شي جينپيڭ ۆيەتنامنىڭ مەملەكەت ءتوراعاسى ۋ ۋىنشاڭمەن كەڭەس وتكىزدى
2023.12.14 16:30 كەلۋ قاينارى : حالىق تورابى
 |
سول جەر ۋاقىتى 12 - ايدىڭ 13 - كۇنى تۇستەن بۇرىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ حانويداعى ءتوراعا سارايىندا ۆيەتنامنىڭ مەملەكەت ءتوراعاسى ۋ ۋىنشاڭمەن كەڭەس وتكىزدى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
|
«حالىق گازەتى»، 12 - ايدىڭ 13 - كۇنى، حانوي (تىلشىلەر سۇن گۋاڭيۇڭ، ۋاڭ زى). سول جەر ۋاقىتى 12 - ايدىڭ 13 - كۇنى تۇستەن بۇرىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ حانويداعى ءتوراعا سارايىندا ۆيەتنامنىڭ مەملەكەت ءتوراعاسى ۋ ۋىنشاڭمەن كەڭەس وتكىزدى.
شي جينپيڭ بىلاي دەپ اتاپ كورسەتتى: كەشە باس شۋجي رۋان فۋجۇڭ ەكەۋىمىز ستراتەگيالىق مانگە يە جۇڭگو - ۆيەتنام تاعدىرلاس ورتاق تۇلعاسىن قۇرۋدى جاريالاپ، ەكى پارتيانىڭ، ەكى ەلدىڭ قارىم - قاتىناسى دامۋىنىڭ جاڭا كەزەڭىن قول ۇستاسا اشتىق. جۇڭگو مەن ۆيەتنام ەكى ەل حالىقتارى مەملەكەتتىڭ تاۋەلسىزدىگى مەن ۇلتتىڭ ازاتتىعىنا قول جەتكىزۋ كۇرەسىندە تىزە قوسا شايقاس جاساپ، سوتسياليستىك توڭكەرىس پەن قۇرىلىس ىستەرىندە ءبىرىن - ءبىرى قولداپ، باستان - اياق ءبىر - بىرىنە قارايلاسىپ، تار جول، تايعاق كەشۋلەردى بىرگە وتكەرىپ، ”جولداستىق، باۋىرلاس بولۋ“ سۇيىسپەنشىلىگىن ورناتتى. ستراتەگيالىق ماڭىزعا يە جۇڭگو - ۆيەتنام تاعدىرلاس ورتاق تۇلعاسىن قۇرۋ — ەكى پارتيانىڭ، ەكى ەلدىڭ اعا بۋىن باسشىلارىنىڭ ورتاق ەركىنە مۇراگەرلىك ەتكەندىك، بۇرىنعى شۇعىلالى جىلدارعا قۇرمەت ەتكەندىك، ەكى ەلدىڭ توڭكەرىستىك دوستىعىن ساۋلەلەندىرگەندىك، ەكى پارتيانىڭ، ەكى ەلدىڭ جوعارى جىكتەگىلەرىنىڭ جۇڭگو - ۆيەتنام قارىم - قاتىناسىنىڭ ۇزاق بولاشاقتىق دامۋ جالپى جاعدايى مەن دۇنيە جۇزىندەگى سوتسياليستىك كۇشتەر ىنتىماعىنىڭ ستراتەگيالىق جالپى جاعدايىن شىعار ءتۇيىن ەتە وتىرىپ جاساعان كەلەلى تاريحي شەشىمى، جۇڭگو مەن ۆيەتنامنىڭ وزدەرىنىڭ وسىزامانداندىرۋ ىستەرىن ىلگەرىلەتۋدەگى ورتاق قاجەتىنە ۇيلەسەدى، ەكى ەل حالىقتارىنىڭ ورتاق مۇددەسىنە ۇيلەسەدى.
شي جينپيڭ بىلاي دەپ دارىپتەدى: ەكى جاق جۇڭگو مەن ۆيەتنامنىڭ تاعدىرلاس ورتاق تۇلعاسىن قۇرۋدىڭ تاريحي سوزسىزدىگىن، ستراتەگيالىق ءمانىن، رەال تالابىن جانە حالىقارالىق جاۋاپكەرلىگىن تولىق تانىپ، ساياسي سەنىمدىلىگى اناعۇرلىم جوعارى، حاۋىپسىزدىك سەلبەستىگى اناعۇرلىم ناقتى، ءوزارا ءتيىمدى سەلبەستىگى اناعۇرلىم تەرەڭ، حالىق رايى نەگىزى اناعۇرلىم بەكەم، كوپ جاقتى كەلىسۋى، سايكەسۋى اناعۇرلىم تىعىز، الاۋىزدىقتاردى باسقارۋ - مەڭگەرۋ، شەشۋى اناعۇرلىم جاقسى بولۋ سىندى 6 ۇلكەن نىسانانى ارقاۋ ەتىپ، ەكى ەل قارىم - قاتىناسىنا ۇزدىكسىز جاڭا داۋىرلىك ءمان ۇستەپ، ستراتەگيالىق مانگە يە جۇڭگو - ۆيەتنام تاعدىرلاس ورتاق تۇلعاسىنىڭ تامىر تارتىپ، گۇل اشىپ، جەمىس بەرۋىن قول ۇستاسا ىلگەرىلەتىپ، ەكى ەل حالىقتارىنا باقىت جاراتۋى كەرەك.
ءبىرىنشى، ساياسي جەتەكشىلىكتى كۇشەيتىپ، جۇڭگو - ۆيەتنام تاعدىرلاس ورتاق تۇلعاسىن قۇرۋدىڭ ستراتەگيالىق ورتاق تانىمىن ۇيىستىرۋ كەرەك. ەكى پارتيانىڭ، ەكى ەلدىڭ جوعارى جىكتەگىلەرى ۇزدىكسىز يكەمدى تاسىلدەرمەن ىشكەرىلەي ستراتەگيالىق قارىم - قاتىناستى جالعاستدىرىپ، ءوزارا ۇيرەنۋدى، ءوزارا ۇلگى الۋدى كۇشەيتىپ، پارتيانى، مەملەكەتتى جونگە سالۋ تاجىريبەلەرىن اۋىستىرۋدى تەرەڭدەتىپ، جونگە سالۋ جۇيەسى مەن جونگە سالۋ قابىلەتىن وسىزامانداندىرۋ دەڭگەيىن بىرگە جوعارىلاتىپ، ءوز ەلدەرىنىڭ دامۋىنا اناعۇرلىم ويداعىداي قىزمەت ەتۋى كەرەك.
ەكىنشى، ىنتىماقتى، سەلبەستىكتى كۇشەيتىپ، جۇڭگو - ۆيەتنام تاعدىرلاس ورتاق تۇلعاسىنىڭ حاۋىپسىزدىك قورعانىس شەبىن بەكەمدەۋ كەرەك. جۇڭگو مەن ۆيەتنام — كوممۋنيستىك پارتيانىڭ باسشىلىعىنداعى سوتسياليستىك مەملەكەتتەر، ساياسي ءتۇزىمنىڭ حاۋىپسىزدىگىن، سوتسياليزم ىستەرىن قورعاۋ — ءبىزدىڭ ورتاق جاۋاپكەرلىگىمىز، بورىشىمىز. ەكى جاق ىنتىماقتى كۇشەيتىپ، ەسىك اشۋدا، تەڭ يگىلىككە كەنەلۋدە تاباندى بولىپ، سىرتتىڭ سىنالاپ كىرۋ، ءبۇلدىرۋ قاسكۇنەمدىگىنەن بىرگە ساقتانىپ جانە وعان قارسى تۇرىپ، دۇنيە جۇزىندەگى سوتسياليستىك كۇشتەردى زورايتۋعا، ادامزاتتىڭ بەيبىتشىلىگى مەن العا باسۋ ىستەرىن ىلگەرىلەتۋگە ءتيىستى ۇلەس قوسۋى كەرەك.
ءۇشىنشى، ءوزارا ءتيىمدى سەلبەستىكتى تەرەڭدەتىپ، جۇڭگو - ۆيەتنام تاعدىرلاس ورتاق تۇلعاسىنىڭ مۇددە تابىسىن زورايتۋ كەرەك. ەكى جاق جوعارى دەڭگەيدە جوبالاۋدى كۇشەيتىپ، ءبىر بەلدەۋ، ءبىر جولدى“ بىرگە قۇرۋ باستاماسىن ”ەكى ءدالىز، ءبىر شەڭبەر“ ستراتەگياسىمەن ۇشتاستىرۋ سەلبەستىك جوبا باعدارلاماسىن ويداعىداي تياناقتاندىرىپ، نەگىزدىك قۇرىلعىلاردى ۇلاستىرۋ - تۇتاستىرۋدى جەدەلدەتىپ، ۆيەتنامنىڭ ساپالى اۋىل شارۋاشىلىق ونىمدەرىن جۇڭگوعا جەتكىزۋدى كەڭەيتۋى كەرەك. سيفرلى ەكونوميكا، جاسىل دامۋ سياقتى سالالارداعى سەلبەستىكتى كۇشەيتىپ، ەكى ەلدىڭ ناقتى سەلبەستىگىنىڭ جاڭا ارتۋ تۇيىندەرىن كەڭەيتۋ كەرەك.
ءتورتىنشى، حالىق تىلەگىنە جەتەكشىلىك ەتۋدى كۇشەيتىپ، جۇڭگو - ۆيەتنام تاعدىرلاس ورتاق تۇلعاسىنىڭ قوعامدىق نەگىزىن بەكەمدەۋ كەرەك. جۇڭگو مەن ۆيەتنامنىڭ حالىقتىق دوستىعىن بەكەمدەۋدى جۇيەلى ينجەنەريا رەتىندە يگەرىپ، ەكى پارتيانىڭ، ەكى ەلدىڭ ءداستۇرلى دوستىعى جونىندەگى ۇگىت - تاربيەنى ىلگەرىلەتىپ، مادەنيەت، ساياحات، جەرگىلىكتى ورىندار سەلبەستىگى سياقتى تۇعىرلاردان ويداعىداي پايدالانىپ، ەكى ەل حالىقتارى، اسىرەسە، جاستار اراسىنداعى بارىس - كەلىسكە اناعۇرلىم كوپ كوپىر سالىپ، ءوزارا ءتۇسىنىسۋ مەن دوستىق سۇيىسپەنشىلىكتى كۇشەيتۋ كەرەك.
بەسىنشى، الاۋىزدىقتاردى ۇيلەسىمدى تىزگىندەپ، جۇڭگو - ۆيەتنام تاعدىرلاس ورتاق تۇلعاسىنىڭ ورنىقتى مەجەسىن جوعارىلاتۋ كەرەك. جۇڭگو مەن ۆيەتنام — نانحاي تەڭىزىندەگى ماڭىزدى ەلدەر، نانحاي تەڭىزىنىڭ بەيبىتشىلىگى مەن ورنىقتىلىعىن قورعاۋ جاعىندا ورتاق مۇددەسى دە، ورتاق جاۋاپكەرلىگى دە بار. جۇڭگو جاق ۆيەتنام جاقپەن تىلدەسۋدى، سايكەسۋدى كۇشەيتىپ، تەڭىز ماسەلەسىن باياندى شەشۋدىڭ ەكى جاق تا قابىلداي الاتىن ءادىسىن تاۋىپ، ەكى جاقتىڭ ەرتەرەك ناقتى، ءونىمدى ”نانحاي تەڭىزى ارەكەت ولشەمىنە“ قول جەتكىزۋىن ىلگەرىلەتىپ، ءوڭىردىڭ بەيبىتشىلىگى مەن ورنىقتىلىعىنا اناعۇرلىم زور ۇلەس قوسۋدى قالايدى.
ۋ ۋىنشاڭ مىنالاردى ءبىلدىردى: باس شۋجي، مەملەكەت ءتوراعاسى شي جينپيڭنىڭ ۆيەتنامدا مەملەكەتتىك ساپاردا بولۋى — ۆيەتنام پارتياسىنىڭ، مەملەكەتىنىڭ جانە حالقىنىڭ ۇزاقتان بەرى اڭساعان ءىرى ءىسى، ۆيەتنام – جۇڭگو قارىم - قاتىناسىنداعى كەلەلى تاريحي ءىس. كەشە ەكى پارتيانىڭ باس شۋجيى ستراتەگيالىق مانگە يە تاعدىرلاس ورتاق تۇلعانى بىرگە قۇرۋعا ءبىر اۋىزدان ماقۇل بولدى، بۇل ۆيەتنام - جۇڭگو قارىم -قاتىناسىنىڭ بولاشاعىنا ايقىن باعدار كورسەتىپ، ۆيەتنام – جۇڭگو قارىم - قاتىناسىنىڭ اناعۇرلىم جوعارى دەڭگەيدەگى دامۋدىڭ جاڭا كەزەڭىنە قادام تاستاۋىن ىلگەرىلەتەدى. ۆيەتنام مەن جۇڭگونىڭ اعا بۋىن باسشىلارى جاساسقان تەرەڭ ءداستۇرلى دوستىق حالىقارالىق اۋمالى - توكپەلى جاعدايدىڭ سىنىنان ءوتىپ، ەكى ەل حالىقتارىنىڭ ورتاق بايلىعىنا اينالدى. قازىر حالىقارالىق جاعداي كۇردەلى وزگەرىستەردى باستان كەشىرۋدە، ۆيەتنام مەن جۇڭگو شەشۋشى دامۋ كەزەڭىندە تۇر، ەكى پارتيانىڭ، ەكى ەلدىڭ سەنىمى مەن سەلبەستىگىن بەكەمدەپ جانە كۇشەيتىپ، ەكى ەلدىڭ سوتسياليزم ىستەرىن ۇزدىكسىز ىلگەرىلەتۋ، دامىتۋ — ەكى ەل حالىقتارىنىڭ ورتاق تىلەگى. باس شۋجي رۋان فۋجۇڭ مەن باس شۋجي شي جينپيڭنىڭ ورنى بولەك ستراتەگيالىق جەتەكشىلىگىندە، ۆيەتنام - جۇڭگو قارىم - قاتىناسى بۇرىن بولىپ كورمەگەن دارەجەدەگى جان - جاقتى، تەرەڭ، دوسجار بەينەگە جەتىپ وتىر. ۆيەتنام جاق ءتوراعا شي جينپيڭنىڭ وسى رەتكى ساپارى ارقىلى دۇنيە جۇزىنە تاعى دا ايقىن سيگنال تاراتۋدى قالايدى، جۇڭگومەن قارى - قاتىناستى دامىتۋ ۆيەتنام پارتياسى مەن ۇكىمەتىنىڭ باستان - اياق الدىمەن ەسكەرىلەتىن جانە ستراتەگيالىق تالعامى. ۆيەتنام - جۇڭگو قارىم - قاتىناسى بولاتتاي بەرىك، ءارقانداي سىرتقى كۇشتىڭ اراعا ىرتكى سالۋىنا جانە كەدەرگىلىك جاساۋىنا، بۇلدىرۋىنە ۇشىرامايدى.
