جۇڭگو مەن ۆيەتنامنىڭ زاڭ اتقارۋ جاعىنداعى سەلبەستىگىندە جاڭا جەتىستىككە قول جەتكىزىلدى 

حالىق گازەتىنىڭ ءتىلشىسى جاڭ تيانپەي 7 – ايدىڭ 21 – كۇنى بەيجيڭنەن حابارلايدى. ءتىلشىنىڭ قوعام حاۋىپسىزدىگى مينيسترلىگىنەن ۇعىسۋىنشا، قوعام حاۋىپسىزدىگى مينيسترلىگىنىڭ ءبىرتۇتاس ورنالاستىرۋى بويىنشا، ەلىمىزدىڭ ۆيەتنامدا تۇراتىن ەلشىلىگىنىڭ بار كۇشپەن قولداۋىندا جانە ۆيەتنامنىڭ قوعام حاۋىپسىزدىگى تاراۋلارىنىڭ بەلسەندى سايكەسۋىندە، شاندۇڭ ولكەسىندەگى قوعام حاۋىپسىزدىگى ورگاندارى قىزمەت گرۋپپاسىن ۆيەتنامعا جىبەرىپ، كومپيۋتەر ينفورماتسيالىق جۇيەسىن ءبۇلدىرۋ دەلوسىنداعى باستى قىلمىس كۇماندىسى پان Xجۇندى ءساتتى وتكىزىپ الىپ، ەلىمىزگە ايداپ اكەلگەن.

2025 - جىلى 7 – ايدا، شاندۇڭ ولكەسىنىڭ زىبو قالاسىنداعى قوعام حاۋىپسىزدىگى ورگاندارى قىزمەت بارىسىندا جەرگىلىكتى ورىنداعى ينتەرنەتتەن پايدالانۋشى ياڭ Xتىڭ كوپتەگەن ”شىرعالىق“ ينتەرنەت پاراقشالارىن قۇرعاندىعىن جانە ىسكە قوسقاندىعىن، ينتەرنەتتەن پايدالانۋشىلاردى ”كۇمىس تۇلكى“ اتتى ترويان ۆيرۋسىن جۇقتىرعان جۇمساق دەتالدى تۇسىرۋگە ەلىكتىرىپ، زيانكەستىككە ۇشىراۋشىلاردىڭ كومپيۋتەرىن زاڭسىز مەڭگەرىپ، پايدالانۋشىلاردىڭ ينفورماتسياسىن ۇرلاپ، زاڭسىز پايدا تاپقانىن بايقايدى.

2025 - جىلى 7 – ايدان 2026 – جىلى 5 – ايعا دەيىن، قوعام حاۋىپسىزدىگى ورگاندارى دەلوعا ىشكەرىلەي تەكسەرۋ جۇرگىزىپ، تالاي رەت شوعىرلى تۇردە تور جايۋ ارەكەتىن ورىستەتىپ، دەلوعا قاتىستى كوپتەگەن قىلمىستىق توپتاردى ارت - ارتىنان تالقانداعان. 2025 – جىلى 8 – ايدا، دەلوداعى باستى قىلمىس كۇماندىسى پان Xجۇن شەكارا سىرتىنا قاشىپ كەتىپ، سودان بەرى ءىز – توزسىز جوعالعان.

2026 - جىلى 6 – ايدىڭ 4 – كۇنى، قوعام حاۋىپسىزدىگى ورگاندارىنىڭ قاجىرلىلىقپەن قۇلشىنۋىمەن، ەلىمىزدىڭ ۆيەتنامدا تۇراتىن ەلشىلىگىنىڭ كۇش سالا قولداۋىندا، ۆيەتنام ساقشى جاعى پان Xجۇندى ءساتتى تۇتقىنداعان. سونىمەن بىرگە، قوعام حاۋىپسىزدىگى ورگاندارى گۋاڭدۇڭ، گۋاڭشي قاتارلى جەرلەردە ءبىر ۋاقىتتا شوعىرلى تور جايۋ ارەكەتىن ورىستەتىپ، اتالعان دەلوداعى قالعان 11 قىلمىس كۇماندىسىن ءبىر جولاتا تۇتقىنداعان. 6 – ايدىڭ 6 – كۇنى تۇستەن كەيىن، پان Xجۇن ەلىمىزگە ايداپ اكەلىنگەن.

پان Xجۇندى تۇتقىنداپ ەلىمىزگە ايداپ اكەلۋ، قوعام حاۋىپسىزدىگى ورگاندارىنىڭ قىلمىستىق ىستەرگە قاتاڭ سوققى بەرۋ، قىلمىس كۇماندىلارىن قۋعىنداۋ جانە تۇتقىنداۋ جاعىنداعى بەكىمىن تولىق ايگىلەدى. قوعام حاۋىپسىزدىگى ورگاندارى حالىقارالىق زاڭ اتقارۋ جاعىنداعى سەلبەستىكتى ۇزدىكسىز كۇشەيتىپ، ينتەرنەت ارقىلى زاڭعا قايشى قىلمىستىق ارەكەتپەن اينالىسقاندارعا قاتاڭ سوققى بەرىپ، حالىق بۇقاراسىنىڭ ءومىرى مەن مال – مۇلكىنىڭ حاۋىپسىزدىگىن شىنايى قورعايدى.

كەلۋ قاينارى: حالىق تورابى