شي جينپيڭ ەكۆادوردىڭ زۇڭتۇڭى نوۆويامەن كەڭەس وتكىزدى

8 - ايدىڭ 18 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ەكۆادوردىڭ زۇڭتۇڭى نوۆويامەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

8 - ايدىڭ 18 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ەكۆادوردىڭ زۇڭتۇڭى نوۆويامەن كەڭەس وتكىزدى. كەڭەستەن بۇرىن شي جينپيڭ حالىق سارايىنىڭ سولتۇستىك زالىندا نوۆويانى قارسى الۋ سالتىن وتكىزدى.

سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن

«حالىق گازەتى»، 8 - ايدىڭ 18 - كۇنى، بەيجيڭ (ءتىلشى ياڭ چياۋچۋ). 8 - ايدىڭ 18 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ەكۆادوردىڭ زۇڭتۇڭى نوۆويامەن كەڭەس وتكىزدى.

شي جينپيڭ بىلاي دەپ اتاپ كورسەتتى: بيىل − جۇڭگو مەن ەكۆادوردىڭ جالپى بەتتىك ستراتەگيالىق سەرىكتەستىك قاتىناس ورناتقاندىعىنىڭ 10 جىلدىعى. حالىقارالىق جاعداي قالاي وزگەرسە دە، جۇڭگو جاق جۇڭگو - ەكۆادور قاتىناسىنا باستان - اياق ستراتەگيالىق بيىك تۇرعىدان جانە ۇزاق بولاشاقتىق تۇرعىدان مامىلە جاسايدى، ەكۆادور جاقپەن بىرگە قۇلشىنىپ، ەكى جاقتى قاتىناستىڭ ۇزدىكسىز تىڭ ساتىعا كوتەرىلۋىن ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايدى.

شي جينپيڭ بىلاي دەپ باسا دارىپتەدى: جۇڭگو مەن ەكۆادور ساياسي سەنىمدىلىكتى بەكەمدەپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ۇزدىكسىز ءوزارا ءتۇسىنىسۋى جانە قولداۋى كەرەك. جۇڭگو جاق ەكۆادور جاقتىڭ ءوز مەملەكەت جاعدايىنا ۇيلەسەتىن دامۋ جولىن قاراستىرۋىنا قۇرمەت ەتەدى جانە ونى قولدايدى، ەكى ەل ۇكىمەتتەرى، زاڭ شىعارۋ قۇرىلىمدارى، ساياسي پارتيالارى سياقتى ءار سالاداعى بارىس - كەلىستى جيىلەتىپ، ەل باسقارۋ تاجىريبەلەرىن اۋىستىرۋدى كۇشەيتىپ، ءوز ەلدەرىنىڭ وسىزاماندانۋ جولىندا قول ۇستاسا العا باسۋدى قالايدى. جۇڭگو - ەكۆادور قاتىناسىندا ءبىر قىدىرۋ تىڭ ىلگەرىلەۋشىلىك بولدى، بۇل ەكى ەلدىڭ ەركىن ساۋدا كەلىسىمىنىڭ پايداسى ءارى جۇڭگونىڭ زور كولەمدى بازار كومەسكى قۋاتىن ايگىلەدى. ەكى جاق دامۋ ستراتەگياسىن ۇشتاستىرۋدى كۇشەيتىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىك جوباسىن تياناقتاندىرىپ، ەنەرگيا، كەن ونىمدەرى، نەگىزدىك قۇرىلعى قۇرىلىسى، فينانس سياقتى سەلبەستىك نىساندارىن ويداعىداي اتقارىپ، سيفرلى ەكونوميكا، جاسىل دامۋ، جاڭا ەنەرگيا، جاساندى زەردە سياقتى سالالارداعى سەلبەستىكتى بەلسەنە تالقىلاپ، ەركىن ساۋدا كەلىسىمىنىڭ كومەسكى كۇشىن ۇزدىكسىز اشىپ، ەركىن ساۋدا پايداسىنىڭ اناعۇرلىم كوپ كاسىپورىندار مەن تۇتىنۋشىلاردى يگىلىككە كەنەلتۋىنە مۇمكىندىك جاساۋى كەرەك. جۇڭگو جاق ەكۆادور جاقپەن ەمدەۋ، دەنساۋلىق ساقتاۋ، كەدەيلەردى سۇيەمەلدەۋ، كەدەيلىكتى ازايتۋ، اپاتتان ساقتانۋ، اپات زيانىن ازايتۋ سياقتى سالالارداعى سەلبەستىكتى ورىستەتىپ، ەكۆادوردىڭ مەملەكەتتى دامىتۋىن قولداۋدى قالايدى. ەكى جاق وقۋ - اعارتۋ، مادەنيەت، جاستار، دەنە تاربيە، جەرگىلىكتى ورىنداردىڭ اۋىس - كۇيىسىن كۇشەيتىپ، ادامداردىڭ بارىس - كەلىسىنە قولايلىلىق جاساپ، ەكى ەلدىڭ دوستىعىن كۇشەيتۋى كەرەك.

