شي جينپيڭ يسلانديانىڭ زۇڭتۇڭى توماسدوتيرمەن كەزدەستى

10 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا دۇنيە جۇزىلىك ايەلدەر باسشىلار ماجىلىسىنە قاتىناسۋ ءۇشىن جۇڭگوعا كەلگەن يسلانديانىڭ زۇڭتۇڭى توماسدوتيرمەن كەزدەستى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

«حالىق گازەتى»، 10 - ايدىڭ 14 - كۇنى، بەيجيڭ. 10 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا دۇنيە جۇزىلىك ايەلدەر باسشىلار ماجىلىسىنە قاتىناسۋ ءۇشىن جۇڭگوعا كەلگەن يسلانديانىڭ زۇڭتۇڭى توماسدوتيرمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن يسلانديا ديپلوماتيالىق قارىم - قاتىناس ورناتقان 54 جىلدان بەرى ءوزارا قۇرمەت ەتۋگە، ءوزارا پايدا جەتكىزىپ سەلبەسۋگە تاباندى بولدى، ەكى ەل قارىم - قاتىناسىندا قول جەتكەن سۇبەلى تابىستار تۇرلىشە مەملەكەت جاعدايىنداعى ەلدەردىڭ قوعامدىق ءتۇزىم سياقتى پارىقتاردان اتتاپ ءوتىپ، ءوزارا پايدا جەتكىزىپ، تەڭ يگىلىككە كەنەلەتىندىگىن تولىق دالەلدەدى. جۇڭگو يسىلانديامەن قارىم - قاتىناستى دامىتۋعا باسا ءمان بەرەدى، يسىلانديا جاقپەن اۋىس - كۇيىستى كۇشەيتىپ، سەلبەستىكتى تەرەڭدەتىپ، ەكى ەل حالىقىنا ءتىپتى دە كوپ ىرىس - قۇت جاراتۋدى قالايدى.

شي جينپيڭ بىلاي دەپ باسا دارىپتەدى: جۇڭگو مەن يسلانديا ەكى جاق وزدەرىنىڭ تاڭداعان دامۋ جولىنا ۇزدىكسىز قۇرمەت ەتىپ جانە ونى قولداپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى باتىل قولداۋى كەرەك. ەكونوميكا - ساۋدا، جەر جىلۋى، ەمدەۋ، سالاماتتىق سياقتى سالالارداعى ناقتى سەلبەستىكتى تەرەڭدەتىپ، جاسىل تيپكە بۇرىلىس جاساۋدى، كليمات وزگەرىسىنە توتەپ بەرۋدى بىرگە ىلگەرىلەتۋ كەرەك. ساياحات، وقۋ - اعارتۋ سياقتى جاقتارداعى گۋمانيتارلىق اۋىس - كۇيىستى كۇشەيتىپ، ەكى ەل حالقىنىڭ دوستىعى مەن ءوزارا ءتۇسىنىسۋىن كۇشەيتۋ كەرەك. جۇڭگو مەن يسلانديا دا كوپ جاقتىلىقتى قولدايدى، بىرلەسكەن مەملەكەتتەر ۇيىمىن ۇيىتقى ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ءتارتىپتى قولدايدى، ەكى جاق تىعىز بايلانىس جاساپ جانە سايكەسىپ، حالىقارالىق تالاس - تارتىستى پىكىرلەسۋ، كەڭەسۋ ارقىلى شەشۋگە بىرگە كۇش سالىپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتۋدى ىلگەرىلەتۋى كەرەك. دۇنيە جۇزىلىك ايەلدەر باسشىلار ءماجىلىسىنىڭ ءساتتى اشىلۋىن وراي ەتىپ، دۇنيە جۇزىلىك ايەلدەر ىستەرىنىڭ ۇزدىكسىز دامۋىن جەبەۋ كەرەك.

توماسدوتير مىنالاردى ءبىلدىردى: جۇڭگونىڭ دۇنيە جۇزىلىك ايەلدەر باسشىلار ءماجىلىسىن ءساتتى وتكىزگەندىگىن قۇتتىقتايمىن، جۇڭگو جاقتىڭ ىستىق ىقىلاسپەن كۇتىپ الىپ، يسلانديا سياقتى شاعىن ەلگە تولىق قۇرمەت ەتكەندىگىنە العىس ايتامىن. يسىلانديا جۇڭگونىڭ دۇنيە جۇزىلىك ايەلدەر ىستەرىن ىلگەرىلەتۋ ءۇشىن قوسقان ماڭىزدى ۇلەسىن جوعارى باعالايدى، جۇڭگو جاقپەن سەلبەستىكتى كۇشەيتىپ، دۇنيە ءجۇزى ايەلدەرىنىڭ جاپپاي دامۋىن ىلگەرىلەتۋدى قالايدى. يسلانديا مەن جۇڭگو ۇزاق ۋاقىتتان بەرى دوسجار بولىپ كەلەدى، ەكى جاقتى قارىم - قاتىناس پارمەندى بولۋدا، ساۋدا، جەر جىلۋى، ساياحات سياقتى سالالارداعى سەلبەستىكتە سۇبەلى تابىستارعا قول جەتكىزىلدى. يسلانديا جاق يسلانديا - جۇڭگو قارىم - قاتىناسىنا ايرىقشا ءمان بەرەدى، جۇڭگو جاقپەن سەلبەستىك ءورىسىن ۇزدىكسىز كەڭەيتىپ، گۋمانيتارلىق اۋىس - كۇيىستى جيىلەتىپ، ەكى ەل قارىم - قاتىناسىنىڭ اناعۇرلىم زور دامۋىن ىلگەرىلەتۋدى قالايدى. اۋمالى - توكپەلى دۇنيە ءجۇزى الدىندا جۇڭگو جاق دۇنيە جۇزىلىك سىن - سايىسقا توتەپ بەرۋدەگى باسشىلىق قابىلەتىن ايگىلەدى، يسلانديا جاق جۇڭگو جاقپەن قارىم - قاتىناس پەن سايكەسۋدى كۇشەيتىپ، دۇنيە جۇزىلىك سىن - سايىسقا بىرگە توتەپ بەرۋدى قالايدى.

ەكى جاق «جۇڭحۋا حالىق رەسپۋبليكاسى مەن يسلانديانىڭ جەر جىلۋى مەن جاسىل تيپكە بۇرىلىس جاساۋ سەلبەستىگىن ونان ارى كۇشەيتۋ جونىندەگى بىرلەسكەن مالىمدەمەسىن» جاريالادى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى