شي جينپيڭ سولومون توپ ارالىنىڭ زۇڭليى سوگاۆارەمەن كەزدەستى
2023.07.11 15:23 كەلۋ قاينارى : حالىق تورابى
 |
7 - ايدىڭ 10 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن سولومون توپ ارالىنىڭ زۇڭليى سوگاۆارەمەن كەزدەستى.
سۋرەتتى شينحۋا اگەنتتىگىنىڭ ءتىلشىسى جاڭ ليڭ تۇسىرگەن
|
شينحۋا اگەنتتىگى، 7 – ايدىڭ 10 – كۇنى، بەيجيڭ (ءتىلشى جىڭ ميڭدا). مەملەكەت ءتوراعاسى شي جينپيڭ 7 - ايدىڭ 10 - كۇنى تۇستەن كەيىن حالىق سارايىندا جۇڭگوعا رەسمي ساپارمەن كەلگەن سولومون توپ ارالىنىڭ زۇڭليى سوگاۆارەمەن كەزدەستى. ەكى جاق جۇڭگو مەن سولومون توپ ارالىنىڭ جاڭا داۋىردەگى ءوزارا قۇرمەت ەتۋ، ورتاق دامۋ جالپى بەتتىك ستراتەگيالىق سەرىكتەستىك قارىم - قاتىناسىن رەسمي ورناتقانىن بىرگە جاريالادى.
شي جينپيڭ بىلاي دەپ اتاپ كورسەتتى: جۇڭگو مەن سولومون توپ ارالى − ءوزارا سەنىمدى جاقسى دوستار، ءوزارا سۇيەنۋگە بولاتىن جاقسى باۋىرلاستار. ديپلوماتيالىق قارىم - قاتىناس ورناتقاننان بەرى ەكى ەلدىڭ دوستىق سەلبەستىگى كەش باستالسادا، ارىنداي العا ءوتىپ، جۇڭگونىڭ تىنىق مۇحيتتاعى ارال ەلدەرىمەن قارىم - قاتىناسىنىڭ الدىڭعى لەگىندە ءجۇرىپ، تۇرلىشە ءىرى، شاعىن ەلدەر مەن وركەندەپ كەلە جاتقان ەلدەردىڭ ىنتىماقتاسا سەلبەسىپ، قول ۇستاسا دامۋىنىڭ ۇلگىسىنە اينالدى. اماليات جۇڭگو مەن سولوموننىڭ ديپلوماتيالىق قارىم - قاتىناس ورناتۋى ءداۋىر اعىمىنا سايكەسەتىنىن، حالىقارالىق اۋقىمعا ۇيلەسەتىنىن، ەكى ەل حالىقتارىنىڭ ءتۇبىرلى مۇددەسىنە ۇيلەسەتىنىن، دۇرىس تالعام ەكەنىن دالەلدەدى. جۇڭگو جاق سولومونمەن ستراتەگيالىق تۇسىنىستىكتى كۇشەيتىپ، ءار سالاداعى سەلبەستىكتى تەرەڭدەتىپ، ەكى ەلدىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ورنىقتى قاداممەن باياندى دامۋىن، ءتىپتى دە جاقسارۋىن ىلگەرىلەتىپ، ەكى ەل حالىقتارىن اناعۇرلىم مول باقىتقا كەنەلتۋدى قالايدى.
