شي جينپيڭ رەسەيدىڭ زۇڭتۇڭى پۋتينمەن كەڭەس وتكىزدى
2023.03.22 17:27 كەلۋ قاينارى : حالىق تورابى
 |
سول جەر ۋاقىتى بويىنشا 3 - ايدىڭ 21 - كۇنى تۇستەن كەيىن مەملەكەت ءتوراعاسى شي جينپيڭ ماسكەۋدەگى كرەمل سارايىندا رەسەيدىڭ زۇڭتۇڭى پۋتينمەن كەڭەس وتكىزدى. پۋتين جورج زالىندا شي جينپيڭگە ارناپ سالتاناتتى قارسى الۋ سالتىن وتكىزدى. سۋرەتتە: ەكى ەل باسشىلارى قول الىسىپ ەستەلىك سۋرەتكە تۇسۋدە.
سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
|
«حالىق گازەتى»، 3 - ايدىڭ 21 - كۇنى، ماسكەۋ (تىلشىلەر دۋ شاڭزى، چۇي سۇڭ). سول جەر ۋاقىتى بويىنشا 3 - ايدىڭ 21 - كۇنى تۇستەن كەيىن مەملەكەت ءتوراعاسى شي جينپيڭ ماسكەۋدەگى كرەمل سارايىندا رەسەيدىڭ زۇڭتۇڭى پۋتينمەن كەڭەس وتكىزدى. ەكى ەل باسشىلارى جۇڭگو - رەسەي قارىم - قاتىناسى، سونداي - اق ورتاق كوڭىل ءبولىپ وتىرعان كەلەلى حالىقارالىق جانە وڭىرلىك ماسەلەلەر جونىندە شىنايى دوسجار نيەتپەن ناتيجەلى كەڭەس وتكىزىپ، كوپتەگەن جاڭا، ماڭىزدى ورتاق تانىمعا كەلدى. ەكى جاق تاتۋ كورشىلىك، دوستىق، سەلبەسىپ تەڭ يگىلىككە كەنەلۋ پرينسيبى بويىنشا ءار سالاداعى بارىس - كەلىستى، سەلبەستىكتى ىلگەرىلەتىپ، جاڭا داۋىردەگى جان - جاقتى ستراتەگيالىق سەلبەستىك سەرىكتەستىك قارىم - قاتىناستى تەرەڭدەتۋگە ءبىر اۋىزدان ماقۇل بولدى.
3 - ايداعى ماسكەۋدە اسپان شايداي اشىق. شي جينپيڭ اۆتوكولىكپەن كرەمل سارايىنا جەتكەندە، كرەمل سارايى قوناقتاردى قارسى الۋ اتتىلار قۇراماسى قاتارعا تۇرىپ قارسى الدى، كرەمل سارايىنىڭ قولباسشىسى اۆتوكولىكتەن تۇسكەن جەردەن قارسى الدى.
پۋتين جورج زالىندا شي جينپيڭگە ارناپ سالتاناتتى قارسى الۋ سالتىن وتكىزدى. ايبىندى دا اسەرلى قوناق قابىلداۋ مۋزىكاسى قويىلىپ تۇردى، شي جينپيڭ مەن پۋتين جەكە - جەكە جورج زالىنىڭ ەكى جاعىنان قىزىل كىلەمدى بويلاي ارشىندى قاداممەن زالدىڭ ورتاسىنا كەلدى. ەكى ەل باسشىلارى قول الىسىپ ەستەلىك سۋرەتكە ءتۇستى. اسكەري وركەستر جۇڭگو مەن رەسەيدىڭ مەملەكەت گيمندەرىن ورىندادى.
ەكى ەل باسشىلارى ىلگەرىندى - كەيىندى شاعىن قۇرامدا، كەڭەيتىلگەن قۇرامدا كەڭەس وتكىزدى.
