۇيىمدارىنان ۇلگى الىپ تەكسەرۋ جۇرگىزۋ قىزمەتى بارىسىندا، حيلۇڭجياڭ ولكەلىك ازىق – تۇلىك، ءدارى – دارمەكتى تەكسەرۋ – ساراپتاۋ مەكەمەسى قاتارلى ورىندار تەكسەرۋ جۇرگىزۋ ارقىلى ءونىم بەلگىسىنە مياۋليڭليان لياڭمياۋمياۋ تەرىنى جىلتىراتاتىن بەت جارعاعى دەپ جازىلعان تەرى قورعاۋ ءونىمى قاتارلى 18 توپتاعى (رەت) بەزەنۋ بۇيىمىنىڭ بەلگىلەمەگە ۇيلەسپەيتىنىن بايقاعان، تەكسەرۋ بارىسىندا «بەزەنۋ بۇيىمدارىنىڭ حاۋىپسىزدىگىنىڭ تەحنيكالىق ولشەمىندە (2015 – جىلعى نۇسقا)» بەلگىلەنگەن بەتامەزون سىركە قىشقىل ەستەرى، فلۋمەتازون، دەكسامەتازون، مەنيدازول قاتارلى انتيبيوتيكتەردى قامتىعان تيىم سالىنعان شيكىزاتتار انىقتالعان.

مەملەكەتتىك ءدارى – دارمەكتى باقىلاۋ – باسقارۋ مەڭگەرمەسى بەيجيڭ قالاسى، شاڭحاي قالاسى، جىجياڭ ولكەسى، گۋاڭدۇڭ ولكەسىندەگى ءدارى – دارمەكتى باقىلاۋ – باسقارۋ تاراۋلارىنان اتالعان بەلگىلەمەلەرگە ۇيلەسپەيتىن بەزەنۋ بۇيىمدارىنا قاتىستى تىزىمگە الدىرۋشىنىڭ، ەستەلىككە الدىرۋشىنىڭ، امانات بويىنشا وندىرگەن كاسىپورىننىڭ ۇستىنەن زاڭ بويىنشا دەلو تۇرعىزۋدى، قاتىستى كاسىپورىنداردى زاڭ بويىنشا حاۋىپ – قاتەردى تەجەۋ شارالارىن اتقارۋعا ءارى ءوزىن – ءوزى رەتكە سالۋعا جانە وزگەرتۋگە بۇيىرۋدى تالاپ ەتكەن.

ءارقايسى ولكەلەردەگى (اۆتونوميالى رايون، توتە قاراستى قالا) ءدارى – دارمەكتى باقىلاۋ – باسقارۋ تاراۋلارى قاتىستى بەزەنۋ بۇيىمدارىن تيجارات ەتۋشىلەردى اتالعان بەزەنۋ بۇيىمدارىن تيجارات ەتۋدى دەرەۋ توقتاتۋعا، زات كىرگىزگەن كەزدەگى تەكسەرۋ ەستەلىگى قاتارلى جاعدايلاردى زاڭ بويىنشا انىقتاۋعا، زاڭعا قايشى ونىمدەردىڭ تەگىن تەكتەۋگە، زاڭعا قايشى ارەكەتتەر بايقالسا، زاڭ بويىنشا قاتاڭ انىقتاپ ءبىرجاقتى ەتۋگە؛ قىلمىس كۇمانىن قالىپتاستىرعانداردى زاڭ بويىنشا قوعام حاۋىپسىزدىگى ورگاندارىنا جوتكەپ بەرۋگە بۇيىرادى.

كەلۋ قاينارى: حالىق تورابى