كەلەسى 5 جىلدا ەمدەلۋ مەن بالالى بولۋ جاعىندا جاڭا وزگەرىس بولادى

9 – ايدىڭ 14 –كۇنى مەملەكەتتىك كەڭەستىڭ اقپارات كەڭسەسى سالاماتتى جۇڭگو قۇرىلىسىندا شەشۋشى سيپاتتى ىلگەرىلەۋشىلىككە قول جەتكىزۋ جاعدايى جونىندە ”’15 - بەسجىلدىق‘ باستاماسىنا قادام تاستاۋ“ اتتى تاقىرىپتىق اقپارات جاريالاۋ ءماجىلىسىن وتكىزدى. ماجىلىستە مەملەكەتتىك دەنساۋلىق ساقتاۋ - سالاماتتىق كوميتەتىنىڭ مەڭگەرۋشىسى لەي حايچاۋ ءتىلشىنىڭ سۇراۋىنا جاۋاپ بەرگەندە، «حالىق دەنساۋلىعىنىڭ ”15 - بەسجىلدىق“ جوسپارىندا» (تومەندە قىسقارتىلىپ «جوسپار» دەپ اتالادى) كورسەتىلگەن ءۇش ءتۇرلى كورسەتكىشتىك وزگەرىستى ايتىپ ءوتتى، بۇل وزگەرىستەر الداعى بەس جىلداعى ەمدەلۋگە، بالالى بولۋعا جانە ورتاشا عۇمىر جاسىنا سايادى.

شيپاگەرلەر مەن سەسترالار سانى كورنەكتى ارتادى

ناۋقاستى ”اسىعىس - ۇسىگىس“ ەمدەۋ جاعدايى ەندىگارى تۋىلمايدى

كەلەسى بەس جىلدا ەلىمىزدىڭ شيپاگەرلەر مەن سەسترالار قوسىنى كەڭ كولەمدە ارتتىرىلىپ، ساپاسى جوعارىلاتىلادى. 2030 - جىلعا بارعاندا كاسىپتىك شيپاگەرلەردىڭ (كاسىپتىك كومەكشى شيپاگەرلەردى قامتىمايدى) سانى 5 ميلليونعا، تىزىمگە الىنعان سەسترالاردىڭ سانى 7 ميلليونعا جەتكىزىلەدى. 2025 - جىلداعى نەگىزگى سانمەن سالىستىرعاندا، كاسىپتىك شيپاگەرلەردىڭ سانى 500 مىڭنان استام، تىزىمگە الىنعان سەسترالاردىڭ سانى 900 مىڭنان استام ارتادى.

لەي حايچاۋ مىنانى ءبىلدىردى: كورسەتكىشتە تەك سان عانا ەمەس، ساپالىق وزگەرىس تە كورسەتىلگەن — ”14 - بەسجىلدىق“، ”13 - بەسجىلدىق“ مەزگىلىندەگى كورسەتكىشتەگى كاسىپتىك شيپاگەرلەر مەن كاسىپتىك كومەكشى شيپاگەرلەردىڭ سانىن بىرىكتىرىپ ەسەپتەۋمەن ۇقسامايتىن جەرى، ”15 - بەسجىلدىق“ مەزگىلىندەگى كورسەتكىشتە كاسىپتىك شيپاگەرلەردىڭ سانى بولەك ەسەپتەلەدى. كاسىپتىك شيپاگەرلەر دياگنوز قويۋ، ەمدەۋ قيمىلىن دەربەس ىستەي الادى، بۇل بولماشى رەتتەۋ ەمدەۋ ساپاسىنا اناعۇرلىم جوعارى تالاپ قويىلاتىنىن ءارى ساپانى جوعارىلاتۋ الدىمەن دامىتىلاتىن ورىنعا قويىلاتىنىن كورسەتەدى.

