شي جينپيڭ امەريكا زۇڭتۇڭى بايدەنمەن بەينە ەكراندا سويلەستى
2022.03.21 16:28 كەلۋ قاينارى : حالىق تورابى
 |
3 - ايدىڭ 18 - كۇنى كەشتە مەملەكەت ءتوراعاسى شي جينپيڭ بەيجيڭدە ۇسىنىس بويىنشا امەريكا زۇڭتۇڭى بايدەنمەن بەينە ەكراندا سويلەستى. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
|
شينحۋا اگەنتتىگى، 3 - ايدىڭ 18 - كۇنى، بەيجيڭ. مەملەكەت ءتوراعاسى شي جينپيڭ 3 - ايدىڭ 18 - كۇنى كەشتە ۇسىنىس بويىنشا امەريكا زۇڭتۇڭى بايدەنمەن بەينە ەكراندا سويلەستى. ەكى ەلدىڭ مەملەكەت باسشىلارى جۇڭگو - امەريكا قاتىناسى جانە ۋكراينا جاعدايى سياقتى بىردەي نازار اۋدارىپ وتىرعان ماسەلەلەر جونىندە بۇكپەسىز، ىشكەرىلەي پىكىر اۋىستىردى.
بايدەن مىنالاردى ءبىلدىردى: 50 جىلدىڭ الدىندا امەريكا مەن جۇڭگو ەكى ەل ماڭىزدى تاڭداۋ جاساپ، «شاڭحاي مازمۇنداماسىن» جاريالادى. 50 جىلدان كەيىنگى بۇگىنگى كۇندە امەريكا - جۇڭگو قاتىناسى تاعى ءبىر شەشۋشى ساتتە تۇردى، امەريكا - جۇڭگو قاتىناسىنىڭ قالاي دامۋى 21 - عاسىرداعى دۇنيە ءجۇزى اۋقىمىن تۇلعالايدى. مەن مىنانى قايتالاي دارىپتەيمىن: امەريكا جۇڭگومەن «جاڭا قىرعي قاباقتىق سوعىس» جۇرگىزۋدى قاراستىرمايدى، جۇڭگونىڭ ءتۇزىلىسىن وزگەرتۋدى قاراستىرمايدى، وداقتاستىق قاتىناستى كۇشەيتۋ ارقىلى جۇڭگوعا قارسى تۇرۋدى قاراستىرمايدى، «تايۋان دەربەستىگىن» قولدامايدى، جۇڭگومەن قاقتىعىسۋ نيەتى جوق. امەريكا جاق جۇڭگو جاقپەن بۇكپەسىز تىلدەسىپ، سەلبەستىكتى كۇشەيتۋدى، ءبىر جۇڭگو ساياساتىندا تاباندى بولۋدى، باسەكە مەن الاۋىزدىقتاردى ءونىمدى تىزگىندەپ، امەريكا - جۇڭگو قاتىناسىنىڭ ورنىقتى دامۋىن ىلگەرىلەتۋدى قالايدى. مەن ءتوراعا شي جينپيڭمەن ءجيى پىكىرلەسۋدى جالعاستىرىپ، امەريكا - جۇڭگو قاتىناسى ءۇشىن تىزگىن ۇستاپ، باعدار بەلگىلەۋدى قالايمىن.
شي جينپيڭ بىلاي دەپ اتاپ كورسەتتى: بىلتىر 11 - ايدا ءبىز تۇڭعىش رەت بۇلتتىق جۇيەدە ديدارلاسقاننان بەرى حالىقارالىق جاعدايدا جاڭا، ەلەۋلى وزگەرىستەر تۋىلدى. بەيبىتشىلىك پەن دامۋ سىندى ءداۋىر تاقىرىبى اۋىر سىن - سايىسقا تاپ بولدى، دۇنيە ءجۇزى بەيبىت ەمەس، تىنىش تا ەمەس. بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلدەرى جانە دۇنيە جۇزىندە الدىڭعى ەكى ورىندا تۇراتىن ءىرى ەكونوميكالىق تۇلعالار رەتىندە، ءبىز جۇڭگو - امەريكا قاتىناسىنىڭ دۇرىس ارنامەن العا دامۋىنا جەتەكشىلىك ەتىپ قانا قويماي، وتەۋگە ءتيىستى حالىقارالىق جاۋاپكەرلىگىمىزدى ارقالاپ، دۇنيە ءجۇزىنىڭ بەيبىتشىلىگى مەن تىنىشتىعى ءۇشىن قۇلشىنىس جاساۋىمىز كەرەك.
