لي چياڭ، جاۋ لىجي، لي شي گوندۋراستىڭ زۇڭتۇڭى كاسترومەن جەكە - جەكە كەزدەستى
2023.06.14 16:00 كەلۋ قاينارى : حالىق تورابى
شينحۋا اگەنتتىگى، 6 - ايدىڭ 13 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 6 - ايدىڭ 13 - كۇنى تۇستەن بۇرىن حالىق سارايىندا جۇڭگوعا مەملەكەتتىك ساپارمەن كەلگەن گوندۋراستىڭ زۇڭتۇڭى كاسترومەن كەزدەستى.
لي چياڭ مىنالاردى ءبىلدىردى: بيىل 3 – ايدا ءتوراعا شي جينپيڭ مەن زۇڭتۇڭ حانىم جۇڭگو مەن گوندۋراستىڭ ديپلوماتيالىق قارىم - قاتىناس ورناتۋى سىندى ماڭىزدى ساياسي شەشىم جاساپ، ەكى ەل قارىم - قاتىناسىنىڭ شىت جاڭا بەتىن اشتى. جۇڭگو جاق گوندۋراس جاقتىڭ ءبىر جۇڭگو پرينسيبىندە تاباندى بولۋداعى باتىل ۋادەسىن، تاريحتىڭ دۇرىس جاعىندا تۇرۋدى تاڭداعانىن بارىنشا القايدى. جۇڭگو جاق گوندۋراس جاقپەن قول ۇستاسا قۇلشىنىپ، ەكى ەل مەملەكەت باسشىلارىنىڭ ماڭىزدى ورتاق تانىمىن ويداعىداي تياناقتاندىرىپ، ءار سالاداعى سەلبەستىكتىڭ قارىشتاپ دامۋىن ىلگەرىلەتۋدى قالايدى.
لي چياڭ بىلاي دەپ اتاپ كورسەتتى: جۇڭگو مەن گوندۋراس جاڭا دوس، جاڭا سەرىك، ونان دا ماڭىزدىسى، ءوزارا قۇرمەت ەتەتىن، تەڭ تۇرعىدا ءوزارا پايدا جەتكىزەتىن، بىرگە داميتىن جاقسى دوس، جاقسى سەرىك بولۋى كەرەك. جۇڭگو جاق گوندۋراس جاقتىڭ دەربەس، ءوز - وزىنە قوجايىن بولۋىن باتىل قولدايدى، كوپ جاقتى ىستەردە گوندۋراس جاقپەن سايكەسۋدى، سەلبەسۋدى كۇشەيتىپ، حالىقارالىق ادىلدىكتى، تۋراشىلدىقتى بىرگە قورعاپ، دۇنيە جۇزىلىك سىن - سايىسقا بىرگە توتەپ بەرىپ، قالىڭ وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى. ەكى جاق ناقتى سەلبەستىكتى تەزدەن ىلگەرىلەتىپ، گۋمانيتارلىق اۋىس – كۇيىستى بەلسەنە ورىستەتىپ، سەلبەستىك ناتيجەلەرى ارقىلى ءوزارا مۇددە جەتكىزىپ، تەڭ يگىلىكتەنۋدى ىسكە اسىرىپ، ناقتى ارەكەت ارقىلى ەكى ەل حالىقتارىنا باقىت جاراتۋى كەرەك. جۇڭگو جاق گوندۋراس جاقپەن ەكى ەلدىڭ ساۋدا كومەسكى كۇشىن اشىپ، گوندۋراس جاقتىڭ ەرەكشە ونىمدەرىن جۇڭگوعا جەتكىزۋ كەلىسىمىنىڭ كەيىنگى ىستەرىن جەدەل ۇشتاستىرىپ، ەركىن ساۋدا كەلىسىمىنىڭ اياق الىسىن ەرتەرەك اقىلداسىپ، قارجى قوسۋ، قارجى قۇراۋ سەلبەستىگىن ورنىقتى ورىستەتىپ، حالىق تۇرمىسى نىسانى قۇرىلىسىن جەدەلدەتۋدى قالايدى. گوندۋراستىڭ جۇڭگو كاسىپورىندارىنىڭ قارجى قوسىپ، شارۋاشىلىعىن شالقىتۋىنا تاماشا، قولايلى قارجى قوسۋ ورتاسىن ازىرلەۋىن ءۇمىت ەتەمىن. جۇڭگو جاق گوندۋراس جاقتىڭ ”ءبىر بەلدەۋ، ءبىر جولدى“ بىرگە قۇرۋ ۇلى شاڭىراعىنىڭ جاڭا مۇشەسىنە اينالۋىن قارسى الادى، گوندۋراسپەن بىرگە ”ءبىر بەلدەۋ، ءبىر جول“ قۇرىلىسىن جوعارى ساپامەن ىلگەرىلەتۋدى قالايدى.
