شي جينپيڭ حۋناندا قىزمەت تەكسەرگەندە بىلاي دەپ دارىپتەدى
رەفورما جاساپ، جاڭالىق اشۋدا تاباندى بولىپ، شىندىققا جۇگىنىپ، ناقتى ءىس ىستەپ، جۇڭگو ۇلگىسىندەگى وسىزامانداندىرۋدىڭ حۋنان تاراۋىن قۇلشىنا جازۋ كەرەك
ساي چي تەكسەرۋدە بىرگە بولدى
2024.03.22 16:32 كەلۋ قاينارى : حالىق تورابى
 |
3 – ايدىڭ 18 – كۇنىنەن 21 – كۇنىنە دەيىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ حۋناندا قىزمەت تەكسەردى. سۋرەتتە: 3 – ايدىڭ 18 – كۇنى تۇستەن كەيىن شي جينپيڭ جۇڭگو - گەرمانيا بىرلەسىپ قارجى قوسقان كاسىپورىن باسف شانشان باتەريا ماتەريالدارى شەكتى سەرىكتەستىگىندە قىزمەت تەكسەرۋدە.
سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن
|
«حالىق گازەتى»، 3 – ايدىڭ 21 – كۇنى، چاڭشا. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جۋىقتا حۋناندا قىزمەت تەكسەرگەندە بىلاي دەپ دارىپتەدى: حۋنان جاڭا دامۋ ارناسىن قالىپتاستىرۋداعى ستراتەگيالىق ورنىن مىقتاپ يگەرىپ، ورنىقتىلىق بارىسىندا ىلگەرىلەۋ سىندى قىزمەت نەگىزگى ارناسىندا، ساپالى دامۋدان اۋىتقىماۋدا، رەفورما جاساپ، جاڭالىق جاراتۋدا، شىندىققا جۇگىنىپ، ناقتى ءىس ىستەۋدە تاباندى بولىپ، مەملەكەتتىڭ ماڭىزدى وزىق جاساۋ كاسىبى بيىگىن، وزەكتى باسەكەلىك قۋاتقا يە عىلىم - تەحنيكادا جاڭالىق اشۋ بيىگىن، ىشكى قۇرلىق وڭىرىندەگى رەفورما جاساپ، ەسىك اشۋ بيىگىن قالىپتاستىرۋعا ۇزدىكسىز كۇش سالىپ، ورتا بولىك وڭىرلەردىڭ ەڭسە كوتەرۋىن جانە چاڭجياڭ ەكونوميكالىق بەلدەۋىنىڭ دامۋىن ىلگەرىلەتۋ بارىسىندا ەرلىكپەن العا ۇمتىلىپ، جۇڭگو ۇلگىسىندەگى وسىزامانداندىرۋدىڭ حۋنان تاراۋىن قۇلشىنا جازۋى كەرەك.
3 - ايدىڭ 18 - كۇنىنەن 21 - كۇنىنە دەيىن شي جينپيڭ حۋنان ولكەلىك پارتكومنىڭ شۋجيى شىن شياۋميڭ مەن ولكە باستىعى ماۋ ۋەيميڭنىڭ سەرىك بولۋىندا، ىلگەرىندى - كەيىندى چاڭشا، چاڭدى قاتارلى جەرلەرگە بارىپ، مەكتەپ، كاسىپورىنداردى، تاريحي مادەنيەت كوشە رايونىن، اۋىل - قىستاقتى ارالاپ تەكسەرۋ - زەرتتەۋ جۇرگىزدى.
