شي جينپيڭ كورەيانىڭ زۇڭتۇڭى لي زايميڭمەن كەڭەس وتكىزدى

1 - ايدىڭ 5 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن كورەيانىڭ زۇڭتۇڭى لي زايميڭمەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان لي زايميڭمەن جانە حانىمى جين حۇيجيڭمەن بىرگە سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

1 - ايدىڭ 5 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن كورەيانىڭ زۇڭتۇڭى لي زايميڭمەن كەڭەس وتكىزدى. كەڭەستەن بۇرىن شي جينپيڭ حالىق سارايىنىڭ سولتۇستىك زالىندا لي زايميڭدى قارسى الۋ سالتىن وتكىزدى.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

شينحۋا اگەنتتىگى، 1 - ايدىڭ 5 - كۇنى، بەيجيڭ (تىلشىلەر فىڭ شينران، ساۋ جيايۋە). 1 - ايدىڭ 5 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن كورەيانىڭ زۇڭتۇڭى لي زايميڭمەن كەڭەس وتكىزدى.

شي جينپيڭ كورەيا حالقىنا جاڭا جىل بايلانىسىمەن ىزگى تىلەك ءبىلدىردى. شي جينپيڭ بىلاي دەپ اتاپ كورسەتتى: لي زايميڭ زۇڭتۇڭ ەكەۋىمىز ەكى رەت كەزدەسىپ، ءوزارا ساپاردا بولدىق، بۇل ەكى جاقتىڭ جۇڭگو - كورەيا قارىم - قاتىناسىنا ءمان بەرەتىندىگىن ايگىلەيدى. دوس جانە كورشى رەتىندە، جۇڭگو مەن كورەيا كوبىرەك بارىس - كەلىس جاساپ، ۇنەمى بارىس - كەلىس جاساپ، ءجيى پىكىرلەسۋى كەرەك. جۇڭگو جاق جۇڭگو - كورەيا قارىم - قاتىناسىن باستان - اياق توڭىرەكتىك ديپلوماتيانىڭ ماڭىزدى ورنىنا قويىپ، كورەياعا قاراتقان ساياساتىنىڭ ۇلاسپالىلىعىن، ورنىقتىلىعىن ساقتايدى. جۇڭگو جاق كورەيام جاقپەن بىرگە دوستىق سەلبەستىك بەتالىسىن مىقتى يگەرىپ، ءوزارا پايدا جەتكىزىپ، تەڭ يگىلىككە كەنەلۋ ماقساتىنان جازباي، جۇڭگو مەن كورەيا ستراتەگيالىق سەلبەستىك سەرىكتەستىك قارىم - قاتىناسىنىڭ اقاۋسىز ارنامەن العا باسۋىن ىلگەرىلەتىپ، ەكى ەل حالقىنىڭ ىرىس - قۇتىن شىنايى ارتتىرىپ، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگى مەن دامۋىنا وڭ ەنەرگيا قوسۋدى قالايدى.

