اۆتونوميالى رايوندىق 10 - كەزەكتى پارتكومنىڭ جەتىنشى جالپى ءماجىلىسى سەنىمدى سەرپىلتتى، جىگەردى ۇشتادى، جەر - جەر، تاراۋلار −
جاڭا جورىقتا قايراتتانا ىسكەرلىك كورسەتىپ، كورىكتى شينجياڭ قۇرىپ شىعامىز
□ انار بۇلت \ شينجياڭ گازەتىنىڭ تىلشىلەرى
2023.01.09 17:01 كەلۋ قاينارى : حالىق تورابى
جاڭا جىل باستالىپ، بار الەم تىڭ پاراق اشتى. جاڭا جىلدىڭ باستالۋى بۇكىل رايونىمىزدا جوعارىدان تومەنگە دەيىن پارتيا 20 - قۇرىلتايىنىڭ رۋحىن ىشكەرىلەي ۇيرەنىپ، ۇگىتتەپ، ورتالىقتىڭ ەكونوميكالىق قىزمەت ءماجىلىسىنىڭ جانە ورتالىقتىڭ اۋىل - قىستاق قىزمەتى ءماجىلىسىنىڭ رۋحىن دايەكتىلەندىرىپ، تياناقتاندىرىپ جاتقان ماڭىزدى ساتتە، رايونىمىزداعى جەر - جەر، تاراۋلار اۆتونوميالى رايوندىق 10 - كەزەكتى پارتكومنىڭ جەتىنىشى جالپى ءماجىلىسىنىڭ ورنالاستىرۋلارى، تالاپتارى بويىنشا، ماسەلەلەردى مۇقيات تەكسەرىپ تاۋىپ، شارالاردى عىلمي بەلگىلەپ، سەنىمدى بەكەمدەپ، ءبىر نيەت، ءبىر ماقساتتا بولىپ، جاڭا جورىقتا قايراتتانا ىسكەرلىك كورسەتىپ، كورىكتى شينجياڭ قۇرۋدىڭ قۋاتتى كۇشىن ۇيىستىردى.
2022 - جىلى جىبەك جولى ەكونوميكالىق بەلدەۋى وزەكتى رايونى قۇرىلىسىنىڭ ماڭىزدى تىرەگىن ارقاۋ ەتە وتىرىپ، قاشقار ەكونوميكالىق اشۋ رايونى ورنىقتىلىق بارىسىندا ىلگەرىلەۋ، ىلگەرىلەۋ بارىسىندا قارقىندى تەزدەتۋ، تەزدىك بارىسىندا ساپانى جوعارىلاتۋداي مەجەلى نىسانانى جۇزەگە اسىردى. قاشقار ەكونوميكالىق اشۋ رايونىنىڭ ءوندىرىس جالپى ءونىم قۇنى، كولەمنەن جوعارى ونەركاسىپتىڭ ارتقان قۇنى، يمپورت - ەكسپورت ساۋدا جالپى سوماسى، ساۋداگەر شاقىرىپ قارجى ەنگىزۋدەگى تياناقتانعان قارجىسى سايكەس مەزگىلدەگىدەن جەكە - جەكە ％25، ％20، ％244، ％75 ارتتى.
”بيىل قاشقار ەكونوميكالىق اشۋ رايونى قاشقار كەشەندى باجىسىز اۋماعىنىڭ سىرتقا ەسىك اشۋداعى جول باستاۋ، جەتەكتەۋ، ىقپال كورسەتۋ رولىن تولىق ساۋلەلەندىرىپ، ورتا ازيانى، باتىس ازيانى، وڭتۇستىك ازيانى جانە شىعىس ەۆروپانى بەتكە العان سىرتقا ەسىك اشۋدىڭ ماڭىزدى تۇعىرىن تۇلعالادى“. قاشقار ايماقتىق اكىمشىلىك مەكەمەسى پارتيا باسشىلىق گرۋپپاسىنىڭ مۇشەسى، قاشقار ەكونوميكالىق اشۋ رايونى پارتيا قىزمەت كوميتەتىنىڭ شۋجيى چۇي لياندۇڭ مىنالاردى ءبىلدىردى: قاشقار ەكونوميكالىق اشۋ رايونى كەزدەسە بەرمەيتىن تاريحي ورايدى مىقتى يگەرىپ، ”كاسىپ سالاسى ارقىلى رايون قۇرۋ، عىلىم - تەحنيكادا قۋاتتى رايون بولۋ، جاڭالىق اشۋ ارقىلى دەم بەرۋ، ەسىك اشۋ ارقىلى جەتەكتەۋ“ ستراتەگياسىن ىشكەرىلەي اتقارىپ، سەنىمدى بەكەمدەپ، باس الماي قاجىرلىلىقپەن ىستەپ، يدەيالىق جاقتاعى بوگەتتەردى بۇزۋ، جۇيەلى قايتا قۇرۋ، ونىمدىلىك وزگەرىسىن، ساپا وزگەرىسىن جەدەل ىلگەرىلەتۋ ارقىلى قاشقار جىبەك جولى ەكونوميكالىق بەلدەۋى وزەكتى رايونى قۇرىلىسىنىڭ وڭتۇستىك شينجياڭداعى ماڭىزدى تىرەكتىك قۇرىلىسىن ىلگەرىلەتۋ بارىسىندا ”اتويشى، ونەگە بولادى“.
”شايار اۋدانى اۋدان ءوڭىرىنىڭ باسىمدىققا يە بايلىق ارتىقشىلىعىن تياناق ەتىپ، كەشەندى شارا قولدانىپ، دالمە - ءدال كۇش سالىپ، اۋىل شارۋاشىلىعى كاسىپ سالاسى شوعىرىن زورايتىپ، اۋىل شارۋاشىلىعىن، اۋىل - قىستاقتى وسىزامانداندىرۋدى جەدەل جۇزەگە اسىرادى“. شايار اۋداندىق پارتكومنىڭ شۋجيى پان ۋانفىڭ بىلاي دەپ تانىستىردى: بيىل شايار اۋدانى ماقتا مەن توقىماشىلىق، كيىم - كەشەك كاسىپ سالاسىن كۇشەيتۋ جاعىندا ماقتا ەگىمشىلىگى كولەمىن ورنىقتىرىپ، اۋىل شارۋاشىلىعىنداعى وزىق تەحنيكالاردى جالپىلاستىرىپ، قولدانۋدى كۇشەيتىپ، لايىقتى كولەمدە تيجارات جۇرگىزۋدى ءۇرتىس ىلگەرىلەتىپ، ”تۇقىم كاسىپورىندارى + ەگىمشىلىك سەلبەستىك كووپەراتيۆى + اۋىل شارۋاشىلىق ماشينالارى سەلبەستىك كووپەراتيۆى + توقىماشىلىق كاسىپورىندارى“ سىندى ماقتانىڭ تۇتاس كاسىپ سالاسى تىزبەگىن قۇرىپ، ماقتا ءوندىرۋدىڭ، ماقتامەن قامداۋدىڭ جانە ماقتا توقىماشىلىعى سۇرانىسىنىڭ مۇددە ورتاق تۇلعاسىن كۇش سالا سومدايدى؛ ورگانيكالى جەمىس - جيدەك، كوكونىس كاسىپ سالاسىن ساپالىلاندىرۋ جاعىندا ”قۇرىلعى مەن بوس جەردى قاتار دامىتۋ، كولەم قارقىنى مەن ساپا - ونىمدىلىككە تەڭ ءمان بەرۋ“ پرينسيبىنە تاباندى بولىپ، 1000 مۋلىق قۇرىلعى اۋىل شارۋاشىلىعىنىڭ كولەمدەنگەن ءوندىرىس بازاسىنان ەكەۋىن قۇرۋدى جەدەل ىلگەرىلەتىپ، ءوندىرۋ، وڭدەۋ، ساتۋدى ءبىر تۇلعالاندىرا ىلگەرىلەتۋدى اتقارىپ، ساپالى جەمىس - جيدەكپەن، كوكونىسپەن قامداۋدى قامتاماسىز ەتۋ قۋاتىن جاپپاي جوعارىلاتادى؛ ساپالى مال ونىمدەرى كاسىپ سالاسىن كۇشەيتۋ جاعىندا ”10 مىڭ ەتتى سيىر باعىمشىلىعى بازاسىن“، ”كوپ تولدەيتىن باسىمدىققا يە ءبىر ميلليون سويىس قوي ءوڭىرىن“ كۇش سالا قۇرىپ، باعىمشىلىق جانە مال ونىمدەرىن وڭدەيتىن باستاماشى كاسىپورىنداردى بەلسەنە جەتىلدىرىپ، مال ونىمدەرىن جالپىلىق ءوندىرۋ قۋاتىن جوعارىلاتىپ، مال شارۋاشىلىعىنىڭ جوعارى ساپالى دامۋىن جەدەل ىلگەرىلەتەدى.
