بازاردى باقىلاۋ – باسقارۋدا ”تۇڭعىش رەت قايشىلىق جاساعانداردى جازالاماۋدىڭ“ ءبىرتۇتاس ولشەمى بەلگىلەندى

حالىق گازەتىنىڭ 11 - ايدىڭ 12 – كۇنى بەيجيڭنەن بەرگەن حابارى. بازاردى باقىلاۋ - باسقارۋ باس مەكەمەسى تاياۋدا «بازاردى باقىلاۋ - باسقارۋداعى اكىمشىلىك جازا بەلگىلەۋ بەلگىلەمەسىن» شىعارىپ، تاراۋلاردىڭ ەرەجە - تارتىپتەرى فورماسىمەن بازاردى باقىلاۋ - باسقارۋداعى اكىمشىلىك جازا بەلگىلەۋ ۇقىعىن ارناعا ءتۇسىرۋ جونىندە جۇيەلى بەلگىلەمە شىعاردى. اكىمشىلىك جازا بەلگىلەۋ مولشەرىن جازالاماۋ، جەڭىلدەتىپ جازالاۋ، جەڭىل جازالاۋ، ادەتتەگى جازالاۋ، اۋىر جازالاۋ سىندى بەس ساتىعا بولۋگە بولادى ءارى ءارقايسى ساتىلاردىڭ قولدانىلۋ جاعدايى جونىندە ناقتى بەلگىلەمەلەر جاسالدى.

قوعامدىق نازار اۋدارۋ دارەجەسى ءبىرشاما جوعارى بولعان ”تۇڭعىش رەت قايشىلىق جاساعاندارعا جازا قولدانباۋ“ ءتۇزىمى جونىندە بازاردى باقىلاۋ - باسقارۋ باس مەكەمەسى زاڭ - ەرەجە مەڭگەرمەسىنىڭ جاۋاپتىسى تانىستىرىپ بىلاي دەدى: اكىمشىلىك جازا زاڭىندا بەلگىلەنگەن ”تۇڭعىش رەت قايشىلىق جاساعاندارعا جازا قولدانباۋ“ دەگەنىمىز ”زاڭعا تۇڭعىش رەت قايشىلىق جاساۋ“، ”زالالدى زاردابى جەڭىل بولۋ“، ”دەر كەزىندە تۇزەتۋ“ سىندى ءۇش ءتۇرلى زاڭدىق ماڭىزدى شارتتى ءبىر ۋاقىتتا قاناعاتتاندىرۋى كەرەك، ءۇش ماڭىزدى شارتتىڭ بىرەۋى كەم بولسا بولمايدى. ”زاڭعا تۇڭعىش رەت قايشىلىق جاساۋدى“ جازالاماۋدىڭ نەگىزى ەتۋگە بولمايدى.

بەلگىلەمەدە ”زاڭعا تۇڭعىش رەت قايشىلىق جاساۋدىڭ“ انىقتاماسى ايقىندالدى. زاڭعا تۇڭعىش رەت قايشىلىق جاساۋ دەپ ىسكە قاتىستى ادامنىڭ ەكى جىل ىشىندە تۇڭعىش رەت وسى سيپاتتاعى زاڭعا قايشى ارەكەتتى ىستەۋى ايتىلادى؛ ازاماتتاردىڭ ءومىرى مەن دەنساۋلىعىنا، فينانس حاۋىپسىزدىگىنە ساياتىن بولسا، سونداي - اق زالالدى زارداپقا سايسا، جوعارىدا ايتىلعان مەرزىم شەگى 5 جىل بولادى. سونىمەن بىرگە، مەرزىم شەگىن ەسەپتەۋ ءتاسىلىن، ۇقساس سيپاتتاعى زاڭعا قايشى ارەكەتتەردى تۇراقتاندىرۋ ولشەمىن ايقىنداۋ كەرەك. زياندى زارداپتىڭ جەڭىل - جەلپى بولۋىن مىناداي فاكتورلاردى جان - جاقتى ويلاستىرۋ ارقىلى تۇراقتاندىرۋعا بولادى، مىسالى، زارداپ شەككەندەر جەڭىل جاراقات الۋ، زارداپ شەگۋ كولەمى كىشكەنە بولۋ، زارداپتى وڭاي جويۋعا بولۋ قاتارلىلار. بازاردى باقىلاۋ - باسقارۋ تاراۋلارى ىسكە قاتىستى ادامنىڭ زاڭعا قايشى ارەكەتىن بايقاسا نەمەسە تۇزەتۋگە بۇيىرۋدان بۇرىن ىرىقتىلىقپەن تۇزەتسە، دەر كەزىندە تۇزەتتى دەپ قاراۋعا بولادى.

بەلگىلەمەدە اكىمشىلىك جازا بەلگىلەۋ بارىسىندا ويلاستىرۋعا ءتيىستى ءتۇرلى فاكتورلار اشالانىپ، جالپىلىق جازا بەلگىلەۋگە ايقىن جەتەكشىلىك ەتىلىپ، جالاڭ جاعدايعا عانا نەگىزدەلىپ جازا بەرۋدەن ساقتاندى.