شي جينپيڭ يندونەزيانىڭ زۇڭتۇڭى جوكومەن كەزدەستى
2023.07.28 16:42 كەلۋ قاينارى : حالىق تورابى
7 - ايدىڭ 27 - كۇنى تۇستەن كەيىن مەملەكەت ءتوراعاسى شي جينپيڭ چىڭدۋدا 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ اشىلۋ سالتىنا قاتىناسۋعا كەلگەن ءارى جۇڭگوعا ساپارلاي كەلگەن يندونەزيانىڭ زۇڭتۇڭى جوكومەن كەزدەستى. سۋرەتتى شينحۋا اگەنتتىگىنىڭ ءتىلشىسى يىن بوگۋ تۇسىرگەن
«حالىق گازەتى»، 7 - ايدىڭ 27 – كۇنى، چىڭدۋ (تىلشىلەر جاڭ فان، ۋاڭ دي). 7 - ايدىڭ 27 - كۇنى تۇستەن كەيىن مەملەكەت ءتوراعاسى شي جينپيڭ چىڭدۋدا جۇڭگوعا كەلىپ 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ اشىلۋ سالتىنا قاتىناسپاق بولعان ءارى جۇڭگوعا ساپارلاي كەلگەن يندونەزيانىڭ زۇڭتۇڭى جوكومەن كەزدەستى.
شي جينپيڭ بىلاي دەپ اتاپ كورسەتتى: بىلتىر جوكو زۇڭتۇڭ ەكەۋىمىز ەكى ەلدىڭ تاعدىرلاس ورتاق تۇلعاسىن بىرگە قۇرۋدىڭ جاڭا پاراعىن بىرگە اشتىق. مەملەكەتتىڭ وسىزاماندانۋى مەن ۇلتتىڭ گۇلدەنۋىن جۇزەگە اسىرۋ جولىندا جۇڭگو مەن يندونەزيانىڭ ۇستانىمى جوعارى دارەجەدە قابىسىپ، ءبىر - بىرىنە دامۋ ورايىن ازىرلەپ، مۇراتتاس جولداستار، جاقسى سەرىكتەر بولدى. جۇڭگو جاق بيىل ەكى ەلدىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقانىنىڭ 10 جىلدىعىن وراي ەتىپ، يندونەزيامەن ستراتەگيالىق سەلبەستىكتى تەرەڭدەتىپ، وركەندەپ كەلە جاتقان ەلدەردىڭ تاعدىرى بىرگە بولۋىنىڭ، ىنتىماقتاسا سەلبەسۋىنىڭ، بىرگە دامۋدى جەبەۋىنىڭ ۇلگىسىن سومداپ، وڭىرگە جانە دۇنيە جۇزىنە اناعۇرلىم كوپ تۇراقتىلىق جانە وڭ ەنەرگيا ۇستەۋدى قالايدى.
