ورتالىق 215 ميلليون يۋان قارجى قوسىپ، شينجياڭنىڭ جايىلىم مال شارۋاشىلىعىنىڭ تيپىن وزگەرتىپ، دارەجەسىن جوعارىلاتۋىنا دەم بەردى

انار بۇلتى \ شينجياڭ گازەتىنىڭ حابارى. شينجياڭ ۇيعۇر اۆتونوميالى رايوندىق دامۋ جانە رەفورما كوميتەتى تاياۋدا ورتالىقتىڭ مەجە ەسەبىنەن 215 ميلليون يۋان قارجىنى موڭعۇلكۇرە اۋدانىنىڭ، بۋىرشىن اۋدانىنىڭ، تاشقورعان تاجىك اۆتونوميالى اۋدانىنىڭ، حىجيڭ اۋدانىنىڭ، تەكەس اۋدانىنىڭ جايىلىم مال شارۋاشىلىعىنىڭ تيپىن وزگەرتىپ، دارەجەسىن جوعارىلاتۋ نىسانىن اتقارۋىنا قولداۋ كورسەتۋگە ءساتتى قول جەتكىزدى.

ۇعىسۋعا قاراعاندا، بۇل شارانىڭ ماقساتى شينجياڭنىڭ جايىلىم مال شارۋاشىلىعىنىڭ وسىزاماندانۋ دەڭگەيىن جاپپاي جوعارىلاتىپ، ەگىنشى ـ مالشىلاردىڭ كىرىسىن ارتتىرۋدى جەبەۋ.

جايىلىم مال شارۋاشىلىعىنىڭ تيپىن وزگەرتىپ، دارەجەسىن جوعارىلاتۋ نىسانى جوعارى ءونىمدى، ورنىقتى ساپالى جەم – ءشوپ بازاسى، وسىزاماندانعان جايىلىم ەكولوگيالىق مال فەرماسى نەمەسە ولشەمدەنگەن كولەمدى باعىمشىلىق الاڭى، ساپالى اسىل تۇقىمدى مال جانە جەم - ءشوپ تۇقىمىن كوبەيتۋ بازاسى، سونداي ـ اق اپاتتان ساقتانۋ، اپات زيانىن ازايتۋ، جەم – ءشوپ ساقتاۋ، تاسۋ جۇيەسى قاتارلى نەگىزدىك قۇرىلعىلار قۇرىلىسىن كەمەلدەندىرۋگە ءتۇيىندى تۇردە قولداۋ كورسەتەدى. نىسان سالىنىپ بولعاننان كەيىن، جايىلىم مال شارۋاشىلىعى قۇرىلىمىن ءونىمدى ساپالىلاندىرىپ، ءوندىرىس ونىمدىلىگى مەن ءونىم ساپاسىن جوعارىلاتىپ، ءداستۇرلى مال شارۋاشىلىعىنىڭ وسىزاماندانۋعا، كولەمدەنۋگە، جاسىلدانۋعا قاراي بۇرىلىس جاساۋىن جەبەيدى.

شينجياڭ ۇيعۇر اۆتونوميالى رايوندىق دامۋ جانە رەفورما كوميتەتى مەملەكەتتىڭ تالابىنا قاتاڭ بويسۇنىپ، كەلەلى نىساندار قامباسىن ورنالاستىرۋ قىزمەتىن ويداعىداي ىستەپ، جوعارىداعى 5 اۋداننىڭ نىسانداردىڭ اتقارىلۋىن جەدەلدەتۋىنە قۋزاۋشىلىق جانە جەتەكشىلىك ەتىپ، نىسانداردىڭ ەرتەرەك اياقتاۋىنا كەپىلدىك ەتىپ، ورتالىقتىڭ قارجى قوسۋ ونىمدىلىگىن ەرتەرەك ساۋلەلەندىرەدى. سونىمەن بىرگە، قاتىستى تاراۋلارمەن بىرگە جەر - جەردىڭ نىسانداردى جوبالاۋدى بەلسەنە ورىستەتۋىنە جەتەكشىلىك ەتىپ، ”15 – بەسجىلدىق“ جايىلىم مال شارۋاشىلىعىنىڭ تيپىن وزگەرتىپ، دارەجەسىن جوعارىلاتۋ نىسانىنىڭ الدىڭعى مەرزىمدىك قىزمەتىن تىڭعىلىقتى ىستەپ، نىسان زاپاسىنىڭ ساپاسىن كۇش سالا جوعارىلاتىپ، مەملەكەتتىڭ قولداۋىنا ۇزدىكسىز قول جەتكىزۋگە نەگىز قالايدى.

كەلۋ قاينارى: حالىق تورابى