شي جينپيڭ سلوۆاكيانىڭ زۇڭتۇڭى پەللەگرينيمەن كەڭەس وتكىزدى

7 - ايدىڭ 28 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن سلوۆاكيانىڭ زۇڭتۇڭى پەللەگرينيمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

7 - ايدىڭ 28 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن سلوۆاكيانىڭ زۇڭتۇڭى پەللەگرينيمەن كەڭەس وتكىزدى.

سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا پەللەگرينيدى قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى ديڭ لين تۇسىرگەن

«حالىق گازەتى»، 7 - ايدىڭ 28 - كۇنى، بەيجيڭ (ءتىلشى ياڭ چياۋچۋ). مەملەكەت ءتوراعاسى شي جينپيڭ 7 - ايدىڭ 28 - كۇنى تۇستەن بۇرىن بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن سلوۆاكيانىڭ زۇڭتۇڭى پەللەگرينيمەن كەڭەس وتكىزدى.

شي جينپيڭ بىلاي دەپ اتاپ كورسەتتى: سلوۆاكيا − جاڭا جۇڭگومەن ەڭ ەرتە ديپلوماتيالىق قاتىناس ورناتقان ەلدەردىڭ ءبىرى، جۇڭگو - سلوۆاكيا دوستىعىنىڭ تامىرى تەرەڭدە جاتىر. 2024 - جىلى ەكى ەلدىڭ قاتىناسى ستراتەگيالىق سەرىكتەستىك قاتىناسقا كوتەرىلدى.

ەكى جاقتىڭ بىرگە قۇلشىنۋىندا، ەكى ەلدىڭ ءوزارا سەنىمدىلىگى ۇزدىكسىز تەرەڭدەپ، سەلبەستىك جەتىستىكتەرى ۇزدىكسىز جارىققا شىعىپ، ءداستۇرلى دوستىق جۇرت جۇرەگىنە تەرەڭ ۇيالادى.

جۇڭگو جاق سلوۆاكيا جاقپەن بىرگە جۇڭگو مەن سلوۆاكيانىڭ ءوزارا قۇرمەت ەتەتىن، ءوزارا سەنىم ارتاتىن، تەڭ تۇرعىدا ءوزارا پايدا جەتكىزەتىن، ورنىقتىلىققا تاباندى ستراتەگيالىق سەرىكتەستىك قاتىناسىن ورناتىپ، ەكى ەل حالقىن اناعۇرلىم باقىتقا كەنەلتۋدى قالايدى.

شي جينپيڭ بىلاي دەپ باسا دارىپتەدى: كەلەسى ساتىدا ەكى جاق 4 جاقتاعى قىزمەتتى ءتۇيىندى تۇردە ويداعىداي ىستەۋى كەرەك.

ءبىرىنشى، ستراتەگيالىق ءوزارا سەنىمدىلىكتى بەكەمدەپ، ءبىرىن - ءبىرى باتىل قولداۋ. جۇڭگو مەن سلوۆاكيانىڭ ساياسي ءتۇزىلىسى ۇقساماعانىمەن، ەكى جاق وزدەرى تاڭداعان دامۋ جولىنا قۇرمەت ەتىپ، دوستىق سەلبەستىك سىندى ەكى جاقتى قاتىناستىڭ نەگىزگى اۋەنىنەن جازبايدى، بۇل − جۇڭگو - سلوۆاكيا قاتىناسىنىڭ اقاۋسىز، تەز دامۋىنىڭ نەگىزى. جۇڭگو جاق سلوۆاكيا جاقتىڭ ءبىر جۇڭگو پرينسيبىنە تاباندى بولعاندىعىن القايدى، سلوۆاكيا جاقپەن بىرگە ءبىر - ءبىرىنىڭ وزەكتى مۇددەسى مەن كوڭىل ءبولىپ وتىرعان كەلەلى ىستەرىنە ۇزدىكسىز تولىق كوڭىل ءبولۋدى قالايدى. ەكىنشى، ءوزارا ءتيىمدى سەلبەستىكتى تەرەڭدەتىپ، بىرگە دامۋدى جەبەۋ.