شي جينپيڭ بىلاي دەپ دارىپتەدى: جۇڭگو جاق يندونەزيامەن ۇنەمىلىك ستراتەگيالىق بايلانىستى ساقتاپ، ەل باسقارۋ تاجىريبەلەرى جونىندە اۋىس - كۇيىس جاساۋدى كۇشەيتىپ، ەكى ەلدىڭ سىرتقى ىستەر مينيسترلەرىنىڭ، قورعانىس مينيسترلەرىنىڭ ”2+2“ كەڭەس مەحانيزمىن ىسكە قوسىپ، جوعارى دەڭگەيلى ستراتەگيالىق ءوزارا سەنىمدىلىك ورناتۋدى قالايدى. ”ءبىر بەلدەۋ، ءبىر جول“ باستاماسىن يندونەزيانىڭ ”دۇنيە جۇزىلىك تەڭىز - مۇحيت ءتۇيىنى“ ويىمەن ۇشتاستىرۋدا كەلەلى جەتىستىككە قول جەتتى. جاكارتا - باندۇڭ جوعارى قارقىندىق تەمىر جولىندا پويەز قاتىناۋ الدىندا تۇر، ەكى جاق ”ەڭ سوڭعى ءبىر كيلومەتر“ قۇرىلىسىن بار كۇشپەن ويداعىداي ىستەپ، نىساننىڭ جوعارى ولشەمدى، ساپالى بولۋىنا شىنايى كەپىلدىك ەتىپ، يندونەزيانىڭ دامۋىنا دەم بەرۋى كەرەك. ەكى جاق جالپىلىق كاسىپ سالاسى باقشا رايونى سەلبەستىگىن ۇزدىكسىز ويداعىداي جۇرگىزىپ، ”وڭىرلىك جالپىلىق ەكونوميكالىق ءدالىز“ جانە ”ەكى ەلدىڭ قوس باقشاسى“ قۇرىلىسىن ءتۇيىندى تۇردە ىلگەرىلەتۋى كەرەك. جۇڭگو جاق يندونەزيانىڭ جاڭا استانا قۇرىلىسىن جانە سولتۇستىك كاليمانتان ونەركاسىپ باقشاسىن اشۋىن قولدايدى، يندونەزيامەن جاڭا ەنەرگيالى اۆتوموبيل، زەردەلى قالا سياقتى سالالارداعى سەلبەستىكتى كەڭەيتىپ، كاسىپ سالاسىنىڭ سيفرلانۋىن بىرگە جەبەۋدى قالايدى. جۇڭگو جاق يندونەزيانىڭ كوپ قولدى تاۋارلارىن جانە ساپالى اۋىل شارۋاشىلىعى ونىمدەرىن يمپورت ەتۋدى ۇزدىكسىز كەڭەيتىپ، «وڭىرلىك جالپى بەتتىك ەكونوميكالىق سەرىكتەستىك قارىم - قاتىناس كەلىسىمىن» جوعارى ساپامەن اتقارىپ، استىق حاۋىپسىزدىگى، كەدەيلەردى ازايتۋ، كەدەيلەردى سۇيەمەلدەۋ، اۋىل - قىستاقتى گۇلدەندىرۋ، كاسىپتىك وقۋ - اعارتۋ، ءتىل وقىتۋى، ەمدەۋ، ءدارى - دارمەك، دەنساۋلىق ساقتاۋ، مادەنيەت، ساياحات سياقتى سالالارداعى سەلبەستىكتى كۇشەيتۋدى قالايدى.
شي جينپيڭ بىلاي دەپ اتاپ كورسەتتى: بيىل − مەنىڭ اناعۇرلىم تىعىز جۇڭگو - شىعىس وڭتۇستىك ازيا ەلدەرى وداعى تاعدىرلاس ورتاق تۇلعاسىن قۇرۋدى العا قويعانىمنىڭ 10 جىلدىعى، سونداي - اق جۇڭگونىڭ «شىعىس وڭتۇستىك ازيا دوستىق سەلبەستىك شارتىنا» قاتىناسقانىنىڭ 20 جىلدىعى. جۇڭگو جاق شىعىس وڭتۇستىك ازيا ەلدەرى وداعىمەن جاپپاي ستراتەگيالىق سەرىكتەستىك قارىم - قاتىناستى تەرەڭدەتىپ، يندونەزيانىڭ بيىل شىعىس وڭتۇستىك ازيا ەلدەرى وداعىنىڭ كەزەكتى ءتوراعا ەلى بولۋىن قولداپ، شىعىس وڭتۇستىك ازيا ەلدەرى وداعىن ستراتەگيالىق دەربەستىكتە تاباندى بولۋعا، ىنتىماقتاسا وتىرىپ ءوزىن الۋەتتەندىرۋگە جەتەكتەپ، وڭىرلىك ورنىقتىلىق ورتالىعىن، دامۋ بيىگىن بىرگە قالىپتاستىرۋدى قالايدى. جۇڭگو جاق يندونەزيامەن بىرگە 20 ەل توبى جانە بريكس ەلدەرى سياقتى كوپ جاقتى مەحانيزمدە پىكىرلەسۋدى، سەلبەسۋدى كۇشەيتىپ، دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن تياناقتاندىرۋدى ىلگەرىلەتىپ، ءوڭىردىڭ جانە دۇنيە ءجۇزىنىڭ بەيبىتشىلىگىن، ورنىقتىلىعىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
جوكو مىنالاردى ءبىلدىردى: بىلتىر مەن بالي ارالىندا ساپارلاپ كەلگەن ءتوراعا شي جينپيڭدى قابىلداعاننان بەرى ەكى ەل قارىم - قاتىناسى تاعى دا كوپتەگەن ماندىك ىلگەرىلەۋشىلىككە قول جەتكىزدى. باندۇڭ - جاكارتا جوعارى قارقىندىق تەمىر جولىندا بيىل 8 - ايدا ۋاعىندا پويەز قاتىنايدى، جۇڭگو بەلسەنە ات سالىسقان يندونەزيانىڭ جاڭا استانا قۇرىلىسى مەن سولتۇستىك كاليمانتان ونەركاسىپ باقشاسىن اشۋ سياقتى ستراتەگيالىق نىسانداردىڭ اياق الىسى ءساتتى بولۋدا. يندونەزيا ءبىر جۇڭگو ساياساتىن باتىل اتقارادى، جۇڭگومەن قارجى قوسۋ، تەڭىز - مۇحيت بالىق شارۋاشىلىعى، استىق حاۋىپسىزدىگى، ەمدەۋ - دەنساۋلىق ساقتاۋ سياقتى جاقتارداعى سەلبەستىكتى ۇزدىكسىز كۇشەيتىپ، ەكى ەلدىڭ جان - جاقتى ستراتەگيالىق سەرىكتەستىك قارىم - قاتىناسىنىڭ دامۋىن ونان ارى جەبەۋدى قالايدى. ءتوراعا شي جينپيڭ العا قويعان دۇنيە جۇزىلىك دامۋ باستاماسى، دۇنيە جۇزىلىك حاۋىپسىزدىك باستاماسى، دۇنيە جۇزىلىك وركەنيەت باستاماسى − شىق ۇستاۋ، سيىسىمدى بولۋ باستاماسى، يندونەزيا مۇنى بەلسەنە قولدايدى. جۇڭگو جاقتىڭ يندونەزيانىڭ شىعىس وڭتۇستىك ازيا ەلدەرى وداعىنىڭ كەزەكتى ءتوراعا ەلى بولۋ قىزمەتىن قولداعانىنا، شىعىس وڭتۇستىك ازيا ەلدەرى وداعىنىڭ وڭىرلىك قۇرىلىمداعى وزەكتى ورنىن قورعاۋدى قولداعانىنا العىس ايتامىن. يندونەزيا جۇڭگو جاقپەن ستراتەگيالىق كەڭەسۋدى جيىلەتىپ، ءوڭىردىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن بىرگە قورعاۋدى قالايدى.
كەزدەسۋدەن كەيىن ەكى ەل باسشىلارى اۋىل شارۋاشىلىق ونىمدەرىن جۇڭگوعا جەتكىزۋ، دەنساۋلىق ساقتاۋ، بىرلەسىپ زەرتتەۋ - اشۋ، سونداي - اق يندونەزيانىڭ جاڭا استاناسى، جۇڭگو مەن يندونەزيانىڭ ”ەكى ەلدىڭ قوس باقشاسى“ قۇرىلىسى سياقتى كوپتەگەن ەكى جاقتى سەلبەستىك قۇجاتىنا قول قويۋعا بىرگە كۋا بولدى.
ساي چي، ديڭ شۋەشياڭ، ۋاڭ ي، چىن ي - چين قاتارلىلار جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