كاسترو مىنالاردى ءبىلدىردى: گوندۋراس گوندۋراس – جۇڭگو قارىم - قاتىناسىنا ايرىقشا ءمان بەرەدى، جۇڭگو جاقتىڭ گوندۋراس پەن جۇڭگو ديپلوماتيالىق قارىم - قاتىناس ورناتقاننان كەيىن ەكى ەل سەلبەستىگىن ىلگەرىلەتۋ ءۇشىن ىستەگەن قىرۋار تابىستى قىزمەتىنە العىس ايتادى. گوندۋراس جاق ءبىر جۇڭگو پرينسيبىندە تاباندى بولادى، ءتوراعا شي جينپيڭ العا قويعان ءبىرقىدىرۋ ماڭىزدى باستامانى قولدايدى، جۇڭگو جاقپەن بىرگە اۋىل شارۋاشىلىعى، كەدەيلىكتى ازايتۋ، نەگىزدىك قۇرىلعى قۇرىلىسى سياقتى سالالارداعى سەلبەستىكتى كۇشەيتىپ، گۋمانيتارلىق اۋىس - كۇيىستى كۇشەيتىپ، گوندۋراس - جۇڭگو قارىم - قاتىناسىنىڭ ورنىقتى قاداممەن الىسقا جەتۋىن ىلگەرىلەتىپ، ەكى ەل حالىقتارىنا باقىت جاراتۋدى قالايدى.
چين گاڭ قاتارلىلار كەزدەسۋدە بىرگە بولدى.
شينحۋا اگەنتتىگى، 6 - ايدىڭ 13 - كۇنى، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 6 - ايدىڭ 13 - كۇنى بەيجيڭدە گوندۋراستىڭ زۇڭتۇڭى كاسترومەن كەزدەستى.
جاۋ لىجي مىنالاردى ءبىلدىردى: جۇڭگو مەن گوندۋراستىڭ ديپلوماتيالىق قارىم - قاتىناس ورناتقان ۋاقىتى قىسقا بولعانىمەن، سەلبەستىك ناتيجەسى مول بولىپ، ەكى ەلدىڭ ديپلوماتيالىق قارىم - قاتىناس ورناتۋىنىڭ تاريح اعىمىنا سايكەسەتىنىن، ەكى ەل حالىقتارىنىڭ ءتۇبىرلى مۇددەسىنە ۇيلەسەتىنىن تولىق دالەلدەدى. جۇڭگو جاق گوندۋراس جاقپەن بىرگە ەكى ەل مەملەكەت باسشىلارى كەشەگى تاريحي كەزدەسۋىندە كەلىسكەن ماڭىزدى ورتاق تانىمدى ويداعىداي تياناقتاندىرىپ، جۇڭگو - گوندۋراس قارىم - قاتىناسىنىڭ ورنىقتى، باياندى بولۋىن ىلگەرىلەتۋدى قالايدى. جاۋ لىجي جۇڭگو ۇلگىسىندەگى وسىزامانداندىرۋدى جانە جۇڭگو ۇكىمەتىنىڭ حالىقتى وزەك ەتۋ تانىمى مەن امالياتىن تانىستىرىپ، جۇڭگونىڭ مەملەكەتتىك حالىق قۇرىلتايىنىڭ گوندۋراس پارلامەنتىمەن كوپ ساتىلى، كوپ سالالى، كوپ فورمالى اۋىس - كۇيىس سەلبەستىگىن ورىستەتىپ، ءوزارا ۇيرەنىپ، ءوزارا ۇلگى الىپ، ءوز ەلدەرىنىڭ دامۋىنا اناعۇرلىم ويداعىداي قىزمەت ەتىپ، ەكى ەل حالىقتارىنا باقىت جاراتۋدى قالايتىنىن ءبىلدىردى.
