«شي جينپيڭ ەل باسقارۋ جونىندە» كىتابىنا بايلانىستى جۇڭگو - كەنيا وقىرماندارى جينالىسى نايروبيدا وتكىزىلدى

«حالىق گازەتى»، 12 - ايدىڭ 1 - كۇنى، نايروبي (ءتىلشى حۋاڭ ۋەيشين). سول جەر ۋاقىتى 12 - ايدىڭ 1 - كۇنى جۇڭگو مەملەكەتتىك كەڭەسىنىڭ اقپارات كەڭسەسى، جۇڭگو شەتەل تىلدەرى مەكەمەسى، جۇڭگونىڭ كەنيادا تۇراتىن باس ەلشىحاناسى بىرلەسىپ ۇيىمداستىرعان «شي جينپيڭ ەل باسقارۋ جونىندە» كىتابىنا بايلانىستى جۇڭگو - كەنيا وقىرماندارى جينالىسى كەنيانىڭ استاناسى نايروبيدا وتكىزىلدى. جۇڭگو مەن كەنيانىڭ ءار سالا قايراتكەرلەرىنەن 200 دەي ادام قيمىلعا قاتىناستى.

قيمىلعا قاتىناسقان جۇڭگولىق، شەتەلدىك سيلى قوناقتار مىنالاردى ءبىلدىردى: «شي جينپيڭ ەل باسقارۋ جونىندە» اتتى كىتاپتىڭ 5 - تومى الدىڭعى ءتورت توممەن ءوزارا توعىسىپ، تامىرلاس بولىپ، شي جينپيڭ جاڭا ءداۋىر جۇڭگوشا سوتسياليزم يدەياسىنىڭ باستى مازمۇنى مەن عىلمي جۇيەسىن شوعىرلى بەينەلەدى. «شي جينپيڭ ەل باسقارۋ جونىندە» اتتى جەلىلەس كىتاپتار حالىقارالىق قوعامنىڭ جۇڭگو ۇلگىسىندەگى وسىزامانداندىرۋدىڭ امالياتتىق جەتىستىكتەرى مەن دۇنيە جۇزىلىك ءمانىن اناعۇرلىم ىشكەرىلەي تۇسىنۋىنە سەپتىگىن تيگىزەدى، جۇڭگو مەن كەنيانىڭ، جۇڭگو مەن افريكانىڭ ەل باسقارۋ تاجىريبەلەرىن اۋىستىرۋدى ىشكەرىلەي ورىستەتىپ، دۇنيە ءجۇزىنىڭ وڭتۇستىگىن دامىتۋ ورتاق تانىمىن ۇيىستىرىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدا ماڭىزدى مانگە يە.

كەنيا بىرلەسكەن دەموكراتيالىق وداعىنىڭ باس شۋجيى ومار مىنالاردى ءبىلدىردى: ءتوراعا شي جينپيڭنىڭ جەتەكشىلىگىندە، جۇڭگو دۇنيە ءجۇزىن جالت قاراتقان دامۋ جەتىستىكتەرىنە قول جەتكىزدى، ەكونوميكاسى مەن قوعامى جەدەل دامىپ، حالىقتىڭ تۇرمىس ورەسى جوعارىلادى. «شي جينپيڭ ەل باسقارۋ جونىندە» اتتى كىتاپ لەكسيادان ۇزىندىلەر عانا ەمەس، ونان دا ماڭىزدىسى، ءبىلىم جۇلگەسى، فيلوسوفيالىق ۇستانىم، كىتاپتاعى ەكونوميكا، كەدەيلىكتى ازايتۋ، عىلىم - تەحنيكا جانە حاۋىپسىزدىك سياقتى سالالارعا ساياتىن ماڭىزدى بايىمداۋلار كەنيا سىن - سايىستقا ءدوپ كەلگەن كەزدە يدەيالىق جەتەكشىلىك ازىرلەدى. كەنيا جۇڭگومەن وسىزامانداندىرۋ دامۋ تاجىريبەلەرىن اۋىستىرۋدى ونان ارى كۇشەيتىپ، بىرگە گۇلدەنۋدى جەبەپ، ەكى ەل حالقىنا ءتىپتى دە زور باقىت جاراتۋدى قالايدى.

