جاۋ لىجي مەكسيكا قاۋىم پالاتاسىنىڭ باستىعى گۋتەررەسپەن كەڭەس وتكىزدى

شينحۋا اگەنتتىگى، 5 ـ ايدىڭ 19 ـ كۇنى، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 5 ـ ايدىڭ 19 ـ كۇنى حالىق سارايىندا مەكسيكا قاۋىم پالاتاسىنىڭ باستىعى گۋتەررەسپەن كەڭەس وتكىزدى.

جاۋ لىجي مىنالاردى ءبىلدىردى: ءتوراعا شي جينپيڭ جۇڭگو - لاتىن امەريكاسى تالقى مىنبەرىنىڭ 4 - كەزەكتى مينيستر دارەجەلىلەر ءماجىلىسىنىڭ اشىلۋ سالتىندا ماڭىزدى ءسوز سويلەپ، ىنتىماق، دامۋ، وركەنيەت، بەيبىتشىلىك، حالىق تىلەگى سىندى ”5 ءىرى ينجەنەريانىڭ“ باستالاتىندىعىن جاريالاپ، جۇڭگو - لاتىن امەريكاسى تاعدىرلاس ورتاق تۇلعاسى قۇرىلىسىنا ايقىن بەتالىس كورسەتتى. جۇڭگو - مەكسيكا قارىم - قاتىناسى جوعارى دەڭگەيلى اينالىمدى ساقتاپ، ستراتەگيالىق، ءوزارا تولىقتاۋ، ءوزارا پايدا جەتكىزۋ سيپاتى ۇزدىكسىز كۇشەيدى. جۇڭگو جاق مەكسيكا جاقپەن بىرگە ەكى ەل مەملەكەت باسشىلارىنىڭ ماڭىزدى ورتاق تانىمىن ويداعىداي تياناقتاندىرىپ، جۇڭگو ـ لاتىن امەريكاسى تاعدىرلاس ورتاق تۇلعاسى قۇرىلىسىنىڭ ”5 ءىرى ينجەنەرياسىن“ بىرگە ويداعىداي اتقارىپ، جۇڭگو مەن مەكسيكانىڭ جان ـ جاقتى ستراتەگيالىق سەرىكتەستىك قارىم - قاتىناسىنىڭ مازمۇنىن ۇزدىكسىز بايىتىپ، جۇڭگو مەن لاتىن امەريكاسىنىڭ ىنتىماعىن، سەلبەستىگىن، بىرگە گۇلدەنۋىن ىلگەرىلەتۋدى قالايدى.

جاۋ لىجي مىنالاردى ءبىلدىردى: جۇڭگو مەن مەكسيكا ەكى جاق ەل قارىم - قاتىناسىنا ستراتەگيالىق جانە ۇزاق بولاشاقتىق تۇرعىدان مامىلە جاساپ جانە ونى دامىتىپ، ءبىر ـ ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ۇزدىكسىز ءبىرىن ـ ءبىرى ءتۇسىنۋى جانە قولداۋى كەرەك. جۇڭگو جاق مەكسيكا قاۋىم پالاتاسىنىڭ ۇزاق ۋاقىتتان بەرى ءبىر جۇڭگو پرينسيبىن باتىل اتقارعاندىعىن ايرىقشا القايدى. مەكسيكا جاقتىڭ يكەمدى تاسىلمەن ”ءبىر بەلدەۋ، ءبىر جولدى“ بىرگە قۇرۋعا ات سالىسىپ، نەگىزدىك قۇرىلعى قۇرىلىسى سياقتى ءداستۇرلى سالالارداعى سەلبەستىكتى بىرگە تەرەڭدەتىپ، ەلەكترلى اۆتوموبيل، جاڭا ەنەرگيا، اۋىل شارۋاشىلىق ماشينالارى سياقتى جاڭادان گۇلدەنگەن سالالارداعى سەلبەستىكتى كەڭەيتۋىن، گۋمانيتارلىق اۋىس - كۇيىستى كۇشەيتىپ، وقۋ - اعارتۋ، اقىل - پاراسات قويماسى، اقپارات قۇرالدارى سياقتى سالالارداعى سەلبەستىكتى كۇشەيتۋىن قارسى الامىز.