شي جينپيڭ بىلاي دەپ دارىپتەدى: زۇڭتۇڭ مىرزا ەكەۋىمىز دە جۇڭگو مەن امەريكانىڭ ءوزارا قۇرمەت ەتۋىن، بەيبىت قاتار تۇرۋىن، قارسىلاسۋدان ساقتانۋىن قۇپتايمىز، ەكى جاقتىڭ ءار دەڭگەيدەگى، ءار سالاداعى بايلانىستى، تىلدەسۋدى كۇشەيتۋ كەرەكتىگىنە قوسىلامىز. زۇڭتۇڭ مىرزا جاڭا عانا امەريكا جاقتىڭ «اڭا قىرعي قاباقتىق سوعىس» جۇرگىزۋدى قاراستىرمايتىنىن، جۇڭگونىڭ ءتۇزىلىسىن وزگەرتۋدى قاراستىرمايتىنىن، وداقتاستىق قاتىناستى كۇشەيتۋ ارقىلى جۇڭگوعا قارسى تۇرۋدى قاراستىرمايتىنىن، «تايۋان دەربەستىگىن» قولدامايتىنىن، جۇڭگومەن قاقتىعىسۋ نيەتى جوق ەكەنىن قايتالاي دارىپتەپ ءوتتى. ءسىزدىڭ بۇل ەمەۋرىنىڭىزگە مەن ايرىقشا ءمان بەرەمىن.
شي جينپيڭ بىلاي دەپ اتاپ كورسەتتى: قازىر جۇڭگو - امەريكا قاتىناسى امەريكانىڭ الدىڭعى كەزەك ۇكىمەتى تۋدىرعان تىعىرىقتان ءالى شىعا العان جوق، كەرىسىنشە اناعۇرلىم كوپ سىن - سايىسقا تاپ بولۋدا. وتە - موتە، امەريكاداعى كەيبىرەۋلەر «تايۋان دەربەستىگى» كۇشتەرىنە قاتە سيگنال بەرىپ وتىر، بۇل ايرىقشا قاتەرلى. تايۋان ماسەلەسى ويداعىداي ءبىر جاقتى ەتىلمەسە، ەكى ەلدىڭ قاتىناسىنا ويرانداۋ سيپاتتى ىقپال جاسايدى. امەريكا جاقتىڭ بۇعان جەتكىلىكتى ءمان بەرۋىن ءۇمىت ەتەمىن. جۇڭگو - امەريكا قاتىناسىندا قازىرگىدەي جاعدايدىڭ تۋىلۋىنىڭ تىكەلەي سەبەبى امەريكا جاقتاعى كەيبىرەۋلەردىڭ ءبىز ەكەۋىمىز كەلىسكەن ماڭىزدى ورتاق تانىمدى تياناقتاندىرماۋىنان، سونداي - اق زۇڭتۇڭ مىرزانىڭ بەلسەندى ەمەۋرىنىن ناقتى تياناقتاندىرماۋىنان بولعان. امەريكا جاق جۇڭگو جاقتىڭ ستراتەگيالىق ماقساتى جونىندە اعات تۇسىنىك، قاتە تۇجىرىم جاسادى.
شي جينپيڭ بىلاي دەپ دارىپتەدى: جۇڭگو مەن امەريكا اراسىندا الاۋىزدىقتار بۇرىن بولعان، قازىر دە بار، بولاشاقتا دا الاۋىزدىقتار بولادى. شەشۋشى ءتۇيىن الاۋىزدىقتاردى ويداعىداي تىزگىندەۋدە. ورنىقتى داميتىن جۇڭگو - امەريكا قاتىناسى ەكى جاققا دا پايدالى.
ەكى جاق قازىرگى ۋكراينا جاعدايى جونىندە پىكىر اۋىستىردى.