ورتالىق ۇگىت ءبولىمى باستىعىنىڭ ورىنباسارى، مەملەكەتتىك كەڭەس اقپارات كەڭسەسىنىڭ مەڭگەرۋشىسى مو گاۋ - ي ارناۋ سوزىندە بىلاي دەدى: «شي جينپيڭ ەل باسقارۋ جونىندە» − ماركسيزمنىڭ جۇڭگوشالانۋىنىڭ ەڭ جاڭا جەتىستىگى، ول شي جينپيڭ جاڭا ءداۋىر جۇڭگوشا سوتسياليزم يدەياسىنىڭ باستى مازمۇنى مەن عىلمي جۇيەسىن شوعىرلى بەينەلەپ، جۇڭگو ۇلگىسىندەگى وسىزامانداندىرۋ جولىنىڭ تاريحي جەتىستىكتەرىن، دامۋ جولىن جانە ونىڭ نەگىزگى ەرەكشەلىگىن جۇيەلى بەينەلەدى، دۇنيە جۇزىندەگى وڭتۇستىك ەلدەردىڭ وسىزاماندانۋعا بىرگە بەت الۋىنا ۇلگى الۋعا بولاتىن جۇڭگو اقىل - پاراساتى مەن جۇڭگو جوباسىن ازىرلەدى. جۇڭگو مەن كەنيا ديپلوماتيالىق قارىم - قاتىناس ورناتۋدىڭ 62 جىلدىعىن قارسى الادى، كەلگەن جولىمىزعا قايىرىلا قاراساق، ەكى ەل باستان - اياق تىزە قوسا سەلبەسىپ، قول ۇستاسا دامىپ، ساياسي جاقتا ءبىر - بىرىنە سەنەتىن جاقسى دوسقا، ەكونوميكالىق جاقتا سەلبەسىپ تەڭ يگىلىككە كەنەلەتىن جاقسى سەرىككە اينالدى. جۇڭگو كەنيانى قامتىعان افريكا ەلدەرىمەن ىنتىماقتى، سەلبەستىكتى كۇشەيتىپ، 4 ۇلكەن دۇنيە جۇزىلىك باستامانى بىرگە امالياتتا ايگىلەپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، وسىزامانداندىرۋدى قول ۇستاسا ىلگەرىلەتۋدەگى 10 ءىرى سەرىكتەستىك ارەكەتىن تياناقتاندىرىپ، جۇڭگو ۇلگىسىندەگى وسىزامانداندىرۋدىڭ جاڭا دامۋى ارقىلى افريكاعا اناعۇرلىم كوپ جاڭا وراي ازىرلەپ، جاڭا داۋىردەگى جۇڭگو - افريكا تاعدىرلاس ورتاق تۇلعاسىنىڭ بارلىق جاعدايدا بىردەي جاڭا تاراۋىن بىرگە جازۋدى قالايدى.

كەنيا ينفورماتسيا، حابارلاسۋ جانە سيفرلى ەكونوميكا مينيسترلىگىنىڭ مينيسترى ۋيلليام كابوگو كيتاۋ مىنالاردى ءبىلدىردى: جۇڭگو وسىزامانداندىرۋدى ىلگەرىلەتۋ بارىسىندا دۇنيە ءجۇزى وركەنيەتىنىڭ اياق الىسىن جەبەدى، جۇڭگو قول جەتكىزگەن ءتۇرلى تابىستار مەن جونگە سالۋ ۇستانىمى كەنيانىڭ رەفورما نىساناسىمەن بىردەي. «شي جينپيڭ ەل باسقارۋ جونىندە» اتتى جەلىلەس كىتاپتاردىڭ مازمۇنى ناقتى دا باي، كىتاپتا قامتىلعان دامۋ ۇستانىمى كەنيانىڭ وسىزاماندانۋ جولىن قاراستىرۋىنا ماڭىزدى پايدالانۋ ماتەريالىن ازىرلەدى. ەڭ جاڭا باسپادان شىعىپ تاراتىلعان «شي جينپيڭ ەل باسقارۋ جونىندە» اتتى كىتاپتىڭ 5 - تومى كەنياداعى ءار سالا وقىرماندارىنىڭ وسى زامانعى جۇڭگونىڭ دامۋ تامىرىن سەزىنىپ، جۇڭگو مەن كەنيا اراسىنداعى ءوزارا ءتۇسىنىسۋدى كۇشەيتۋىنە سەپتىگىن تيگىزەدى.

قيمىل بارىسىندا جۇڭگو جاق شەتەلدىك سيلى قوناقتارعا «شي جينپيڭ ەل باسقارۋ جونىندە» كىتابىنىڭ 5 - تومىنىڭ اعىلشىنشا باسىلىمىن ۇسىندى. ماجىلىسكە قاتىناسقان مامان - وقىمىستىلار جۇڭگو مەن كەنيانىڭ ەل باسقارۋ تاجىريبەلەرى، ”ءبىر بەلدەۋ، ءبىر جولدى“ بىرگە قۇرۋ، جۇڭگو - افريكا سەلبەستىگى، كەدەيلىكتى جويۋ، گۋمانيتارلىق اۋىس - كۇيىس، ءوزارا ۇلگى الۋ سياقتى كەڭەستىك تاقىرىپتار توڭىرەگىندە پىكىر اۋىستىرىپ، تالقى ورىستەتتى.

كەلۋ قاينارى: حالىق تورابى