سلوۆاكيا ” ءبىر بەلدەۋ، ءبىر جولدى“ بىرگە قۇرۋ جانە جۇڭگو - ورتا، شىعىس ەۆروپا ەلدەرى سەلبەستىگىنە بەلسەنە ات سالىسىپ، سۇبەلى تابىستارعا قول جەتكىزدى. ەكى جاق ەكى ەل ۇكىمەتتەرى ارا سەلبەستىك كوميتەتى سياقتى مەحانيزمدەردەن اناعۇرلىم ويداعىداي پايدالانىپ، ەكى ەلدىڭ سەلبەستىگىن تەرەڭدەتۋگە ساياساتتىق قولداۋ كورسەتىپ، تازا ەنەرگيا، سيفرلى ەكونوميكا، قۇلتەمىر جاساۋ، جاساندى زەردە سياقتى جاڭادان گۇلدەنگەن كاسىپ سالالارى مەن الدىڭعى لەكتىك سالالارداعى سەلبەستىكتىڭ كومەسكى كۇشىن اشىپ، اناعۇرلىم كوپ سەلبەستىكتىڭ جاڭا كورىنەۋ تۇيىندەرىن قالىپتاستىرۋى كەرەك. ءۇشىنشى، حالىق تىلەگىنىڭ توعىسۋىن كۇشەيتىپ، ءداستۇرلى دوستىقتى جالعاستىرۋ. مادەنيەت، دەنە تاربيە، ساياحات، جاستار، جەرگىلىكتى ورىندار سياقتى سالالارداعى سەلبەستىكتى كەڭەيتىپ، ادامداردىڭ بارىس - كەلىسىنە قولايلىلىق تۋدىرىپ، ەكى ەل جاستارىن اۋىس - كۇيىس جاساۋعا ۇزدىكسىز شابىتتاندىرىپ، ءوزارا ۇيرەنۋ، ءوزارا ۇلگى الۋ بارىسىندا ءتۇسىنىسۋدى كۇشەيتىپ، دوستىققا قول جەتكىزۋ كەرەك. ءتورتىنشى، حالىقارالىق ادىلدىك پەن ادىلەتتىلىكتى قورعاپ، دۇنيە جۇزىلىك جونگە سالۋعا رەفورما جاساۋ جانە ونى كەمەلدەندىرۋ. كوپ جاقتى سايكەسۋدى كۇشەيتىپ، بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيە مەن حالىقارالىق ءتارتىپتى باتىل قورعاپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن، سيىسىمدى ەكونوميكانىڭ جاھاندانۋىن جەبەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ كەرەك.

شي جينپيڭ بىلاي دەپ اتاپ كورسەتتى: دۇنيە جۇزىندە عاسىرلىق وزگەرىس جەدەل قۇبىلىپ، جۇڭگو - ەۆروپا قاتىناسى جاڭا دا ماڭىزدى ورايعا ءدوپ كەلۋمەن بىرگە، كوپتەگەن سىن - سايىسقا دا ءدوپ كەلدى، سىن - سايىستى ورايعا اينالدىرۋعا بولا ما، جوق پا، مۇنداعى شەشۋشى ءتۇيىن − تەڭ تۇرعىدا كەڭەسىپ، پارىقتاردى بىرلىككە كەلتىرۋ. جۇڭگو جاق ەۆروپا وداعىن باستان - اياق سەرىكتەس ساناپ، شىن نيەتپەن جانە ىزگى نيەتپەن ەۆروپامەن قاتىناستى دامىتادى. سلوۆاكيا جاقتىڭ ەۆروپا وداعىنىڭ نازاردى جۇڭگو مەن ەۆروپانىڭ ورتاق تانىمىنا شوعىرلاندىرىپ، قايشىلىقتاردى، الاۋىزدىقتاردى ۇيلەسىمدى ءبىر جاقتى ەتۋدى ىلگەرىلەتىپ، جۇڭگو - ەۆروپا قاتىناسىنىڭ اقاۋسىز، ورنىقتى دامۋىن ىلگەرىلەتۋىندە سىندارلى رول اتقارۋىن ءۇمىت ەتەمىز.

