مەملەكەتتىك كەڭەس نەگىزگى زاڭعا سەرت بەرۋ سالتىن وتكىزدى
لي چياڭ زۇڭلي سەرت بەرۋدى باقىلادى
2023.06.16 15:50 كەلۋ قاينارى : حالىق تورابى
6 - ايدىڭ 15 - كۇنى مەملەكەتتىك كەڭەس بەيجيڭدەگى جۇڭنانحايدا نەگىزگى زاڭعا سەرت بەرۋ سالتىن وتكىزدى. مەملەكەتتىك كەڭەستىڭ زۇڭليى لي چياڭ سەرت بەرۋدى باقىلادى. سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن
شينحۋا اگەنتتىگى، 6 ـ ايدىڭ 15 ـ كۇنى، بەيجيڭ. 6 ـ ايدىڭ 15 ـ كۇنى مەملەكەتتىك كەڭەس نەگىزگى زاڭعا سەرت بەرۋ سالتىن وتكىزدى. مەملەكەتتىك كەڭەستىڭ زۇڭليى لي چياڭ سەرت بەرۋدى باقىلادى.
«جۇڭحۋا حالىق رەسپۋبليكاسىنىڭ نەگىزگى زاڭىنا» جانە «مەملەكەتتىك كەڭەس جانە ونىڭ تاراۋلارى تاعايىنداعان مەملەكەت قىزمەتكەرلەرىن نەگىزگى زاڭعا سەرت بەرۋگە ۇيىمداستىرۋ ادىسىنە» ساي، مەملەكەتتىك كەڭەس تاعايىنداعان 55 تاراۋ مەن ورىننىڭ 81 جاۋاپتىسى نەگىزگى زاڭعا زاڭ بويىنشا سەرت بەردى.
تۇستەن كەيىن ساعات 4 تە مەملەكەتتىك كەڭەستىڭ مۇشەسى، قوسىمشا مەملەكەتتىك كەڭەستىڭ باس حاتشىسى ۋ جىڭلۇڭ نەگىزگى زاڭعا سەرت بەرۋ سالتىنىڭ باستالعانىن جاريالادى. كوپشىلىك ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن شىرقادى. وسىدان كەيىن سەرت بەرۋشىلەردىڭ باستاماشىسى قولىن نەگىزگى زاڭنىڭ ۇستىنە قويىپ، سەرت ءسوزىن وقىدى، باسقا دا سەرت بەرۋشىلەر ساپ تۇزەپ تۇرىپ، سەرت ءسوزىن بىرگە وقىدى.
سەرت بەرگەننەن كەيىن مەملەكەتتىك كەڭەستىڭ زۇڭليى لي چياڭ ءسوز سويلەدى. ول بىلاي دەدى: ايبىندى سالت قاشان دا كوڭىلىمىزدى تەرەڭ اسەرلەندىرىپ، رۋحىمىزدى تازارتىپ، ارلەندىرەدى، كوپشىلىكتىڭ ايبىندى ۋادەنى كوكەيگە ۇيالاتىپ، ارەكەتتە ايگىلەپ، كۇندەلىكتى قىزمەت پەن تۇرمىستىڭ بارلىق جاقتارىندا ايگىلەپ، كۇرەس ارقىلى سەرتتەن اينىماۋىن، ۋادەنى امالياتتا ايگىلەۋىن ءۇمىت ەتەمىن. ول بىلاي دەپ دارىپتەدى: ادالدىقتى ماڭگى ساقتاۋ ءۇشىن، ەڭ ءتۇبىرلىسى پارتياعا ادال بولۋ نيەتىن شىڭداپ، شي جينپيڭ جاڭا ءداۋىر جۇڭگوشا سوتسياليزم يدەياسىمەن تىلەك توعىستىرىپ، رۋحتى سومداۋدا تاباندى بولىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ەكىنى قورعاۋدى“سانالى تۇردە ورىنداپ، مەيلى قانداي جاعدايدا بولسىن، قانداي بوران ـ شاشىندى باستان كەشىرەيىك، يدەيادا، ساياسيدا، ارەكەتتە شي جينپيڭ جولداستى ۇيىتقى ەتكەن پارتيا ورتالىق كوميتەتىمەن وسكەلەڭ ءبىر اۋىزدىلىقتى ساقتاپ، نەگىزگى زاڭعا، وتانعا، حالىققا ادال بولۋ كەرەك. العا باسۋ سەزىمىن كۇشەيتىپ، حالىقتى وزەك ەتكەن دامۋ يدەياسىندا تاباندى بولىپ، ءىس تىندىرىپ، شارۋاشىلىق قۇرۋ رۋحىن ۇزدىكسىز سەرپىلتىپ، بار ىنتا ـ پەيىلمەن پارتيا مەن حالىق ءۇشىن قىزمەت ىستەپ، ساپالى دامۋدى ىلگەرىلەتىپ، رەفورما جاساپ، ەسىك اشۋدى جاپپاي تەرەڭدەتىپ، جاڭا ىسكەرلىك ارقىلى ءتۇرلى ىستەردىڭ دامۋىن ىلگەرىلەتۋدە تىڭ تابىستارعا قول جەتكىزىپ، ۇلكەن وزگەرىس بارىسىندا ىرىقتىلىققا، ابزالدىققا قول جەتكىزۋگە قۇلشىنۋ كەرەك. قاي - قاشان دا يمەنۋ سەزىمىندە بولىپ، دۇرىس ۇقىق كوزقاراسىن، ساياسي ناتيجە كوزقاراسىن، كاسىپ كوزقاراسىن بەرىك ورناتىپ، زاڭمەن جونگە سالۋ رۋحىنا بويسۇنىپ، نەگىزگى زاڭنىڭ بەدەلىن قورعاپ، اكىمشىلىكتى زاڭ بويىنشا قاتاڭ جۇرگىزىپ، يدەيالىق قورعانىس شەبىن بەكەمدەپ، پاكتىكتىڭ تومەنگى شەگىن ساقتاپ، زاڭ - ءتارتىپ قىزىل سىزىعىن بەرىك ساقتاپ، كوممۋنيستەردىڭ ساياسي قاسيەتىن باستان - اياق ساقتاپ، كىرشىكسىز ادام بولىپ، ءىستى كىرشىكسىز ىستەۋ كەرەك. ول مىنالاردى دارىپتەدى: بورىش پەن جاۋاپكەرلىك موينىمىزعا جۇكتەلدى، شىنايى ىستەگەندە عانا الىسقا جەتۋگە بولادى، سەرتتى ارەكەتتە ايگىلەپ، امالياتتا تياناقتاندىرىپ، شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، پارتيا ورتالىق كوميتەتىنىڭ شەشىمدەرىن، ورنالاستىرۋلارىن باتىل دايەكتىلەندىرۋدىڭ اتقارۋشىسى، ارەكەتشىسى، ىسكەرى بولىپ، جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا قاجىماي ـ تالماي كۇرەس جۇرگىزۋ كەرەك.
مەملەكەتتىك كەڭەستەگى باسشى جولداستار، سونداي - اق مەملەكەتتىك كەڭەستىڭ قاتىستى تاراۋلارىنداعى جاۋاپتى جولداستار قاتارلىلار قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
