ول اۋىلداستارىن باستاپ تۇيە ءسۇتى ماركاسىن جاراتتى
□ انار بۇلت \ شينجياڭ گازەتىنىڭ ءتىلشىسى ۋي يۇڭگۇي، ەرىكتى ءتىلشى ما جىجۋان
2023.04.24 16:04 كەلۋ قاينارى : شينجياڭ گازەتى
”سەلبەستىك كووپەراتيۆىندە قازىر 500دەن استام تۇيە بار، مۇنىڭ 380ى ساۋىن تۇيە، دامۋ بولاشاعى جارقىن“. 3 - ايدىڭ 25 - كۇنى تاياۋ جىلداردان بەرى تۇيە باعىمشىلىعىن دامىتقاندىعىن تىلگە تيەك ەتكەندە، ارسىلان روزىنىڭ سەنىمى ارتا ءتۇستى.
ارسىلان قۇمىل قالاسى يجوۋ رايونى نانحۋ اۋىلىنىڭ ادامى. 2011 - جىلى تەكسەرۋ ارقىلى ول تۇيە باعىمشىلىعىمەن شۇعىلدانۋعا بەل بايلاپ، اۋىلداستارىن بايۋعا باستايدى.
سول جىلى 10 - ايدا ارسىلان نانحۋ اۋىلىنداعى 5 تۇيە باعىمشىلىعى وتباسىمەن بىرگە اۋىلدىق ۇكىمەتكە تۇيە باعىمشىلىعى سەلبەستىك كووپەراتيۆىن قۇرۋ ءوتىنىشىن تاپسىرادى. سول كەزدە نانحۋ اۋىلىنىڭ تۇيە باعىمشىلىعى بىرتىندەپ دامىپ، زورايىپ، ”سەركەلىك“ رول اتقاراتىن شارۋاشىلىق تۇلعاسىن جەتىلدىرۋ قاجەت بولدى. نانحۋ اۋىلى تۇيە باعىمشىلىعى سەلبەستىك كووپەراتيۆىنىڭ قۇرىلۋىنا بارىنشا قولداۋ كورسەتىپ، يجوۋ رايوندىق ۇكىمەتكە مالىمەت بەرگەننەن كەيىن، 50 مۋ جەر بەرىپ، سەلبەستىك كووپەراتيۆىنىڭ باعىمشىلىق بازاسىن قۇرۋىنا مۇمكىندىك جاساپ قانا قويماي، سەلبەستىك كووپەراتيۆىنىڭ نىسان قارجىسىنا ءوتىنىش بەرۋىنە كومەكتەسىپ، ىلگەرىندى - كەيىندى 2 ميلليون يۋاننان استام قارجى توپتاپ، سەلبەستىك كووپەراتيۆىنىڭ نەگىزدىك قۇرىلعى قۇرىلىسىنا جۇمسادى.
ۇكىمەتتىڭ زور كۇشپەن قولداۋىنا يە بولعان ارسىلاننىڭ سەنىمى ەسەلەپ ارتىپ، بارلىق قارجىسىن شىعارىپ تۇيە ساتىپ الادى، قورا سالىپ، جابدىق ورنالاستىرادى. سەلبەستىك كووپەراتيۆى قۇرىلعاننان كەيىن، ارسىلان تەحنيكتەر مەن جەرگىلىكتى ورىنداعى باعىمشىلىقپەن شۇعىلدانۋدا تاجىريبەلى وتباسىلارىن تۇيە باعىمشىلىعىنا جاۋاپتى بولۋعا ۇسىنىس ەتەدى. شارۋاشىلىق ۇلگىسى جاعىندا سەلبەستىك كووپەراتيۆى تاپسىرىسپەن باسقارۋ، پايداسىن ءبولىسۋ ءتاسىلىن قولدانىپ، قىستاق تۇرعىندارىن تۇيەلەرىن سەلبەستىك كووپەراتيۆىنىڭ باسقارۋىنا تاپسىرىپ، جىل سوڭىندا پايدا ءبولىسىن الۋعا شابىتتاندىردى. سونىمەن بىرگە ارسىلان تۇيە باعىمشىلىعىمەن شۇعىلداناتىن وتباسىلارىمەن تۇيە ءسۇتىن ساتىپ الۋ كەلىسىمىنە قول قويىپ، تۇيە ءسۇتىن شوعىرلى ساتىپ العاننان كەيىن ءبىر تۇتاس ساتىپ، باعىمشىلىق وتباسىلارىنىڭ تۇراقتى پايدا تابۋىنا شىنايى كەپىلدىك ەتەدى.
سەلبەستىك كووپەراتيۆى كولەمىنىڭ كەڭەيۋىنە، ونىمدىلىگىنىڭ جوعارىلاۋىنا بايلانىستى، سەلبەستىك كووپەراتيۆىنە كىرگەن باعىمشىلىق وتباسىلارى بارعان سايىن كوبەيدى. ارسىلان اۋىلداستارىن باستاپ كىرىستەرىن ارتتىرىپ، بىرگە بايۋ نىساناسىن العاشقى قادامدا جۇزەگە اسىردى.
2017 - جىلى ارسىلان قۇمىل قالاسى حۋاڭمو جىجوۋ مال شارۋاشىلىعى عىلىم - تەحنيكا شەكتى سەرىكتەستىگىن تىركەۋگە الدىرىپ، قۇرىپ، 2 ميلليون يۋاننان استام قارجى قوسىپ، تۇيە ءسۇتى تالقانىن وڭدەۋ ءوندىرىس جەلىسىن قۇرىپ، بۇكىلدەي مايلى تۇيە ءسۇتى تالقانى مەن توڭازىتىپ قۇرعاتىلعان تۇيە ءسۇتى تالقانى سىندى 2 ءتۇرلى ءونىم وندىرە باستايدى. سەرىكتەستىك تاعى يجوۋ رايونىنىڭ تۇيە ءسۇتى ماركاسى − ”جياڭدۇڭ حۋاڭمولاڭ“ تۇيە ءسۇتى تالقانىن شىعاردى.
”سەلبەستىك كووپەراتيۆى + سەرىكتەستىك“ ۇلگىسىن قولدانعاندىقتان، ارسىلاننىڭ تۇيە باعىمشىلىعى مەن تۇيە ءسۇتىن وڭدەۋى تەز قارقىندى دامۋ ارناسىنا ءتۇسىپ، تۇيە ءسۇتى تالقانىنىڭ ەكونوميكالىق ونىمدىلىگى كۇن سايىن ارتتى. قازىر ونىڭ سەرىكتەستىگى قۇمىل قالاسى رايونىندا 20 نەشە تۇيە ءسۇتى تالقانىن ساتۋ ورنىن قۇرىپ، 2 ارناۋلى ساتۋ دۇكەنىن اشىپ وتىر.
”ءبىز وندىرگەن تۇيە ءسۇتى تالقانى بەيجيڭ، شاڭحاي، گۋاڭجوۋ سياقتى جەرلەرگە ساتىلدى“. ارسىلان بىلاي دەدى: بيىل تۇيە باعىمشىلىعىنىڭ كولەمىن ۇزدىكسىز كەڭەيتىپ، تۇيە ءسۇتىنىڭ ءونىم مولشەرىن جوعارىلاتامىز. سونىمەن بىرگە بازاردى كەڭەيتۋ اياق الىسىن جەدەلدەتىپ، ءۇرىمجى قالاسى سياقتى جەرلەردەن ”جياڭدۇڭ حۋاڭمولاڭ“ تۇيە ءسۇتى تالقانىن ارناۋلى ساتۋ دۇكەنىن اشۋدى جوسپارلاپ وتىرمىز.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
