شي جينپيڭ تۇركمەنستاننىڭ زۇڭتۇڭى بەردىمۇحامەتوۆپەن كەزدەستى
2023.05.19 15:08 كەلۋ قاينارى : حالىق تورابى
«حالىق گازەتى»، 5 - ايدىڭ 18 – كۇنى، شي – ان (تىلشىلەر جاڭ پىڭحۇي، لي چياڭ). 5 - ايدىڭ 18 - كۇنى تۇستەن كەيىن مەملەكەت ءتوراعاسى شي جينپيڭ شي - اندا جۇڭگو - ورتا ازيا ەلدەرى باسشىلار ماجىلىسىنە قاتىناسۋعا كەلگەن تۇركمەنستاننىڭ زۇڭتۇڭى بەردىمۇحامەتوۆپەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن تۇركمەنستان ديپلوماتيالىق قارىم - قاتىناس ورناتقان 31 جىلدان بەرى ەكى ەل باستان - اياق ءوزارا قۇرمەت ەتۋ، ءوزارا پايدا جەتكىزىپ، تەڭ يگىلىككە كەنەلۋ پرينسيبى بويىنشا دوستىق سەلبەستىكتى ىلگەرىلەتتى. بيىل 1 - ايدا ءسىز جۇڭگودا مەملەكەتتىك ساپاردا بولدىڭىز، ءبىز ەكى ەل قارىم - قاتىناسىن جان - جاقتى ستراتەگيالىق سەرىكتەستىك قارىم - قاتىناس دەڭگەيىنە كوتەرىپ، ەكى جاقتى دەڭگەيدە تاعدىرلاس ورتاق تۇلعانى امالياتتا ايگىلەپ، جۇڭگو - تۇركمەنستان قارىم - قاتىناسى دامۋىنىڭ جاڭا پاراعىن اشتىق. جۇڭگو جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدە، تۇركمەنستان ”مەملەكەتتى قۇدىرەتتەندىرۋدىڭ جاڭا داۋىردەگى گۇلدەنۋى“ نىساناسىنا قاراي قادام تاستاۋدا، جۇڭگو - تۇركمەنستان قارىم - قاتىناسىنىڭ دامۋ كومەسكى كۇشى زور، بولاشاعى نۇرلى. جۇڭگو جاق تۇركمەنستان جاقپەن بىرگە قۇلشىنىپ، ەكى ەلدىڭ قارىم - قاتىناسىن ۇزدىكسىز العا ىلگەرىلەتىپ، ەكى ەل حالىقتارىن اناعۇرلىم باقىتقا كەنەلتۋدى قالايدى.
شي جينپيڭ بىلاي دەپ دارىپتەدى: جۇڭگو جاق تۇركمەنستاننىڭ مەملەكەتتىڭ يەلىك ۇقىعىن، تاۋەلسىزدىگىن، تەرريتوريا تۇتاستىعىن قورعاۋىن باتىل قولدايدى، تۇركمەنستاننىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن باتىل قولدايدى، باستان - اياق تۇركمەنستان جاقتىڭ سەنىمدى دوسى جانە سەرىگى بولادى. ەكى جاق ءبىرىن - ءبىرى تولىقتاۋ ابزالدىعىن تولىق ساۋلەلەندىرىپ، سەلبەستىك كومەسكى كۇشىن اشىپ، سەلبەستىكتىڭ تەرەڭدىگىن، كەڭدىگىن جانە كولەمىن جاپپاي جوعارىلاتۋى كەرەك. جۇڭگو جاق تۇركمەنستان جاقپەن ەكونوميكا - ساۋدا، تابيعي گاز، ۇلاستىرۋ - تۇتاستىرۋ سياقتى سالالارداعى سەلبەستىكتى كەڭەيتىپ، حابارلاسۋ، عارىش سياقتى جوعارى، جاڭا تەحنيكا سەلبەستىگىن كەڭەيتىپ، ءتىپتى دە كوپ جۇڭگو كاسىپورىندارىنىڭ تۇركمەنستانعا بارىپ قارجى قوسىپ، شارۋاشىلىقتى گۇلدەندىرۋىن قولدايدى، ەكى ەلدىڭ جەرگىلىكتى ولكە، وبلىستارى دا جۇمىلىپ، ءوز ابزالدىقتارىمەن ۇشتاستىرىپ، اناعۇرلىم كوپ سالادا سەلبەستىك ورىستەتۋى كەرەك. ەكى جاق بيىل جانە كەلەر جىلى ءوزارا مادەنيەت جىلىن وتكىزۋدى وراي ەتىپ، گۋمانيتارلىق اۋىس - كۇيىستى تەرەڭدەتۋى كەرەك.
