مادۋرو تۇڭعىش رەت سوتقا شىقتى: مەن بارىمتالاندىم! قىلمىسسىزبىن!

ا ق ش جاق زورلىقپەن مەڭگەرۋگە العان ۆەنەسۋەلانىڭ زۇڭتۇڭى مادۋرو مەن ونىڭ ايەلى 1 – ايدىڭ 5 – كۇنى تۇستە ا ق ش – نىڭ نيۋ – يورك قالاسىنىڭ وڭتۇستىك رايونىنداعى فەدەراتسيالىق وڭىرلىك سوتتا تۇڭعىش رەت سوتقا شىعىپ، ا ق ش جاقتىڭ اتالمىش ”قىلمىستى“ دەگەن ايىپتاۋىنا تويتارىس جاسادى.

ا ق ش بىرلەسكەن اگەنتتىگىنىڭ حابارلاۋىنشا، مادۋرو مەن ونىڭ ايەلى سوتقا بىرگە اكەلىنگەن، ەكەۋى قۇلاقتارىنا تىڭداعىش تاعىپ، يسپان تىلىندە اۋدارماشى ارقىلى سويلەسكەن.

مادۋرو سوتتا يسپان تىلىندە بىلاي دەپ باياندادى: ”مەن بۇل جەرگە بارىمتالانىپ اكەلىندىم“، ”قىلمىسسىزبىن. تاعىلعان قىلمىستى مويىندامايمىن“. مادۋرو ءوزىنىڭ ءالى دە ۆەنەسۋەلانىڭ زۇڭتۇڭى ەكەنىن باسا دارىپتەدى.

مادۋرونىڭ ايەلى سيليا فلورەس تە ا ق ش جاقتىڭ ايىپتاۋىنا قارسى ءوزىنىڭ قىلمىسسىز ەكەنىن ءبىلدىردى. ونىڭ ۋاكىل ادۆوكاتىنىڭ سوتتا ايتۋىنشا، فلورەس ا ق ش ارمياسىنىڭ شابۋىلى بارىسىندا جارالانعان.

سوتشى مادۋرودان 3 – ايدىڭ 17 – كۇنى تاعى دا سوتقا كەلىپ، كۋاگەرلەردىڭ ءسوزىن تىڭداۋدى تالاپ ەتكەن.

سوت مەكەمەسىنىڭ سىرتىندا قارسىلىق بىلدىرۋشىلەر شوعىرلانىپ، مادۋرونى بوساتۋدى تالاپ ەتىپ، ا ق ش – نىڭ ۆەنەسۋەلاعا قارۋلى كۇشپەن كيلىككەنىنە قارسىلىق بىلدىرگەن.

ا ق ش 1 – ايدىڭ 3 – كۇنى تاڭ سارىدە ۆەنەسۋەلاعا كەڭ كولەمدى اسكەري سوققى بەرۋدى ورىستەتىپ، مادۋرو مەن ونىڭ ايەلىن زورلىقپەن مەڭگەرۋگە العان ءارى ولاردى ا ق ش – نا اپارعان. قازىر مادۋرو نيۋ – يوركتىڭ برۋكلين رايونىنداعى ءبىر قاماي تۇرۋ ورتالىعىنا قامالعان.

كەلۋ قاينارى: حالىق تورابى