شي جينپيڭ بىلاي دەپ باسا دارىپتەدى: جۇڭگو مەن كورەيا ۇزاق ۋاقىتتان بەرى ”تاتۋلىقتى قىمباتقا بالاۋعا“، ”توعىسسا دا وزگەشەلىگىن ساقتاۋعا“ تاباندى بولىپ، قوعامدىق ءتۇزىم مەن يدەولوگيالىق پارىقتان اتتاپ ءوتىپ، ءوزارا تابىسقا جەتىپ، بىرگە دامىدى. ەكى جاق وسى تاڭداۋلى ءداستۇردى جالعاستىرىپ، ءوزارا سەنىمدىلىكتى ۇزدىكسىز كۇشەيتىپ، وزدەرى تاڭداعان دامۋ جولىنا قۇرمەت ەتىپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىنە كوڭىل ءبولىپ، الاۋىزدىقتاردى پىكىرلەسۋ، كەڭەسۋ ارقىلى ۇيلەسىمدى شەشۋگە تاباندى بولۋى كەرەك. جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 - بەسجىلدىق“ جوبا ۇسىنىسىن قاراپ ماقۇلداپ، الداعى 5 جىلداعى جۇڭگونىڭ دامۋىنا جوبا جاسادى، سونداي - اق دۇنيە جۇزىندەگى ءار ەلگە كەڭ وراي ازىرلەدى. جۇڭگو مەن كورەيانىڭ ەكونوميكالىق بايلانىسى تىعىز، كاسىپ سالاسى تىزبەگى مەن قامداۋ تىزبەگى ىشكەرىلەي ءوزارا توعىسىپ، سەلبەستىك جاساۋ ءوزارا پايدا، تيىمدىلىك جەتكىزدى، دامۋ ستراتەگياسىن ۇشتاستىرۋ مەن ساياساتتى سايكەستىرۋدى كۇشەيتىپ، ورتاق مۇددە بالكۇلشەسىن ۇلكەيتىپ، جاساندى زەردە، جاسىل كاسىپ سالاسى، قارتتار ەكونوميكاسى سياقتى جاڭادان گۇلدەنگەن سالالاردا اناعۇرلىم كوپ سەلبەستىك جەتىستىكتەرىن قالىپتاستىرۋ كەرەك. ەكى جاق ادامداردىڭ بارىس - كەلىسىن كۇشەيتىپ، جاستار مەن ورەندەر، اقپارات قۇرالدارى، دەنە تاربيە، اقىل - پاراسات قويماسى، جەرگىلىكتى ورىندار سياقتى جاقتارداعى بارىس - كەلىستى ورىستەتىپ، ۇنامدى بايانداۋدى حالىق تىلەگىنىڭ نەگىزگى اعىمىنا اينالدىرۋ كەرەك.

شي جينپيڭ بىلاي دەپ اتاپ كورسەتتى: قازىر دۇنيە ءجۇزىنىڭ 100 جىلدىق وزگەرىس جاعدايى جەدەل قۇبىلىپ، حالىقارالىق جاعداي ءتىپتى دە بىلىقتى. جۇڭگو مەن كورەيا ءوڭىردىڭ بەيبىتشىلىگىن قورعاۋ، دۇنيە ءجۇزىنىڭ دامۋىن جەبەۋ جاعىندا ماڭىزدى جاۋاپكەرشىلىك ارقالاپ وتىر، كەڭ كولەمدى مۇددە توعىسۋى بار، تاريحتىڭ دۇرىس جاعىندا باتىل تۇرىپ، دۇرىس ستراتەگيالىق تالعام جاساۋى كەرەك. 80 نەشە جىلدىڭ الدىندا جۇڭگو مەن كورەيا وراسان زور ۇلتتىق قۇرباندىق بەرىپ، جاپونيا ميليتاريزمىنە قارسى تۇرۋدىڭ جەڭىسىنە قول جەتكىزدى. بۇل كۇندە دۇنيە جۇزىلىك ەكىنشى سوعىستىڭ جەڭىس جەتىستىكتەرىن قول ۇستاسا قورعاپ، شىعىس سولتۇستىك ازيانىڭ بەيبىتشىلىگى مەن ورنىقتىلىعىن قورعاۋ كەرەك. ەكونوميكا جاھاندانۋىنىڭ يگىلىگىن كورۋشى رەتىندە، جۇڭگو مەن كورەيا قورعانىمپازدىققا بىرگە قارسى تۇرىپ، ناعىز كوپ جاقتىلىقتى امالياتتا ايگىلەپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن، جالپىعا ءتيىمدى، سيىسىمدى ەكونوميكانىڭ جاھاندانۋىن ىلگەرىلەتۋگە ۇلەس قوسۋى كەرەك.

