2026.11.19 16:16 كەلۋ قاينارى : حالىق تورابى

11 - ايدىڭ 18 - كۇنى تۇستەن كەيىن مەملەكەت ءتوراعاسى شي جينپيڭ شىنجىن باۋ - ان حالىقارالىق اۋەجايىندا ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ماجىلىسىنە قاتىناسۋ ءۇشىن جۇڭگوعا كەلگەن ا ق ش - نىڭ زۇڭتۇڭى ترامپتى قارسى الدى.
سۋرەتتى شينحۋا اگەنتتىگىنىڭ ءتىلشىسى يان بوگۋ تۇسىرگەن.
«حالىق گازەتى»، 11 - ايدىڭ 18 - كۇنى، شىنجىن (تىلشىلەر ۋاڭ رۇڭ، چىن زىحان). مەملەكەت ءتوراعاسى شي جينپيڭ 11 - ايدىڭ 18 - كۇنى تۇستەن كەيىن شىنجىن باۋ - ان حالىقارالىق اۋەجايىندا ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ماجىلىسىنە قاتىناسۋ ءۇشىن جۇڭگوعا كەلگەن ا ق ش - نىڭ زۇڭتۇڭى ترامپتى قارسى الدى.
قوناق قابىلداۋ مۋزىكاسىنىڭ اۋەلەۋىندە شي جينپيڭ ترامپپەن ىقىلاسپەن قول الىستى. 3 ارميانىڭ قۇرمەت قاراۋىلى مىلتىقتى سەرت ۇستاپ قۇرمەت ءبىلدىردى، جاس وسپىرىمدەر ترامپقا گۇل ۇسىندى. جۇڭگو مەن ا ق ش - نىڭ مەملەكەت تۋى جەلبىرەپ، اسكەري وركەستر ەكى ەلدىڭ مەملەكەت ءانىن ورىندادى، سوعىس ۇشاعى ۇشىپ قۇرمەت ءبىلدىردى. ەكى ەلدىڭ مەملەكەت باسشىلارى جاستاردىڭ قارسى الۋ قوسىنىنا قول بۇلعاپ قۇرمەت ءبىلدىردى.
شي جينپيڭ مىنالاردى ءبىلدىردى: بيىل 9 - ايدا مەن ا ق ش - عا ساپارلاي بارعانىمدا، ترامپ زۇڭتۇڭ مەن حانىمى اۋەجايعا ارنايى بارىپ قارسى الدى ءارى سالتاناتتى قارسى الۋ سالتىن وتكىزدى. جۇڭگو _ ادەپتى دە يبالى ەل، جالعاسىپ كەلگەن ادەپ - يبا ءداستۇرى بار. مەن ءسىزدىڭ جۇڭگوعا تاعى دا ساپارلاي كەلگەنىڭىزدى قارسى الامىن، سىزبەن بىرگە جۇڭگو - ا ق ش قاتىناسىنا، ازيا - تىنىق مۇحيت سەلبەستىگىنە جانە دۇنيە ءجۇزى جاعدايىنا ساياتىن كەلەلى ماسەلەلەر جونىندە ىشكەرىلەي پىكىر اۋىستىرىپ، جۇڭگو مەن ا ق ش - نىڭ قۇرمەت، ادىلدىك، تەڭدىك نەگىزىندەگى سىندارلى ستراتەگيالىق ورنىقتى قاتىناسىنىڭ العا قاراي دامۋىن ىلگەرىلەتۋدى ءۇمىت ەتەمىن.
ترامپ مىنالاردى ءبىلدىردى: ءتوراعا شي جينپيڭنىڭ اۋەجايعا كەلىپ قارسى العانىنا العىس ايتامىن، جۇڭگونىڭ ەرەكشە ورنالاستىرۋىنا العىس ايتامىن، ۇلى جۇڭگوعا تاعى دا ساپارلاي كەلگەنىمە وتە قۋانىشتىمىن. ءتوراعا شي جينپيڭ _ ۇلى كوسەم، ءار جولى ءتوراعا شي جينپيڭمەن كەزدەسكەنىمە توتەنشە قۋانامىن، وسى رەتكى ساپاردىڭ ەكى ەل قاتىناسىن ونان ارى ىلگەرىلەتەتىنىنە، تولىق تابىسقا جەتەتىنىنە سەنەمىن.
ساي چي، ۋاڭ ي، حۋاڭ كۇنميڭ قاتىناستى.
كەلۋ قاينارى: حالىق تورابى