شينجياڭدىق ءۇش جىگىت، جارايسىڭدار 

4 – ايدىڭ 9 – كۇنى شاندۇڭ ولكەسى جينان قالاسى چاڭچيڭ رايونى ەرلىكپەن ادام قۇتقارعانداردى ماراپاتتاۋ جيىنىن اشىپ، شاندۇڭ ەڭبەكشىلەر كاسىپتىك – تەحنيكالىق شۋەيۋانىندا وقيتىن شينجياڭدىق ءۇش وقۋشى ابدىكەرىم ءادىل، ءابدىسالام ءماتنياز، ءبىلال ءابدۋاليدىڭ ەرلىك كورسەتكەنىن ماراپاتتاپ، ولارعا ەرلىكپەن ادام قۇتقارعانىن تۇراقتاندىرۋ كۋالىگى مەن سيلىق قاراجات تاراتتى.

ءىستىڭ ءمان – جايى

بيىل 3 – ايدىڭ 5 – كۇنى تۇستەن كەيىن، شاندۇڭ ەڭبەكشىلەر كاسىپتىك – تەحنيكالىق شۋەيۋانىنىڭ اۆتوموبيل جوندەۋ كاسىبىنىڭ 2024 – جىلدىق كلاسىنداعى ابدىكەرىم ءادىل، ءابدىسالام ءماتنياز، ءبىلال ءابدۋالي ۇشەۋى جينان قالاسىنداعى حالىقارالىق باۋ – باقشا كورمەسى باقشاسىندا سەيىلدەپ جۇرگەندە، قىزىمەن بىرگە ورتاق پايدالاناتىن ەلەكترلى ۆەلوسيپەتكە ءمىنىپ كەلە جاتقان ءبىر ايەلدىڭ ۇلكەن تاسقا سوعىلىپ، سوڭىنان ۆەلوسيپەت ءبىر جاعىنا قاراي جىعىلىپ، ەكەۋى بىردەي سۋعا قۇلاپ ءتۇسىپ كەتكەنىن ءارى سۋ ىشىندە جانتالاسىپ، قۇتقارىڭدار دەپ ايعايلاپ جاتقانىن، جاعدايدىڭ ەرەكشە قاتەرلى ەكەنىن كورەدى.

ول كەزدە كوكتەمنىڭ سۋىعى سۇيەكتەن وتەتىن، كولدىڭ سۋى مۇزداي سۋىق بولاتىن. ابدىكەرىم شاپانىن شەشە سالىپ، سۋعا سەكىرەدى. ول بار قايراتىن سالىپ، جانتالاسۋعا دارمەنى قالماعان قىز بالاعا قاراي كۇش سالا جۇزەدى. ءبىر مەتردەي جەردەگى جاعالاۋدا ءبىلال ۇزىن تاياق تاۋىپ، ءابدىسالاممەن بىرگە قىز بالانىڭ اناسىنا قاراي جۇگىرەدى، سۋداعى ايەل تاياقتان مىقتاپ ۇستاعاننان كەيىن، ەكەۋى بەينە ارقان تارتىسقا تۇسكەندەي ءبىر قادام ءبىر قادامنان جىلجىپ، سۋداعى ادامدى جاعالاۋعا جاقىنداتادى.

ەندى ءبىر جاقتان، ابدىكەرىم قىز بالانىڭ جانىنا ءجۇزىپ بارادى. ءبىلال مەن ءابدىسالام قۇتقارۋ دوڭگەلەگىن ونىڭ جانىنا قاراي لاقتىرادى. ابدىكەرىم قۇتقارۋ دوڭگەلەگىنەن پايدالانىپ، قىز بالانى جاعالاۋعا قۇتقارىپ شىعادى. قۇتقارۋ دەر كەزىندە ورىستەتىلگەندىكتەن، سۋعا ءتۇسىپ كەتكەندەر ۇلكەن قاتەرگە جولىقپاعان، الايدا، انالى – بالالى ەكەۋىنىڭ ءۇستى – باسى تۇگەل سۋ بولىپ، ەرىندەرى كوگەرىپ كەتكەن. بۇل جاعدايدى كورگەن ءابدىسالام مەن ءبىلال دەرەۋ سىرت كيىمدەرىن شەشىپ، ولاردىڭ ۇستىنە جابادى.

بىرنەشە كۇننەن كەيىن، ولارعا راقىمەتىن ءبىلدىرۋ ءۇشىن، قۇتقارىلعانداردىڭ وتباسىنداعىلار ارنايى مەكتەپكە كەلىپ، قۇرمەت جالاۋىن ۇسىندى ءارى: ”ولار قاتەرلى كەزدە باستارىن ءباي تىگىپ ادام قۇتقاردى، اجالدان اراشالاعان جاقسىلىقتارىن ۇمىتپايمىز“ دەپ اقشا ۇسىنىپ، العىستارىن بىلدىرمەك بولدى. شينجياڭدىق ءۇش وقۋشى بىردەي سىپايىلىقپەن تويتارىپ: ”ءبىز تەك ىستەۋگە ءتيىستى ءىستى ىستەدىك، كىم بولسا دا وسىلاي ىستەيتىن ەدى“ دەدى.

كۇنلۇن تاۋىنىڭ ەتەگىنەن چيلۋ وڭىرىنە بارعان شينجياڭدىق ءۇش جىگىتتىڭ ەرلىكپەن ادام قۇتقارعان ىزگى ىستەرى ۇلتتاردىڭ ءبىر شاڭىراقتىڭ ادامىنداي تەرەڭ ىنتىماعىن ايگىلەدى. ولاردىڭ ارەكەتى تەك ادام ءومىرىن قورعاۋ بولىپ قالماستان، جاڭا داۋىردەگى ورەندەردىڭ ىرىقتىلىقپەن مىندەت ارقالاۋىنىڭ جاندى بەينەلەنۋى سانالادى.

كەلۋ قاينارى: حالىق تورابى