شي جينپيڭ رەسەيدىڭ زۇڭتۇڭى پۋتينمەن بىرگە ”جۇڭگو - رەسەي وقۋ - اعارتۋ جىلىنىڭ“ اشىلۋ سالتىنا قاتىناستى ءارى ءسوز سويلەدى

5 - ايدىڭ 20 - كۇنى تۇستەن كەيىن مەملەكەت ءتوراعاسى شي جينپيڭ رەسەيدىڭ زۇڭتۇڭى پۋتينمەن بىرگە بەيجيڭدەگى حالىق سارايىندا ”جۇڭگو - رەسەي وقۋ - اعارتۋ جىلىنىڭ“ اشىلۋ سالتىنا قاتىناستى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 5 - ايدىڭ 20 - كۇنى، بەيجيڭ (ءتىلشى ياڭ چياۋچۋ). 5 - ايدىڭ 20 - كۇنى تۇستەن كەيىن مەملەكەت ءتوراعاسى شي جينپيڭ رەسەيدىڭ زۇڭتۇڭى پۋتينمەن بىرگە بەيجيڭدەگى حالىق سارايىندا ”جۇڭگو - رەسەي وقۋ - اعارتۋ جىلىنىڭ“ اشىلۋ سالتىنا قاتىناستى.

ەكى ەل مەملەكەت باسشىلارى قىزۋ قول شاپالاق ءۇنى ىشىندە جيىن زالىنا بىرگە كىردى.

شي جينپيڭ الدىمەن ارناۋ ءسوز سويلەدى. شي جينپيڭ بىلاي دەپ اتاپ كورسەتتى: بيىل _ جۇڭگو مەن رەسەيدىڭ ستراتەگيالىق سەلبەستىك سەرىكتەستىك قارىم - قاتىناس ورناتقاندىعىنىڭ 30 جىلدىعى جانە «جۇڭگو مەن رەسەيدىڭ تاتۋ كورشىلىك، دوستىق سەلبەستىك شارتىنا» قول قويىلعاندىعىنىڭ 25 جىلدىعى. وسىنداي ەرەكشە مانگە يە جىلدا ”جۇڭگو - رەسەي وقۋ - اعارتۋ جىلىن“ باستاۋ − پۋتين زۇڭتۇڭ ەكەۋىمىزدىڭ جۇڭگو - رەسەي قارىم - قاتىناسىنىڭ ۇزاق بولاشاقتىق دامۋىن كوزدەي وتىرىپ جاساعان ستراتەگيالىق ورنالاستىرۋىمىز. وقۋ - اعارتۋ _ مەملەكەت پەن مەملەكەت اراسىنداعى حالىق تىلەگىن توعىستىرۋدىڭ، دوستىقتى جالعاستىرۋدىڭ ماڭىزدى كوپىرى، قازىرگىلەر ەڭبەك ەتىپ، كەيىنگىلەر يگىلىگىن كورەتىن وسكەلەڭ ءىس. ۇزاق ۋاقىتتان بەرى جۇڭگو مەن رەسەيدىڭ وقۋ - اعارتۋ سەلبەستىگى ۇزدىكسىز تەرەڭدەپ، ناتيجەسى كورنەكتى بولىپ، جۇڭگو مەن رەسەيدىڭ جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قارىم - قاتىناسىنىڭ مازمۇنىن بايىتتى. ”جۇڭگو - رەسەي وقۋ - اعارتۋ جىلىن“ وراي ەتىپ، ەكى جاق سەلبەستىك ورتاق تانىمىن ونان ارى ۇيىستىرىپ، سەلبەستىك سالالارىن كەڭەيتىپ، سەلبەستىك دەڭگەيىن جوعارىلاتۋى كەرەك.

شي جينپيڭ بىلاي دەپ باسا دارىپتەدى: وقۋ - اعارتۋ گۇلدەنسە، مەملەكەت گۇلدەنەدى، وقۋ - اعارتۋ قۇدىرەتتەنسە، مەملەكەت قۇدىرەتتەنەدى. جۇڭگو مەن رەسەي دارىندىلاردى باۋلۋ سەلبەستىگىن تەرەڭدەتىپ، حالىقارالىق ۇزدىك دارىندىلار قوسىنىن جانە مەملەكەتتىڭ ستراتەگيالىق عىلىم - تەحنيكا كۇشىن بىرگە جەتىلدىرىپ، عىلىم سالاسىنداعى الدىڭعى لەكتىك قيىن ماسەلەلەردى قول ۇستاسا جەڭىپ، ەكى ەلدىڭ جاڭالىق اشا دامۋىنا دەم بەرۋى؛ ءداستۇرلى دوستىق سۇيىسپەنشىلىكتى جالعاستىرىپ، وقۋ - اعارتۋ سەلبەستىگىنىڭ كومەسكى كۇشىن ونان ارى اشىپ، ەكى ەل حالقىنىڭ ءوزارا ءتۇسىنىسۋىن، ەتەنە بولۋىن جەبەپ، جاستار مەن ورەندەردىڭ ىشكەرىلەي اۋىس - كۇيىس جاساۋ بارىسىندا دوستىقتى كۇشەيتىپ، جۇڭگو مەن رەسەيدىڭ ۇرپاقتان - ۇرپاققا جالعاسقان دوستىعىنىڭ ءىزباسارلارىن جەتىلدىرۋىنە مۇمكىندىك جاساۋى كەرەك. ەكى جاقتىڭ بىرگە قۇلشىنۋىندا، ”جۇڭگو - رەسەي وقۋ - اعارتۋ جىلىنىڭ“، ءسوز جوق، تولىق تابىستى بولاتىندىعىنا سەنەمىن.

پۋتين مىنالاردى ءبىلدىردى: وقۋ - اعارتۋ سەلبەستىگى _ ەكى ەلدىڭ جان - جاقتى ستراتەگيالىق ىستەستىك سەرىكتەستىك قارىم - قاتىناسىنىڭ كەم بولسا بولمايتىن ماڭىزدى قۇرامداس بولىگى، ”رەسەي - جۇڭگو وقۋ - اعارتۋ جىلىن“ باستاۋ بەلەستىك مانگە يە. رەسەي دە، جۇڭگو دا وقۋ - اعارتۋعا ءمان بەرەدى، وقۋ - اعارتۋ جەكە ادامنىڭ دامۋى جونىنەن توتەنشە ماڭىزدى بولىپ قالماستان، مەملەكەتتىڭ ەكونوميكالىق، قوعامدىق دامۋىنىڭ نەگىزى. ”رەسەي - جۇڭگو وقۋ - اعارتۋ جىلى“ قيمىلىنىڭ مازمۇنى باي، كولەمى زور. رەسەي جاق جۇڭگو جاقپەن بىرگە وقۋ - اعارتۋ سەلبەستىگىن كۇشەيتۋ ارقىلى جاس بۋىنداردىڭ ءوزارا تۇسىنىستىكتى ارتتىرىپ، رەسەي - جۇڭگو دوستىق ىستەرىنىڭ ءىزباسارلارى بولۋىنا مۇمكىندىك جاساپ، رەسەي - جۇڭگو قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى.

ەكى ەل مەملەكەت باسشىلارى ”جۇڭگو - رەسەي وقۋ - اعارتۋ جىلى“ بەلگىسىنىڭ جامىلعىسىن بىرگە اشتى.

ساي چي، ديڭ شۋەشياڭ، ۋاڭ ي، حى ليفىڭ، جاڭ گوچيڭ، چىن ي - چين قاتارلىلار قاتىناستى.