كاسترو مىنالاردى ءبىلدىردى: گوندۋراس پەن جۇڭگو ديپلوماتيالىق قارىم - قاتىناس ورناتقاننان بەرگى ەكى ەل قارىم - قاتىناسىنىڭ دامۋى، اسىرەسە، مەنىڭ وسى رەتكى جۇڭگوعا ساپارىمنىڭ ناتيجەسى گوندۋراس پەن جۇڭگو ديپلوماتيالىق قارىم - قاتىناس ورناتۋىنىڭ بۇكىلدەي دۇرىس تاريحي تالعام ەكەنىن تولىق دالەلدەدى. گوندۋراس جاق ءبىر جۇڭگو پرينسيبىندە تاباندى بولادى، جۇڭگو جاقپەن ەكى ەلدىڭ زاڭ شىعارۋ قۇرىلىمدارىنىڭ اۋىس - كۇيىسىن كۇشەيتىپ، ەكى ەل قارىم - قاتىناسىنىڭ باياندى، ورنىقتى دامۋىن ىلگەرىلەتۋدى قالايدى.
جاڭ چيڭۋەي كەزدەسۋدە بىرگە بولدى.
شينحۋا اگەنتتىگى، 6 - ايدىڭ 13 - كۇنى، بەيجيڭ. ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق ءتارتىپ تەكسەرۋ كوميتەتىنىڭ شۋجيى لي شي 6 - ايدىڭ 13 - كۇنى بەيجيڭدە گوندۋراستىڭ زۇڭتۇڭى كاسترومەن كەزدەستى.
لي شي مىنالاردى ءبىلدىردى: ءتوراعا شي جينپيڭ جۇڭگو – گوندۋراس قارىم - قاتىناسى مەن كاسترو زۇڭتۇڭنىڭ وسى رەتكى ساپارىنا ايرىقشا ءمان بەرىپ، زۇڭتۇڭ حانىممەن بىرگە ەكى ەل قارىم - قاتىناسىنىڭ بولاشاق دامۋ جوباسىن جاسادى. جۇڭگو مەن گوندۋراس ديپلوماتيالىق قارىم - قاتىناس ورناتقان 2 ايدان استام ۋاقىتتان بەرى ەكى جاق ەرەكشە ريتىممەن سەلبەستىكتى ىلگەرىلەتىپ، سۇبەلى تابىستارعا قول جەتكىزىپ، جۇڭگو مەن گوندۋراستىڭ ديپلوماتيالىق قارىم - قاتىناس ورناتۋىنىڭ ەكى ەلگە جانە ەكى ەل حالىقتارىنا ءتيىمدى دۇرىس شەشىم ەكەنىن تولىق دالەلدەدى. لي شي جۇڭگو جاقتىڭ شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا پارتيانى جاپپاي قاتاڭ جونگە سالۋدى جانە شىرىكتەسۋگە قارسى تۇرۋ كۇرەسىن ىلگەرىلەتۋگە قاتىستى جاعدايلار مەن تاجىريبە اسەرلەرىن جۇيەلى تانىستىرىپ، جۇڭگونىڭ گوندۋراس جاقپەن شىرىكتەسۋگە قارسى تۇرۋ سياقتى سالالاردى قامتىعان ەل باسقارۋ تاجىريبەلەرىن اۋىستىرۋدى كۇشەيتىپ، شىرىكتەسۋگە قارسى حالىقارالىق سەلبەستىكتە تاباندى بولىپ جانە ونى كۇشەيتىپ، ەكى جاقتى قاتىناستا ۇزدىكسىز تىڭ تابىستارعا قول جەتكىزۋدى قالايتىنىن ءبىلدىردى.
كاسترو مىنالاردى ءبىلدىردى: گوندۋراس جاق ءبىر جۇڭگو پرينسيبىن مويىندايدى ءارى وسى نەگىزدە جۇڭگومەن ديپلوماتيالىق قارىم - قاتىناس ورناتۋى تاريحي مانگە يە. گوندۋراس جاق جۇڭگو جاقتىڭ شىرىكتەسۋگە قارسى تۇرۋ ۇستانىمى مەن جەتىستىگىنە جوعارى باعا بەرەدى، جۇڭگو جاقتىڭ قاتىستى تاجىريبەلەرىن ۇيرەنۋدى، ۇلگى الۋدى قالايدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