لي زايميڭ جۇڭگو حالقىنا جاڭا جىل قۇتتى بولسىن ايتتى. لي زايميڭ مىنالاردى ءبىلدىردى: كورەيا مەن جۇڭگو _ جاقىن كورشى، ەكى ەل قارىم - قاتىناسىنىڭ تاريحى ۇزاق. كورەيا مەن جۇڭگو كەزىندە جاپونيا ميليتاريزمىنىڭ شاپقىنشىلىعىنا بىرگە قارسى تۇرعان، كورەيا جاق جۇڭگو جاقتىڭ كورەيانىڭ جۇڭگوداعى تاۋەلسىزدىك قوزعالىسى بايىرعى جۇرتىن قورعاعاندىعىنا العىس ايتادى. ەكى ەل ديپلوماتيالىق قارىم - قاتىناس ورناتقاننان كەيىن تىعىز سەلبەستىك قاتىناس ورناتىپ، سۇبەلى تابىستارعا قول جەتكىزدى. كورەيا جاق جۇڭگومەن قارىم - قاتىناسىنا ايرىقشا ءمان بەرەدى، جاڭا ءبىر جىلداعى تۇڭعىش رەتكى مەملەكەت باسشىلارى ديپلوماتياسىن وراي ەتىپ، كورەيا - جۇڭگو قارىم - قاتىناسىنىڭ جاپپاي قالپىنا كەلۋ جاعدايىن بەكەمدەپ، پارىقتاردى ساقتاپ، ورتاقتىققا ۇمتىلىپ، كورەيا مەن جۇڭگونىڭ ستراتەگيالىق سەلبەستىك سەرىكتەستىك قارىم - قاتىناسىن تەرەڭدەتىپ، ەكى ەل قارىم - قاتىناسى دامۋىنىڭ جاڭا جاعدايىن بىرگە اشۋدى قالايدى. كورەيا جاق جۇڭگونىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە قۇرمەت ەتەدى، ءبىر جۇڭگوعا تاباندى بولادى. كورەيا مەن جۇڭگونىڭ ەكونوميكا - ساۋدا سەلبەستىگى وزدەرىنىڭ ەكونوميكالىق، قوعامدىق دامۋىندا بەلسەندى رول اتقاردى، كورەيا جاق جۇڭگونىڭ ”15 - بەسجىلدىق“ جوباسى الا كەلگەن ورايدى يگەرىپ، ەكى ەلدىڭ ناقتى سەلبەستىگىنىڭ اناعۇرلىم كوپ تابىستارعا قول جەتكىزۋىن ىلگەرىلەتۋدى ءۇمىت ەتەدى. ەكى ەل حالىقتىق اۋىس - كۇيىستى جەبەپ، ءتۇسىنىسۋدى، ءوزارا سەنىمدىلىكتى كۇشەيتۋى كەرەك. كورەيا جاق جۇڭگو جاقپەن كوپ جاقتى سايكەسۋدى كۇشەيتىپ، دۇنيە ءجۇزىنىڭ گۇلدەنىپ - كوركەيۋىنە، دامۋىنا ۇلەس قوسۋدى قالايدى. جۇڭگونىڭ بيىلعى ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ءماجىلىسىن تابىستى وتكىزۋىن تىلەيمىن.

كەڭەستەن كەيىن ەكى ەل مەملەكەت باسشىلارى عىلىم - تەحنيكادا جاڭالىق اشۋ، ەكولوگيالىق ورتا، قاتىناس - تاسىمال، ەكونوميكا - ساۋدا سەلبەستىگى سياقتى سالالارداعى 15 سەلبەستىك قۇجاتىنا قول قويۋعا بىرگە كۋا بولدى.

كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ سولتۇستىك زالىندا لي زايميڭ مەن حانىمى جين حۇيجيڭدى قارسى الۋ سالتىن وتكىزدى.

لي زايميڭ جەتكەندە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن كورەيانىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. لي زايميڭ شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى كەشتە شي جينپيڭ مەن پىڭ لييۋان حالىق سارايىنىڭ التىن ءتۇستى زالىندا لي زايميڭ مەن حانىمىنا ارناپ قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.

كەلۋ قاينارى: حالىق تورابى