لي چياڭ انگليا - جۇڭگو ساۋدا قوعامىنىڭ جۇڭگوعا ساپارلاۋ ۇيىرمەسىندەگىلەرمەن كەزدەستى
2024.05.16 16:30 كەلۋ قاينارى : حالىق تورابى
شينحۋا اگەنتتىگى، 5 - ايدىڭ 15 – كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 5 - ايدىڭ 15 - كۇنى تۇستەن بۇرىن بەيجيڭدەگى حالىق سارايىندا انگليا - جۇڭگو ساۋدا قوعامىنىڭ ءتوراعاسى كوۋپەر كوۋلس باستاعان انگليا - جۇڭگو ساۋدا قوعامىنىڭ جۇڭگوعا ساپارلاۋ ۇيىرمەسىندەگىلەرمەن كەزدەستى.
لي چياڭ انگليا - جۇڭگو ساۋدا قوعامى قۇرىلعانىنىڭ 70 جىلدىعىن قۇتتىقتادى، انگليا - جۇڭگو ساۋدا قوعامىنىڭ جۇڭگو - انگليا قارىم - قاتىناسىنىڭ دامۋىن ىلگەرىلەتۋگە باستان - اياق كۇش سالىپ، جۇڭگو - انگليا ساۋداسىنىڭ ”مۇز جارۋىنا“ تاريحي ۇلەس قوسقانىن، سونداي - اق ەكى ەلدىڭ قارىم - قاتىناسىندا، تىلدەسۋىندە ۇزاق ۋاقىت كوپىرلىك رول اتقارعانىن القادى. لي چياڭ مىنانى ءبىلدىردى: جۇڭگو مەن انگليا بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە دۇنيە جۇزىندەگى ەكى ۇلكەن ەكونوميكالىق تۇلعا رەتىندە، تاماشا قارىم - قاتىناستى ساقتاۋى ەكى جاققا دا، دۇنيە جۇزىنە دە ءتيىمدى. جۇڭگو جاق جۇڭگو - انگليا قارىم - قاتىناسىنا باستان - اياق ايرىقشا ءمان بەرىپ كەلەدى، انگليامەن تىلدەسۋدى كۇشەيتىپ، سەلبەستىكتى تەرەڭدەتىپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىنە قۇرمەت ەتىپ، ەكى ەل قارىم - قاتىناسىنىڭ دۇرىس ارنامەن باياندى دامۋىن، ورنىقتى، باياندى جالعاسۋىن ىلگەرىلەتۋدى قالايدى.
لي چياڭ مىنالاردى اتاپ كورسەتتى: جۇڭگو مەن انگليانىڭ ەكونوميكاسى ءبىرشاما كۇشتى ءبىرىن - ءبىرى تولىقتاۋ ابزالدىعىنا جانە وراسان زور سەلبەستىك كومەسكى كۇشىنە يە. جۇڭگو جاق انگليا جاقپەن ەكونوميكا - ساۋدا بارىس - كەلىسىن جيىلەتىپ، دامۋ ورايىنان بىرگە يگىلىكتەنىپ، فينانس، جاڭا ەنەرگيا، بيولوگيالىق ءدارى - دارمەك، سيفرلى ەكونوميكا سياقتى سالالارداعى سەلبەستىكتى كەڭەيتىپ، ”ءبىر بەلدەۋ، ءبىر جولدى“ بىرگە قۇرۋ جۇلگەسىندە اناعۇرلىم كوپ 3 - جاق سەلبەستىگىن ورىستەتىپ، ءوزارا پايدا جەتكىزىپ، تەڭ يگىلىككە كەنەلۋدى باستان - اياق ەكى ەل قارىم - قاتىناسىنىڭ نەگىزگى اۋەنىنە اينالدىرۋدى قالايدى. جۇڭگو سىرتقا ەسىك اشۋ سىندى نەگىزگى مەملەكەت ساياساتىندا باستان - اياق تاباندى بولىپ، بازارعا كىرۋ رۇقساتىن ونان ارى كەڭەيتىپ، شەتەل ساۋداگەرلەرىنىڭ قارجى قوسۋىنا قىزمەت وتەۋدى قامتاماسىز ەتۋدى كۇشەيتىپ، شەتەل كاپيتالىمەن قۇرىلعان كاسىپورىنداردىڭ جۇڭگودا تيجارات جۇرگىزۋىنە اناعۇرلىم جاقسى ورتا ازىرلەپ، انگليا سياقتى ءار ەل كاسىپورىندارىنىڭ جۇڭگوعا ۇزدىكسىز قارجى قوسۋىن قارسى الادى. انگليا - جۇڭگو ساۋدا قوعامىنىڭ جانە انگليانىڭ ونەركاسىپ - ساۋدا سالاسىنىڭ مۇز جارۋ رۋحىنا مۇراگەرلىك ەتىپ جانە ونى ساۋلەلەندىرىپ، جۇڭگو - انگليا دوستىعىنىڭ جەتكىزۋشىسى، ءوزارا ءتيىمدى سەلبەستىكتىڭ ىلگەرىلەتۋشىسى، كاسىپ تىزبەگى مەن قامداۋ تىزبەگىنىڭ ورنىقتىلىعىنىڭ، ىركىلىسسىزدىگىنىڭ قورعاۋشىسى بولىپ، جۇڭگو - انگليا قارىم - قاتىناسىنىڭ دامۋىنا ۇزدىكسىز ۇلەس قوسۋىن ءۇمىت ەتەمىن.
كوۋپەر كوۋلس مىنانى ءبىلدىردى: جۇڭگو _ دۇنيە جۇزىنە ماڭىزدى ىقپال جاسايتىن ءىرى ەل، انگليا مەن جۇڭگونىڭ قارىم - قاتىناسى توتەنشە ماڭىزدى، ەكى ەلدىڭ ەكونوميكا - ساۋدا بايلانىسى توتەنشە تىعىز. انگليا - جۇڭگو ساۋدا قوعامى جۇڭگونىڭ رەفورما جاساپ، ەسىك اشۋدى ىلگەرىلەتۋىن، ساپالى دامۋدى جۇزەگە اسىرۋىن قولدايدى، كوپىرلىك رولىن ۇزدىكسىز ساۋلەلەندىرىپ، انگليا - جۇڭگو قارىم - قاتىناسىنىڭ دامۋىن جەبەۋگە، ەكى ەلدىڭ سەلبەستىگىن تەرەڭدەتۋگە بەلسەندى ۇلەس قوسۋدى قالايدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