3 - ايدىڭ 18 - كۇنى تۇستەن كەيىن شي جينپيڭ حۋنان 1 - پەداگوگيكا شۋەيۋانىنا (چىڭنان ساباقحاناسى مەكتەپ رايونى) بارىپ قىزمەت تەكسەردى. بۇل مەكتەپتىڭ توركىنى سۇڭ پاتشالىعى داۋىرىندەگى چىڭنان ساباقحاناسى ەدى، تاياۋ زاماننان بەرى ءبىر توپ پرولەتاريات توڭكەرىسشىلەرى مەن ايگىلى ۇستازداردى تاربيەلەپ شىققان. شي جينپيڭ ماۋ زىدۇڭنىڭ جاستىق شاعى نەگىزگى تاقىرىپتىق كورمەسىن ەكسكۋرسيالاپ، شۋەيۋاننىڭ دامۋ بارىسى جانە توڭكەرىستىك بايلىقتان ويداعىداي پايدالانۋ سياقتى جاعدايلاردى ۇعىستى. شۋەيۋان زالىندا شي جينپيڭ وقىتۋشى - وقۋشىلاردىڭ ۋاكىلدەرىمەن ىقىلاسپەن اڭگىمەلەستى. ول بىلاي دەدى: مەملەكەتتى قۇدىرەتتەندىرۋ ءۇشىن، ءسوز جوق، وقۋ - اعارتۋدى ويداعىداي جۇرگىزۋ كەرەك. 1 - پەداگوگيكا شۋەيۋانى − وتانشىلدىق ءتالىم تاربيە جۇرگىزىپ، توڭكەرىستىك گەندى جالعاستىراتىن جاقسى جەر، وسى توڭكەرىستىك بايلىقتى ويداعىداي قورعاۋ، ۇتىمدى پايدالانۋ كەرەك. مەكتەپ ءمورال ارقىلى ادام تاربيەلەۋى، وقىتۋشىلار بىلىكتى ۇستازداردان بولۋى قاجەت، وقۋشىلاردىڭ ءبىلىم، مادەنيەت ساپاسىن جوعارىلاتۋعا ءمان بەرىپ قانا قويماي، ونان دا ماڭىزدىسى، يدەيا - ساياسي ساباعىن جاقسى ءوتىپ، وقۋشىلاردى ءمورالدى، نامىستى بولىپ، سوتسياليستىك وزەكتى قۇن كوزقاراسىن ورناتىپ، وتان ءۇمىتىن اقتاپ، مەملەكەتتى قۇدىرەتتەندىرۋ ۇلى مۇراتىن ورناتىپ، مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ سىندى ۇلى مىندەتتىڭ تىرەكتىلەرى بولۋ ءۇشىن قۇلشىنۋعا تاربيەلەۋى جانە جەتەكتەۋى كەرەك.
وسىدان كەيىن شي جينپيڭ باسف شانشان باتەريا ماتەريالدارى شەكتى سەرىكتەستىگىنە بارىپ قىزمەت تەكسەردى. بۇل سەرىكتەستىك ليتي يونىندىق باتەريانىڭ وڭ زاريادتى ماتەريالىن زەرتتەپ تاپقىرلاعان، وندىرگەن جانە ساتقان جۇڭگو - گەرمانيا بىرلەسىپ قارجى قوسقان كاسىپورىن ەدى. شي جينپيڭ جەرگىلىكتى ورىننىڭ جاڭا وندىرگىش كۇشتەردى جەدەل دامىتۋ، جوعارى دەڭگەيدە سىرتقا ەسىك اشۋدى كەڭەيتۋ سياقتى جاعدايلار جونىندەگى تانىستىرۋىن تىڭداپ، كاسىپورىن ونىمدەرىنىڭ كورمەسىن كوردى، ماتەريالدىڭ ەرەكشەلىگىن سىناۋ جاعدايىن جانە باتەريا ءوندىرۋ ءتارتىبىن ۇعىستى. ول بىلاي دەپ دارىپتەدى: عىلىم - تەحنيكادا جاڭالىق جاراتۋ، ساپالى دامۋ − كاسىپورىننىڭ ۇزدىكسىز جەتىلۋىنىڭ، زورايۋىنىڭ، جەڭىلمەس ورىندا تۇرۋىنىڭ تەتىگى، حالىقتىق كاسىپورىندار، بىرلەسىپ قارجى قوسقان كاسىپورىندار بۇل جاعىندا كەسەك تابىستارعا قول جەتكىزە الادى. جۇڭگونىڭ اشىق ەسىگى بارعان سايىن ايقارا اشىلادى، ءبىز دۇنيە جۇزىندەگى ەلدەرمەن اۋىس - كۇيىستى، سەلبەستىكتى كۇشەيتۋدى قالايمىز، ءتىپتى دە كوپ شەتەل كاسىپورىندارىنىڭ جۇڭگوعا كەلىپ قارجى قوسىپ دامۋىن قارسى الامىز.
3 - ايدىڭ 19 - كۇنى شي جينپيڭ چاڭدى قالاسىنا بارىپ قىزمەت تەكسەرىپ، تەكسەرۋ - زەرتتەۋ جۇرگىزدى. يۋانجياڭ وزەنىنىڭ جاعاسىنا ورنالاسقان چاڭدىحى كوشەسىنىڭ تاريحى ۇزاق، 1943 - جىلعى چاڭدى شايقاسىندا ويراندالعان. تاياۋ جىلداردان بەرى چاڭدى قالاسى وزەن جاعاسىنداعى كونە كوشەنىڭ بەت - بەينەسىن قالپىنا كەلتىرىپ، بۇل جەردى تاريحي مادەنيەت كوشە رايونىنا اينالدىردى. سول كۇنى تۇستەن بۇرىن شي جينپيڭ چاڭدىحى كوشەسىنە بارىپ، ءتۇرلى ەرەكشە جەڭىل تاعامدار، ەرەكشە ونىمدەر، ەرەكشە قولونەر بۇيىمدارى سياقتىلاردى كورىپ، دۇكەن قوجايىندارىمەن جانە ساياحاتشىلارمەن ىقىلاسپەن اڭگىمەلەستى ءارى بەيزاتتىق مادەنيەت مۇرالارى شەبەرلىك كورمەسىن كورىپ، چاڭدى كونە قالا كوشەسىن قالپىنا كەلتىرۋ، پايدالانۋ، قالا جوباسى، سۋ ورتاسىن جالپىلىق وڭاۋ سياقتى جاعدايلاردى ەگجەي - تەگجەيلى ۇعىستى. شي جينپيڭ بىلاي دەپ اتاپ كورسەتى: الۋان ءتۇرلى جەرگىلىكتى ەرەكشەلىككە يە ءداستۇرلى مادەنيەت شۇعىلالى جۇڭحۋا وركەنيەتىن ورتاق قالىپتاستىردى ءارى ەكونوميكالىق، قوعامدىق دامۋعا دەم بەردى. چاڭدى − مادەنيەتتى جالعاستىراتىن جەر، مۋزىكا اسپاپتار ىشەگى، سىچۋان تەاتر اۋەنى، ەڭبەك تاقپاعى قاتارلىلارعا ۇيلەسىمدى دانەكەرلەر ارقىلى ويداعىداي مۇراگەرلىك ەتىپ، ويداعىداي پايدالانىپ، داۋىرمەن جارىسا العا باستىرۋ، ويداعىداي دامىتۋ كەرەك.
حۋنان − ەلىمىزدەگى استىق وندىرەتىن 13 نەگىزگى ولكەنىڭ ءبىرى، كۇرىش ەگىلگەن جەر اۋدانى، جالپى ءونىم مولشەرى مەملەكەت بويىنشا ءبىرىنشى ورىندا تۇرادى. سول كۇنى تۇستەن كەيىن شي جينپيڭ چاڭدى قالاسى ديڭچىڭ رايونى شيەجياپۋ قالاشىعى گاڭجۇڭپيڭ قىستاعىنا بارىپ، جەرگىلىكتى ورىننىڭ استىق وندىرىسىندەگى 10 مىڭ مۋ جالپىلىق ۇلگى رايونىن كورىپ، مايسا جەتىلدىرۋ جانە كوكتەمگى ەگىس دايىندىعىنىڭ اياق الىسىن كوزدەن كەشىرىپ، اۋىل شارۋاشىلىعىن وسىزامانداندىرۋدى جوعارى ساپامەن ىلگەرىلەتۋ جاعدايى جونىندەگى تانىستىرۋدى تىڭدادى ءارى سورتتى استىق ەگەتىن ءىرى وتباسىلارمەن، اۋىل شارۋاشىلىق تەحنيكتەرىمەن، نەگىزگى ساتى كادرلارىمەن بىرگە ۇسىنىلىم جانە ءونىم ەسەبىن ءبىر - بىرلەپ ەسەپتەدى. شي جينپيڭ بىلاي دەپ دارىپتەدى: ەلىمىزدە ءبىر ميلليارد 400 ميلليوننان استام حالىق سانى بار، استىق حاۋىپسىزدىگىنە، ءسوز جوق، ءوزىمىز كەپىلدىك ەتۋىمىز، جۇڭگولىقتاردىڭ اس ىدىسىنا نەگىزىنەن جۇڭگو استىعىن سالۋىمىز كەرەك. جوعارى ولشەمدى ەگىنجايلاردى ويداعىداي قۇرىپ، لايىقتى كولەمدەگى تيجاراتتى جالپىلاستىرىپ، ساياساتتىق قولداۋ مەن ۇلگى كورسەتۋدى، جەتەكشىلىك ەتۋدى كۇشەيتىپ، ساپالى تۇقىم، تاماشا وراي، تاماشا ءادىستى جالپىلاستىرۋ تەبىنىن ارتتىرىپ، قۇنىتتاي ەگىپ، دەن قويا باپتاۋعا كۇش سالىپ، استىقتىڭ بىرلىك ءونىمى مەن ساپاسىن ونان ارى جوعارىلاتىپ، استىق ەگۋدى اۋقاتتانۋ جولىنا اينالدىرىپ، اناعۇرلىم كوپ شارۋا وتباسىلارىن وسىزاماندانعان ءىرى اۋىل شارۋاشىلىعىن دامىتۋعا ات سالىسۋعا باۋراپ، جۇڭگوشا اۋىل شارۋاشىلىعىن وسىزامانداندىرۋ جولىمەن ورنىقتى ءجۇرۋ، تىڭعىلىقتى ناتيجە جاراتۋ كەرەك.
شي جينپيڭ وسىدان كەيىن استىق ەگەتىن ءىرى وتباسى − داي حۇڭنىڭ ۇيىنە بارىپ، اۋىل شارۋاشىلىق ماشينا جابدىقتارى مەن كوكتەمگى ەگىس ماتەريالدارى دايىندىعىن كوزدەن كەشىردى ءارى قىستاق پارتيا ياچەيكاسىنىڭ بۇقاراعا قىزمەت وتەۋ ورتالىعىنا بارىپ، جەرگىلىكتى ورىننىڭ نەگىزگى ساتىنىڭ اۋىرتپالىعىن جەڭىلدەتۋ، نەگىزگى ساتىنى باسقارۋ ونىمدىلىگىن جوعارىلاتۋ جاعدايلارىن ۇعىستى. ول بىلاي دەپ اتاپ كورسەتتى: فورماشىلدىق، تورەشىلدىك ماسەلەلەرىن باتىلدىقپەن تۇزەتىپ، قوسىندى سۇرىپتاپ، ۇكىمەت ورىندارىن ىقشامداپ، وسى قىزمەتتى تاباندىلىقپەن ويداعىداي يگەرۋ كەرەك. ول نەگىزگى ساتى كادرلارىن كاسىپ سالاسىن دامىتۋ جانە اۋىل - قىستاقتى باسقارۋ جاقتارىندا كوپ بولىپ اقىل قوسىپ، كوپ بولىپ كۇش سالىپ، شارۋالار بۇقاراسى مويىنداعان ناقتى ناتيجەلەردى ۇزدىكسىز جاراتۋعا شابىتتاندىردى.
