شي جينپيڭ رەسەي فەدەراتسيالىق كوميتەتىنىڭ ءتوراعاسى ماتۆيەنكومەن كەزدەستى
2023.07.11 15:25 كەلۋ قاينارى : حالىق تورابى
 |
7 – ايدىڭ 10 – كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا رەسەي فەدەراتسيالىق كوميتەتىنىڭ ءتوراعاسى ماتۆيەنكومەن كەزدەستى.
سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
|
شينحۋا اگەنتتىگى، 7 - ايدىڭ 10 – كۇنى، بەيجيڭ (ءتىلشى جىڭ ميڭدا). مەملەكەت ءتوراعاسى شي جينپيڭ 7 - ايدىڭ 10 - كۇنى تۇستەن كەيىن حالىق سارايىندا رەسەي فەدەراتسيالىق كوميتەتىنىڭ ءتوراعاسى ماتۆيەنكومەن كەزدەستى.
شي جينپيڭ بىلاي دەپ اتاپ كورسەتتى: ەكى جاقتىڭ بىرگە قۇلشىنۋىندا، جۇڭگو - رەسەي قارىم - قاتىناسىندا باستان - اياق اقاۋسىز، ورنىقتى دامۋ ارىنى ساقتالدى، ءار سالاداعى سەلبەستىك ورنىقتى قاداممەن ىلگەرىلەپ، ەكى ەلدىڭ ۇرپاقتان - ۇرپاققا جالعاسقان دوستىعىنىڭ قوعامدىق نەگىزى مەن حالىق تىلەگى نەگىزى اناعۇرلىم بەكەمدەلە ءتۇستى. بيىل 3 - ايدا مەن رەسەيدە مەملەكەتتىك ساپاردا بولىپ، پۋتين زۇڭتۇڭمەن بىرگە ەكى ەلدىڭ جالپى بەتتىك ستراتەگيالىق سەلبەستىگىن جانە ءار سالاداعى ناقتى سەلبەستىگىن تەرەڭدەتۋ جونىندە تىڭ دا ماڭىزدى ورتاق تانىمعا كەلدىك. جۇڭگو - رەسەي قارىم - قاتىناسىن دامىتۋ − ەكى ەلدىڭ ءوز ەلدەرىنىڭ جانە حالىقتارىنىڭ ءتۇبىرلى مۇددەسى نەگىزىندە جاساعان ستراتەگيالىق تالعامى. جۇڭگو جاق رەسەي جاقپەن بىرگە ءوزارا قارايلاساتىن، ىشكەرىلەي توعىساتىن، ءورىس اشا جاڭالىق جاراتاتىن، جالپىعا بىردەي تيىمدىلىك جاساپ، ورتاق يگىلىكتەنەتىن جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قارىم - قاتىناستى دامىتىپ، ەكى ەلدىڭ دامۋى مەن كوركەيۋىنە دەم بەرىپ، كوركەيىپ - گۇلدەنگەن، ورنىقتى، تەپە - تەڭ، ءادىل دۇنيە ءجۇزىن قۇرۋدى ىلگەرىلەتۋدى قالايدى.
شي جينپيڭ بىلاي دەپ دارىپتەدى: زاڭ شىعارۋ قۇرىلىمدارىنىڭ سەلبەستىگى − جۇڭگو مەن رەسەي قارىم - قاتىناسىنىڭ ماڭىزدى قۇرامداس بولەگى. ەكى جاقتىڭ بىرگە قۇلشىنىپ، پۋتين زۇڭتۇڭ ەكەۋىمىز كەلىسكەن ماڭىزدى ورتاق تانىمدى ويداعىداي تياناقتاندىرىپ، ەكى ەلدىڭ ءار سالاداعى سەلبەستىگىنىڭ باياندى، اقاۋسىز دامۋىن زاڭ شىعارۋ تۇرعىسىنان جەبەۋىن جانە قامتاماسىز ەتۋىن، زاڭ شىعارۋ جانە مەملەكەتتى باسقارۋ، اكىمشىلىك باسقارۋ تاجىريبەلەرىن اۋىستىرۋدى كۇشەيتىپ، ەكى ەلدىڭ زاڭ شىعارۋ قۇرىلىمدارىنىڭ سەلبەستىگىن تاعى دا تىڭ ساتىعا كوتەرۋىن ءۇمىت ەتەمىن. ەكى جاق تاعى دا شاڭحاي سەلبەستىك ۇيىمى، بريكس ەلدەرى سياقتى كوپ جاقتى مەحانيزم اياسىنداعى تۇسىنىستىك، سەلبەستىكتى كۇشەيتىپ، دۇنيە جۇزىلىك جونگە سالۋ رەفورماسىن دۇرىس بەتالىسقا باستاپ، بازارى جاڭادان گۇلدەنگەن ەلدەر مەن وركەندەپ كەلە جاتقان ەلدەردىڭ ورتاق مۇددەسىن ويداعىداي قورعاۋى كەرەك.
ماتۆيەنكو مىنانى ءبىلدىردى: رەسەي مەن جۇڭگونىڭ جالپى بەتتىك ستراتەگيالىق سەلبەستىك سەرىكتەستىك قارىم - قاتىناسى ەكى ەلدىڭ مۇددەسىنە جانە ەكى ەل حالىقتارىنىڭ تىلەگىنە ۇيلەسەدى، تاريحتاعى ەڭ جوعارى دەڭگەيگە جەتتى، ۇزدىكسىز ورنىقتى دامي بەرەدى. ءتوراعا شي جينپيڭنىڭ بيىل 3 - ايدا رەسەيدە جاساعان مەملەكەتتىك ساپارى رەسەي – جۇڭگو قارىم - قاتىناسىنىڭ ونان ارى دامۋىنا پارمەندى قوزعاۋشى كۇش قوستى. رەسەي پارلامەنتى رەسەي - جۇڭگو سەلبەستىگىن تەرەڭدەتۋدى كەڭ كولەمدە قولدايدى، جۇڭگونىڭ مەملەكەتتىك حالىق قۇرىلتايىمەن اۋىس - كۇيىستى جانە پىكىرلەسۋدى ونان ارى كۇشەيتىپ، ەكى ەل مەملەكەت باسشىلارىنىڭ ورتاق تانىمىن تياناقتاندىرۋدى زاڭدىق جاقتان كەپىلدەندىرۋدى قالايدى.
ۋاڭ ي، ۋاڭ دۇڭميڭ كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
