شي جينپيڭ 2026 - جىلعى شاڭحاي سەلبەستىك ۇيىمى باسشىلار ماجىلىسىنە قاتىناسادى ءارى قىرعىزستاندا، ەگيپەتتە مەملەكەتتىك ساپاردا بولادى

«حالىق گازەتى»، 8 - ايدىڭ 26 - كۇنى بەيجيڭ (ءتىلشى لي انچي). سىرتقى ىستەر مينيسترلىگىنىڭ مالىمدەمەشىسى 8 - ايدىڭ 26 - كۇنى تامىزدا مىنانى جاريالادى: 8 - ايدىڭ 30 - كۇنىنەن 9 - ايدىڭ 3 - كۇنىنە دەيىن مەملەكەت ءتوراعاسى شي جينپيڭ بىشكەكتە وتكىزىلەتىن 2026 - جىلعى شاڭحاي سەلبەستىك ۇيىمى باسشىلار ماجىلىسىنە قاتىناسادى ءارى قىرعىزستاننىڭ زۇڭتۇڭى جاپاروۆتىڭ، ەگيپەتتىڭ زۇڭتۇڭى سيسيدىڭ ۇسىنىسىمەن ەكى ەلدە مەملەكەتتىك ساپاردا بولادى.

شينحۋا اگەنتتىگى، 8 - ايدىڭ 26 - كۇنى، بەيجيڭ (تىلشىلەر ۋان چيان - ي، ما جويان). 8 - ايدىڭ 30 - كۇنىنەن 9 - ايدىڭ 3 - كۇنىنە دەيىن مەملەكەت ءتوراعاسى شي جينپيڭ بىشكەكتە وتكىزىلەتىن 2026 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسادى ءارى قىرعىزستاننىڭ زۇڭتۇڭى جاپاروۆتىڭ، ەگيپەتتىڭ زۇڭتۇڭى سيسيدىڭ ۇسىنىسى بويىنشا ەكى ەلدە مەملەكەتتىك ساپاردا بولادى. سىرتقى ىستەر مينيسترلىگىنىڭ مالىمدەمەشىسى لين جيان 8 - ايدىڭ 26 - كۇنى كەزەكتى تىلشىلەر جينالىسىندا قاتىستى ورنالاستىرۋلاردى جانە جۇڭگونىڭ ءۇمىتىن تانىستىردى.

ءتوراعا شي جينپيڭنىڭ 2026 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋى جونىندە لين جيان مىنالاردى ءبىلدىردى: بيىل − شاڭحاي سەلبەستىك ۇيىمى قۇرىلعاندىعىنىڭ 25 جىلدىعى. 25 جىلدان بەرى مۇشە ەلدەر ”شاڭحاي رۋحىن“ ۇستانىپ، ىنتىماقتاسا سەلبەسۋگە تاباندى بولىپ، سەلبەستىكتى جاپپاي تەرەڭدەتىپ، شاڭحاي سەلبەستىك ۇيىمىنىڭ دامۋىن ىلگەرىلەتىپ، دۇنيە جۇزىندەگى اۋماعى ەڭ كەڭ، حالىق سانى ەڭ كوپ، دامۋ كومەسكى كۇشى وراسان زور جالپىلىق وڭىرلىك سەلبەستىك ۇيىمىنا اينالىپ، جاڭاشا وڭىرلىك سەلبەستىك جولىن ءساتتى قاراستىرىپ، جاڭاشا حالىقارالىق قاتىناستىڭ ۇلگىسىن ورناتتى.

