ءبىر پارشا عانا سۋرەتپەن اقشاڭىزدى جاسىرىن جوتكەپ اكەتە الا ما؟
2024.05.13 14:59 كەلۋ قاينارى : حالىق تورابى
ءبىر پارشا سۋرەتپەن نە ىستەۋگە بولادى؟ AI تەحنيكاسى ارقىلى ونى جالعان كەسكىنگە اينالدىرىپ، وعان قوسا قولفون ءنومىرىڭىز بەن بانكە كارتوچكاڭىزدىڭ ءنومىرىن بىلسە، سىزگە بىلدىرتپەي عانا بانكە كارتوچكاڭىزداعى اقشانى جوتكەپ اكەتە الادى.
دەلونىڭ ناقتى جاعدايى
جۋىردا لياۋنيڭ ولكەسىندەگى ينتەرنەت حاۋىپسىزدىگى تاراۋلارى بۇقارانىڭ دەلوعا قاتىستى مالىمدەۋىن تاپسىرىپ الادى، مالىمدەۋشى ءوزىنىڭ بانكە كارتوچكاسىنداعى اقشادان 3000 يۋان اقشانىڭ ازايىپ قالعانىن، بوتەن ادامنىڭ اتىنداعى ەسەپ نومىرىنە اقشا جوتكەگەن ەستەلىكتىڭ ساقتالىپ قالعانىن ايتقان. دەلونىڭ دەرەگىن بىلگەن سوڭ، لياۋنيڭدەگى ينتەرنەت ساقشىلارى دەرەۋ قىزمەت ورىستەتكەن.
تەكسەرۋ بارىسىندا ينتەرنەت حاۋىپسىزدىگى تاراۋلارى وسى تەكتەس حاۋىپتى جاعدايلار جونىندەگى مالىمدەۋلەردى كوپ رەت تاپسىرىپ العان، ولاردىڭ بارلىعى ەسەپ نومىرىنەن كوپ رەت بوتەن ادامعا بولەك – سالاق اقشا جوتكەگەن جاعدايدى بايقاعانىن ايتقان، جوتكەگەن اقشا سوماسى ءار ءتۇرلى بولىپ، كوبىنشە 50 مىڭ يۋاننان تومەن بولعان.
ساقشى جاق بۇل دەلولاردى ۇيىمدى تۇردەگى، جوسپارلى توپتىڭ تۋدىرۋ ىقتيمالدىعى زور دەپ قاراعان. الايدا، كۇماندى ادامدار بۇل اقشالاردى قالايشا بىلدىرتپەي جوتكەپ اكەتەدى؟
بىرنەشە اي بويى تەكسەرۋ ارقىلى AI تەحنيكاسىنان پايدالانىپ قىلمىس وتكىزەتىن توپتى بايقايدى. اتالعان قىلمىستى توپتىڭ اتامانى رىن XX، ونىڭ قول استىنداعى ”ينفورماتسيا قىزمەتكەرى“، ”بايلانىس جاساۋشى قىزمەتكەر“ سالاۋاتىنداعى 4 ۇيىتقى مۇشەسى، 27 ”قوسىمشا قىزمەتكەرى“ جۇمىس اتقارىپ وتىرعان.
ولاردىڭ جاۋاپتى جۇمىس ءبولىسى ايقىن، ”ينفورماتسيا قىزمەتكەرى“ جاۋ XX پەن ليۋ XX ازاماتتاردىڭ بەت الپەتىنىڭ سۋرەتى، تەلەفون ءنومىرى، بانكە كارتوچكاسىنىڭ ءنومىرى قامتىلعان ءۇش ءتۇرلى ماڭىزدى جەكەلىك ينفورماتسياسىن ساتىپ الۋعا جاۋاپتى بولادى؛ ”بايلانىس جاساۋشى قىزمەتكەر“ ليۋ X شەكارا سىرتىنداعى زاڭسىز ەلەمەنت ”چيۋ X“ پەن حابارلاسىپ، وسى ينفورماتسيالاردى ساتۋعا جاۋاپتى بولادى؛ ”چيۋ X“ بولسا AI تەحنيكاسىنان پايدالانىپ، جەكەلەردىڭ بەت – بەينەسىنىڭ سۋرەتىن شىراي پارىقتاۋعا قاجەتتى بەينەسى ەتىپ جاساپ، ونى قولفون ءنومىرى مەن بانكە كارتۋچكاسىنىڭ نومىرىمەن ۇشتاستىرىپ، شەتەلدەگى قۇمار ويناۋ توبىنا نەمەسە تەلەگراف پەن ينتەرنەتتەن پايدالانىپ الدامكوستىك ىستەۋ ۇيىمىنا ساتىپ بەرۋ ارقىلى پايدا تابادى.
قىلمىس كۇماندىلارىنىڭ بەلگىلى دەڭگەيدە تەكسەرۋدەن ساقتانۋ تانىمى بولعاندىقتان، شەكارا سىرتىنداعى لەزدىك حابارلاسۋ قۇرالدارى ارقىلى بايلانىس جاساپ، سويلەسۋ ەستەلىگىن بەلگىلى مەرزىمدە ءوشىرىپ وتىرادى، سونىمەن بىرگە، تۇراتىن ورىندارىن دا ءجيى اۋىستىرىپ وتىرادى.
تۇلكى قانشا ايلاكەر بولعانىمەن، اڭشىنىڭ جانارىنان قۇتىلا المايدى، لياۋنيڭ ينتەرنەت حاۋىپسىزدىگى تاراۋلارى 20 نەشە كادر – ساقشىنى 2 ولكەدەگى 5 قالاعا جىبەرىپ، قىلمىس كۇماندىلارىن تۇگەلىمەن قولعا تۇسىرەدى.
تەكسەرۋگە قاراعاندا، اتالعان توپ ازاماتتاردىڭ بەت – الپەتىنىڭ سۋرەتىنەن 50 نەشە سۋرەتتى، بانكە كارتوچكاسى مەن تەلەفون كارتوچكاسىنان 100 نەشەسىن زاڭسىز ساتىپ الىپ، شەكارا سىرتىنداعى تەلەگراف پەن ينتەرنەتتەن پايدالانىپ الدامكوستىك ىستەيتىن قىلمىستىق ەلەمەنتتەردىڭ 70 ميلليون يۋاننان استام اقشانى جاڭعىرتپالاۋىنا كومەكتەسكەن ءارى وسى بارىستا پايداعا كەنەلگەن.
ساقشى جاق مىنانى ەسكەرتەدى: بارشا جۇرت جەكەلىك ينفورماتسياسىن ويداعىداي ساقتاۋى، تەلەفون ءنومىرى مەن بانكە كارتۋچكاسىنىڭ ءنومىرىن الباتى جاريالاماۋى، كەرەك. سونىمەن بىرگە، زاڭسىز ەلەمەنتتەرگە مىنانى قاتاڭ ەسكەرتەدى: زاڭ تورىنىڭ ءورىسى كەڭ، ءارقانداي ورىندى قاعىس قالدىرمايدى، جامان ءىس ىستەگەندەردىڭ زاڭ تورىنان قاشىپ قۇتىلۋى مۇمكىن ەمەس.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