اتتانارىندا قىستاق تۇرعىندارى قاۋمالاي كەلىپ باس شۋجيدى اتتاندىرىپ سالدى. شي جينپيڭ تەرەڭ سۇيىسپەنشىلىكپەن كوپشىلىككە بىلاي دەدى: پارتيا ورتالىق كوميتەتى اۋىل شارۋاشىلىعى، اۋىل - قىستاق، شارۋالار قىزمەتىنە ايرىقشا ءمان بەرەدى، ءسوز جوق، شىنايى - پارمەندى ساياساتتىق شارالار قولدانىپ، بۇقارانىڭ كوڭىل ءبولىپ وتىرعان ماسەلەلەرى مەن قاجەتىنە اڭىس قايتارىپ، اۋىل - قىستاقتى كوركەيتۋدىڭ تاماشا كارتيناسىن رەالدىققا اينالدىرادى. دۋ قول شاپالاق ءۇنى قىستاقتا ۇزاق ۋاقىت جاڭعىردى.
3 - ايدىڭ 21 - كۇنى تۇستەن بۇرىن شي جينپيڭ حۋنان ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداپ، حۋناننىڭ ءتۇرلى قىزمەتتەردە قول جەتكىزگەن ناتيجەلەرىن تۇراقتاندىردى.
شي جينپيڭ بىلاي دەپ اتاپ كورسەتتى: عىلىم - تەحنيكادا جاڭالىق اشۋ − جاڭا ساپالى وندىرگىش كۇشتەردى دامىتۋدىڭ وزەكتى فاكتورى. عىلىم - تەحنيكادا جاڭالىق اشۋ ارقىلى كاسىپ سالاسىندا جاڭالىق اشۋعا جەتەكشىلىك ەتۋگە اناعۇرلىم زور كۇش سالىپ، مەملەكەتتىڭ ستراتەگيالىق عىلىم - تەحنيكا كۇشتەرىمەن ىرىقتى تۇردە ۇشتاسىپ، ەل ءىشى - سىرتىنداعى بىرەگەي زەرتتەۋ - اشۋ قۇرىلىمدارىن بەلسەنە ەنگىزىپ، شەشۋشى سالالاردا دەربەس جاڭالىق اشۋ قابىلەتىن جوعارىلاتۋ كەرەك. كاسىپورىنداردىڭ عىلىم - تەحنيكادا جاڭالىق اشۋداعى نەگىزگى تۇلعالىق ورنىن نىعايتىپ، جاڭالىق اشۋ تىزبەگىنىڭ، كاسىپ تىزبەگىنىڭ، قارجى تىزبەگىنىڭ، دارىندىلار تىزبەگىنىڭ ىشكەرىلەي توعىسۋىن جەبەپ، عىلىم - تەحنيكا جەتىستىكتەرىنىڭ رەال وندىرگىش كۇشكە اينالۋىن جەدەل ىلگەرىلەتۋ كەرەك. نازاردى ابزال كاسىپ سالالارىنا شوعىرلاندىرىپ، كاسىپ نەگىزىن قايتا سومداۋدى جانە كەلەلى تەحنيكالىق جابدىقتاردان قامال الۋدى كۇشەيتىپ، وزىق جاساۋ كاسىبىن ۇزدىكسىز بەكەمدەپ - زورايتىپ، كاسىپ سالاسىنىڭ جوعارى دەڭگەيدە، زەردەلى، جاسىل دامۋىن جەبەپ، مەملەكەت دارەجەلى كاسىپ سالاسى شوعىرىن قالىپتاستىرۋ كەرەك.
شي جينپيڭ بىلاي دەپ دارىپتەدى: رەفورمانى اناعۇرلىم جاپپاي تەرەڭدەتۋدە ماسەلەنى كوزدەۋدى كورنەكتىلەندىرىپ، جاڭا دامۋ جاعدايىن ورناتۋعا جانە ساپالى دامۋدى ىلگەرىلەتۋگە تۇساۋ بولاتىن كەدەرگىلەر مەن بوگەتتەردى، دامۋ ورتاسى مەن حالىق تۇرمىسى سالاسىنداعى قيىن تۇيىندەردى، قوعامدىق تەڭدىك پەن ادىلدىككە قايشى كەلەتىن قولامتالى ماسەلەلەردى كۇش سالا شەشىپ، اۋىر حاۋىپ - قاتەردەن ءونىمدى ساقتانىپ جانە ونى شەشىپ، ەكونوميكالىق، قوعامدىق دامۋعا ۇزدىكسىز قوزعاۋشى كۇش، ومىرشەڭدىك كۇش قوسۋ كەرەك. حۋنان رەفورما جۇيەسىنىڭ شوعىرلانۋىن كۇشەيتىپ، بۇكىل ەل بويىنشا بىرلىككە كەلگەن ءىرى بازار قۇرىلىسىنا اناعۇرلىم ويداعىداي ات سالىسىپ، ورتا بولەك وڭىرلەردىڭ كوركەيۋى مەن چاڭجياڭ ەكونوميكالىق بەلدەۋىنىڭ دامۋ ستراتەگياسىمەن جاپپاي توعىسىپ، ”ءبىر بەلدەۋ، ءبىر جولدى“ بىرگە قۇرۋمەن تەرەڭ ۇشتاسىپ، تۇزىمدىك ەسىك اشۋدى ورنىقتى كەڭەيتىپ، ەركىن ساۋدا سىناق رايونىن جوعارى ولشەممەن ويداعىداي قۇرىپ، جۇڭگو - افريكا ەكونوميكا - ساۋدا سەلبەستىگىنىڭ الدىمەن اتقارىلاتىن رايونىن كۇش سالا قالىپتاستىرۋى كەرەك.
شي جينپيڭ بىلاي دەپ اتاپ كورسەتتى: اۋىل - قىستاقتى جاپپاي گۇلدەندىرۋدى ىلگەرىلەتۋ − جاڭا ءداۋىردىڭ جاڭا جورىعىنداعى اۋىل شارۋاشىلىعى، اۋىل - قىستاق، شارۋالار قىزمەتىنىڭ باس تۇتقاسى. حۋنان ولكەسى مەملەكەتتىڭ استىق حاۋىپسىزدىگىن قورعاۋ اۋىر مىندەتىن ارقالاپ، تۇقىم مەن ەگىستىك جەر سىندى ەكى ماڭىزدى ءتۇيىندى مىقتى يگەرىپ، تۇقىم شارۋاشىلىعى، اۋىل شارۋاشىلىعىن ماشينالاندىرۋ سىندى شەشۋشى، وزەكتى تەحنيكالاردان قامال الۋدى جەدەلدەتۋى كەرەك. ءىرى اۋىل شارۋاشىلىق كوزقاراسىندا، وسىزامانعى ازىق - تۇلىك ءوندىرىسى مەن تۇتىنۋ تانىمى كوزقاراسىندا تاباندى بولىپ، ەرەكشە اۋىل شارۋاشىلىعى مەن اۋىل شارۋاشىلىق ونىمدەرىن مانەرلەۋ كاسىبىن بەلسەنە دامىتىپ، اۋىل شارۋاشىلىعىنىڭ كاسىپ سالالانۋ دەڭگەيىن جوعارىلاتۋ كەرەك. قالا مەن اۋىلدى ىشكەرلەي