جاۋ لىجي بىلاي دەپ باسا دارىپتەدى: جۇڭگو مەن مەكسيكانىڭ زاڭ شىعارۋ قۇرىلىمدارى ۇزاق ۋاقىتتان بەرى دوسجار بولىپ كەلەدى، ەكى جاق قۇرعان پىكىرلەسۋ تالقى مىنبەرى قازىرگە دەيىن 5 رەت ءماجىلىس وتكىزدى. جۇڭگو مەملەكەتتىك حالىق قۇرىلتايى مەكسيكا فەدەراتسيالىق پارلامەنتىنىڭ ەكى پالاتاسىمەن اۋىس ـ كۇيىستى كۇشەيتىپ، پىكىرلەسۋ تالقى مىنبەرى، دوستىق گرۋپپاسى سياقتى تۇعىرلاردىڭ رولىن ونان ارى ساۋلەلەندىرىپ، زاڭ شىعارۋ قۇرىلىمدارىنىڭ كوپ ساتىلى، كوپ سالالى سەلبەستىگىن تەرەڭدەتىپ، دەموكراتيا، زاڭمەن جونگە سالۋ قۇرىلىسى سياقتى تاجىريبەلەردەن تەڭ يگىلىكتەنىپ، ەكى ەلدىڭ ءوزارا ءتيىمدى سەلبەستىگىن زاڭدىق كەپىلمەن قامداۋدى قالايدى.

جاۋ لىجي جۇڭگونىڭ ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە قاتىستى جاعدايلاردى تانىستىردى. ول مىنالاردى ءبىلدىردى: جۇڭگو مەكسيكا سياقتى لاتىن امەريكاسى جانە كارايب ەلدەرىمەن بىرگە دۇنيە ءجۇزىنىڭ وڭتۇستىگىندەگى ماڭىزدى مۇشەلەر سانالادى، قول ۇستاسا سەلبەسىپ، تار جول، تايعاق كەشۋلەردەن بىرگە ءوتىپ، دەربەس، ءوز ـ وزىنە قوجا بولۋ داڭقتى ءداستۇرىن ساۋلەلەندىرىپ، دامۋ، گۇلدەنۋ ۇقىعىن قورعاپ، حالىقارالىق ادىلدىك پەن ادىلەتتىلىكتى قورعاپ، ناعىز كوپ جاقتىلىقتى امالياتتا ايگىلەۋ كەرەك. جۇڭگو مەملەكەتتىك حالىق قۇرىلتايى مەكسيكا جاقپەن ءار ەل پارلامەنتتەر وداعى سياقتى كوپ جاقتى مەحانيزمدەگى سايكەسۋدى، سەلبەسۋدى جيىلەتىپ، وركەندەپ كەلە جاتقان ەلدەردىڭ زاڭ شىعارۋ قۇرىلىمدارىنىڭ اۋىس ـ كۇيىسىن، سەلبەستىگىن ىلگەرىلەتۋدى قالايدى.

گۋتەررەس مىنالاردى ءبىلدىردى: مەكسيكا مەن جۇڭگو − وركەنيەتتى بايىرعى ەلدەر، ەكى ەل دە حالىق ءۇشىن بيلىك جۇرگىزۋگە تاباندى بولۋدا. مەكسيكا ءبىر جۇڭگو پرينسيبىنە تاباندى بولىپ، ءتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن قولدايدى، جۇڭگو ـ لاتىن امەريكاسى تالقى مىنبەرى ءماجىلىسىنىڭ جەتىستىكتەرىن تياناقتاندىرۋدى بىرگە ىلگەرىلەتىپ، ەكونوميكا، عىلىم ـ تەحنيكا، مادەنيەت، وقۋ ـ اعارتۋ، ساياحات سياقتى سالالارداعى سەلبەستىكتى كۇشەيتۋدى قالايدى. مەكسيكا حالىقارالىق سەلبەستىكتى كۇشەيتۋدى قولدايدى، قامال تۇرعىزبايدى. مەكسيكا قاۋىم پالاتاسى جۇڭگو مەملەكەتتىك حالىق قۇرىلتايىمەن اۋىس ـ كۇيىستى تەرەڭدەتىپ، مەكسيكا ـ جۇڭگو، لاتىن امەريكاسى ـ جۇڭگو قارىم - قاتىناسىنىڭ ىشكەرىلەي دامۋىن جەبەۋدى ءۇمىت ەتەدى.

كەلۋ قاينارى: حالىق تورابى