شي جينپيڭ دومينيكانىڭ زۇڭتۇڭى بەرتونمەن كەزدەستى

10 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا دۇنيە جۇزىلىك ايەلدەر باسشىلار ماجىلىسىنە قاتىناسۋ ءۇشىن جۇڭگوعا كەلگەن دومينيكانىڭ زۇڭتۇڭى بەرتونمەن كەزدەستى.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

«حالىق گازەتى»، 10 - ايدىڭ 14 - كۇنى، بەيجيڭ (تىلشىلەر شيڭ شۋە، گۇڭ حان). 10 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا دۇنيە جۇزىلىك ايەلدەر باسشىلار ماجىلىسىنە قاتىناسۋ ءۇشىن جۇڭگوعا كەلگەن دومينيكانىڭ زۇڭتۇڭى بەرتونمەن كەزدەستى.

شي جينپيڭ بىلاي دەپ اتاپ كورسەتتى: دومينيكا − جۇڭگونىڭ كارايب وڭىرىندەگى جاقسى دوسى، جاقسى سەرىگى. ديپلوماتيالىق قارىم - قاتىناس ورناتقان 20 نەشە جىلدان بەرى ەكى ەل باستان - اياق ءوزارا قۇرمەت ەتىپ، تەڭ تۇرعىدا مامىلە جاساپ، ساياسي ءوزارا سەنىمدىلىكتى ۇزدىكسىز بەكەمدەپ، ءار سالاداعى اۋىس - كۇيىس پەن سەلبەستىكتى قارىشتاپ ورىستەتىپ، حالىقتىڭ دوستىعىن كۇن سايىن تەرەڭدەتىپ، تۇرلىشە قوعامدىق ءتۇزىم، تۇرلىشە ۇلكەندى - كىشىلى ەلدەر اراسىنداعى دوستىق سەلبەستىكتىڭ ۇلگىسىن ورناتتى. جۇڭگو جاق دومينيكا جاقپەن بىرگە ەكى ەل قارىم - قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايدى.

شي جينپيڭ بىلاي دەپ باسا دارىپتەدى: جۇڭگو مەن دومينيكا ەكى جاق ساياسي سەنىمدىلىكتى بەكەمدەپ، ەل باسقارۋ تاجىريبەلەرىن اۋىستىرۋدى كۇشەيتىپ، ۇكىمەت، زاڭ شىعارۋ قۇرىلىمدارى، ساياسي پارتيالار اراسىنداعى بارىس - كەلىستى جيىلەتۋى كەرەك. ناقتى سەلبەستىكتى تەرەڭدەتۋ كەرەك، جۇڭگو جاق دومينيكا جاقتىڭ كليمات وزگەرىسىنە توتەپ بەرۋ جانە اپاتتان ساقتانۋ، اپات زيانىن ازايتۋ قابىلەتىن جوعارىلاتۋىن ۇزدىكسىز قولداپ، نەگىزدىك قۇرىلعى، تازا ەنەرگيا، ەمدەۋ - دەنساۋلىق ساقتاۋ، اۋىل شارۋاشىلىعى، ايەلدەر ۇقىعى سياقتى سەلبەستىكتەردى كۇشەيتىپ، مادەنيەت، وقۋ - اعارتۋ، ساياحات سياقتى گۋمانيتارلىق اۋىس - كۇيىستى جيىلەتۋدى قالايدى. كوپ جاقتى سەلبەستىكتى كۇشەيتىپ، 4 ۇلكەن دۇنيە جۇزىلىك دارىپتەمەنى بىرگە امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ كەرەك. دۇنيە جۇزىلىك ايەلدەر باسشىلار ءماجىلىسىنىڭ ورتاق تانىمىن تياناقتاندىرىپ، ايەلدەردىڭ قابىلەت قۇرىلىسى سەلبەستىگىن تەرەڭدەتۋ كەرەك.

بەرتون مىنالاردى ءبىلدىردى: جۇڭگو − دومينيكانىڭ ۇلى دوسى جانە توتەنشە قاستەرلەيتىن سەرىگى، جۇڭگو جاقتىڭ قاستەرلى قولداۋى مەن شىنايى دوستىعىنا العىس ايتامىن. دومينيكا مەن جۇڭگونىڭ ورتاق ۇستانىمى مەن تالپىنىسى بار، دومينيكا - جۇڭگو قارىم - قاتىناسىن تەرەڭدەتۋ دومينيكا حالقىنا نۇرلى بولاشاق جاراتادى. دومينيكا جاق ءبىر جۇڭگو پرينسيبىن باتىل قولدايدى، جۇڭگومەن ەكونوميكا - ساۋدا، اۋىل شارۋاشىلىعى، جاسىل ەكونوميكا، جاڭا ەنەرگيا، دەنساۋلىق ساقتاۋ، كليمات وزگەرىسىنە توتەپ بەرۋ سياقتى سالالارداعى سەلبەستىكتى تەرەڭدەتىپ، گۋمانيتارلىق اۋىس ـ كۇيىستى جيىلەتىپ، لاتىن امەريكاسى مەن جۇڭگونىڭ سەلبەستىگىن ىلگەرىلەتىپ، ەكى ەل قارىم - قاتىناسىنىڭ تىڭ داستانىن ۇزدىكسىز جازۋدى قالايدى. جۇڭگو قازىرگى دۇنيە جۇزىندەگى ماڭىزدى بەيبىتشىلىك، ورنىقتىلىق كۇشى رەتىندە، ادامزاتتىڭ تاعدىرلاس ورتاق تۇلعاسىن قۇرۋ بولاشاعىن العا قويىپ، دامۋ ورايىنان دۇنيە جۇزىمەن بىرگە يگىلىكتەنىپ، دۇنيە ءجۇزىنىڭ وڭتۇستىگىنىڭ ىنتىماعىن جەبەپ، ءار ەلدەگى جۇرتشىلىقتىڭ جۇرەگىن جەلپىندىردى، بۇل − دۇنيە ءجۇزى ءۇمىتىنىڭ مايەگى. ءتوراعا شي جينپيڭ دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن، دۇنيە جۇزىلىك جونگە سالۋ باستاماسىن العا قويىپ، ءار ەلدىڭ بەيبىت قاتار تۇرۋىن، بىرگە گۇلدەنۋىن جۇزەگە اسىرۋىنا ايقىن باعدار كورسەتتى. دومينيكا جاق جۇڭگو جاقپەن تىعىز سەلبەسىپ، سىڭار جاقتىلىققا، زورەكەرلىككە قارسى تۇرىپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى