شي جينپيڭ ا ق ش – نىڭ زۇڭتۇڭى بايدەنمەن تەلەفوندا سويلەستى
2024.04.03 15:30 كەلۋ قاينارى : حالىق تورابى
شينحۋا اگەنتتىگى، 4 - ايدىڭ 2 - كۇنى، بەيجيڭ. 4 - ايدىڭ 2 - كۇنى كەشتە مەملەكەت ءتوراعاسى شي جينپيڭ ۋادە بويىنشا ا ق ش - تىڭ زۇڭتۇڭى بايدەنمەن تەلەفوندا سويلەستى. ەكى ەل مەملەكەت باسشىلارى جۇڭگو - ا ق ش قارىم - قاتىناسى جانە ەكى جاق ورتاق كوڭىل ءبولىپ وتىرعان ماسەلەلەر جونىندە بۇكپەسىز، ىشكەرىلەي پىكىر اۋىستىردى.
شي جينپيڭ مىنالاردى اتاپ كورسەتتى: بىلتىر 11 - ايدا مەن زۇڭتۇڭ مىرزامەن سان - فرانسيسكو قالاسىندا كەڭەس وتكىزىپ، بولاشاققا بەت العان ”سان - فرانسيسكو ارمانىنا“ جول اشتىم. وسى بىرنەشە ايدا ەكى جاقتىڭ ۇيىرمەلەرى ءبىز كەلىسكەن ورتاق تانىمدى مۇقيات تياناقتاندىرىپ، جۇڭگو - ا ق ش قارىم - قاتىناسىندا ورنىقتى جاعداي جارىققا شىعىپ، ەكى ەلدىڭ ءار سالاسى مەن حالىقارالىق قوعامنىڭ قارسى الۋىنا يە بولدى. ەندى ءبىر جاعىنان، ەكى ەل قارىم - قاتىناسىنداعى كەرەناۋ فاكتورلار دا كوبەيدى، بۇعان ەكى جاقتىڭ نازارىن اۋدارۋىنا تۋرا كەلەدى.
شي جينپيڭ مىنالاردى دارىپتەدى: ستراتەگيالىق تانىم ماسەلەسى باستان - اياق جۇڭگو - ا ق ش قارىم - قاتىناسىندا، ءسوز جوق، ويداعىداي تۇيمەلەۋگە ءتيىستى ”ءبىرىنشى تۇيمە “ بولىپ كەلەدى. جۇڭگو مەن ا ق ش سياقتى ەكى ءىرى ەلدىڭ بارىس – كەلىس، اۋىس - كۇيىس جاساماۋىنا بولمايدى، قاقتىعىسۋىنا، قارسىلاسۋىنا ءتىپتى دە بولمايدى، ءوزارا قۇرمەت ەتىپ، بەيبىت قاتار تۇرىپ، سەلبەسىپ تەڭ يگىلىككە كەنەلىپ، ورنىقتى، اقاۋسىز، باياندى جولمەن ۇزدىكسىز العا باسۋ، كونە سۇردەككە قايتا تۇسپەۋ كەرەك.
شي جينپيڭ مىنالاردى اتاپ كورسەتتى: بيىلعى جۇڭگو - ا ق ش قارىم - قاتىناسىندا بىرنەشە ۇلكەن پرينسيپتە تاباندى بولۋ كەرەك. ءبىرىنشى، تاتۋلىقتى قاستەرلەپ، قاقتىعىسپاۋ، قارسىلاسپاۋ تومەنگى شەگىن بەرىك ساقتاپ، جۇڭگو - ا ق ش قارىم - قاتىناسى جونىندەگى ۇنامدى مەجەنى ۇزدىكسىز جوعارىلاتۋ كەرەك. ەكىنشى، ورنىقتىلىقتى ماڭىزدى ورىنعا قويىپ، اۋرە-سارساڭعا سالىنباي، ءىس تۋدىرماي، قىزىل سىزىقتان اتتاماي، جۇڭگو - ا ق ش قارىم - قاتىناسىنىڭ جالپى تۇلعالىق ورنىقتىلىعىن ساقتاۋ كەرەك. ءۇشىنشى، سەنىمدى نەگىز ەتىپ، ءوز ۋادەسىن ءىس - ارەكەتىمەن ورىنداپ، ”سان - فرانسيسكو ارمانىن“ ”ناقتى جوباعا“ اينالدىرۋ كەرەك. ەكى جاق ءوزارا قۇرمەت ەتۋ تاسىلىمەن تىلدەسۋدى كۇشەيتىپ، الاۋىزدىقتاردى بايسالدى پوزيتسيامەن تىزگىندەپ، ءوزارا تيىمدىلىك جاساۋ رۋحىمەن سەلبەستىكتى ىلگەرىلەتىپ، جاۋاپكەرلىك ارقالاۋ ارقىلى حالىقارالىق سايكەسۋدى كۇشەيتۋى كەرەك.
