مىناداي ءۇش ءتۇرلى كۋالىكتى العاندار شەبەرلىكتى جوعارىلاتۋ قوسىمشا قاراجاتىن الۋعا ءوتىنىش ەتۋىنە بولادى! 

7 - ايدىڭ 22 – كۇنى، ادام كۇشى بايلىعى جانە قوعامدىق قامتاماسىزداندىرۋ مينيسترلىگى وتكىزگەن اقپارات جاريالاۋ ماجىلىسىندە قاتىستى جاۋاپتى ادام بىلاي دەدى: بيىل 1 – ايدان 6 – ايعا دەيىن شەبەرلىكتى جوعارىلاتۋ قوسىمشا قاراجاتىنان ءبىر ميلليارد 200 ميلليون يۋان تاراتىلدى. جاڭادان كاسىپتىك تولىمدىلىق نەمەسە شەبەرلىك دارەجەسى كۋالىگىن العاندار 4 ميلليون 819 مىڭ ادام – رەتكە، جوعارى دارەجەلى جۇمىسشى جانە ودان جوعارىلار ءبىر ميلليون 936 مىڭ ادام – رەتكە، تەحنيك جانە ودان جوعارىلار 141 مىڭ ادام – رەتكە جەتتى.

شەبەرلىكتى جوعارىلاتۋعا بەرىلەتىن قوسىمشا قاراجات جونىندەگى ساياساتتى ساپالىلاندىرادى. وتكەن جىلدارداعىمەن سالىستىرعاندا، بيىلعى ساياساتتىڭ ەرەكشەلىگى ”كۋالىك پەن قىزمەت ورنىنىڭ ۇيلەسۋىن“ اناعۇرلىم كورنەكتىلەندىرۋ بولدى. جۇمىسسىزدىقتان قامسىزداندىرۋعا 12 ايدان استام قاتىناسقان كاسىپورىندارداعى قىزمەتتەگى جۇمىسشى – قىزمەتكەرلەر نەمەسە جۇمىسسىزدىقتان قامسىزداندىرۋ قاراجاتىن العاندار تومەندەگى ءۇش ءتۇرلى كۋالىكتىڭ بىرەۋىن العان بولسا، باستاپقى، ورتاشا، جوعارى دارەجە بويىنشا سايكەستى تۇردە 1000 يۋاننان، 1500 يۋاننان، 2000 يۋاننان اسپايتىن شەبەرلىكتى جوعارىلاتۋ قوسىمشا قاراجاتىن الۋىنا بولادى، ءار ادام ءار جىلى ءبىر رەت قوسىمشا قاراجاتتان يگىلىكتەنە الادى.

وسى ءۇش ءتۇرلى كۋالىك مىنالار:

ءبىرىنشى ءتۇرى: جۇمىسشى – قىزمەتكەر العان كۋالىك سايكەس كەلەتىن كاسىپتىك ءتۇر مەن ول جۇمىس ىستەيتىن كاسىپورىنىنىڭ كاسىپ ءتۇرى بىردەي بولعاندار. ءار كاسىپ ءبىر كاسىپتىك تۇرگە سايكەس كەلسە، ءار كاسىپورىن دا ءبىر كاسىپ تۇرىنە سايكەس كەلسە، كۋالىك سايكەس كەلەتىن كاسىپتىك ءتۇر مەن ول جۇمىس ىستەيتىن كاسىپورىنىنىڭ كاسىپ ءتۇرى بىردەي بولسا، جۇمىسشى – قىزمەتكەر العان كۋالىك ءوزى جۇمىس ىستەگەن كاسىپورىنىنىڭ ءوندىرىس – تيجارات قاجەتىمەن تىعىز قاتىستى ەكەنىن، ”كۋالىك پەن قىزمەت ورنىنىڭ ۇيلەسۋى“ تالابىنا ۇيلەسەتىنىن بىلدىرەدى، قوسىمشا قاراجاتقا ءوتىنىش ەتۋىنە بولادى.

ەكىنشى ءتۇرى: سيفرلى كاسىپ جانە جاسىل تيپتى كاسىپ دارەجە كۋالىگى. 2022 – جىلعى نۇسقاداعى جۇڭحۋا حالىق رەسپۋبليكاسىنىڭ كاسىپتەردى جىكتەۋ جيناعىندا جانە ودان كەيىنگى جاڭادان قوسىلعان كاسىپتەردى جىكتەۋدە ”S“ ارىبىمەن بەلگىلەنگەنى سيفرلى كاسىپ كۋالىگى، ”L“ ارىبىمەن بەلگىلەنگەنى جاسىل كاسىپ كۋالىگى بولادى.

ءۇشىنشى ءتۇرى: جەرگىلىكتى ورىنعا شۇعىل قاجەتتى، ادام كەمشىل كاسىپتەر (جۇمىس ءتۇرى) تىزىمدىگىنە ەنگىزىلگەن دارەجە كۋالىگى. شۇعىل قاجەتتى، ادام كەمشىل كاسىپتەردىڭ (جۇمىس ءتۇرى) كوپ ءتۇرلى كۋالىگىن العاندارعا، قوسىمشا قاراجات الۋ رەت سانىن تاعى دا ەكى رەت ارتتىرۋعا بولادى. مۇنداي ساپالىلاندىرۋ جانە رەتتەۋ وسى ساياساتتىڭ كاسىپورىنداردىڭ ءوندىرىس قاجەتىنە، بازارداعى جۇمىستانۋ قاجەتىنە جانە كاسىپ سالاسىنىڭ دامۋ قاجەتىنە اناعۇرلىم ويداعىداي قىزمەت وتەۋ ءۇشىن بولىپ تابىلادى.

كەلۋ قاينارى: حالىق تورابى