شي جينپيڭ ەۆروپا القالار كەڭەسىنىڭ ءتوراعاسى ميچەلمەن كەڭەس وتكىزدى
2022.12.02 16:52 كەلۋ قاينارى : حالىق تورابى
 |
12 - ايدىڭ 1 - كۇنى مەملەكەت ءتوراعاسى شي جينپيڭ بەيجيڭدەگى حالىق سارايىندا ەۆروپا القالار كەڭەسىنىڭ ءتوراعاسى ميچەلمەن كەڭەس وتكىزدى.
سۋرەتتى شينحۋا اگەنتتىگىنىڭ ءتىلشىسى ديڭ لين تۇسىرگەن
|
شينحۋا اگەنتتىگى، 12 - ايدىڭ 1 - كۇنى، بەيجيڭ. 12 - ايدىڭ 1 - كۇنى تۇستەن بۇرىن مەملەكەت ءتوراعاسى شي جينپيڭ حالىق سارايىندا ەۆروپا القالار كەڭەسىنىڭ ءتوراعاسى ميچەلمەن كەڭەس وتكىزدى.
شي جينپيڭ بىلاي دەپ اتاپ كورسەتتى: ءتوراعا ميچەل ەۆروپا وداعىنا مۇشە بارلىق ەل اتىنان ج ك پ - نىڭ 20 - قۇرىلتايى اياقتاپ كوپ وتپەي جۇڭگودا ساپاردا بولىپ، ەۆروپا وداعىنىڭ جۇڭگومەن قارىم - قاتىناسىن دامىتۋداعى تاماشا تىلەگىن ايگىلەدى. جۇڭگو مەن ەۆروپا − دۇنيە ءجۇزىنىڭ بەيبىتشىلىگىن قورعايتىن ەكى ۇلكەن كۇش، بىرگە دامۋدى جەبەيتىن ەكى ۇلكەن بازار، ادامزاتتىڭ العا باسۋىن ىلگەرىلەتەتىن ەكى ۇلكەن وركەنيەت. جۇڭگو - ەۆروپا قارىم - قاتىناسى العا ىلگەرىلەۋ بەتالىسىن ساقتادى، ءوزارا پايدا جەتكىزىپ، تەڭ يگىلىككە كەنەلۋدە تاباندى بولدى، بۇل جۇڭگو مەن ەۆروپانىڭ جانە حالىقارالىق قوعامنىڭ ورتاق مۇددەسىنە ۇيلەسەدى. حالىقارالىق جاعداي اۋمالى - توكپەلى بولعان سايىن، دۇنيە جۇزىلىك سىن - سايىس نەعۇرلىم كورنەكتىلەنگەن سايىن، جۇڭگو - ەۆروپا قارىم - قاتىناسىنىڭ دۇنيە جۇزىلىك ماڭىزى سولعۇرلىم كورنەكتىلەنە تۇسەدى.
شي جينپيڭ بىلاي دەدى: جياڭ زىمين جولداس كەشە ناۋقاستان قۇتقارۋ ءونىم بەرمەي شاڭحايدا دۇنيەدەن ءوتتى. جياڭ زىمين جولداس جۇڭگونىڭ مەملەكەت باسشىسى مىندەتىن وتەگەن كەزىندە جۇڭگو - ەۆروپا قارىم - قاتىناسىنىڭ دامۋىنا ايرىقشا ءمان بەرىپ جانە كوڭىل ءبولىپ، ەۆروپا ەلدەرىندە تالاي رەت ساپاردا بولىپ، ەۆروپا وداعىنىڭ جانە ەۆروپا ەلدەرىنىڭ باسشىلارىمەن ءجيى بارىس - كەلىستى جالعاستىرىپ، جۇڭگو - ەۆروپا وداعى باسشىلارىنىڭ كەزدەسۋ مەحانيزمىنىڭ ورناۋىن ىلگەرىلەتىپ، ەكى جاقتىڭ ءار سالاداعى تىلدەسۋىن، سەلبەستىگىن جەبەدى. ءبىز ونىڭ مۇراتىنا مۇراگەرلىك ەتىپ، جۇڭگو - ەۆروپا قاتىناسىن ۇزدىكسىز بەكەمدەيمىز جانە دامىتامىز. جۇڭگو جاق جۇڭگو - ەۆروپا قارىم - قاتىناسىنا ۇزدىكسىز ستراتەگيالىق دەڭگەيدەن جانە ۇزاق بولاشاقتىق تۇرعىدان قارايدى جانە ونى دامىتادى، ەۆروپا جاقپەن ستراتەگيالىق بايلانىستى، سايكەستىكتى كۇشەيتىپ، جۇڭگو مەن ەۆروپانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ورنىقتى، باياندى بولۋىن ىلگەرىلەتۋدى قالايدى.