توعىسپالى دامىتىپ، اۋدان ءوڭىرى ەكونوميكاسىن زورايتىپ، قالا مەن اۋىل فاكتورلارىنىڭ قوس باعىتتا اۋىسۋىن ىركىلىسسىزدەندىرىپ، اۋىل - قىستاقتىڭ نەگىزدىك قۇرىلعىلارى مەن الەۋمەتتىك قىزمەت وتەۋ ورنالاستىرۋىن عىلمي ءبىر تۇتاس جوسپارلاۋ قاجەت. اۋىل - قىستاقتىڭ رۋحاني وركەنيەت قۇرىلىسىن شىنايى كۇشەيتىپ، ەسكى سالت - سانانى وزگەرتۋدى كۇش سالا ىلگەرىلەتۋ كەرەك. پارتيا ۇيىمى باسشىلىعىنداعى ءوزىن - ءوزى باسقارۋ، زاڭمەن باسقارۋ، مورالمەن باسقارۋ ءوزارا ۇشتاسقان نەگىزگى ساتىنى باسقارۋ جۇيەسىن اقاۋسىزداندىرىپ، جاڭا داۋىردەگى ”فىڭچياۋ تاجىريبەسىندە“ تاباندى بولۋ جانە ونى دامىتۋ كەرەك. قايتا كەدەيلەسۋدەن ساقتانۋدى باقىلاۋ - تەكسەرۋ، كومەكتەسۋ - سۇيەمەلدەۋ مەحانيزمىن تياناقتاندىرىپ، كولەمدى قايتا كەدەيلەسۋدىڭ تۋىلماۋىنىڭ تومەنگى شەگىن باتىل ساقتاۋ كەرەك.
شي جينپيڭ بىلاي دەپ دارىپتەدى: حۋنان جاڭا مادەنيەت بورىشىن اناعۇرلىم ويداعىداي ارقالاپ، جۇڭحۋا ۇلتىنىڭ وسى زامانعى وركەنيەتىن قۇرۋ بارىسىندا تىڭ ناتيجە جاراتۋى كەرەك. توڭكەرىستىك بايلىقتى ويداعىداي قورعاپ جانە ودان ويداعىداي پايدالانىپ، توڭكەرىستىك ءداستۇر مەن وتانشىلدىق تاربيەنى كۇشەيتىپ، قالىڭ كادرلار مەن بۇقارانى تاڭداۋلى ءداستۇردى ساۋلەلەندىرىپ، توڭكەرستىك گەندى جالعاستىرىپ، سوتسياليستىك وزەكتى قۇن كوزقاراسىن امالياتتا ايگىلەپ، ءداۋىردىڭ جاڭا سالتىن، جاڭا بەينەسىن جەتىلدىرۋگە جەتەكتەۋ كەرەك. مادەنيەت پەن عىلىم - تەحنيكانى توعىستىرۋدىڭ ءونىمدى مەحانيزمى جونىندە ىزدەنىس جاساپ، جاڭاشا مادەنيەت فورماتسياسىن جەدەل دامىتىپ، مادەنيەت كاسىبىنىڭ اناعۇرلىم كوپ جاڭا ارتۋ تۇيىندەرىن قالىپتاستىرۋ كەرەك. مادەنيەت پەن ساياحاتتى ىشكەرىلەي توعىستىرا دامىتىپ، حۋناننىڭ بايتاق دالاسىنداعى جاسىل تاۋ، تۇنىق سۋ، كوك اسپان، قۇنارلى توپىراقتى ايتارلىقتاي قورعاپ، جاراتىلىستىق كورىنىس پەن گۋمانيتارلىق سالت - سانا ارقىلى ساياحات كاسىبىنىڭ باۋراۋ قۋاتىن ارتتىرۋ كەرەك.