شي جينپيڭ بىلاي دەپ دارىپتەدى: جۇڭگو سولوموننىڭ ءبىر جۇڭگو پرينسيبىن باتىل اتقارعانىن القايدى، سولوموننىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن قولدايدى، سولوموننىڭ دامۋ جولىن ءوز ەركىمەن تاڭداۋىن قولدايدى. جۇڭگو جاق ءوز ءىسىن ويداعىداي ىستەۋدە تاباندى بولىپ، باستان - اياق دۇنيە ءجۇزى بەيبىتشىلىگىنىڭ قۇرۋشىسى، دۇنيە جۇزىلىك دامۋدىڭ ۇلەس قوسۋشىسى، حالىقارالىق ءتارتىپتىڭ قورعاۋشىسى بولا بەرەدى، جۇڭگو ۇلگىسىندەگى وسىزامانداندىرۋ الا كەلگەن دامۋ ورايىنان سولومون جاقپەن ورتاق يگىلىكتەنۋدى، ”ءبىر بەلدەۋ، ءبىر جولدى“ بىرگە قۇرۋدى سولومون توپ ارالىنىڭ ”2035 دامۋ ستراتەگياسىمەن“ ۇشتاستىرۋدى كۇشەيتىپ، ءار سالاداعى ناقتى سەلبەستىكتى كەڭەيتۋدى، سولوموننىڭ ابزال ونىمدەرىن يمپورت ەتۋدى كەڭەيتۋدى، سولوموننىڭ دامۋدى، گۇلدەنۋدى جانە باياندى تىنىشتىقتى جۇزەگە اسىرۋىنا كومەكتەسۋدى قالايدى. جۇڭگو جاق اناعۇرلىم كوپ جۇڭگو كاسىپورىندارىنىڭ سولومونعا بارىپ قارجى قوسىپ، يگىلىك جاراتۋىن قولدايدى، سولومونعا ۇزدىكسىز ساياسي شارت ۇستەلمەگەن ەكونوميكالىق، تەحنيكالىق كومەك بەرەدى. ەكى جاق ەمدەۋ، وقۋ - اعارتۋ سياقتى سالالارداعى دوستىق اۋىس - كۇيىستى كەڭەيتۋى كەرەك. جۇڭگو جاق سولومون جاقتىڭ 17 - كەزەكتى تىنىق مۇحيت سپورت جارىسىن وتكىزۋىن قولدايدى.
شي جينپيڭ بىلاي دەپ اتاپ كورسەتتى: جۇڭگو تىنىق مۇحيت ارال ەلدەرى ساياساتىندا ”تورتكە تولىق قۇرمەت ەتۋدى“ ۇستانادى: ءبىرىنشى، ارال ەلدەرىنىڭ يەلىك ۇقىعى مەن تاۋەلسىزدىگىنە تولىق قۇرمەت ەتىپ، ۇلكەن - كىشى ەلدەردىڭ بۇكىلدەي تەپە– تەڭ بولۋىندا تاباندى بولادى؛ ەكىنشى، ارال ەلدەرىنىڭ تىلەگىنە تولىق قۇرمەت ەتىپ، ورتاق اقىلداسۋدا، ورتاق قۇرۋدا، ورتاق يگىلىكتەنۋدە، ورتاق پايدا كورۋدە تاباندى بولادى؛ ءۇشىنشى، ارال ەلدەرىنىڭ ۇلتتىق مادەنيەت داستۇرىنە تولىق قۇرمەت ەتىپ، تاتۋ - ءتاتتى بولۋ ءارى پارىقتىلىققا قۇرمەت ەتۋدە، اركىم ءوز ارتىقشىلىعىن ساۋلەلەندىرىپ ورتاق يگىلىكتەنۋدە تاباندى بولادى؛ ءتورتىنشى، ارال ەلدەردىڭ بىرلەسە الۋەتتەنۋىنە تولىق قۇرمەت ەتىپ، ارال ەلدەردىڭ ”كوگىلدىر تىنىق مۇحيت 2050 ستراتەگياسىن“ تياناقتاندىرۋىن قولداپ، بەيبىت، جاراسىمدى، حاۋىپسىز، سيىسىمدى، كوركەيىپ - گۇلدەنگەن كوگىلدىر تىنىق مۇحيت الەمىن قۇرۋعا ۇلەس قوسادى. جۇڭگو جاق تىنىق مۇحيت ارال ەلدەرىنىڭ كليمات وزگەرىسى