شي جينپيڭ بىلاي دەپ اتاپ كورسەتتى: جۇڭگو مەن رەسەي − ءبىر - ءبىرىنىڭ ەڭ ۇلكەن كورشى ەلدەرى، رەسەيمەن ۇزاق ۋاقىتتىق تاتۋ كورشىلىك دوستىق قارىم - قاتىناستى بەكەمدەۋ جانە دامىتۋ تاريحي لوگيكاعا ۇيلەسەدى، بۇل − جۇڭگو جاقتىڭ ستراتەگيالىق تالعامى، ءبىر مەزەتتىك جاعدايعا بولا، بىرەر ىسكە بولا وزگەرمەيدى. 10 جىلدىڭ الدىندا مەن تۇڭعىش رەت رەسەيدە مەملەكەتتىك ساپاردا بولعاننان بەرى جۇڭگو مەن رەسەي ەكى جاق ءوزارا قۇرمەت ەتىپ، ءوزارا سەنىم ارتىپ، ءوزارا پايدا جەتكىزىپ، تەڭ يگىلىككە كەنەلدى، ەكى ەلدىڭ قارىم - قاتىناسى ۋاقىت وتكەن سايىن بەكەمدەلىپ، اناعۇرلىم جان - جاقتى، اناعۇرلىم ناقتى، اناعۇرلىم ستراتەگيالىق ەرەكشەلىككە يە بولدى. وسى رەتكى ساپار كەزىندە اۆتوكولىك اترەتى ءجۇرىپ وتكەن جەرلەردە كوپتەگەن رەسەي جۇرتشىلىعى وزدىكتەرىنەن قول بۇلعاپ قۇرمەت ءبىلدىرىپ، ماعان جۇڭگو - رەسەي قارىم - قاتىناسىنىڭ تەرەڭ حالىق رايى نەگىزىنە يە ەكەنىن شىنايى سەزىندىردى. حالىقارالىق جاعداي قالاي وزگەرسە دە، جۇڭگو جاق جۇڭگو مەن رەسەيدىڭ جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قارىم - قاتىناسىن ىلگەرىلەتۋگە ۇزدىكسىز كۇش سالادى. وسى رەتكى رەسەيدەگى مەملەكەتتىك ساپارىم − دوستىق ساپارى، سەلبەستىك ساپارى، بەيبىتشىلىك ساپارى. جۇڭگو جاق رەسەي جاقپەن بىرگە بۇرىنعىعا مۇراگەر بولىپ، كەيىنگىگە جول اشىپ، جۇڭگو مەن رەسەيدىڭ جاڭا داۋىردەگى جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ مازمۇنىن بايىتىپ، ەكى ەل حالىقتارىنا ءتىپتى دە كوپ ىرىس - قۇت جاراتۋعا، ادامزاتتىڭ العا باسۋ ىستەرىن جەبەۋگە اناعۇرلىم زور ۇلەس قوسۋعا پەيىل.شي جينپيڭ مىنالاردى اتاپ كورسەتتى: قازىر عاسىرلىق وزگەرىس جەدەل قۇبىلىپ، حالىقارالىق كۇشتەردىڭ سالىستىرماسىندا تەرەڭ وزگەرىستەر تۋىلدى. بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە دۇنيە جۇزىندەگى نەگىزگى ءىرى ەل رەتىندە جۇڭگو مەن رەسەيدىڭ باس تارتۋعا بولمايتىن بورىشى بار، بىرگە قۇلشىنىپ، دۇنيە ءجۇزىن جونگە سالۋدىڭ حالىقارالىق قوعامنىڭ تىلەگىنە ۇيلەسەتىن باعىتقا قاراي ىلگەرىلەۋىنە جەتەكشىلىك ەتىپ جانە ونى جەبەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ كەرەك. ەكى جاق ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىرىن - ءبىرى قولداپ، سىرتقى كۇشتەردىڭ ىشكى ىستەرگە كيلىگۋىنە بىرگە قارسى تۇرۋى كەرەك. حالىقارالىق ىستەردى، اسىرەسە، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، بريكس ەلدەرى سەلبەستىك مەحانيزمى سياقتى كوپ جاقتى جۇلگەدەگى تىلدەسۋدى، سايكەسۋدى كۇشەيتىپ، ناعىز كوپ جاقتىلىقتى امالياتتا ايگىلەپ، زورەكەرلىككە جانە وكتەمدىك ساياسيعا قارسى تۇرىپ، دۇنيە ءجۇزىنىڭ ىندەتتەن كەيىن ەكونوميكانى قايتا جانداندىرۋىن جەبەپ، كوپ ۇيەكتەنۋ بەتالىسىنىڭ دامۋىن ىلگەرىلەتىپ، دۇنيە جۇزىلىك جونگە سالۋ جۇيەسىنىڭ وزگەرىسىن، كەمەلدەنۋىن ىلگەرىلەتۋ كەرەك.ەكى ەل باسشىلارى ەكى ەلدىڭ قاتىستى تاراۋلارىنداعى جاۋاپتىلاردىڭ ءار سالاداعى سەلبەستىك جاعدايى جونىندەگى مالىمەتتەرىن تىڭدادى.
شي جينپيڭ بىلاي دەپ اتاپ كورسەتتى: ەكى جاقتىڭ بىرگە قۇلشىنۋىندا، ەكى ەلدىڭ ساياسيداعى ءوزارا سەنىمى، مۇددە توعىستىرۋى، حالىق تىلەگىن توعىستىرۋى ۇزدىكسىز تەرەڭدەپ، ەكونوميكا - ساۋدا، قارجى قوسۋ، ەنەرگيا، گۋمانيتارلىق، جەرگىلىكتى ورىندار سياقتى سالالارداعى سەلبەستىگى ۇزدىكسىز ىلگەرىلەپ، سەلبەستىك سالاسى ۇزدىكسىز كەڭەيىپ، ورتاق تانىم اناعۇرلىم كۇشەيدى. بيىل − جۇڭگونىڭ ج ك پ 20 - قۇرىلتايىنىڭ رۋحىن جاپپاي دايەكتى تياناقتاندىرۋىنىڭ باستاما جىلى، ءبىز جاڭا دامۋ جاعدايىن جەدەل ورناتىپ، ساپالى دامۋدى كۇش سالا جەبەپ، جۇڭگو ۇلگىسىندەگى وسىزامانداندىرۋدى جاپپاي ىلگەرىلەتەمىز. جۇڭگو مەن رەسەيدىڭ سەلبەستىك كومەسكى كۇشى مەن كەڭىستىگى وتە زور، ستراتەگيالىق، سەنىمدىلىك، ورنىقتىلىق سيپاتقا يە. ەكى جاق ەنەرگيا، بايلىق، ماشينا - ەلەكتر ونىمدەرى سياقتى ءداستۇرلى ساۋدانى ءبىر تۇتاس جوسپارلاپ سايكەستىرۋدى كۇشەيتىپ، كاسىپ سالاسى تىزبەگىنىڭ، قامداۋ تىزبەگىنىڭ سەرپىمدىلىگىن ۇزدىكسىز كۇشەيتىپ، ينفورماتسيا تەحنيكاسى، سيفرلى ەكونوميكا، اۋىل شارۋاشىلىعى، قىزمەت وتەۋ ساۋداسى سياقتى سالالارداعى سەلبەستىكتى كەڭەيتۋى كەرەك. جاڭالىق اشۋ سالاسىنداعى سەلبەستىكتى كۇشەيتىپ، شەكارا اتتاعان زات اينالىمى تاسىمالىن ىركىلىسسىزدەندىرۋ كەرەك. گۋمانيتارلىق اۋىس - كۇيىس نەگىزىن بەكەمدەپ، دوس ولكە، وبلىستاردىڭ، دوس قالالاردىڭ اۋىس - كۇيىستى كەڭەيتۋىن ىلگەرىلەتىپ، جۇڭگو مەن رەسەيدىڭ دەنەتاربيە اۋىس - كۇيىس جىلىن ۇزدىكسىز ويداعىداي وتكىزىپ، ەكى ەل ادامدارىنىڭ بارىس - كەلىسىن جەبەۋگە قولايلى شارت - جاعداي ازىرلەۋ كەرەك.
پۋتين مىنالاردى ءبىلدىردى: رەسەي جاق ءتوراعا شي جينپيڭنىڭ تولىق داۋىسپەن جۇڭگونىڭ مەملەكەت ءتوراعاسى بولىپ تاعى دا مىندەتكە تاعايىندالعانىن، جۇڭگونىڭ جاڭا كەزەكتى ۇكىمەتىنىڭ ۇيىمداستىرىلعانىن تاعى دا قىزۋ قۇتتىقتايدى. قازىر رەسەي - جۇڭگو قارىم - قاتىناسىنىڭ دامۋى وتە جاقسى، ەكى ەلدىڭ ءار سالاداعى سەلبەستىگى باياندى ىلگەرىلەۋشىلىككە قول جەتكىزىپ، ۇكىمەت، زاڭ شىعارۋ قۇرىلىمدارى اراسىنداعى، سونداي - اق ءار دارەجەلى، ءار سالاداعى اۋىس - كۇيىس، سەلبەستىك ەرەكشە جاندانىپ، جاڭا تيپتى ايدارشا ۆيرۋس وكپە قابىنۋ ىندەتى سياقتى كۇردەلى سىرتقى ورتادا رەسەي مەن جۇڭگونىڭ ەكى جاقتى ساۋداسى قيىن – قىستاۋ جاعدايداعى ارتۋدى جۇزەگە اسىردى. ەكى جاقتىڭ ەكى ەلدىڭ قازىرگى اۋىس - كۇيىس ارناسىنىڭ رولىن تولىق ساۋلەلەندىرىپ، ەكى ەلدىڭ ەكونوميكا - ساۋدا، قارجى قوسۋ، ەنەرگيا، عارىش، شەكارا اتتاعان قاتىناس، زات اينالىمى سياقتى سالالارداعى ناقتى سەلبەستىگىندە تىڭ ىلگەرىلەۋشىلىككە قول جەتكىزۋىن ىلگەرىلەتىپ، دەنەتاربيە، ساياحات، جەرگىلىكتى ورىندار سياقتى گۋمانيتارلىق اۋىس - كۇيىستى تىڭ دەڭگەيگە كوتەرۋىن ءۇمىت ەتەمىن. رەسەي جاق جۇڭگو جاقتىڭ تايۋانعا ساياتىن ىستەر، شياڭگاڭعا ساياتىن ىستەر، شينجياڭعا ساياتىن ىستەر سياقتى ماسەلەلەردە ءوزىنىڭ ورىندى مۇددەسىن قورعاۋىن باتىل قولدايدى. جۇڭگو جاقتىڭ ساۋد ارابياسى مەن يراننىڭ بەيجيڭ كەڭەسىن ءساتتى ىلگەرىلەتۋدە تاريحي تابىسقا قول جەتكىزگەنىن قۇتتىقتايمىن، بۇل جۇڭگونىڭ دۇنيە جۇزىندەگى ءىرى ەل رەتىندەگى ماڭىزدى ورنى مەن بەلسەندى ىقپالىن تولىق ايگىلەدى. رەسەي جاق جۇڭگو جاقتىڭ باستان - اياق حالىقارالىق ىستەردە وبيەكتيۆ، ءادىل تۇرعى ۇستانعانىن القايدى، جۇڭگو جاق العا قويعان دۇنيە جۇزىلىك حاۋىپسىزدىك باستاماسىن، دۇنيە جۇزىلىك دامۋ باستاماسىن، دۇنيە جۇزىلىك وركەنيەت باستاماسىن قولدايدى، جۇڭگو جاقپەن حالىقارالىق سەلبەستىكتى اناعۇرلىم جيىلەتۋگە پەيىل.
ەكى ەلدىڭ مەملەكەت باسشىلارى بىلاي دەپ قارادى: وسى رەتكى ساپار كەزىندە ەكى جاقتىڭ اۋىس - كۇيىسى تەرەڭدەپ، مازمۇنى باي، جان - جاقتى بولىپ، رەسەي مەن جۇڭگونىڭ جاڭا داۋىردەگى جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ دامۋىنا تىڭ قوزعاۋشى كۇش ۇستەدى.
ەكى ەلدىڭ مەملەكەت باسشىلارى ەكى ەلدىڭ قاتىستى تاراۋلارىن ەكى ەلدىڭ مەملەكەت باسشىلارى كەلىسكەن ورتاق تانىم بويىنشا، پىكىرلەسۋدى كۇشەيتىپ، تىعىز سايكەسىپ، ەكى ەلدىڭ ناقتى سەلبەستىگىنىڭ تىڭ دا اناعۇرلىم زور دامۋشىلىقتارعا قول جەتكىزۋىن ىلگەرىلەتىپ، ەكى ەلدىڭ ءوز دامۋلارىنا، گۇلدەنۋلەرىنە دەم بەرۋدى مىندەتتەدى.
ەكى ەلدىڭ مەملەكەت باسشىلارى ءتۇرلى تاسىلدەر ارقىلى تىعىز بايلانىستى ۇزدىكسىز جالعاستىرىپ، جۇڭگو - رەسەي قارىم - قاتىناسىنىڭ ورنىقتى قاداممەن باياندى جالعاسۋىنا بىرگە جەتەكشىلىك ەتۋگە ماقۇل بولدى.
كەڭەستەن كەيىن ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى مەن رەسەي فەدەراتسياسىنىڭ جاڭا داۋىردەگى جان - جاقتى ستراتەگيالىق سەلبەستىك سەرىكتەستىك قارىم - قاتىناسىن تەرەڭدەتۋ جونىندەگى بىرلەسكەن مالىمدەمەسىنە» جانە «جۇڭحۋا حالىق رەسپۋبليكاسىنىڭ ءتوراعاسى مەن رەسەي فەدەراتسياسى زۇڭتۇڭىنىڭ 2030 – جىلعا دەيىنگى جۇڭگو مەن رەسەيدىڭ ەكونوميكالىق سەلبەستىگىن ءتۇيىندى بەتالىس بويىنشا دامىتۋ جوباسى جونىندەگى بىرلەسكەن مالىمدەمەسىنە» بىرگە قول قويدى.
ساپار كەزىندە ەكى جاق تاعى اۋىل شارۋاشىلىعى، ورمان شارۋاشىلىعى، نەگىزدىك عىلمي زەرتتەۋ، بازار باقىلاۋ - باسقارۋ، اقپارات قۇرالدارى سياقتى سالالارداعى كوپ جاقتى، ەكى جاقتى سەلبەستىك قۇجاتتارىنا قول قويدى.
ەكى ەلدىڭ مەملەكەت باسشىلارى تاعى تىلشىلەرمەن كەزدەستى.
سول كۇنى كەشتە پۋتين كرەمل سارايىندا شي جينپيڭگە ارناپ سالتاناتتى قارسى الۋ قوناعاسىن بەردى.
ساي چي، ۋاڭ ي، چين گاڭ، سونداي - اق رەسەي فەدەراتسيالىق ۇكىمەتىنىڭ باسشىلارى جوعارىداعى قيمىلدارعا قاتىناستى.
كەلۋ قاينارى: حالىق تورابى
 |
سول جەر ۋاقىتى بويىنشا 3 - ايدىڭ 21 - كۇنى تۇستەن كەيىن مەملەكەت ءتوراعاسى شي جينپيڭ ماسكەۋدەگى كرەمل سارايىندا رەسەيدىڭ زۇڭتۇڭى پۋتينمەن كەڭەس وتكىزدى. سۋرەتتە: پۋتين جورج زالىندا شي جينپيڭگە ارناپ سالتاناتتى قارسى الۋ سالتىن وتكىزۋدە.
سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
|
 |
سول جەر ۋاقىتى بويىنشا 3 - ايدىڭ 21 - كۇنى تۇستەن كەيىن مەملەكەت ءتوراعاسى شي جينپيڭ ماسكەۋدەگى كرەمل سارايىندا رەسەيدىڭ زۇڭتۇڭى پۋتينمەن كەڭەس وتكىزدى. سۋرەتتە: كەڭەستەن كەيىن ەكى ەل باسشىلارى «جۇڭحۋا حالىق رەسپۋبليكاسى مەن رەسەي فەدەراتسياسىنىڭ جاڭا داۋىردەگى جان - جاقتى ستراتەگيالىق سەلبەستىك سەرىكتەستىك قارىم - قاتىناسىن تەرەڭدەتۋ جونىندەگى بىرلەسكەن مالىمدەمەسىنە» جانە «جۇڭحۋا حالىق رەسپۋبليكاسىنىڭ ءتوراعاسى مەن رەسەي فەدەراتسياسى زۇڭتۇڭىنىڭ 2030 – جىلعا دەيىنگى جۇڭگو مەن رەسەيدىڭ ەكونوميكالىق سەلبەستىگىن ءتۇيىندى بەتالىس بويىنشا دامىتۋ جوباسى جونىندەگى بىرلەسكەن مالىمدەمەسىنە» بىرگە قول قويۋدا.
سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
|
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