لين جيان بىلاي دەدى: بىلتىر تيانجين باسشىلار ءماجىلىسى شاڭحاي سەلبەستىك ۇيىمىنىڭ الداعى 10 جىلداعى دامۋى جونىندە ستراتەگيالىق جوبا جاساپ، شاڭحاي سەلبەستىك ۇيىمىنىڭ جوعارى ساپالى دامۋىنىڭ جاڭا كەزەڭىن باستادى. بيىل بىشكەك باسشىلار ءماجىلىسى كەزىندە ءتوراعا شي جينپيڭ ماجىلىسكە قاتىناسقان ءار ەل باسشىلارىمەن جاڭا جاعدايدا شاڭحاي سەلبەستىك ۇيىمىنىڭ ءار سالاداعى سەلبەستىگىن تەرەڭدەتۋ، سونداي - اق قازىرگى كەلەلى حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرىپ، شاڭحاي سەلبەستىك ۇيىمىنىڭ جوعارى ساپالى دامۋىنا جەتەكشىلىك ەتۋ، دۇنيە جۇزىلىك جونگە سالۋ جۇيەسى رەفورماسى مەن قۇرىلىسىنا ات سالىسۋ جونىندە جوبا - ورنالاستىرۋ جاسايدى. جۇڭگو جاق ءار جاقپەن بىرگە بىشكەك باسشىلار ءماجىلىسىنىڭ ورتاق تانىمدى ونان ارى ۇيىستىرۋىن ىلگەرىلەتىپ، سەلبەستىكتىڭ تىڭ داستانىن بىرگە جازىپ، وڭىردەگى ءار ەلدىڭ حاۋىپسىزدىگىن، ورنىقتىلىعىن جانە دامۋىن، گۇلدەنۋىن جەبەۋگە، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە بەلسەندى ۇلەس قوسۋدى قالايدى.

ءتوراعا شي جينپيڭنىڭ قىرعىزستاندا مەملەكەتتىك ساپاردا بولۋى جونىندە لين جيان مىنالاردى ءبىلدىردى: جۇڭگو مەن قىرعىزستان تاۋ - وزەندەرى جالعاسقان جاقسى كورشى، ءبىر - بىرىنە سەنەتىن جاقسى دوس، مۇراتتاس جاقسى سەرىك. ديپلوماتيالىق قاتىناس ورناتقان 34 جىلدان بەرى ەكى ەل باستان - اياق ءوزارا سەنىم ارتىپ، شىنايى مامىلە جاساپ، كورشى ەلدەر اراسىنداعى ءوزارا قولداۋدىڭ، ءوزارا تابىسقا جەتۋدىڭ ۇلگىسىن ورناتتى.

لين جيان بىلاي دەدى: تاياۋ جىلداردان بەرى جۇڭگو - قىرعىزستان قاتىناسى قارىشتاپ دامىدى، ەكى ەلدىڭ ساياسي ءوزارا سەنىمدىلىگى ۇزدىكسىز بەكەمدەلىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ سەلبەستىگىنىڭ تابىسى مولايىپ، گۋمانيتارلىق اۋىس - كۇيىستىڭ كورىنەۋ تۇيىندەرى ارت - ارتىنان جارىققا شىعىپ، حالىقارالىق سەلبەستىك جيىلەپ، پارمەندى بولدى. بىلتىر ءتوراعا شي جينپيڭ جاپاروۆ زۇڭتۇڭمەن 3 رەت ديدارلاسىپ، جۇڭگو - قىرعىزستان سەلبەستىگىنىڭ جەدەل دامۋدىڭ ”التىن مەزگىلىنە“ وتۋىنە جەتەكشىلىك ەتتى. ساپار كەزىندە ءتوراعا شي جينپيڭ جاپاروۆ زۇڭتۇڭمەن كەڭەس وتكىزىپ، ەكى جاقتى قاتىناس، ءتۇيىندى سالالارداعى سەلبەستىك، سونداي - اق حالىقارالىق جانە وڭىرلىك جاعداي جونىندە ىشكەرىلەي پىكىر اۋىستىرادى ءارى ءتۇرلى مەملەكەت ىستەرى قيمىلدارىنا قاتىناسادى. جۇڭگو جاق قىرعىزستان جاقپەن بىرگە وسى رەتكى ساپاردى وراي ەتىپ، ەكى ەلدىڭ جان - جاقتى ءوزارا ءتيىمدى سەلبەستىگىنىڭ جوعارى ساپالى دامۋىن ىلگەرىلەتىپ، جۇڭگو مەن قىرعىزستاننىڭ تاعدىرلاس ورتاق تۇلعاسىنىڭ مازمۇنىن ونان ارى بايىتىپ، ەكى ەل حالقىنا باقىت جاراتۋدى ءۇمىت ەتەدى.

