شي جينپيڭ بانگلادەشتىك بالا الفا چينگە جاۋاپ حات جازدى
2023.06.01 17:07 كەلۋ قاينارى : حالىق تورابى
شينحۋا اگەنتتىگى، 5 - ايدىڭ 31 - كۇنى، بەيجيڭ. تاياۋدا مەملەكەت ءتوراعاسى شي جينپيڭ بانگلادەشتىك بالا الفا چىنگە جاۋاپ حات جازىپ، ونى قۇلشىنا ۇيرەنىپ، ارمانعا تالپىنىپ، جۇڭگو مەن بانگلادەشتىڭ ءداستۇرلى دوستىعىن ويداعىداي جالعاستىرۋعا شابىتتاندىردى.
شي جينپيڭ بىلاي دەپ اتاپ كورسەتتى: الفا چين حاتىندا جۇڭگو مەن بانگلادەش دوستىعىنىڭ جاندى كارتيناسىن بايانداپتى. جۇڭگو مەن بانگلادەش حالىقتارى ەجەلدەن جاقسى كورشىلەر، تاتۋ دوستار، مىڭ جىلعا جالعاسقان دوستىق بارىس - كەلىس تاريحى بار. 600 نەشە جىلدىڭ الدىندا جۇڭگونىڭ ميڭ پاتشالىعى داۋىرىندەگى تەڭىز ساياحاتشىسى جىڭ حىنىڭ ”قازىنالى كەمەسى“ ەكى رەت بانگلادەشتە ساپاردا بولىپ، ەكى ەل حالىقتارىنىڭ اراسىنا دوستىقتىڭ تۇقىمىن سەپتى. 600 جىلدان استام ۋاقىتتان كەيىن جۇڭگو تەڭىز ارمياسىنىڭ ”بەيبىتشىلىك كەمەسى“ اتتى ەمدەۋ كەمەسى زور سۇيىسپەنشىلىكپەن الىس ساپارعا اتتاندى، جۇڭگونىڭ ايەل اسكەري شيپاگەرى جيدا پورتىندا الفا چيننىڭ شەشەسىنىڭ قاتەرلى جاعدايدان وتۋىنە، ءساتتى بوسانۋىنا كومەكتەستى، الفا چيننىڭ اكەسى وعان بانگلادەش تىلىندە ”جۇڭگو“ دەگەن ماعىنا بەرەتىن ءسوزدى ەسىم ەتىپ قويىپ، جۇڭگو مەن بانگلادەش دوستىعىنىڭ جان تەبىرەنتەرلىك تىڭ داستانىن جازدى.
شي جينپيڭ بىلاي دەپ دارىپتەدى: الفا چيننىڭ ەرجەتكەننەن كەيىن جۇڭگو مەن بانگلادەشتىڭ دوستىعىنىڭ ەلشىسى بولۋعا بەل بايلاعانىن، بولاشاقتا جۇڭگوعا كەلىپ مەديتسينا ۇيرەنىپ، ”جۇڭگولىق شەشە“ سياقتى اجالعا اراشاشى، جارالىعا مەدەت بولۋدى ءۇمىت ەتەتىنىن ءبىلىپ، قاتتى قۋاندىم. الفا چيننىڭ جاستىق كوكتەمدى قاستەرلەپ، قۇلشىنا ۇيرەنىپ، ءوز ارمانىن جۇزەگە اسىرىپ، وتباسىنا قارىمجى قايتارۋىن، قوعامعا قىزمەت وتەۋىن، وتاننىڭ ءۇمىتىن اقتاۋىن ءۇمىت ەتەمىن. ”1 – ماۋسىم“ حالىقارالىق بالالار مەرەكەسى قارساڭىندا دەنىنىڭ ساۋ، وتباسىلارىنىڭ باقىتتى بولۋىن، ۇيرەنۋدە العا باسۋىن تىلەيمىن.
الفا چين 2010 - جىلى تۋىلعاندا، شەشەسى اۋىر جۇرەك اۋرۋىنا شالدىعىپ، بوسانا الماي، ءبىر مەزەت ومىرىنە حاۋىپ تونەدى. سول كەزدە بانگلادەشتىڭ جيدا پورتىندا ساپاردا جۇرگەن جۇڭگو تەڭىز ارمياسىنىڭ ”بەيبىتشىلىك كەمەسى“ اتتى ەمدەۋ كەمەسى كومەك سۇراۋ مالىمەتىن تاپسىرىپ الىپ، اسكەري شيپاگەردى دەرەۋ جەرگىلىكتى شيپاحاناعا جىبەرىپ، اۋىر قاتەرگە قاراماي قۇرساقتى جارىپ بوساندىرۋ وپەراتسياسىن جاساپ، ەڭ سوڭىندا شەشەسى امان – ەسەن بوسانادى. العىس ءبىلدىرۋ ءۇشىن اكەسى وعان ”چين“ (Chin) دەپ ات قويادى، بانگلادەش تىلىندە بۇل ”جۇڭگو“ دەگەن ماعىنانى بىلدىرەدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