شي جينپيڭ بىلاي دەپ اتاپ كورسەتتى: ساپالى دامۋدى ىلگەرىلەتۋدە، جۇڭگو ۇلگىسىندەگى وسىزامانداندىرۋدى ىلگەرىلەتۋدە، ءسوز جوق، پارتيا قۇرىلىسىن كۇشەيتۋ جانە جاقسارتۋ كەرەك. نەگىزگى تاقىرىپتىق تاربيەنىڭ جەتىستىكتەرىن بەكەمدەپ جانە كەڭەيتىپ، باياندى مەحانيزم ورناتىپ جانە كەمەلدەندىرىپ، دۇرىس ساياسي ناتيجە كوزقاراسىن ورناتىپ جانە امالياتتا ايگىلەپ، فورماشىلدىقتى جونگە سالۋدى ۇزدىكسىز تەرەڭدەتىپ، نەگىزگى ساتىنىڭ اۋىرتپالىعىن جەڭىلدەتۋ كەرەك. پارتيا ءتارتىبى جونىندەگى ۇيرەنۋ تاربيەسىن ويداعىداي ۇيىمداستىرىپ جانە ورىستەتىپ، پارتيالى كادرلاردى ءتارتىپتى ۇيرەنۋگە، ءتارتىپتى بىلۋگە، ءتارتىپتى ايقىنداۋعا، تارتىپكە بويسۇنۋعا جەتەكتەپ، باسشى كادرلاردى دۇرىس ۇقىق كوزقاراسىن ورناتۋعا، ۇقىقتى ءادىل ىستەتۋگە، ۇقىقتى زاڭ بويىنشا ىستەتۋگە، ۇقىقتى حالىق ءۇشىن ىستەتۋگە، ۇقىقتى پاك ىستەتۋگە قۋزاۋ كەرەك.
ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي قىزمەت تەكسەرۋدە بىرگە بولدى.
لي گانجيە، حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى.
3 - ايدىڭ 20 - كۇنى تۇستەن بۇرىن شي جينپيڭ چاڭشا قالاسىندا چاڭشادا تۇراتىن اسكەري بولىمدەردىڭ شاڭشياۋ دارەجەلىدەن جوعارى باسشى كادرلارىن ىقىلاسپەن قابىلداپ، پارتيا ورتالىق كوميتەتى مەن ورتالىق اسكەري ىستەر كوميتەتى اتىنان چاڭشادا تۇراتىن اسكەري بولىمدەردەگى بارلىق كوماندير - جاۋىنگەرگە ىقىلاستى سالەم جولدادى ءارى كوپشىلىكپەن بىرگە ەستەلىك سۋرەتكە تۇستى. جاڭ يوۋشيا قابىلداۋدا بىرگە بولدى.
كەلۋ قاينارى: حالىق تورابى
 |
3 – ايدىڭ 18 – كۇنىنەن 21 – كۇنىنە دەيىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ حۋناندا قىزمەت تەكسەردى. سۋرەتتە: 3- ايدىڭ 19 - كۇنى تۇستەن كەيىن شي جينپيڭ چاڭدى قالاسى ديڭچىڭ رايونى شيەجياپۋ قالاشىعى گاڭجۇڭپيڭ قىستاعىندا استىق ەگەتىن ءىرى وتباسىلارىمەن، اۋىل شارۋاشىلىق تەحنيكتەرىمەن، نەگىزگى ساتى كادرلارىمەن ىقىلاسپەن اڭگىمەلەسۋدە.
سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
|
 |
3 – ايدىڭ 18 – كۇنىنەن 21 – كۇنىنە دەيىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ حۋناندا قىزمەت تەكسەردى. سۋرەتتە: 3 - ايدىڭ 20 – كۇنى تۇستەن بۇرىن شي جينپيڭ چاڭشادا تۇراتىن اسكەري بولىمدەردىڭ شاڭشياۋ دارەجەلىدەن جوعارى باسشى كادرلارىن ىقىلاسپەن قابىلداپ، پارتيا ورتالىق كوميتەتى مەن ورتالىق اسكەري ىستەر كوميتەتى اتىنان چاڭشادا تۇراتىن اسكەري بولىمدەردەگى بارلىق كوماندير - جاۋىنگەرگە ىقىلاستى سالەم جولدادى.
سۋرەتتى شينحۋا اگەنتتىگىنىڭ ءتىلشىسى لي گاڭ تۇسىرگەن
|
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