بايدەن امەريكا جاقتىڭ تۇرعىسىن تانىستىرىپ، جۇڭگو جاقپەن بايلانىس جاساۋدى، جاعدايدىڭ شيەلەنىسۋىنەن ساقتانۋدى قالايتىنىن ءبىلدىردى.
شي جينپيڭ بىلاي دەپ اتاپ كورسەتتى: ۋكراينا جاعدايىنىڭ ۋشىعىپ وسى كۇنگە جەتكەنىن جۇڭگو جاق قالامايدى. جۇڭگو جاق ەجەلدەن بەيبىتشىلىكتى دارىپتەپ كەلەدى، سوعىسقا قارسى تۇرادى، بۇل − جۇڭگونىڭ تاريحي مادەنيەت ءداستۇرى. ءبىز ەجەلدەن ءىستىڭ وزىندەگى دۇرىس - بۇرىستى، ورىندى - ورىنسىزدىقتى نەگىزگە الىپ، دەربەس، ءوز - وزىنە قوجايىن بولا وتىرىپ تۇجىرىم جاسايمىز، حالىقارالىق زاڭ مەن جالپى مويىنداعان حالىقارالىق قاتىناستاردىڭ نەگىزگى ولشەمىن قورعاۋدى دارىپتەيمىز، بىرلەسكەن مەملەكەتتەر ۇيىمى ۋستاۆى بويىنشا ءىس بىتىرۋدە تاباندى بولامىز، ورتاق، كەشەندى، سەلبەسەتىن، باياندى حاۋىپسىزدىك كوزقاراسىن جاقتايمىز. بۇل ۇلكەن پرينسيپتەر جۇڭگو جاقتىڭ ۋكراينا داعدارىسىن ءبىر جاقتى ەتۋىنىڭ تياناعى بولىپ تابىلادى. جۇڭگو جاق ۋكرايناداعى گۋمانيتارلىق جاعداي جونىندە 6 ءتۇرلى باستامانى العا قويدى، ۋكرايناعا جانە وسىنىڭ اسەرىنە ۇشىراعان باسقا مەملەكەتتەرگە ىشكەرىلەگەن تۇردە گۋمانيتارلىق كومەك بەرۋدى قالايدى. ءار جاق رەسەي مەن ۋكراينانىڭ تىلدەسۋىنە، كەلىسسوز وتكىزۋىنە، كەلىسسوزدەن ناتيجە شىعارۋىنا، بەيبىتشىلىك بىتىمىنە كەلۋىنە بىرگە قولداۋ كورسەتۋگە ءتيىس. امەريكا مەن ناتو دا رەسەيمەن تىلدەسىپ، ۋكراينا داعدارىسىنىڭ ارتىنداعى تۇيىنشەكتى شەشىپ، رەسەي مەن ۋكراينا ەكى جاقتى حاۋىپسىزدىك تۋرالى الاڭداۋشىلىقتان ارىلتۋعا ءتيىس.
شي جينپيڭ بىلاي دەپ دارىپتەدى: قازىر دۇنيە جۇزىندەگى ءار ەل ايرىقشا قيىن كۇيگە كىرىپتار بولىپ وتىر، جاڭا تيپتى ايدارشا ۆيرۋس وكپە قابىنۋ ىندەتىنە توتەپ بەرۋمەن بىرگە، ەكونوميكانىڭ ارتۋىن قامتاماسىز ەتۋى، حالىق تۇرمىسىن قامتاماسىز ەتۋى كەرەك. ءىرى ەل باسشىلارى رەتىندە، ءبىز دۇنيە جۇزىلىك قولامتالى ماسەلەلەردى لايىقتى شەشۋدى ويلاستىرۋىمىز، ونان دا ماڭىزدىسى، دۇنيە جۇزىلىك تۇراقتىلىق پەن نەشە ميلليارد حالىقتىڭ ءوندىرىس، تۇرمىسىن ويلاستىرۋىمىز كەرەك. جان - جاقتى، پارىقسىز شەكتەۋ قولدانىلسا، ونىڭ زاردابىن ءبارىبىر بۇقارا تارتادى. ەگەر اناعۇرلىم ۋشىعاتىن بولسا، دۇنيە جۇزىلىك ەكونوميكا - ساۋدا، فينانس، ەنەرگيا، استىق، كاسىپ سالاسى تىزبەگى، قامداۋ تىزبەگى سياقتىلاردا اۋىر