2026.11.19 16:16 كەلۋ قاينارى : حالىق تورابى

11 - ايدىڭ 18 - كۇنى تۇستەن بۇرىن مەملەكەت ءتوراعاسى شي جينپيڭ شىنجىندە ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ماجىلىسىنە قاتىناسۋ ءۇشىن جۇڭگوعا كەلگەن كورەيانىڭ زۇڭتۇڭى لي زايميڭمەن كەزدەستى.
سۋرەتتى شينحۋا اگەنتتىگىنىڭ ءتىلشىسى ۋاڭ يە تۇسىرگەن.
«حالىق گازەتى»، 11 - ايدىڭ 18 - كۇنى، شىنجىن (تىلشىلەر حى لينپيڭ، لين شياۋشي). مەملەكەت ءتوراعاسى شي جينپيڭ 11 - ايدىڭ 18 - كۇنى تۇستەن بۇرىن شىنجىندە ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ماجىلىسىنە قاتىناسۋ ءۇشىن جۇڭگوعا كەلگەن كورەيانىڭ زۇڭتۇڭى لي زايميڭمەن كەزدەستى.
شي جينپيڭ مىنالاردى اتاپ كورسەتتى: جۇڭگو مەن كورەيا _ دوس كورشىلەر جانە ستراتەگيالىق سەلبەستىك سەرىكتەرى. ەكى ەلدىڭ مەملەكەت جاعدايى ۇقساماعانىمەن، حالىقتىڭ باقىتىن كوزدەۋ نىساناسى ۇقساس. كەلەر جىلى _ جۇڭگو مەن كورەيانىڭ ديپلوماتيالىق قاتىناس ورناتقاندىعىنىڭ 35 جىلدىعى، ەكى جاق وسىنى وراي ەتىپ، تاجىريبەلەردى قورىتىندىلاپ، بولاشاقتى جوسپارلاپ، جۇڭگو - كورەيا قاتىناسىنىڭ ورنىقتى دامۋىن ىلگەرىلەتىپ، ەكى ەل حالقىنا ءتىپتى دە زور باقىت جاراتۋى كەرەك. ەكى جاق ستراتەگيالىق دەربەستىككە تاباندى بولىپ، ەكى ەل قاتىناسىنىڭ ساياسي نەگىزىن ويداعىداي قورعاپ، جۇڭگو - كورەيا قاتىناسىن ويداعىداي بەكەمدەۋ، ويداعىداي دامىتۋ كەرەك. ەكى ەل ساياسي پارتيالارىنىڭ، ۇكىمەتتەرىنىڭ، زاڭ شىعارۋ قۇرىلىمدارىنىڭ ەل باسقارۋ تاجىريبەلەرىن اۋىستىرۋدى كۇشەيتىپ، ءوزارا ءتۇسىنىسۋدى كۇشەيتىپ، بىرگە دامۋدى جەبەۋى كەرەك. جۇڭگو مەن كورەيا ەركىن ساۋدا كەلىسىمىنىڭ 2 - كەزەڭدىك كەلىسسوزىن ماندىك جاقتان ورىندادى، بۇل ءوزارا پايدا جەتكىزىپ، تەڭ يگىلىككە كەنەلۋدىڭ تاماشا جاعدايىن بەكەمدەۋگە ءتيىمدى. ەكى جاق وسى تۇزىمدىك ورنالاستىرۋدان ويداعىداي، تولىق پايدالانىپ، ماكرولىق ساياساتتى سايكەستىرۋدى كۇشەيتىپ، جاساندى زەردە سياقتى جاڭادان گۇلدەنگەن عىلىم - تەحنيكا كاسىبى سەلبەستىك ەكولوگياسىن جەتىلدىرىپ، دامۋ ورايىنان بىرگە يگىلىكتەنۋى كەرەك. جۇڭگو كورەيامەن بىرگە ەكى ەل ادامدارىنىڭ بارىس - كەلىسىن ۇزدىكسىز جەبەپ، اقاۋسىز، پايدالى مادەنيەت اۋىس - كۇيىسىن بىرتىندەپ ورىستەتۋدى قالايدى.
شي جينپيڭ مىنالاردى باسا دارىپتەدى: قازىر حالىقارالىق جاعدايدا بىلىقپالىق ءورشىپ تۇر، جۇڭگو مەن كورەيا _ كوپ جاقتىلىق پەن ەركىن ساۋدانىڭ يگىلىگىن كورۋشىلەر. ەكى جاق كوپ جاقتى سەلبەستىكتى اناعۇرلىم كۇشەيتىپ، ناعىز كوپ جاقتىلىقتى بىرگە امالياتتا ايگىلەپ، ازيا - تىنىق مۇحيت ورتاق تۇلعاسى مەن ازيا - تىنىق مۇحيت ەركىن ساۋدا رايونى قۇرىلىسىن ىلگەرىلەتىپ، ءوڭىردىڭ بەيبىتشىلىگى مەن دامۋىنا اناعۇرلىم زور ۇلەس قوسىپ، دۇنيە جۇزىلىك كاسىپ تىزبەگىنىڭ قامداۋ تىزبەگىنىڭ ورنىقتى، ىركىلىسسىز بولۋىن قورعاپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتۋدى ىلگەرىلەتۋى كەرەك.
لي زايميڭ مىنالاردى ءبىلدىردى: ءتوراعا شي جينپيڭ ەكەۋىمىزدىڭ ستراتەگيالىق جەتەكشىلىگىمىزدە كورەيا - جۇڭگو قاتىناسىنىڭ جاپپاي قالپىنا كەلۋ اۋقىمى ۇزدىكسىز بەكەمدەلىپ، ەكى جاقتى ەكونوميكا - ساۋدا سەلبەستىگى جەدەل ارتىپ، ادامداردىڭ بارىس - كەلىسى جيىلەپ، ءوزارا تانىمى ۇزدىكسىز جاقسارىپ، ەكى ەل حالقىنا ناقتى باقىت اكەلدى. كورەيا ءبىر جۇڭگو ساياساتىنا تاباندى بولادى ءارى ونى وزگەرتپەيدى، كەلەر جىلى ەكى ەلدىڭ ديپلوماتيالىق قاتىناس ورناتقاندىعىنىڭ 35 جىلدىعىن وراي ەتىپ، جۇڭگومەن جوعارى جىكتەگىلەردىڭ بارىس - كەلىسىن جيىلەتىپ، ساۋدا، قارجى قوسۋ، ءوندىرۋ، قامداۋ تىزبەگى سياقتى سەلبەستىكتى كۇشەيتۋدى، حالىق تىلەگىنىڭ توعىسۋىن جەبەۋدى، كورەيا مەن جۇڭگونىڭ اناعۇرلىم پىسىپ - جەتىلگەن ستراتەگيالىق سەرىكتەستىك قاتىناسىن ورناتۋدى ىلگەرىلەتۋىن قالايدى. كورەيا جۇڭگونىڭ ازيا - تىنىق مۇحيت ەكونوميكالىق سەلبەستىك ۇيىمىنىڭ ءتوراعا ەلى بولعاندىعىن قۇتتىقتايدى ءارى قولدايدى، جۇڭگومەن قول ۇستاسا سەلبەسۋدى، بىرگە گۇلدەنگەن ازيا - تىنىق مۇحيت ورتاق تۇلعاسىن قۇرۋدى قالايدى.
ساي چي، ۋاڭ ي، حۋاڭ كۇنميڭ قاتارلىلار كەزدەسۋدە بىرگە بولدى.
كەلۋ قاينارى: حالىق تورابى