جۇڭگونىڭ سىرتقى ىستەر مينيسترلىگى ا ق ش جاقتىڭ ءىشىنارا بۇيىمداردان الىناتىن ”بارابار كەدەن باجىسىن“ كەشىرىم ەتكەنى تۋرالى جاۋاپ قايتاردى 

شينحۋا اگەنتتىگىنىڭ 4 – ايدىڭ 13 – كۇنى بەيجيڭنەن بەرگەن حابارى. ساۋدا مينيسترلىگىنىڭ مالىمدەمەشىسىنىڭ 4 – ايدىڭ 13 – كۇنى ايتۋىنشا، ا ق ش ۋاقىتى بويىنشا 4 – ايدىڭ 12 – كۇنى ا ق ش جاق قاتىستى حابارلامانى جاريالاپ، كومپيۋتەر، زەدەلى قول تەلەفون، جارتىلاي وتكىزگىشتى جاساۋ اسپاپتارى، شوعىرلى ەلەكتر تىزبەگى قاتارلى ءىشىنارا بۇيىمداردان الىناتىن ”بارابار كەدەن باجىسىن“ كەشىرىم ەتەتىنىن جاريالاعان، جۇڭگو جاق قازىر قاتىستى شارانىڭ ىقپالىن ساراپتاۋدا.

مالىمدەمەشى بىلاي دەدى: ءبىز بۇعان نازار اۋدارىپ وتىرمىز، بۇل ا ق ش – نىڭ 4 – ايدىڭ 10 – كۇنى ءىشىنارا ساۋدالىق سەرىكتەرىنەن جوعارى سوماداعى ”بارابار كەدەن باجىسىن“ الۋدى ۋاقىتشا توقتاتقاننان بەرى، قاتىستى ساياساتتى ەكىنشى رەت رەتتەۋى. بۇل ا ق ش جاقتىڭ سىڭار جاقتىلى ”بارابار كەدەن باجىسىن الۋ“ سىندى قاتە ارەكەتىن ازداپ تۇزەتۋگە قادام باسقانى دەۋگە بولادى.

مالىمدەمەشى مىنانى اتاپ كورسەتتى: ءبىر پاراق اكىمشىلىك بۇيرىق قاعازىمەن اتالمىش ”بارابار كەدەن باجىسىن“ ورتاعا قويۋ، نەگىزگى ەكونوميكالىق زاڭدىلىق پەن بازار زاڭدىلىعىنا قايشى كەلىپ قالماستان، مەملەكەتتەر ارا ءبىر – ءبىرىن تولىقتايتىن سەلبەستىك پەن قامداۋ – قاجەتسىنۋ قاتىناسىن ەسكەرمەۋ سانالادى. ”بارابار كەدەن باجىسى” 4 – ايدىڭ 2 – كۇنى ورتاعا قويىلعاننان بەرى، ا ق ش – نىڭ وزىندەگى ءارقانداي ماسەلەنى شەشپەگەنىمەن قويماي، حالىقارالىق ساۋدا – ەكونوميكا ءتارتىبىن اۋىر دارەجەدە ءبۇلدىردى، كاسىپورىنداردىڭ قالىپتى وندىرىسىنە، تيجاراتىنا جانە حالىقتىڭ كۇندەلىكتى تۇرمىستاعى تۇتىنۋىنا اۋىر دارەجەدە كەدەرگىلىك جاسادى، ءوزىن دە وزگەنى دە زياندادى.

مالىمدەمەشى مىنانى ءبىلدىردى: جۇڭگو جاقتىڭ جۇڭگو – ا ق ش ساۋدا – ەكونوميكا قارىم – قاتىناسى تۋرالى مايدانى وزگەرمەيدى. ساۋدا شايقاسىندا جەڭىمپاز بولمايدى، قورعانىمپازدىقتىڭ شىعار جولى جوق. جۇڭگودا ”كىم بۇلدىرگەن بولسا، سول ءوزى وڭالتسىن“ دەگەن ناقىل ءسوز بار. ءبىز ا ق ش جاقتى حالىقارالىق قوعام مەن ەل ىشىندەگى ءارقايسى جاقتاردىڭ بايىپتى ۇنىنە قۇلاق اسۋعا، قاتەلىكتى تۇزەتۋدە اناعۇرلىم زور قادام باسۋعا، ”بارابار كەدەن باجىسى“ سىندى قاتە ءتاسىلدى تۇبەگەيلى كۇشىنەن قالدىرۋعا، ءوزارا قۇرمەتتەپ، تەپە - تەڭ تۇرعىدا سويلەسۋ ارقىلى الاۋىزدىقتاردى شەشىم ەتۋ سىندى دۇرىس جولعا تۇسۋگە قۋزايدى.

كەلۋ قاينارى: حالىق تورابى