2026.09.10 16:18 كەلۋ قاينارى : حالىق تورابى
شينحۋا اگەنتتىگى، 9 - ايدىڭ 9 - كۇنى، بەيجيڭ. 9 - ايدىڭ 9 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ چاۋشياننىڭ مەملەكەت مەرەكەسىنىڭ 78 جىلدىعى بايلانىسىمەن چاۋشيان ەڭبەك پارتياسىنىڭ باس شۋجيى، مەملەكەت ىستەرى كوميتەتىنىڭ باستىعى جين جىڭىنعا قۇتتىقتاۋ تەلەگرامماسىن جولدادى.
شي جينپيڭ بىلاي دەپ اتاپ كورسەتتى: 78 جىلدان بەرى چاۋشيان ەڭبەك پارتياسىنىڭ باسشىلىعىندا چاۋشيان حالقى ءوز كۇشىنە سۇيەنىپ ءومىر ءسۇرىپ، ىنتىماقتاسا كۇرەس جۇرگىزىپ، چاۋشياننىڭ سوتسياليستىك ىستەرىنىڭ قارىشتاپ دامۋىن ىلگەرىلەتتى. اسىرەسە، تاياۋ جىلدارى باس شۋجي جولداس چاۋشيان پارتياسى مەن حالقىن باستاپ، ەكونوميكالىق، قوعامدىق قۇرىلىستى بار كۇشپەن ىلگەرىلەتىپ، ءبىر قىدىرۋ دامۋ جەتىستىكتەرىنە قول جەتكىزدى، جۇڭگو جاق بۇعان شىنايى قۋانادى. باۋىرلاس چاۋشيان حالقىنىڭ ەڭبەك پارتياسىنىڭ 9 - قۇرىلتايىندا العا قويىلعان نىسانا - مىندەتتەردى، ءسوز جوق، جۇزەگە اسىرىپ، پارتيا مەن مەملەكەت قۇرىلىسى ىستەرىنىڭ جاڭا جاعدايىن ۇزدىكسىز اشاتىندىعىنا سەنەمىن.
شي جينپيڭ بىلاي دەپ باسا دارىپتەدى: جۇڭگو مەن چاۋشيان ءبىر - بىرىنە قارايلاساتىن، تاعدىرلاس سوتسياليستىك دوس كورشىلەر. جۇڭگو - چاۋشيان قاتىناسىن ويداعىداي قورعاۋ، ويداعىداي بەكەمدەۋ، ويداعىداي دامىتۋ باستان - اياق جۇڭگو پارتياسى مەن ۇكىمەتىنىڭ بۇلجىماس باعىتى سانالادى. بيىل 6 - ايدا مەن چاۋشياندا مەملەكەتتىك ساپاردا بولىپ، سىزبەن تاعى دا ديدارلاسىپ، ەكى پارتيا، ەكى ەل قاتىناسى دامۋىنىڭ تىڭ پاراعىن اشتىم. مەن باس شۋجي جولداسپەن بىرگە قۇلشىنىپ، ەكى پارتيانىڭ، ەكى ەلدىڭ قاتىناسىنا ستراتەگيالىق جەتەكشىلىكتى ۇزدىكسىز كۇشەيتىپ، ءوز پارتيالارىنىڭ، ەلدەرىنىڭ ىستەرىنىڭ دامۋىن قول ۇستاسا ىلگەرىلەتىپ، ەكى ەل حالقىنىڭ باقىتى مەن دوستىعىن ۇزدىكسىز نىعايتىپ، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن جەبەۋگە اناعۇرلىم زور ۇلەس قوسۋدى قالايمىن.