شي جينپيڭ يندونەزيانىڭ سايلانعان زۇڭتۇڭى پرابوۆومەن كەڭەس وتكىزدى
2024.04.02 16:26 كەلۋ قاينارى : حالىق تورابى
4 - ايدىڭ 1 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا يندونەزيانىڭ سايلانعان زۇڭتۇڭى پرابوۆومەن كەڭەس وتكىزدى. سۋرەتتى شينحۋا اگەنتتىگىنىڭ ءتىلشىسى ياۋ داۋەي تۇسىرگەن
شينحۋا اگەنتتىگى، 4 - ايدىڭ 1 – كۇنى، بەيجيڭ (ءتىلشى ليۋ حۋا). 4 - ايدىڭ 1 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا يندونەزيانىڭ سايلانعان زۇڭتۇڭى پرابوۆومەن كەڭەس وتكىزدى.
شي جينپيڭ پرابوۆونىڭ يندونەزيانىڭ زۇڭتۇڭى بولىپ سايلانعانىن قۇتتىقتادى ءارى وعان بۇرىنعى زۇڭتۇڭ جوكوعا ىقىلاستى سالەمى مەن ىزگى تىلەگىن جەتكىزۋدى تاپسىردى. شي جينپيڭ بىلاي دەپ اتاپ كورسەتتى: وتكەن 10 جىلدا جوكو زۇڭتۇڭ ەكەۋىمىز ەكى ەل قارىم - قاتىناسىن جاپپاي تەز قارقىنمەن دامىتۋعا بىرگە جەتەكشىلىك ەتىپ، كەسەك تابىستارعا قول جەتكىزدىك، جاكارتا - باندۇڭ جوعارى قارقىندى تەمىر جولى ەكى ەلدىڭ ساپالى سەلبەستىگىنىڭ التىن ماڭدايشالىعىنا اينالدى، جۇڭگو – يندونەزيا قارىم - قاتىناسى تاعدىرلاس ورتاق تۇلعانى بىرگە قۇرۋدىڭ جاڭا كەزەڭىنە ءوتتى. جۇڭگو جاق جۇڭگو - يندونەزيا قارىم - قاتىناسىنا ستراتەگيالىق بيىكتەن جانە ۇزاق بولاشاقتىق تۇرعىدان قارايدى، يندونەزيامەن جاپپاي ستراتەگيالىق سەلبەستىكتى تەرەڭدەتىپ، وڭىرلىك جانە دۇنيە جۇزىلىك ىقپالعا يە جۇڭگو - يندونەزيا تاعدىرلاس ورتاق تۇلعاسىن قۇرىپ، ەكى ەل حالىقتارىنا اناعۇرلىم مول ىرىس – قۇت جاراتىپ، ءوڭىردىڭ جانە دۇنيە ءجۇزىنىڭ بەيبىتشىلىگىنە، ورنىقتىلىعىنا، كوركەيۋىنە بەلسەندى ۇلەس قوسۋدى قالايدى.
شي جينپيڭ بىلاي دەپ دارىپتەدى: جۇڭگو – يندونەزيا قارىم - قاتىناسىندا باعالى تابىستارعا قول جەتكىزۋدىڭ تەتىگى ستراتەگيالىق دەربەستىكتە تاباندى بولۋدا، ءوزارا سەنىم ارتۋدا، ءوزارا كومەكتەسۋدە تاباندى بولۋدا، سەلبەسە ورتاق يگىلىكتەنۋدە تاباندى بولۋدا، تەڭدىك پەن ادىلدىكتە تاباندى بولۋدا. جۇڭگو مەن يندونەزيا − وركەندەپ كەلە جاتقان ءىرى ەلدەردىڭ جانە بازارى جاڭادان گۇلدەنگەن ەلدەردىڭ ۋاكىلدەرى. بۇرىن ەكى ەل ۇلت تاۋەلسىزدىگى مەن مەملەكەت قۇرىلىسى ىستەرىندە باستان - اياق ءوزارا قولداپ كەلدى، بۇدان بىلاي دا شىنايى ىنتىماقتاسىپ، ءوزارا پايدا جەتكىزىپپ ورتاق يگىلىكتەنۋدىڭ ۇلگىسى، بىرگە دامۋدىڭ ۇلگىسى، وڭتۇستىك - وڭتۇستىك سەلبەستىگىنىڭ اتويشىسى بولۋى كەرەك. ەكى جاق ءوز مەملەكەت جاعدايىنا ۇيلەسەتىن دامۋ جولىمەن بۇلجىماي ءجۇرىپ، ءبىر - ءبىرىنىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن باتىل قولداۋى، ءبىر - ءبىرىنىڭ وزەكتى مۇددەسىنە جانە كوكەيتەستى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى ءتۇسىنۋى، قولداۋى كەرەك. جۇڭگو جاق يندونەزيامەن تىعىز بارىس - كەلىستى ساقتاپ، ەل باسقارۋ تاجىريبەلەرى جونىندە اۋىس - كۇيىس جاساپ، دامۋ ستراتەگياسىن ۇشتاستىرۋدى كۇشەيتىپ، ”ەكى ەلدىڭ قوس باقشاسى“ جانە ”وڭىرلىك جالپىلىق ەكونوميكالىق ءدالىز“ نىسانىن ىشكەرىلەي ىلگەرىلەتىپ، تەڭىز ىستەرى سالاسىنداعى سەلبەستىكتى ۇزدىكسىز تەرەڭدەتۋدى قالايدى. جۇڭگو جاق كەدەيلىكتى ازايتۋ، كەدەيلىكتەن ارىلتۋ سالاسىندا يندونەزيامەن سەلبەستىكتى كۇشەيتىپ، قولداۋ كورسەتۋدى قالايدى.