داعدارىس تۋىلۋعا اپارىپ سوعىپ، ونسىز دا تۇرالاپ تۇرعان دۇنيە ءجۇزى ەكونوميكاسى ءۇشىن جىعىلعان ۇستىنە جۇدىرىق بولىپ، ورنى تولماس زارداپ تۋدىرادى. جاعداي نەعۇرلىم كۇردەلى بولعان سايىن، سابىرلىلىق پەن ۇستامدىلىقتى سولعۇرلىم ساقتاۋ قاجەت. ءارقانداي جاعدايدا دا ساياسي باتىلدىق كورسەتىپ، بەيبىتشىلىك ءۇشىن ءورىس اشىپ، ساياسي جولمەن شەشۋگە مۇمكىندىك قالدىرۋ كەرەك. جۇڭگودا مىناداي 2 ءتامسىل بار: ءبىرى، «جەل سوقپاسا ءشوپتىڭ باسى قيمىلدامايدى»، ەندى ءبىرى، «تۇيىنشەكتى كىم تۇيسە سول شەشۋى كەرەك». مۇندا شەشۋشى ءتۇيىن ىسكە قاتىستى جاقتار ساياسي ىنتا كورسەتىپ، قازىرگى جاعدايدى كوزدەپ، بولاشاقتى بەتكە الىپ، لايىقتى شەشۋ ءادىسىن تابۋى كەرەك، باسقا جاقتاردىڭ دا بۇل ءۇشىن شارت - جاعداي ازىرلەۋىنە بولادى ءارى سولاي ىستەۋگە ءتيىس تە. قازىر كەزەك كۇتتىرمەيتىن جۇمىس − تىلدەسۋدى، كەلىسسوزدى جالعاستىرىپ، جاي بۇقارانىڭ ءولىم - جىتىمىنەن ساقتانۋ، گۋمانيتارلىق داعدارىس تۋىلۋىنان ساقتانىپ، سوعىستى ەرتەرەك توقتاتۋ. ۇزاق بولاشاقتىق جول − ءىرى ەلدەردىڭ ءوزارا قۇرمەت ەتىپ، قىرعي قاباقتىق سوعىس ويىن تاستاپ، توپقا ءبولىنىپ قارسىلاسۋعا بوي ۇرماي، تەپە - تەڭ، ءونىمدى، باياندى دۇنيە جۇزىلىك جانە وڭىرلىك حاۋىپسىزدىك جۇلگەسىن بىرتىندەپ ورناتۋ. جۇڭگو ءار دايىم بەيبىتشىلىك ءۇشىن بار كۇشىن سالىپ كەلەدى، ناتيجەلى رولىن ۇزدىكسىز ساۋلەلەندىرەدى.
ەكى ەلدىڭ مەملەكەت باسشىلارى وسى رەتكى بەينە ەكراندا سويلەسۋ ناتيجەلى بولدى دەپ قاراپ، ەكى ەلدىڭ جۇمىس توپتارىنا دەر كەزىندە قاداعالاي ىلەسىپ، ءىس جۇزىندىك ارەكەت قولدانىپ، جۇڭگو - امەريكا قاتىناسىنىڭ ورنىقتى دامۋ ارناسىنا قايتا ورالۋىنا قول جەتكىزىپ، ۋكراينا داعدارىسىن لايىقتى شەشۋ ءۇشىن ءتيىستى قۇلشىنىستار جاساۋدى تاپسىردى.
ديڭ شۋەشياڭ، ليۋ حى، ۋاڭ ي قاتارلىلار اتالعان قيمىلعا قاتىناستى.
كەلۋ قاينارى: حالىق تورابى
 |
3 - ايدىڭ 18 - كۇنى كەشتە مەملەكەت ءتوراعاسى شي جينپيڭ بەيجيڭدە ۇسىنىس بويىنشا امەريكا زۇڭتۇڭى بايدەنمەن بەينە ەكراندا سويلەستى. سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن
|
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
- ورتالىق
- ەل ءىشى
- شينجياڭ
- حالىقارا
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
سۋرەتتى حابار
لەبىز جازۋ
