شي جينپيڭ شەتەلدىڭ جۇڭگودا تۇرۋعا جاڭادان تاعايىندالعان باس ەلشىلەرىنىڭ مەملەكەت جولداماسىن قابىلدادى

7 - ايدىڭ 25 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگودا تۇراتىن 16 باس ەلشىنىڭ مەملەكەت جولداماسىن قابىلدادى. سۋرەتتە: سالت اياقتاعاننان كەيىن شي جينپيڭ بەيجيڭ زالىندا ەلشىلەرگە ءسوز سويلەۋدە.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگى، 7 - ايدىڭ 25 - كۇنى، بەيجيڭن (تىلشىلەر شاۋ ي - بو، ساۋ جيايۋە). مەملەكەت ءتوراعاسى شي جينپيڭ 7 - ايدىڭ 25 - كۇنى تۇستەن بۇرىن بەيجيڭدەگى حالىق سارايىندا جۇڭگودا تۇراتىن 16 باس ەلشىنىڭ مەملەكەت جولداماسىن قابىلدادى.

حالىق سارايىنىڭ سولتۇستىك قاقپاسىنىڭ سىرتىندا قۇرمەت قاراۋىلى سالتاناتپەن ساپ تۇزەپ، قوناقتاردى قارسى الۋ دابىلى قاعىلدى. ەلشىلەر ارت - ارتىنان كەلىپ، تۋ شەبىنەن ءوتىپ، اق ءمارمار تاستان جاسالعان باسپالداقتى بويلاپ جوعارى كوتەرىلدى.

«وتان وسىنشاما كوركەم» اتتى الىپ قابىرعا سۋرەت الدىندا شي جينپيڭ ەلشىلەردىڭ مەملەكەت جولداماسىن جەكە - جەكە قابىلدادى ءارى ولارمەن ءبىر - بىرلەپ سۋرەتكە ءتۇستى.

ولار مىنالار: ۆيەتنامنىڭ جۇڭگودا تۇراتىن باس ەلشىسى فان چيڭپيڭ، پانامانىڭ جۇڭگودا تۇراتىن باس ەلشىسى لەي ميڭ، دومينيكانىڭ جۇڭگودا تۇراتىن باس ەلشىسى گومىز، البانيانىڭ جۇڭگودا تۇراتىن باس ەلشىسى بودا، جاڭا زەلانديانىڭ جۇڭگودا تۇراتىن باس ەلشىسى چياۋ ۋىنبو، پاپۋا - جاڭا گۆينەياسىنىڭ جۇڭگودا تۇراتىن باس ەلشىسى كامباني، انگولانىڭ جۇڭگودا تۇراتىن باس ەلشىسى اللىن، ەگيپەتتىڭ جۇڭگودا تۇراتىن باس ەلشىسى نازمى، نيكاراگۋانىڭ جۇڭگودا تۇراتىن باس ەلشىسى كۇڭ لىران، يراننىڭ جۇڭگودا تۇراتىن باس ەلشىسى فازلى، چيليدىڭ جۇڭگودا تۇراتىن باس ەلشىسى ارييالان، ۋكراينانىڭ جۇڭگودا تۇراتىن باس ەلشىسى نەچيتايلو، بەنيننىڭ جۇڭگودا تۇراتىن باس ەلشىسى اجابا، امەريكانىڭ جۇڭگودا تۇراتىن باس ەلشىسى پاڭ دىۋي، يزرايلدىڭ جۇڭگودا تۇراتىن باس ەلشىسى بي يىلي، وڭتۇستىك سۋداننىڭ جۇڭگودا تۇراتىن باس ەلشىسى موريس. شي جينپيڭ تاعى شاڭحاي سەلبەستىك ۇيىمىنىڭ باس حاتشىسى ەرمەكبايەۆتى قابىلدادى.

سالت اياقتاعاننان كەيىن شي جينپيڭ بەيجيڭ زالىندا ەلشىلەرگە ءسوز سويلەدى.