ۋ ۋىنشاڭ جۇڭگونىڭ 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلى باسشىلار تالقى مىنبەرىن ءساتتى وتكىزگەنىن تاعى ءبىر رەت قۇتتىقتاپ، مىنالاردى ءبىلدىردى: باس شۋجي شي جينپيڭدى ۇيىتقى ەتكەن ج ك پ ورتالىق كوميتەتىنىڭ باسشىلىعى مەن شي جينپيڭ جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە، جۇڭگونىڭ، ءسوز جوق، ج ك پ 20 - قۇرىلتايىندا بەلگىلەنگەن ءتۇرلى نىسانالاردى جۇزەگە اسىرا الاتىنىنا سەنەمىن. جۇڭگونىڭ دامۋى مەن تابىسقا جەتۋى ۆيەتنامعا وراسان زور شابىت بەرەدى جانە قولداۋ بولادى. ۆيەتنام جاق ەكى پارتيانىڭ باس شۋجيلەرىنىڭ ماڭىزدى ورتاق تانىمىن مۇقيات تياناقتاندىرىپ، ەكى ەلدىڭ قوعامدىق ءتۇزىمى ۇقساس، مۇرات - ۇستانىمى قارايلاس بولۋ سياقتى وزگەشە ابزالدىعىن تولىق ساۋلەلەندىرىپ، پارتيانى، مەملەكەتتى جونگە سالۋ تاجىريبەلەرىن اۋىستىرۋدى كۇشەيتىپ، ەكى ەلدىڭ ساياسي، ەكونوميكا - ساۋدا، گۋمانيتارلىق، حاۋىپسىزدىك سياقتى سالالارداعى ناقتى سەلبەستىگىن جاپپاي ىلگەرىلەتىپ، مەملەكەتتىڭ ساياسي حاۋىپسىزدىگىن قورعاپ، ونەركاسىپتەندىرۋ، وسىزامانداندىرۋ قۇرىلىسىنا دەم بەرۋدى قالايدى. ۆيەتنام جفق ءبىر جۇڭگو ساياساتىن باستان - اياق اتقارىپ، جۇڭگونىڭ بىرلىككە كەلۋ ۇلى ءىسىن شىنايى قولدايدى. ۆيەتنام جاق ءوزارا قۇرمەت ەتۋ، سەلبەسىپ تەڭ يگىلىككە كەنەلۋ رۋحىمەن تەڭىزدەگى الاۋىزدىق ماسەلەسىن ۇيلەسىمدى شەشىپ، ۆيەتنام مەن جۇڭگونىڭ تاعدىرلاس ورتاق تۇلعاسى قۇرىلىسىنىڭ ورنىقتى، باياندى دامۋىن ىلگەرىلەتۋدى قالايدى. ءتوراعا شي جينپيڭ العا قويعان جەلىلەس دۇنيە جۇزىلىك باستامالار ءىرى ەل، ءىرى پارتيانىڭ جاۋاپكەرلىك ارقالاۋىن، سونداي - اق جۇڭگونىڭ حالىقارالىق دامۋ مەن سەلبەستىكتەگى ماڭىزدى جەتەكشىلىگىن ايگىلەدى، ۆيەتنام جاق بەلسەنە ات سالىسىپ، جۇڭگومەن حالىقارالىق سەلبەستىكتى جيىلەتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن جانە ادامزاتتىڭ العا باسۋىن، ىرىس - قۇتىن جەبەۋگە بىرگە تىڭ ۇلەس قوسۋدى قالايدى.
كەڭەستەن كەيىن شي جينپيڭ مەن حانىمى پىڭ لييۋان ۋ ۋىنشاڭ مەن حانىمى وتكىزگەن قارسى الۋ تۇسكى قوناعاسىنا قاتىناستى.
ساي چي، ۋاڭ ي، ۋاڭ شياۋحۇڭ قاتارلىلار جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