بالالاردىڭ ياسليگە قابىلدانۋ سالىستىرماسى تاعى 6 پايىز جوعارىلايدى

بالالى بولۋداعى اۋىرتپالىق ونان ارى جەڭىلدەتىلەدى

”وتكەن جىلدان باستاپ بالا باعۋ قوسىمشا قاراجاتىن تاراتۋ باستالدى، وسىنىڭ ارقاسىندا 30 ميلليوننان استام وتباسى يگىلىككە كەنەلىپ، وتباسىلاردىڭ تۋىت، بالا باعۋ جانە بالانى وقىتۋ جاقتارىنداعى وزىندىك قۇنىن تومەندەتتى“، - دەپ تانىستىردى لەي حايچاۋ، ”15 - بەسجىلدىق“ مەزگىلىندە، ياسلي مەن بالالار باقشاسىن ءبىر تۇلعالاندىرۋدى ۇزدىكسىز ىلگەرىلەتىپ، الەۋمەتتىك اۋماقتاردىڭ، ادام ىستەتۋشى ورىنداردىڭ ياسلي قۇرىلىمدارىن اشۋىنا قولداۋ كورسەتىپ، تۇرعىنداردىڭ جاقىن ماڭدا، قولايلى تۇردە ءارى قولجەتىمدى باعادا بالانى ياسليگە بەرۋىنە مۇمكىندىك جاسايدى.

بالا باعۋدىڭ قيىن بولۋىنا باعىتتاي وتىرىپ، «جوسپاردا» بەس جىل ىشىندە 3 جاستان تومەنگى سابيلەردىڭ ياسليگە قابىلدانۋ سالىستىرماسىن تاعى دا 6 پايىز جوعارىلاتۋ ايقىندالعان.

مەملەكەتتىك دەنساۋلىق ساقتاۋ - سالاماتتىق كوميتەتىنىڭ اقپارات مالىمدەمەشىسى، ورىنباسار مەڭگەرۋشىسى گو يانحۇڭ مىنانى ءبىلدىردى: بالا باعۋ قوسىمشا قاراجاتى ءتۇزىمىن ىشكەرىلەي اتقارىپ، ياسلي مەن بالالار باقشاسىن ءبىر تۇلعالاندىرۋ جاعىندا جالپىعا ءتيىمدى قىزمەت وتەۋدى كۇش سالا دامىتىپ، ياسلي كەزەڭىندەگى قىزمەت وتەۋ جۇيەسىن كەمەلدەندىرىپ، بالالى بولعان وتباسىلاردىڭ اناعۇرلىم كوپ ساپالى، قولايلى جانە جالپىعا ءتيىمدى تاڭداۋ جاساۋ مۇمكىندىگىنە يە بولۋىنا جاعداي جاراتىلادى.

ورتاشا عۇمىر ءسۇرۋ نىساناسى 80 جاسقا جوعارىلايدى

بۇكىل حالىقتىڭ سالاماتتىق ورەسى ونان ارى جوعارىلايدى

”15 - بەسجىلدىق“ مەزگىلىندە، حالىقتىڭ مەجەلى عۇمىرى 2025 - جىلداعى 79.25 جاستان 2030 - جىلى 80 جاسقا جوعارىلايدى. لەي حايچاۋ مىنانى اتاپ كورسەتتى: ءبىر ميلليارد 400 ميلليوننان استام حالقى بار مەملەكەت جونىنەن العاندا، بۇل تەك جاي ستاتيستيكالىق سيفىر عانا ەمەس، ءتۇرلى جاقتاردان قاجىرلى ەڭبەك ەتۋدى، ۇزدىكسىز قۇلشىنۋدى قاجەت ەتەدى. ەلىمىز جەرى كەڭ، قالا مەن اۋىلدىڭ اراسىنداعى پارىق زور، 80 جاس جاساۋ وڭايعا سوقپايدى، قىزمەت وتەۋ جۇيەسىنىڭ پارمەندى تىرەك ازىرلەۋىن قاجەت ەتەدى.

كەلۋ قاينارى: حالىق تورابى