شي جينپيڭ مىنالاردى اتاپ كورسەتتى: جۇڭگو مەن ورتا ازيا ەلدەرى − ءبىر – بىرىنە بەرىك سۇيەنگەن، بەينەت پەن زەينەتتە بىرگە بولاتىن تاعدىرلاس ورتاق تۇلعا. جۇڭگو 5 ەلمەن بىرگە قۇلشىنىپ، وسى رەتكى جۇڭگو - ورتا ازيا باسشىلار ءماجىلىسىن ويداعىداي اشىپ، جۇڭگو - ورتا ازيا سەلبەستىگىنىڭ ورنىقتى دامۋىن ىلگەرىلەتىپ، ورتا ازيا ءوڭىرىنىڭ بەيبىتشىلىگى مەن ورنىقتىلىعن جانە باياندى تىنىشتىعىن قورعاۋدى ءۇمىت ەتەدى.
بەردىمۇحامەتوۆ مىنالاردى ءبىلدىردى: تۇركمەنستان مەن جۇڭگونىڭ دوستىعى ۋاقىت وتكەن سايىن جاڭارىپ كەلەدى، تۇركمەنستان مەن جۇڭگونىڭ قارىم - قاتىناسى ءوزارا قۇرمەت ەتۋدى، تەڭدىكتى جانە ءوزارا پايدا جەتكىزىپ، تەڭ يگىلىككە كەنەلۋدى نەگىز ەتەدى، بولاشاعى نۇرلى. تۇركمەنستان جاق جۇڭگومەن جاپپاي ستراتەگيالىق سەرىكتەستىك قارىم - قاتىناستى ايرىقشا قاستەرلەيدى، جۇڭگو جاقتىڭ ”جىبەك جولىن گۇلدەندىرۋ“ ستراتەگياسىن ”ءبىر بەلدەۋ، ءبىر جولددى“ بىرگە قۇرۋ باستاماسىمەن ۇشتاستىرۋدى، تۇركمەنستان - جۇڭگو سەلبەستىك كوميتەتىنىڭ رولىن ساۋلەلەندىرىپ، ەنەرگيا، جاڭالىق اشۋ سياقتى ءتۇيىندى سالالارداعى سەلبەستىكتى تەرەڭدەتىپ، گۋمانيتارلىق اۋىس - كۇيىستى جيىلەتۋدى قالايدى. جۇڭگو - ورتا ازيا مەحانيزمى دوستىق پەن سەلبەستىكتى تەرەڭدەتۋگە جاڭا وراي ازىرلەيدى، دۇنيە ءجۇزى جونىنەن دە ماڭىزدى مانگە يە. تۇركمەنستان جاق بۇعان باسا ءمان بەرەدى، جۇڭگو جاقپەن تىلدەسۋدى، سەلبەسۋدى جيىلەتىپ، سىن - سايىسقا بىرگە توتەپ بەرىپ، ءوڭىردىڭ حاۋىپسىزدىگىن، ورنىقتىلىعىن جانە دامۋىن، گۇلدەنۋىن جەبەۋدى قالايدى.
كەزدەسۋدەن كەيىن ەكى ەلدىڭ مەملەكەت باسشىلارى عىلىم - تەحنيكا، كەدەن سياقتى سالالارداعى كوپتەگەن ەكى جاقتى سەلبەستىك قۇجاتىنا قول قويۋعا بىرگە كۋا بولدى.
ساي چي، ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