شي جينپيڭ ەلشىلەردىڭ جۇڭگوعا كەلىپ جاڭا مىندەت اتقارۋىن قارسى الىپ، ولارعا ءوز ەلدەرىنىڭ باسشىلارىنا جانە حالقىنا ىزگى تىلەگىن جەتكىزۋدى تاپسىردى، ەلشىلەردىڭ جۇڭگونى جان - جاقتى، ىشكەرىلەي ءتۇسىنىپ، جۇڭگونىڭ ءار ەلمەن دوستىعىن تەرەڭدەتۋگە، جۇڭگونىڭ دۇنيە جۇزىمەن بارىس - كەلىسىن نىعايتۋعا بەلسەندى ۇلەس قوسۋىن ءۇمىت ەتتى.

شي جينپيڭ بىلاي دەپ اتاپ كورسەتتى: جۇڭگو دۇنيە جۇزىندەگى ءار ەل حالقىمەن بولعان دوستىق سۇيىسپەنشىلىكتى باستان - اياق قاستەرلەيدى، ءوزارا قۇرمەت ەتۋ، تەڭ تۇرعىدا مامىلە جاساۋ، ءوزارا پايدا جەتكىزىپ، تەڭ يگىلىككە كەنەلۋ نەگىزىندە ءار ەلمەن جان - جاقتى سەلبەستىك ورىستەتىپ، ءار سالاداعى اۋىس - كۇيىستى كۇشەيتۋدى قالايدى. قازىر جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋدە، ەكونوميكا ۇزدىكسىز ورنىقتىلىق بارىسىندا جاقسارۋدا. جۇڭگو جوعارى دەڭگەيدەگى سىرتقا ەسىك اشۋدى تاباندىلىقپەن كەڭەيتىپ، ەرەن كولەمدى بازاردىڭ پايداسىن جارىققا شىعارىپ، جۇڭگونىڭ جاڭا دامۋىن ءار ەلدىڭ جاڭا ورايىنا اينالدىرىپ، دۇنيە ءجۇزى ەكونوميكاسىنىڭ ارتۋىنا اناعۇرلىم كوپ تۇراقتىلىق قوسادى.

شي جينپيڭ بىلاي دەپ باسا دارىپتەدى: جەدەل قۇبىلعان دۇنيە جۇزىندەگى 100 جىلدىق وزگەرىس جاعدايى مەن بىلىقپالىق توعىسقان حالىقارالىق جاعداي الدىندا، ءار ەل بۇرىنعى ءارقانداي كەزدەگىدەن دە ىنتىماقتى، سەلبەستىكتى اناعۇرلىم قاجەت ەتىپ وتىر، دارقان پەيىل ارقىلى كىربەڭدىك پەن قاقتىعىستان اتتاپ ءوتىپ، ادامزاتتىڭ تاعدىرىنا كەڭ پەيىلمەن قامقور بولۋى كەرەك. بيىل _ جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە ءجۇزىنىڭ فاشيزمگە قارسى سوعىسى جەڭىسكە جەتكەندىگىنىڭ 80 جىلدىعى، سونداي - اق بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. جۇڭگو ءار ەلمەن بىرگە بىرلەسكەن مەملەكەتتەر ۇيىمىن ۇيىتقى ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ءتارتىپتى باتىل قورعاپ، دوستىق سەلبەستىكتىڭ امالياتتا ايگىلەۋشىسى، وركەنيەتتىڭ ءوزارا ۇلگى الۋىنىڭ ىلگەرىلەتۋشىسى، ادامزاتتىڭ تاعدىرلاس ورتاق تۇلعاسىن قۇرۋشى بولىپ، وسى پلانەتانىڭ اناعۇرلىم كوركەم بولاشاعىن قول ۇستاسا اشۋدى قالايدى.

ۋاڭ ي جوعارىداعى قيمىلعا قاتىناستى.

كەلۋ قاينارى: حالىق تورابى