شي جينپيڭ بىلاي دەپ اتاپ كورسەتتى: قازىر دۇنيە جۇزىندە 100 جىلدا بولماعان وزگەرىس جەدەل قۇبىلۋدا. ەكى جاق بەيبىت قاتار تۇرۋ بەس پرينسيبىن بەلسەنە امالياتتا ايگىلەپ، ىنتىماق، دوستىق، سەلبەستىك سىندى باندۇڭ رۋحىن بارىنشا ساۋلەلەندىرىپ، دۇنيە ءجۇزىنىڭ تەڭ، ءتارتىپتى كوپ ۇيەكتەنۋىن جانە جالپىعا ءتيىمدى، سيىسىمدى ەكونوميكانىڭ جاھاندانۋىن ىلگەرىلەتىپ، كوپ جاقتى سەلبەستىكتى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاۋى كەرەك. جۇڭگو جاق يندونەزيا جاقپەن بىرگە شىعىس وڭتۇستىك ازيا ەلدەرى وداعىنىڭ ىنتىماعى مەن وزەكتى ورنىن قورعاپ، اشىق ۇستالعان، سيىسىمدى وڭىرلىك قۇرىلىمدى قورعاۋدى، جۇڭگو - شىعىس وڭتۇستىك ازيا ەلدەرى وداعىنىڭ اناعۇرلىم تىعىز تاعدىرلاس ورتاق تۇلعاسىن قۇرۋدى قالايدى.
پرابوۆو اۋەلى جوكو زۇڭتۇڭنىڭ ءتوراعا شي جينپيڭگە جولداعان ىقىلاستى سالەمىن جەتكىزىپ، مىنالاردى ءبىلدىردى: زۇڭتۇڭ بولىپ سايلانعاننان كەيىنگى تۇڭعىش ساپارلاي بارعان ەلىم جۇڭگو بولعانىنا ەرەكشە قۋانىشتىمىن. جۇڭگو − ماڭىزدى ىقپالعا يە ءىرى ەل، يندونەزيامەن باستان - اياق ءوزارا قۇرمەت ەتىپ، تەڭ تۇرعىدا مامىلە جاساپ كەلەدى. مەن ءتوراعا شي جينپيڭ جۇڭگو حالقىنا باسشىلىق ەتىپ قول جەتكىزگەن ۇلى تابىستارعا ەرەكشە سۇيىنەمىن، جۇڭگو كوممۋنيستىك پارتياسىنىڭ تاجىريبەلەرىن ۇيرەنۋدى، ودان ۇلگى الۋدى، ەل باسقارۋ اۋىس - كۇيىسىن تەرەڭدەتۋدى قۇپتايمىن. جۇڭگو − يندونەزيانىڭ پارمەندى سەلبەستىك سەرىگى. تاياۋ جىلداردان بەرى جۇڭگو كاسىپورىندارى يندونەزيانىڭ ەكونوميكالىق قۇرىلىسىنا بەلسەنە ات سالىسىپ، يندونەزيا مەملەكەتىنىڭ ءتۇرلى ىستەرىن دامىتۋعا بەلسەنە دەم بەردى. مەن يندونەزيانىڭ جۇڭگومەن اناعۇرلىم تىعىز قارىم - قاتىناسىن دامىتۋدى بۇكىلدەي قولدايمىن، جوكو زۇڭتۇڭنىڭ جۇڭگوعا قاراتقان دوستىق ساياساتىن جالعاستىرىپ، دەربەس، ءوز - وزىنە قوجايىن بولۋدا تاباندى بولۋدى، يندونەزيا ۇكىمەتىنىڭ باستان - اياق اتقارىپ كەلە جاتقان ءبىر جۇڭگو ساياساتىندا تاباندى بولۋدى، جۇڭگو جاقپەن ءبىر - ءبىرىنىڭ وزەكتى مۇددەسىن باتىل قولداۋدى، ەكى ەل قارىم - قاتىناسىنىڭ اناعۇرلىم جاپپاي جانە ساپالى دامۋىن ىلگەرىلەتىپ، ەكى ەلدىڭ تاعدىرلاس ورتاق تۇلعاسىن قۇرۋ ماڭىزدى ورتاق تانىمىن ويداعىداي تياناقتاندىرۋعا كۇش سالۋدى قالايمىن. يندونەزيانىڭ جاڭا ۇكىمەتى ەكى ەلدىڭ دامۋ ستراتەگياسىن ۇشتاستىرۋدى بەلسەنە ىلگەرىلەتىپ، ەكونوميكا - ساۋدا، كەدەيلىكتەن ارىلتۋ سياقتى سالالارداعى سەلبەستىكتە اناعۇرلىم كوپ تابىستارعا قول جەتكىزۋدى جەبەپ، ەكى ەل حالىقتارىنا ءتىپتى دە زور باقىت جاراتۋدى قالايدى. جۇڭگو حالىقارالىق ىستەردە، اسىرەسە، پالەستين ماسەلەسىندە باستان - اياق تۋراشىلدىقتى، ادىلدىكتى قولداپ كەلەدى، مەن مۇنى شىن جۇرەكتەن القايمىن. يندونەزيا جۇڭگو جاقپەن حالىقارالىق جانە وڭىرلىك ىستەردى سايكەستىرۋ سەلبەستىگىن كۇشەيتۋدى، وڭتۇستىك - وڭتۇستىك سەلبەستىگىنە اناعۇرلىم زور ۇلەس قوسۋدى قالايدى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