2022 - جىلى قۇمىل قالاسىنىڭ ونەركاسىپ ەكونوميكاسى جىلدام ارتتى. كومىر كەن اشۋ جانە جۋىپ سۇرىپتاۋ كاسىبى، ەلەكتر شىعارۋ جانە ەلەكترمەن قامداۋ ونەركاسىپ ەكونوميكاسىن جەتەكتەيتىن مىعىم كۇشكە اينالدى؛ كومىر حيميا ونەركاسىبى ۇزدىكسىز زورايدى، كۇشەيدى؛ ”جەل، جارىق“ جاڭا ەنەرگياسىنىڭ اگراگاتتار كولەمى جىلدام ارتىپ، 15 ميلليون كيلوۆاتتان استى؛ جەل ەلەكتر قۇرىلعىلارىن جاساۋ كاسىبى ورنىقتى كاسىپ سالاسى تىزبەگىن قالىپتاستىردى؛ ”شينجياڭنىڭ ەلەكترىن چۇڭچيڭگە ەنگىزۋدىڭ سايكەستى ەلەكتر قاينارى“ ءىرى نىسانى قۇرىلىس باستادى، ”شينجياڭنىڭ ەلەكترىن سىرتقا جەتكىزۋدىڭ“ 3 - ارناسىنىڭ قۇرىلىسى شەشۋشى كەزەڭگە ءوتتى.
قۇمىل قالالىق دامۋ جانە رەفورما كوميتەتى پارتيا باسشىلىق گرۋپپاسىنىڭ مۇشەسى، ورىنباسار مەڭگەرۋشى جاڭ جيميڭ بىلاي دەدى: قۇمىل مەملەكەتتىڭ كومىردەن مۇناي - تابيعي گاز ءوندىرۋ ستراتەگيالىق بازاسى ەتىپ تۇراقتانىپ، اۆتونوميالى رايون جوعارى ساپالى دامۋدىڭ ۇلگىسى سىندى نىسانا - مىندەتىن جۇكتەدى. قۇمىل قالاسى اۆتونوميالى رايوننىڭ قۇمىل قالاسىنىڭ دامۋ ورىن تۇراقتاندىرۋى مەن وندىرگىش كۇشتەردى ورنالاستىرۋ تالاپتارىن دالمە - ءدال يگەرىپ، ءوڭىردىڭ ءىس جۇزىندىگىن تياناق ەتىپ، قۇمىلدىڭ ەنەرگيا بايلىعى ارتىقشىلىعىن، كاسىپ سالاسى نەگىزىن جانە وڭىرلىك ورىن باسىمدىعىن ساۋلەلەندىرىپ، ەنەرگيا بايلىعىنداعى ءىرى نىسان قۇرىلىستارى ارقىلى ەكونوميكالىق قۇرىلىمدى ساپالىلاندىرۋدى ىلگەرىلەتىپ، قۇمىل ەرەكشەلىگىنە يە وسىزاماندانعان كاسىپ سالاسى جۇيەسىن جەدەل جەتىلدىرىپ جانە دامىتىپ، قۇمىلدى بۇكىل ەلدىڭ ەنەرگيا كاسىپ سالاسىنىڭ دامۋىنداعى ۇلگى كورسەتەتىن رايونعا جانە بيىك بەلەسكە اينالدىرىپ، مەملەكەتتىڭ ەنەرگيا بايلىعىن اشۋعا قۇمىلدىڭ ۇلەسىن قوسادى.