شي جينپيڭ جۇڭگو كوممۋنيستىك پارتياسى 20 - قۇرىلتايىنىڭ ماڭىزدى جەتىستىكتەرىن جانە جۇڭگو ۇلگىسىندەگى وسىزامانداندىرۋدىڭ 5 ەرەكشەلىگىن تانىستىردى. شي جينپيڭ بىلاي دەپ دارىپتەدى: قازىر دۇنيە ءجۇزىنىڭ وزگەرىسى، ءداۋىردىڭ وزگەرىسى، تاريحتىڭ وزگەرىسى جەدەل قۇبىلۋدا، ءار ەل تۇگەلدەي بولاشاق جولىن ويلاستىرۋدا، جۇڭگو كوممۋنيستىك پارتياسىنىڭ 20 - قۇرىلتايى جۇڭگونىڭ جاۋابىن بەردى، اتاپ ايتقاندا، ىشكى جاقتا جۇڭگوشا سوتسياليزم جولىندا، حالىقتى وزەك ەتكەن دامۋ يدەياسىندا تاباندى بولۋ، رەفورما جاساپ، ەسىك اشۋدى تەرەڭدەتۋدە تاباندى بولۋ؛ سىرتقى جاقتا دەربەس، ءوز - وزىنە قوجا بولۋ سىندى بەيبىت ديپلوماتيالىق ساياساتتى باتىل اتقارىپ، دۇنيە ءجۇزىنىڭ بەيبىتشىلىگىن قورعاۋ، بىرگە دامۋدى جەبەۋ سىندى ديپلوماتيالىق ماقساتتا تاباندى بولىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە كۇش سالۋ كەرەك. جۇڭگونىڭ دامۋى دۇنيە ءجۇزى بەيبىتشىلىك كۇشىنىڭ نىعايۋىنان دەرەك بەرەدى، جۇڭگو ماڭگى زورەكەر بولمايدى، ماڭگى ىرگە كەڭەيتپەيدى. جۇڭگو كوممۋنيستىك پارتياسىنىڭ وسى ايبىندى ساياسي ۋادەسى ءبىر ميلليارد 400 ميلليوننان استام جۇڭگو حالقىنىڭ ەركىن بەينەلەدى. ءبىز وزىندىك ءتۇزىمنىڭ ورنىقتىلىعى، جونگە سالۋدىڭ ورنىقتىلىعى، ساياساتتىڭ ورنىقتىلىعى، دامۋدىڭ ورنىقتىلىعى ارقىلى حالىقارالىق قوعامعا قاستەرلى تۇراقتىلىق ۇستەۋگە كامىل سەنەمىز. جۇڭگو ۇلگىسىندەگى وسىزامانداندىرۋ مەن ەۆروپانىڭ ءبىر تۇلعالانۋى − جۇڭگو مەن ەۆروپانىڭ بولاشاقتى كوزدە ۇستاي وتىرىپ جاساعان تالعامى. ەكى جاق ءبىرىن - ءبىرى ءتۇسىنۋى، ءبىرىن - ءبىرى قولداۋى كەرەك. جۇڭگو ەۆروپا وداعىنىڭ جۇڭگونىڭ جۇڭگو ۇلگىسىندەگى وسىزامانداندىرۋ جولىمەن جۇرۋدەگى ماڭىزدى سەرىگىنە اينالىپ، جۇڭگونىڭ الىپ بازار ورايىنان، تۇزىمدىك ەسىك اشۋ ورايىنان، حالىقارالىق سەلبەستىكتى تەرەڭدەتۋ ورايىنان بىرگە يگىلىكتەنۋىن ءۇمىت ەتەدى.