ءتوراعا شي جينپيڭنىڭ ەگيپەتتە مەملەكەتتىك ساپاردا بولۋى جونىندە لين جيان بىلاي دەدى: ەگيپەت − جاڭا جۇڭگومەن ەڭ ەرتە ديپلوماتيالىق قاتىناس ورناتقان اراب جانە افريكا مەملەكەتى. سوڭعى جىلدارى ءتوراعا شي جينپيڭ مەن سيسي زۇڭتۇڭنىڭ ستراتەگيالىق جەتەكشىلىگىندە ەكى ەلدىڭ ساياسي ءوزارا سەنىمدىلىگى ۇزدىكسىز تەرەڭدەپ، ءار سالاداعى سەلبەستىگى سۇبەلى تابىستارعا قول جەتكىزىپ، گۋمانيتارلىق اۋىس - كۇيىس كۇن سايىن جيىلەپ، كوپ جاقتى سەلبەستىك تىعىز، ءونىمدى بولدى. جۇڭگو مەن ەگيپەتتىڭ جالپى بەتتىك ستراتەگيالىق سەرىكتەستىك قاتىناسى قارىشتاپ دامىپ، تاريحتاعى ەڭ جاقسى مەزگىلدى قارسى الىپ، وركەندەپ كەلە جاتقان ەلدەردىڭ ىنتىماقتاسا سەلبەسۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ ۇلگىسىنە اينالدى.

لين جيان مىنالاردى ءبىلدىردى: وسى رەتكى ساپار − ءتوراعا شي جينپيڭنىڭ 10 جىلدان كەيىن ەگيپەتتە تاعى دا مەملەكەتتىك ساپاردا بولۋى، جۇڭگو مەن ەگيپەتتىڭ ديپلوماتيالىق قاتىناس ورناتقاندىعىنىڭ 70 جىلدىعى، ەكى ەل قاتىناسىنىڭ دامۋىندا بۇرىنعىعا مۇراگەر بولىپ، كەيىنگىگە جول اشۋ سىندى ەرەكشە ماڭىزدى مانگە يە. ساپار كەزىندە ءتوراعا شي جينپيڭ سيسي زۇڭتۇڭمەن كەڭەس وتكىزىپ، جۇڭگو - ەگيپەت قاتىناسى جانە ورتاق كوڭىل ءبولىپ وتىرعان حالىقارالىق، وڭىرلىك ماسەلەلەر جونىندە ىشكەرىلەي پىكىر اۋىستىرادى. جۇڭگو جاق وسى رەتكى ساپار ارقىلى ەگيپەت جاقپەن ءداستۇرلى دوستىقتى جالعاستىرىپ، ءوزارا قولداۋدى بەكەمدەپ، ءوزارا ءتيىمدى سەلبەستىكتى كەڭەيتىپ، ءبىر - ءبىرىنىڭ وسىزاماندانۋ اياق الىسىنا دەم بەرىپ، جۇڭگو - ەگيپەت قاتىناسىنىڭ تىڭ داستانىن بىرگە جازىپ، ءوڭىردىڭ جانە دۇنيە ءجۇزىنىڭ بەيبىتشىلىگى مەن ورنىقتىلىعىن قورعاۋعا بەلسەندى ۇلەس قوسۋدى ءۇمىت ەتەدى.