كوكتەم مەرەكەسىنە ارنالعان 40تان استام جايما ورنى مەرەكەلىك تاۋارلارمەن جاڭالاندى، تەڭىز ونىمدەرى ەت تۇرلەرى، ۇن - كۇرىش، استىق - ماي، بال، شاي، ەرەكشە ونىمدەر كوزدىڭ جاۋىن الادى. جۋىقتا شاعانتوعاي اۋدانىنداعى جينيۇي ۋۋيدا شاعانتوعايدىڭ ”مەرەكەلىك بۇيىمدار مەرەكەسى“ دابىرالى ءوتىپ، قىرۋار ساۋداگەرلەر مەن تۇتىنۋشىلاردى جايما اشۋعا، زات الۋعا باۋرادى، شاعانتوعاي اۋدانىنىڭ ەلەكتروندىق ساۋدا ءبولىپ ساتۋ پۋنكتىندەگى ”ينتەرنەتتە تانىمالىلار“ اسپاپتارىن الىپ، شاعانتوعاي اۋدانىنىڭ ەرەكشە ونىمدەرىن تانىستىردى...
”تۇتىنۋدى جەبەۋ ءۇشىن، ءارقايسى اۋدان، قالالار ءوز ەرەكشەلىكتەرىنە ساي، ساۋدا سارايلارى مەن ەرەن بازارلاردى، كولىك ساتۋ كاسىپورىندارىن ءار ءتۇرلى تۇتىنۋدى جەبەۋ قيمىلدارىن ورىستەتۋگە ۇيىمداستىرىپ، ەرەكشە باعادا ساتۋ، جيناق ءنومىر اۋىستىرۋ، سيلىقتى قاعاز سۋىرىپ تارتۋ ۇسىنۋ، قامسىزداندىرۋ قىزمەت وتەۋىن ۇسىنۋ، ماي قۇيۋعا تيىمدىلىك جاساۋ، اۆتوكولىك كۇتىمدەۋ، اشەكەيلەۋ تارتۋ سومكەسىن ۇسىنۋ سياقتىلار ارقىلى تۇتىنۋدى جەبەدى. سونىمەن بىرگە، ەلەكتروندىق ساۋدا جانە قار - مۇز ساياحات قيمىلدارى ارقىلى جەرگىلىكتى ساپالى، ەرەكشە اۋىل شارۋاشىلىعى ونىمدەرىن ۇگىتتەدى، تانىستىردى“. تارباعاتاي ايماقتىق ساۋدا ىستەرى مەكەمەسى پارتيا باسشىلىق گرۋپپاسىنىڭ شۋجيى، ورىنباسار مەكەمە باستىعى شۇي حۇڭيان بىلاي دەدى: قازىر تارباعاتاي ايماعىنىڭ تۇتىنۋ جاعدايىندا جاقسارۋ، ارتۋ جارىققا شىقتى. الداعى جەردە، ءبىز جالپى ءماجىلىس العا قويعان ”تۇتىنۋدى كەڭەيتۋدى الدىڭعى ورىنعا قويىپ، تۇتىنۋدىڭ جاقسارۋىن، ارتۋىن جەبەۋ“ سىندى ورنالاستىرۋى تالابى بويىنشا، كوپ ءتۇرلى شارانى قاتار قولدانىپ تۇتىنۋدى جەبەپ، قويۋ تۇتىنۋ رايىن قالىپتاستىرىپ، تۇتىنۋدىڭ ارتۋىن جەبەپ، تۇتىنۋ بازارىنىڭ جاقسارۋىن جەدەلدەتەمىز.
حوتان قالاسى يلچي اۋىلى ياپىلاق قىستاعىنداعى راۋشانگۇل ەگەتىن وتباسىندا، راۋشانگۇل ءوسىرۋ، بۇتاۋ، گۇلدەۋ مەزگىلىندە باپتاۋ، ۇسىكتەن ساقتانۋ، دەرت - دەربەزدەردەن، زياندى جاندىكتەردەن ساقتانۋ سياقتى تەحنيكالارعا باۋلۋ ورىستەتىلىپ جاتتى، راۋشانگۇل ەگۋدىڭ پايداسىن كورگەن قىستاق تۇرعىندارى ەرەكشە مۇقياتتىلىقپەن كىرىسىپ ۇيرەندى.