شي جينپيڭ جۇڭگو - ەۆروپا قارىم - قاتىناسىنىڭ دامۋى جونىندە 4 ءتۇرلى كوزقاراستى ورتاعا قويدى:
ءبىرىنشى، دۇرىس تانىمنان جازباۋ كەرەك. جۇڭگو مەن ەۆروپا اراسىندا ءتۇبىرلى ستراتەگيالىق الاۋىزدىق جانە قاقتىعىس جوق. جۇڭگو جاق ءوزى ءبي، ءوزى قوجا بولعىسى كەلمەيدى، ءتۇزىمدى سىرتقا شىعارۋمەن شۇعىلدانعان ەمەس، بۇدان بىلاي دا شۇعىلدانبايدى. جۇڭگو جاق ەۆروپا وداعىنىڭ ستراتەگيالىق دەربەستىگىن قولدايدى، ەۆروپانىڭ ىنتىماعىن، گۇلدەنۋىن قولدايدى. ەۆروپا وداعى قۇرىلىمدارى مەن مۇشە ەلدەردىڭ جۇڭگوعا وبيەكتيۆ، دۇرىس تانىم ورناتىپ، جۇڭگوعا قاراتقان ساياساتتا تاباندى بولىپ، ءوزارا تيىمدىلىك جەتكىزىپ، تەڭ يگىلىككە كەنەلۋدە تاباندى بولىپ، قىرعي قاباقتىق وي مەن يدەولوگيانىڭ قاراما - قارسىلىعىنان اسىپ ءتۇسىپ، ءتۇزىم جاعىنداعى قارسىلاسۋدان اسىپ ءتۇسىپ، ءتۇرلى فورماداعى «جاڭا قىرعي قاباقتىق سوعىسقا» قارسى تۇرۋىن ءۇمىت ەتەمىن.
ەكىنشى، الاۋىزدىقتاردى ۇيلەسىمدى تىزگىندەۋ كەرەك. جۇڭگو مەن ەۆروپانىڭ تاريحي مادەنيەتىندە، دامۋ ورەسىندە، يدەولوگياسىندا پارىق بار، ەكى جاقتىڭ كەيبىر ماسەلەلەردەگى كوزقاراستارى ۇقسامايدى، بۇل − وتە قالىپتى جاعداي، سىندارلى پوزيتسيامەن تىلدەسۋدى، كەڭەسۋدى جالعاستىرۋ كەرەك، مۇنىڭ تەتىگى ءبىر - ءبىرىنىڭ باسا نازار اۋداراتىن ماسەلەلەرى مەن وزەكتى مۇددەسىنە قۇرمەت ەتۋدە، اسىرەسە، يەلىك ۇقىعىنا، تاۋەلسىزدىگىنە، تەرريتوريا تۇتاستىعىنا قۇرمەت ەتۋدە، قارسى جاقتىڭ ىشكى ىسىنە كيلىكپەي، جۇڭگو - ەۆروپا قارىم - قاتىناسىنىڭ ساياسي نەگىزىن بىرگە قورعاۋ كەرەك. جۇڭگو جاق تەڭدىك جانە ءوزارا قۇرمەت ەتۋ نەگىزىندە جۇڭگو - ەۆروپا ادامدىق ۇقىق كەڭەسىن وتكىزۋدى قالايدى.
ءۇشىنشى، اناعۇرلىم جوعارى دەڭگەيدەگى سەلبەستىكتى ورىستەتۋ كەرەك. ەۆروپا − جۇڭگونىڭ تەز قارقىنمەن دامۋىنداعى ماڭىزدى سەرىگى ءارى يگىلىگىن كورۋشى. جۇڭگو جوعارى دەڭگەيدە سىرتقا ەسىك اشىپ، جاڭا دامۋ جاعدايىن جەدەل قالىپتاستىرادى، ەۆروپا جاقتىڭ ۇزدىكسىز ات سالىسۋىن، ۇزدىكسىز تەڭ يگىلىككە كەنەلۋىن قارسى الادى. ەكى جاق ماكرولىق ەكونوميكالىق ساياساتتى سايكەستىرۋدى كۇشەيتىپ، بازار، كاپيتال، تەحنيكا ابزالدىقتارى بويىنشا ءبىرىن - ءبىرى تولىقتاۋدى كۇشەيتىپ، سيفرلى ەكونوميكا، جاسىل دامۋ، ورتانى قورعاۋ، جاڭا ەنەرگيا، جاساندى زەردە سياقتى جاڭا ارتۋ قوزعالتقىشتارىن بىرگە تۇلعالاپ، كاسىپ سالاسى تىزبەگىنىڭ، قامداۋ تىزبەگىنىڭ حاۋىپسىزدىگىنە، ورنىقتىلىعىنا، سەنىمدىلىگىنە بىرگە شىنايى كەپىلدىك ەتىپ، «قول ۇزۋگە، تىزبەكتى ۇزۋگە»، قورعانىمپازدىققا بىرگە قارسى تۇرىپ، ەكونوميكا - ساۋدا، عىلىم - تەحنيكا اۋىس - كۇيىسىن ساياسيلاندىرۋعا بىرگە قارسى تۇرۋى كەرەك. جۇڭگو جاق ەۆروپا كاسىپورىندارىنا ەسىك اشا بەرەدى، ەۆروپا وداعىنىڭ كەدەرگىلەردى الاستاپ، جۇڭگو كاسىپورىندارىنا ءادىل، جاريالى تيجارات - ساۋدا ورتاسىن ازىرلەۋىن ءۇمىت ەتەدى.