قاتاڭ سىن - سايىسىنا ءدوپ كەلىپ وتىرعانىن تۇسىنەدى، ارال ەلدەرىمەن اۋا رايى سالاسىندا قىزمەت وتەۋ، اپاتتان ساقتانۋ، اپات زيانىن ازايتۋ، ەكولوگياعا زالالسىز ەنەرگيا سياقتى سالالارداعى اۋىس - كۇيىستى، سەلبەستىكتى كۇشەيتىپ، ارال ەلدەرىنىڭ بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەس ءتارتىبىن تياناقتاندىرۋىنا دەم بەرۋدى قالايدى. جۇڭگو جاق سولومون جاقپەن سايكەسۋدى كۇشەيتىپ، ناعىز كوپ جاقتىلىقتا تاباندى بولىپ، حالىقارالىق تەڭدىك پەن ادىلدىكتى قورعاپ، قىرعي قاباقتىق وي جەلىسىنە جانە زورەكەرلىككە بىرگە قارسى تۇرىپ، ازيا - تىنىق مۇحيت ءوڭىرىنىڭ بەيبىتشىلىگىن، ورنىقتىلىعىن قورعاۋدى قالايدى.
سوگاۆارە مىنالاردى ءبىلدىردى: جۇڭگومەن ديپلوماتيالىق قارىم - قاتىناس ورناتۋ − سولوموننىڭ دۇرىس تالعامى. ديپلوماتيالىق قارىم - قاتىناس ورناتقاننان بەرى ەكى ەل قارىم - قاتىناسىندا سۇبەلى تابىستارعا قول جەتتى. جۇڭگو سولومون توپ ارالىنىڭ ەڭ ۇلكەن نەگىزدىك قۇرىلعى سەلبەستىك سەرىگىنە جانە سەنىمدى دامۋ سەرىگىنە اينالدى. ءتوراعا شي جينپيڭ دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن جانە دۇنيە جۇزىلىك وركەنيەت باستاماسىن العا قويىپ، اسقان كورەگەندىك جانە ەرەكشە باسشىلىق قابىلەت كورسەتتى، سولومون جاق مۇنى ايرىقشا القايدى جانە قولدايدى. جۇڭگو جاقتىڭ كەدەيلىكتى ازايتۋ تابىستارى دۇنيە ءجۇزىنىڭ سۇيىنۋىنە جانە ۇلگى الۋىنا تاتيدى. سولومون جاق ءبىر جۇڭگو پرينسيبىن باتىل اتقارادى، جۇڭگو جاقپەن جوعارى جىكتەگىلەر بارىس - كەلىسىن جيىلەتىپ، ساۋدا، قارجى قوسۋ، گۋمانيتارلىق، جەرگىلىكتى ورىندار سەلبەستىگى سياقتى سالالارداعى اۋىس - كۇيىستى، سەلبەستىكتى كۇشەيتىپ، كليمات وزگەرىسى سياقتى دۇنيە جۇزىلىك سىن - سايىسقا بىرگە توتەپ بەرىپ، سولومون مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزدىكسىز العا دامۋىن ىلگەرىلەتۋدى قالايدى. سولومون جاق جۇڭگونىڭ دامۋىنا قارسى باعىتتالعان جانە شاۋجايلايتىن ءارقانداي ارەكەتكە قارسى تۇرادى.
كەزدەسۋدەن كەيىن ەكى جاق «جۇڭحۋا حالىق رەسپۋبليكاسى مەن سولومون توپ ارالىنىڭ جاڭا داۋىردە ءوزارا قۇرمەت ەتۋ، بىرگە دامۋ جالپى بەتتىك ستراتەگيالىق سەرىكتەستىك قارىم - قاتىناسىن ورناتۋ جونىندەگى بىرلەسكەن مالىمدەمەسىن» جاريالادى.
ۋاڭ ي، ۋاڭ شياۋحۇڭ كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