نوۆويا مىنالاردى ءبىلدىردى: جۇڭگو − ەكۆادوردىڭ ماڭىزدى سەرىگى جانە دوسى، ءتوراعا شي جينپيڭ − ۇلى باسشى. ەكى جاقتىڭ بىرگە قۇلشىنۋىندا ەكۆادور - جۇڭگو قاتىناسى جاڭا كەزەڭگە ءوتىپ، ەكى ەل حالقىنا ناقتى باقىت اكەلدى. ەكۆادور جاق جۇڭگو جاقپەن ساياسي ءوزارا سەنىمدىلىكتى تەرەڭدەتۋدى قالايدى، جۇڭگو جاقتىڭ يەلىك ۇقىعى مەن تەرريتوريا تۇتاستىعىن قورعاۋىن قولدايدى، جۇڭگو جاقتىڭ حالىقاراداعى تۇرعىسىن قۇرمەتتەيدى. ەكۆادور جاق جۇڭگومەن سەلبەستىككە ايرىقشا ءمان بەرەدى، ەكى جاقتىڭ ەكونوميكا - ساۋدا، فينانس، كەن ونىمدەرى، تۋىندامالى ەنەرگيا، عىلىم - تەحنيكا، مادەنيەت سياقتى سالالارداعى ءوزارا ءتيىمدى سەلبەستىگىن كۇشەيتىپ، جۇڭگوعا ەكسپورتتى كەڭەيتۋدى قالايدى، ءتىپتى دە كوپ جۇڭگو كاسىپورىندارىنىڭ ەكۆادورعا بارىپ قارجى قوسىپ، شارۋاشىلىقتى گۇلدەندىرىپ، ەكۆادور جاقتىڭ حالىق تۇرمىسىن جاقسارتۋىنا، مەملەكەتتىڭ دامۋىن جۇزەگە اسىرۋىنا دەم بەرۋىن قارسى الادى.

ەكى ەل مەملەكەت باسشىلارى لاتىن امەريكاسى مەن كارايب رايونىنىڭ جاعدايى جونىندە پىكىر اۋىستىردى. شي جينپيڭ بىلاي دەپ باسا دارىپتەدى: جۇڭگو جاق لاتىن امەريكا جانە كارايب بەيبىتشىلىك رايونى ورنىنان اۋىتقىماۋدى، لاتىن امەريكاسى مەن كارايب ەلدەرىنىڭ دامۋ، گۇلدەنۋ جولىن ءۇزىپ تاستاماۋدى، لاتىن امەريكاسى جانە كارايب ءوڭىرى ەلدەرىنىڭ سەلبەستىك سەرىكتەرىن دەربەس تاڭداۋ ۇقىعىنا كيلىكپەۋدى باستان - اياق دارىپتەپ كەلەدى. جۇڭگو جاق لاتىن امەريكاسى ەلدەرىنىڭ دەربەس، ءوز - وزىنە قوجايىن بولۋعا تاباندى بولىپ، ءوز ەلىنىڭ مۇددەسىن شىعار ءتۇيىن ەتە وتىرىپ سىرتپەن سەلبەستىك ورىستەتىپ، ءوڭىردىڭ بەيبىتشىلىگىن جانە ورنىقتىلىعىن قورعاۋىن قولدايدى. نوۆويا مىنانى ءبىلدىردى: ەكۆادور جاق جۇڭگو جاقتىڭ تۇرعىسى مەن رولىنا ايرىقشا ءمان بەرەدى، باستان - اياق جۇڭگونىڭ تىنىق مۇحيتتىڭ ەندى ءبىر باسىنداعى جاقسى دوسى بولۋدى قالايدى.

كەڭەستەن كەيىن ەكى جاق جاسىل كاسىپ سالاسى، ەكونوميكا - ساۋدا سەلبەستىگى، سيفرلى ەكونوميكا، حالىق تۇرمىسى سياقتى سالالارداعى كوپتەگەن سەلبەستىك قۇجاتىنا قول قويۋعا بىرگە كۋا بولدى.

كەڭەستەن بۇرىن شي جينپيڭ حالىق سارايىنىڭ سولتۇستىك زالىندا نوۆوياعا ارناپ قارسى الۋ سالتىن وتكىزدى.

نوۆويا كەلگەندە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن ەكۆادوردىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. نوۆويا شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى كەشتە شي جينپيڭ حالىق سارايىنىڭ التىن ءتۇستى زالىندا نوۆوياعا ارناپ قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.

كەلۋ قاينارى: حالىق تورابى