جۋ رۇڭجي جولداستىڭ سۇيەگى بەيجيڭدە ورتەلدى

8 - ايدىڭ 18 - كۇنى جۋ رۇڭجي جولداستىڭ سۇيەگى بەيجيڭ باباۋشان توڭكەرىسىتىك قۇرباندار قابىرستانىندا ورتەلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار باباۋشانعا بارىپ سۇيەكپەن قوشتاستى، حۋ جينتاۋ گۇل شەڭبەر ۇسىنىپ ازا ءبىلدىردى. سۋرەتتە: شي جينپيڭ جۋ رۇڭجيدىڭ تۋىس - تۋعاندارىمەن قول الىسىپ، شىن ىقىلاسپەن حال سۇراۋدا.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگى، 8 - ايدىڭ 18 - كۇنى، بەيجيڭ. جۇڭگو كوممۋنيستىك پارتياسىنىڭ تاڭداۋلى مۇشەسى، ۇزاق سىننان وتكەن ادال كوممۋنيزم جاۋىنگەرى، كورنەكتى پرولەتاريات توڭكەرىسشىسى، ساياساتشى، پارتيا مەن مەملەكەتتىڭ كورنەكتى باسشىسى، جۇڭگو كوممۋنيستىك پارتياسى 14 - كەزەكتى، 15 - كەزەكتى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ بۇرىنعى زۇڭليى جۋ رۇڭجي جولداستىڭ سۇيەگى 8 - ايدىڭ 18 - كۇنى بەيجيڭدەگى باباۋشان توڭكەرىستىك قۇرباندار قابىرستانىندا ورتەلدى.

جۋ رۇڭجي جولداس اۋرۋ سەبەبىنەن 2026 - جىلى 8 - ايدىڭ 12 - كۇنى ساعات 11 دەن 06 مينۋت وتكەندە 98 جاسىندا بەيجيڭدە قايتىس بولدى.

جۋ رۇڭجي جولداستىڭ ناۋقاسى اۋىرلاعان كەزدە جانە قايتىس بولعاننان كەيىن شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ءتۇرلى فورمالار ارقىلى جۋ رۇڭجي جولداستىڭ قايتىس بولعاندىعىنا قايعىلى ازا ءبىلدىردى ءارى ونىڭ تۋىس - تۋعاندارىنان شىنايى حال سۇرادى.

8 - ايدىڭ 18 - كۇنى تۇستەن بۇرىن باباۋشان توڭكەرىستىك قۇرباندار قابىرستانىنىڭ زالى ايبىندى دا جىم - جىرت بەينەگە شومدى، ازالى مۋزىكا باياۋ قالىقتاپ تۇردى. زالدىڭ جوعارعى جاعىنا ”جۋ رۇڭجي جولداسقا قايعىلى ازا بىلدىرەمىز“ دەگەن اق جازۋ جازىلعان قارا كەرمە تۋ ءىلىنىپ، كەرمە تۋدىڭ استىنا جۋ رۇڭجي جولداستىڭ سۋرەتى قويىلدى. جۋ رۇڭجي جولداستىڭ سۇيەگى گۇلدەر مەن شىرشالار اراسىنا قويىلىپ، ۇستىنە جۇڭگو كوممۋنيستىك پارتياسىنىڭ نارت قىزىل تۋى جابىلدى.

تۇستەن بۇرىن ساعات 9 دان 30 مينۋت وتكەندە شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار ازالى مۋزىكا ءۇنى ىشىندە جۋ رۇڭجي جولداستىڭ سۇيەگىنىڭ الدىنا باياۋ كەلىپ، ءۇنسىز ازا ءبىلدىرىپ، جۋ رۇڭجي جولداستىڭ سۇيەگىنە 3 رەت تاعزىم ەتتى ءارى جۋ رۇڭجى جولداستىڭ تۋىس - تۋعاندارىمەن ءبىر - بىرلەپ قول الىسىپ، كوڭىل ايتتى. حۋ جينتاۋ گۇل شەڭبەر ۇسىنىپ، جۋ رۇڭجي جولداستىڭ قايتىس بولعاندىعىنا ازا ءبىلدىردى.

پارتيا مەن مەملەكەتتىڭ قاتىستى باسشى جولداستارى سۇيەكپەن قوشتاستى نەمەسە ءتۇرلى تاسىلدەرمەن ازا ءبىلدىردى. ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، جۋ رۇڭجي جولداستىڭ كوزى تىرىسىندەگى دوستارى مەن اۋىلداستارىنىڭ ۋاكىلدەرى دە سۇيەكپەن قوشتاستى.

كەلۋ قاينارى: حالىق تورابى