2026.11.19 14:25 كەلۋ قاينارى : حالىق تورابى
قىس پەن كوكتەم ماۋسىمدارى جۇقپالى تۇماۋ قاتارلى تىنىس جولى جۇقپالى اۋرۋلارى ءجيى تۋىلاتىن مەزگىل سانالادى. اۆتونوميالى رايوندىق اۋرۋدان ساقتانۋ جانە ونى تىزگىندەۋ مەكەمەسى دەنساۋلىققا قاتىستى ەسكەرتپە جاريالادى: ۆاكسينا ەكتىرۋ — جۇقپالى تۇماۋدان ساقتانۋدىڭ ەڭ ءونىمدى شاراسى، جىلىنا ەكتىرگەن ابزال، ءتۇيىندى توپتارداعى ادامدار ۆاكسينانى الدىمەن ەكتىرگەنى ءجون.
جۋىردان بەرى، ەلىمىزدە جۇقپالى تۇماۋدىڭ تارالۋى تولقۋلى كۇيدەگى ارتۋ بەتالىسىن بايقاتتى. اۆتونوميالى رايوندىق اۋرۋدان ساقتانۋ جانە ونى تىزگىندەۋ ورتالىعى شۇعىل جۇقپالى اۋرۋلاردان ساقتانۋ – تىزگىندەۋ باسقارماسىنىڭ مەڭگەرۋشىسى فۇرحات وشۇر بىلاي دەپ تانىستىردى: بيىل جۇقپالى ۆيرۋس تۇبىرىندە جاڭا ەرەكشەلىكتەر بايقالدى: A تيپتى H3N2 ۆيرۋسى، A تيپتى H1N1 ۆيرۋسى، B تيپتى ۆيرۋستىڭ ءۇش توبى بىرگە جاندانىپ، ۆيرۋس قۇرامى اناعۇرلىم كۇردەلىلەندى. مۇنىڭ ىشىندە، شينجياڭدا A تيپتى H1N1 جۇقپالى تۇماۋى باستى ورىندا بولعان، A تيپتى H3N2 مەن B تيپتى جۇقپالى تۇماۋ قاباتتاسىپ تارالعان.
شينجياڭ مەديتسينا داشۋەسىنە قاراستى 4 - ەمحاناداعى (اۆتونوميالى رايوندىق جۇڭگوشا شيپاگەرلىك ەمحاناسى) وكپە اۋرۋلارى 2 - ءبولىمىنىڭ جاۋاپتىسى، مەڭگەرۋشى شيپاگەر باي ۋىنمەي: ”جۇقپالى تۇماۋدان اۋىر ناۋقاسقا شالدىققانداردا ۆيرۋستىق وكپە قابىنۋى، سوزىلمالى باكتەريالىق وكپە قابىنۋى، تىنىس الۋدىڭ شۇعىل قيىنداسۋى سيندرومى، ەستەن تانۋ، جايىلمالى قان تامىرلاردىڭ ىشكى بولىگىندە قان ۇيۋ، جۇرەك - قان تامىر جانە نەرۆ جۇيەسى قاتارلى وكپەدەن سىرت اۋرۋ بەلگىلەرى مەن كوپ ءتۇرلى قوسالقى اۋرۋ جارىققا شىعادى“، - دەپ تانىستىردى. قارتتار، سابيلەر، نارەستەلەر، سوزىلمالى اۋرۋعا شالدىققاندار جۇعىمدالعان جاعدايدا، قوسالقى اۋرۋ وڭاي تۋىلادى.
كەلۋ قاينارى: حالىق تورابى