ءتورتىنشى، حالىقارالىق سايكەستىكتى، سەلبەستىكتى كۇشەيتۋ كەرەك. جۇڭگو مەن ەۆروپا بىرلەسكەن مەملەكەتتەر ۇيىمىن ۇيىتقى ەتكەن حالىقارالىق جۇيەنى قورعاۋدا ناعىز كوپ جاقتىلىقتى بىرگە امالياتتا ايگىلەپ، سىن - سايىسقا تىزە قوسا توتەپ بەرىپ، دۇنيە ءجۇزىنىڭ بەيبىتشىلىگى مەن دامۋىن بىرگە قورعاۋدى قۋاتتايدى. ەكى جاق بۇكىل دۇنيە ءجۇزىنىڭ كليمات وزگەرىسىنە جانە ورگانيزمدەردىڭ الۋان تۇرلىلىگىن قورعاۋ، ەنەرگيا حاۋىپسىزدىگى جانە استىق حاۋىپسىزدىگى، الەۋمەتتىك دەنساۋلىق ساقتاۋ سياقتى قۇلشىنىستارعا جەتەكشىلىك ەتىپ، وزدەرىنىڭ ساپالى الەۋمەتتىك ونىمدەرى مەن سەلبەستىك تۇعىرلارىنىڭ ۇشتاسۋىن، سەلبەسۋىن كۇشەيتۋى كەرەك. ەۆروپا جاقتىڭ «ءبىر بەلدەۋ، ءبىر جولدى» بىرگە قۇرۋ، دۇنيە جۇزىلىك دامۋ باستاماسىنا ات سالىسىپ، ەۆروپا وداعىنىڭ «دۇنيە جۇزىلىك قاقپا» ستراتەگياسىمەن ورگانيكالى ۇشتاسىپ، قازىرگى ءتۇرلى مەحانيزم ارقىلى ءار سالاداعى تىلدەسۋدە، سەلبەستىكتە اناعۇرلىم كوپ جەتىستىككە جەتۋدى ىلگەرىلەتۋىن قارسى الامىز.
ميچەل شي جينپيڭنىڭ ج ك پ ورتالىق كوميتەتىنىڭ باس شۋجيى مىندەتىن تاعى دا وتەگەنىن قۇتتىقتاپ، ەۆروپا وداعى اتىنان جياڭ زىمين جولداستىڭ ناۋقاستان قايتىس بولعانىنا قايعىلى ازا ءبىلدىردى. ول مىنانى ءبىلدىردى: قازىر حالىقارالىق جاعداي مەن وڭىرلىك ساياسي تەرەڭ دە كۇردەلى وزگەرىستەردى باستان كەشىرۋدە، حالىقارالىق قوعام كوپتەگەن سىن – سايىس پەن داعدارىستارعا ءدوپ كەلىپ وتىر. جۇڭگو ىرگە كەڭەيتپەيدى، بىرلەسكەن مەملەكەتتەر ۇيىمى ەرەجەسىنىڭ نەگىزگى ماقساتىن قورعايتىن جانە كوپ جاقتىلىقتى قولدايتىن ماڭىزدى سەرىك. ەۆروپا جاق جۇڭگو كوممۋنيستىك پارتياسىنىڭ 20 - قۇرىلتايىنان كەيىن كوپ وتپەي جۇڭگومەن ەڭ جوعارى دەڭگەيدە بەتپە - بەت كەزدەسۋ وتكىزۋ ورايىن قاستەرلەيدى، ءوزارا قۇرمەت ەتۋ جانە ادالدىق رۋحى بويىنشا، جۇڭگو جاقپەن ەۆروپا - جۇڭگو قارىم - قاتىناسىنىڭ ءار جاقتاعى ماڭىزدى ماسەلەلەرى جونىندە ىشكەرىلەي تالقى جۇرگىزىپ، ءوزارا ءتۇسىنىسۋدى كۇشەيتىپ، تىلدەسۋدى، سەلبەستىكتى جەبەپ، الاۋىزدىقتاردى ۇيلەسىمدى ءبىر جاقتى ەتۋدى قالايدى. ەۆروپا وداعى ستراتەگيالىق جاقتان دەربەس بولۋدا تاباندى