راۋشانگۇل ياپىلاق قىستاعىنىڭ جەتەكشى كاسىپ سالاسى، بۇكىل قىستاق بويىنشا 121 وتباسى راۋشانگۇل ەگەدى، ەگىلگەن جەر اۋماعى 1090 مۋ. ”ءبىز ساباقحانا وقىتۋى مەن باسى - قاسىندا باۋلۋدى ۇشتاستىرۋ ءتاسىلىن قولدانىپ، تۇتاس قىستاق كولەمىندە راۋشانگۇل ەگىمشىلىگى تەحنيكاسىنا باۋلۋ ورىستەتتىك، اناعۇرلىم كوپ تەحنيكا شەبەرلەرىن باۋلۋ ارقىلى راۋشانگۇل كاسىپ سالاسىن بارعان سايىن جاقسارتىپ، شارۋالاردىڭ كىرىسىن ارتتىرامىز“. ياپىلاق قىستاعى قىستاق كوميتەتىنىڭ مەڭگەرۋشىسى جيا بو بىلاي دەدى: جاڭا ءبىر جىلدا، ءبىز راۋشانگۇل كاسىپ سالاسىنىڭ تىزبەگىن ۇزارتۋعا، تىزبەگىن كۇشەيتۋگە كۇش سالۋدى ارقاۋ ەتىپ، كەدەيلىكتەن ارىلتۋدان قامال الۋ جەتىستىكتەرىن بەكەمدەۋدى، كەڭەيتۋدى اۋىل - قىستاقتى گۇلدەندىرۋمەن ءونىمدى ۇشتاستىرۋدى ىلگەرىلەتەمىز.
قارامايلى قالالىق دەنساۋلىق ساقتاۋ، سالاماتتىق كوميتەتى پارتيا باسشىلىق گرۋپپاسىنىڭ مۇشەسى، ورىنباسار مەڭگەرۋشى جۋ چاۋگاڭ بىلاي دەپ تانىستىردى: قازىر قارامايلى قالاسىنداعى اشىق ۇستالعان قارتتاردى كۇتىمدەۋ قۇرىلىمدارى مەن قارتتاردى ۇيدە كۇتىمدەۋگە قىزمەت وتەۋ ورتالىعى (پۋنكتى) ”ەمدەۋ مەن كۇتىمدەۋدى ۇشتاستىرۋدى“ ％100 جۇزەگە اسىردى، تۇتاس قالاداعى 2 - دارەجەلىدەن جوعارى ۇكىمەت شيپاحانالارى دەرلىك ”ينتەرنەت شيپاحاناسى“ ارقىلى قىزمەت وتەي الادى، وتباسى شيپاگەرىنىڭ قىزمەت وتەۋى بىرتىندەپ بارشا وتباسىنا جەتتى. ”الدا، قارامايلى قالالىق دەنساۋلىق ساقتاۋ، سالاماتتىق كوميتەتى نازاردى بۇقارانىڭ ەمدەۋ سۇرانىسىنا ۇزدىكسىز شوعىرلاندىرىپ، جاۋاپكەرشىلىكتى اناعۇرلىم ونان ارى كۇشەيتىپ، ىسكەرلىك كورسەتىپ، قارامايلىنىڭ ەكونوميكالىق، قوعامدىق دامۋ دەڭگەيىنە ۇيلەسەتىن، قالانىڭ فۋنكتسيالىق ورىن تۇراقتاندىرۋعا سايكەس كەلەتىن سالاماتتىق قىزمەت وتەۋ جۇيەسىن ورناتىپ، بۇكىل قالانىڭ دەنساۋلىق ساقتاۋ، سالاماتتىق ىستەرىنىڭ جوعارى ساپالى دامۋىن ۇزدىكسىز ىلگەرىلەتۋگە پارمەندى قامتاماسىزدىق ازىرلەيدى“.
(تىلشىلەر ءپاريزات ابدۇل، قاتىناسقان تىلشىلەر جاڭ جىلي، ۋي يۇڭگۇي، ءرايدا، حان چين - يان، ەرىكتى ءتىلشى ۋي چۇنلەي)
جاۋاپتى رەداكتورى : نۇرعيسا قۇرمانجان ۇلى
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
- ورتالىق
- ەل ءىشى
- شينجياڭ
- حالىقارا
مادەنيەت
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