پەللەگريني مىنالاردى ءبىلدىردى: سلوۆاكيا جاق جۇڭگونىڭ ءتوراعا شي جينپيڭنىڭ باسشىلىعىندا كۇللى دۇنيە ءجۇزىن جالت قاراتقان دامۋ تابىستارىنا قول جەتكىزگەندىگىن جوعارى باعالايدى، جۇڭگو جاقتىڭ 5 جىلدىق جوبانى جاساۋى ءارى ۇزدىكسىز اتقارۋى، جۇڭگو ۇلگىسىندەگى وسىزامانداندىرۋ قۇرىلىسىن ورنىقتى ىلگەرىلەتۋ قابىلەتى ادامدى سۇيىندىرەدى، ۇلگى الۋعا تاتيدى. سلوۆاكيا جاق ەكى ەلدىڭ ستراتەگيالىق سەرىكتەستىك قاتىناسىن قاستەرلەيدى، ءبىر جۇڭگو پرينسيبىن باتىل اتقارادى، جۇڭگو جاقپەن ءوزارا سەنىمدىلىكتى ارتتىرىپ، سەلبەستىكتى كۇشەيتىپ، دوستىقتى تەرەڭدەتىپ، سەلبەستىكتىڭ جاڭا سالالارىن كەڭەيتىپ، ەكونوميكا - ساۋدا، جاساندى زەردە، سيفرلى ەكونوميكا، قۇلتەمىر، جاڭا ەنەرگيا سياقتى سالالاردا اناعۇرلىم كوپ سەلبەستىك جەتىستىگىنە قول جەتكىزىپ، ەكى ەل حالقىن اناعۇرلىم ويداعىداي باقىتقا كەنەلتۋدى كۇتەدى. جۇڭگو كاسىپورىندارىنىڭ سلوۆاكياعا بارىپ قارجى قوسۋىن، سەلبەستىك جاساۋىن قارسى الامىز. ەۆروپا وداعىنا مۇشە ەل رەتىندە سلوۆاكيا جاق ەۆروپا - جۇڭگو سەلبەستىگىن بەلسەنە ىلگەرىلەتىپ، پىكىرلەسۋ، كەڭەسۋ ارقىلى الاۋىزدىقتاردى ۇيلەسىمدى ءبىر جاقتى ەتۋدى قالايدى. سلوۆاكيا جاق جۇڭگونىڭ حالىقاراداعى ورنى مەن ىقپالىنا ايرىقشا ءمان بەرەدى جانە القايدى، جۇڭگو جاقپەن كوپ جاقتىلىققا تاباندى بولىپ، بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن حالىقارالىق زاڭدى قورعاپ، ءوڭىردىڭ جانە دۇنيە ءجۇزىنىڭ بەيبىتشىلىگىن، ورنىقتىلىعىن جەبەۋدى قالايدى.

سلوۆاكيا جاق ءتوراعا شي جينپيڭنىڭ 2026 - جىلعى دۇنيە جۇزىلىك جاساندى زەردە جينالىسىندا العا قويعان ۇستانىمى مەن باستاماسىن بۇكىلدەي قۇپتايدى، جۇڭگو جاقپەن تىعىز سايكەسىپ، جاساندى زەردەنى دۇنيە جۇزىلىك جونگە سالۋدى كۇشەيتىپ، ونىڭ شىن مانىندە بۇكىل ادامزاتقا باقىت جاراتۋىنا مۇمكىندىك جاساۋدى قالايدى.

كەڭەستەن بۇرىن شي جينپيڭ حالىق سارايىنىڭ سولتۇستىك زالىندا پەللەگرينيدى قارسى الۋ سالتىن وتكىزدى.

پەللەگريني كەلگەن كەزدە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن سلوۆاكيانىڭ مەملەكەت اندەرىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى.

پەللەگريني شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى تۇستە شي جينپيڭ حالىق سارايىنىڭ التىن ءتۇستى زالىندا پەللەگرينيدى قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.