بولىپ، وزىندىك قابىلەت قۇرىلىسىن كۇشەيتىپ، ەۆروپانىڭ ءبىر تۇلعالانۋىن ىلگەرىلەتۋگە كۇش سالادى. ەۆروپا وداعى ءبىر جۇڭگو ساياساتىندا تاباندى بولادى، جۇڭگونىڭ يەلىك ۇقىعى مەن تەرريتوريا تۇتاستىعىنا قۇرمەت ەتەدى، جۇڭگونىڭ ىشكى ىسىنە كيلىكپەيدى. ەۆروپا وداعى جۇڭگو جاقتىڭ سەنىمدى، مەجەلەۋگە بولاتىن سەلبەستىك سەرىگى بولۋدى قالايدى. ەۆروپا جاق جۇڭگو جاقپەن كەلەسى كەزەڭدەگى جوعارى جىكتەگىلەردىڭ بارىس - كەلىسىن ويداعىداي وتكىزىپ، تىكە تىلدەسۋ مەن سەلبەستىكتى كۇشەيتۋ ارقىلى قاتە تۇسىنىكتى، قاتە تۇجىرىمداۋدى ازايتىپ، قارىم - قاتىناستى، سەلبەستىكتى كۇشەيتىپ، ەنەرگيا داعدارىسى، كليمات وزگەرىسى، الەۋمەتتىك دەنساۋلىق ساقتاۋ سياقتى دۇنيە جۇزىلىك سىن - سايىسقا اناعۇرلىم ويداعىداي توتەپ بەرۋدى قالايدى. ەۆروپا جاق جۇڭگو جاقپەن ەۆروپا مەن جۇڭگونىڭ قارجى قوسۋ كەلىسىمىنىڭ اياق الىسىن ۇزدىكسىز ىلگەرىلەتىپ، قامداۋ تىزبەگىنىڭ ورنىقتىلىعىن، ءوزارا سەنىمدىلىكتى كۇشەيتىپ، ەۆروپا مەن جۇڭگونىڭ ءار سالاداعى ءوزارا ءتيىمدى سەلبەستىگىن تەرەڭدەتۋدى قالايدى.
ەكى جاق ۋكراينا داعدارىسى جونىندە پىكىر الماستىردى. شي جينپيڭ جۇڭگو جاقتىڭ پرينسيپتىك تۇرعىسىن پايىمداپ، بىلاي دەپ اتاپ كورسەتتى: جۇڭگودا «تاۋدان تاس قۇلاسا، ەتەكتەگىنى الا كەتەدى، ءبىردىڭ الەمەتى مىڭدى اكەتەدى» دەگەن ءتامسىل بار. ۋكراينا داعدارىسىن ساياسي تاسىلمەن شەشۋ ەۆروپانىڭ مۇددەسىنە، ازيا - ەۆروپا قۇرلىعىنداعى ەلدەردىڭ ورتاق مۇددەسىنە ۇيلەسەدى. قازىرگى جاعدايدا داعدارىستىڭ ۋشىعۋىنان، ۇلعايۋىنان ساقتانىپ، تاتۋلاستىرۋدا تاباندى بولىپ، داعدارىستىڭ سىرتقا جايىلۋىن تىزگىندەپ، توپقا ءبولىنىپ قارسىلاسۋ قاتەرىنەن قىراعى بولۋ كەرەك. جۇڭگو ەۆروپا وداعىنىڭ جاراستىرۋدى كۇشەيتىپ، ەۆروپانىڭ بىركەلكى، ءونىمدى، باياندى حاۋىپسىزدىك جۇلگەسىن ورناتۋعا جەتەكشىلىك ەتۋىن قولدايدى. جۇڭگو جاق باستان - اياق بەيبىتشىلىك جاعىندا تۇرىپ، ءوز تاسىلىمەن ۇزدىكسىز سىندارلى رول اتقارادى.
ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
- ورتالىق
- ەل ءىشى
- شينجياڭ
- حالىقارا
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
سۋرەتتى حابار
لەبىز جازۋ