شي جينپيڭ مىنالاردى دارىپتەدى: تايۋان ماسەلەسى − جۇڭگو - ا ق ش قارىم - قاتىناسىنداعى اتتاپ وتۋگە بولمايتىن ءبىرىنشى قىزىل سىزىق. ”تايۋان دەربەستىگى“ كۇشتەرىنىڭ بولشەكتەۋ ارەكەتتەرىنە جانە سىرتتىڭ ولاردى ىرقىنا جىبەرۋىنە، قولداۋىنا ءبىز قاراپ وتىرا المايمىز. ا ق ش – نىڭ زۇڭتۇڭ مىرزانىڭ ”تايۋان دەربەستىگىن“ قولداماۋداعى بەلسەندى پوزيتسياسىن ارەكەتتە تياناقتاندىرۋىن ءۇمىت ەتەمىن. ا ق ش - نىڭ جۇڭگونىڭ ەكونوميكا - ساۋداسىنا، عىلىم – تەحنيكاسىنا باعىتتاعان قىسىم جاساۋ شارالارى ارت - ارتىنان جارىققا شىعىپ، جۇڭگو كاسىپورىندارىن جازالاۋ جاعدايى بارعان سايىن كوبەيدى. بۇل ”حاۋىپ - قاتەردى الاستاۋ“ ەمەس، قايتا حاۋىپ - قاتەر تۋدىرۋ. ەگەر ا ق ش ءوزارا ءتيىمدى سەلبەستىك ورىستەتىپ، جۇڭگونىڭ دامۋ پايداسىنان ورتاق يگىلىكتەنۋدى قالاسا، جۇڭگونىڭ قاقپاسى باستان - اياق ايقارا اشىلادى؛ ەگەر ا ق ش جۇڭگونىڭ جوعارى عىلىم - تەحنيكاسىنىڭ دامۋىنا قاساقانا قىسىم ءتۇسىرىپ، جۇڭگونى ورىندى دامۋ ۇقىعىنان ماقرۇم ەتسە، ءبىز دە قول قۋسىرىپ قاراپ وتىرمايمىز.
شي جينپيڭ جۇڭگونىڭ شياڭگاڭعا ساياتىن ىستەر، ادامدىق ۇقىق، نانحاي تەڭىزى سياقتى ماسەلەلەردەگى تۇرعىسىن پايىمدادى.
بايدەن مىنالاردى ءبىلدىردى: ا ق ش - جۇڭگو قارىم - قاتىناسى − دۇنيە جۇزىندەگى ىقپالى ەڭ تەرەڭ ەكى جاقتى قارىم - قاتىناس. سان - فرانسيسكو كەزدەسۋىنەن بەرى ا ق ش - جۇڭگو قارىم - قاتىناسىندا قول جەتكەن ىلگەرىلەۋشىلىكتەر ەكى جاقتىڭ سەلبەستىكتى بەلسەنە ىلگەرىلەتۋىنە، سونىمەن بىرگە، الاۋىزدىقتاردى جاۋاپكەرلىكپەن تەجەۋىنە بولاتىنىن ايگىلەدى. مەن مىنانى قايتالاي دارىپتەيمىن: ا ق ش جاق ”جاڭا قىرعي قاباقتىق سوعىس“ جۇرگىزۋگە ۇرىنبايدى، جۇڭگونىڭ ءتۇزىلىسىن وزگەرتۋگە ۇرىنبايدى، وداقتىق قارىم - قاتىناستى كۇشەيتۋ ارقىلى جۇڭگومەن قارسىلاسۋعا ۇرىنبايدى، ”تايۋان دەربەستىگىن“ قولدامايدى، جۇڭگومەن قاقتىعىسۋ ويى جوق. ا ق ش ءبىر جۇڭگو ساياساتىن اتقارادى. جۇڭگونىڭ دامۋى دۇنيە جۇزىنە پايدالى، امەريكا جۇڭگونىڭ دامۋىن شاۋجايلاۋعا، جۇڭگودان ”قول ۇزۋگە“ ۇرىنبايدى. قازىنا مينيسترى يەللەندى، مەملەكەت ىستەرى حاتشىسى بلينكەن تاياۋدا جۇڭگوعا ساپارلاي بارۋعا ورنالاستىرىپ، جۇڭگومەن پىكىرلەسۋدى، تىلدەسۋدى كۇشەيتىپ، قاتە تۇجىرىمداۋدان ساقتانىپ، سەلبەستىكتى ىلگەرىلەتىپ، ەكى ەل قارىم - قاتىناسىنىڭ ورنىقتى دامۋىن ىلگەرىلەتىپ، دۇنيە جۇزىلىك سايىستارعا بىرگە توتەپ بەرۋدى ءۇمىت ەتەمىن.
ەكى ەلدىڭ مەملەكەت باسشىلارى تاعى ۋكراينا داعدارىسى، چاۋشيان تۇبەگىنىڭ جاعدايى سياقتىلار جونىندە پىكىر اۋىستىردى.
ەكى ەلدىڭ مەملەكەت باسشىلارى بىلاي دەپ قارادى: بۇل جولعى سويلەسۋ بۇكپەسىز، سىندارلى بولدى. ەكى جاق تىلدەسۋدى ۇزدىكسىز جالعاستىرۋعا ماقۇلدىق ءبىلدىىرپ، ەكى جاقتىڭ قىزمەت ۇيىرمەلەرىنە ”سان - فرانسيسكو ارمانىن“ ويداعىداي تياناقتاندىرىپ، ديپلوماتيا، ەكونوميكا، فينانس، ساۋدا سياقتى سالالارداعى كەڭەس مەحانيزمىن جانە ەكى ەل ارمياسىنىڭ قارىم - قاتىناسىن ىلگەرىلەتىپ، ەسىرتكىگە تيىم سالۋ، جاساندى زەردە، كليمات وزگەرىسىنە توتەپ بەرۋ سياقتى سالالاردا پىكىرلەسۋ سەلبەستىگىن ورىستەتىپ، ىشكەرىلەي شارا قولدانىپ، ەكى ەلدىڭ گۋمانيتارلىق اۋىس - كۇيىسىن كەڭەيتىپ، حالىقارالىق جانە وڭىرلىك ماسەلەلەر جونىندە تىلدەسۋدى كۇشەيتۋدى تاپسىردى. جۇڭگو جاق قازىنا مينيسترى يەللەننىڭ، مەملەكەت ىستەرى حاتشىسى بلينكەن تاياۋدا جۇڭگوعا ساپارلاي كەلۋىن قارسى الادى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
