ومىرىمەن پارتيا مۇشەسىنىڭ قاسيەتىن ءتۇسىندىردى
2017.03.28 15:59 كەلۋ قاينارى : شينجياڭ گازەتى
ول كوز جۇمدى، جەرگىلىكتى ورىنداعى نەشە ونداعان ءار ۇلت شارۋالارى وزدىكتەرىنەن كەلىپ 3 كۇن ارۋاق كۇزەتتى؛ ول كوز جۇمدى، كەيبىر ۇيعۇر اتايلاردىڭ، اپالاردىڭ كوز جاسى كول بولدى؛ ول كوز جۇمدى، جاي كادردان اۋدان باسشىلارىنا دەيىنگى بارلىق ادامنىڭ كوكىرەگىندە قاباعات قاسىرەت قالدى.
ونىڭ اتى ۋاڭ چياڭ، كوزى تىرىسىندە اقسۋ ايماعى شايار اۋداندىق حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى بولاتىن. بيىل 22 - اقپان تاڭەرتەڭ، ۇزاق ۋاقىتتىق جانكەشتى قىزمەتتەن جۇرەك بۇلشىق ەتىنىڭ كەنەت تۇيىلۋىنەن قىزمەت ورنىندا جىعىلىپ، 45 جاسىندا تىنىسى ماڭگىلىك توقتادى.
ۋاڭ چياڭ گانسۋ ولكەسىنىڭ پيڭلياڭ قالاسىندا دۇنيەگە كەلگەن، بۇرىن لانجوۋ اسكەري رايونىنىڭ زاپاس بريگاداسىندا مىندەت وتەگەن. قوسىننان شەگىنگەننەن كەيىن، ىلگەرىندى - كەيىندى شايار اۋدانى شايار قالاشىعى، گۇلباق قالاشىعى، جاڭا ءمالى قالاشىعى، اۋداندىق ورمان شارۋاشىلىعى مەكەمەسى، اۋداندىق ەگىن شارۋاشىلىعى مەكەمەسى، اۋداندىق ءۇي - قۇرىلىس مەكەمەسى سياقتى ورىنداردا قىزمەت ىستەپ، قارۋلى ءبولىمىنىڭ ورىنباسار باستىعى، قالاشىقتىڭ ورىنباسار باستىعى، قالاشىق پارتكوم شۋجيى، مەكەمە باستىعى سياقتى مىندەتتەردە وتىرىپ، كوپتەگەن قىزمەت ورنىندا شىنىققان. بىلتىر قازاندا اۋداندىق حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى بولعان.
ول ەستەلىگىنە: «مەنىڭ ءاربىر العا باسقان قادامىم − تۇگەلدەي پارتيا ۇيىمىنىڭ ماپەلەۋىنىڭ ناتيجەسى، پارتيا ىستەرىنە ادال بولىپ، پارتيا قىزمەتىن قۇلشىنا ىستەۋ مەنىڭ ومىرلىك تالعامىم. وسى ءۇشىن قانداي بوداۋ بەرۋگە پەيىلمىن» دەپ جازدى.
اۆتونوميالى رايوندىق پارتكومنىڭ ورىنباسار شۋجيى لي پىڭشين ۋاڭ چياڭنىڭ ىستەرىنەن حابار تاپقاننان كەيىن، ارنايى تۇردە «قىزمەتتى جان - تانىمەن ىستەۋدىڭ تيپىن ورناتىپ، ستيل قۇرىلىسىن ىلگەرىلەتتى» دەگەن بەكىتۋ جازدى. بيىل 19 - ناۋرىزدا ج ك پ اقسۋ ايماقتىق كوميتەتى ۋاڭ چياڭعا «تاڭداۋلى پارتيا مۇشەسى» اتاعىن بەردى ءارى ايماق كولەمىندە ۋاڭ چياڭنان ۇيرەنۋ قيمىلىن ورىستەتۋدى ورنالاستىردى.
ءومىرىنىڭ سوڭعى ساتىنە دەيىن قاربالاس ءوتتى
«ۋاڭ چياڭ ءار كۇنى ەرتە تۇرىپ، اۋدان قالاشىعىن ءبىر اينالىپ، ورتانى قورعاۋ جۇمىسشىلارىنىڭ تازالىق جۇمىسىن قانداي ىستەگەنىن، قالا قۇرىلىسى جاعىندا ماسەلە بار - جوعىن قاراپ شىعادى»، - دەيدى شوفەرى كوۋ باۋلەي ەسىنە الىپ، ۋاڭ چياڭعا شوفەر بولعان 3 جىلدا كوۋ باۋلەي كوبىنەسە ونى ورتا جولدان اۆتوكولىككە شىعارىپ الادى ەكەن. ءوز ۇيىنەن نەمەسە كەڭسەدەن ونى اۆتوكولىككە الىپ العان كەزدەرى 10 رەتتەن اسپاعان.
21 - اقپان كۇنى ساعات 9دان 45 مينۋت وتكەن شاق، ۋاڭ چياڭ ءۇي - قۇرىلىس مەكەمەسىنە كەلىپ قىزمەتكە نۇسقاۋ بەرەدى؛ ساعات 10 مولشەرىندە ول ءۇي - قۇرىلىس مەكەمەسىنىڭ كادرلار جيىنىنا قاتىناسىپ، الداعى قىزمەتتەردى ورنالاستىرادى؛ ساعات 11دە قايلور اۋىلىنا بارىپ، ەرەكشە اۋىل - قالاشىق قۇرىلىسىنىڭ جاعدايىن كوزدەن كەشىرەدى؛ 15تەن 45 مينۋت وتكەندە، جاڭا ءمالى قالاشىعىنا بارىپ جيىن اشادى؛ ساعات 18 شاماسىندا، اۋداندىق ءۇي - قۇرىلىس مەكەمەسىنىڭ «ۇعىسۋ، تيىمدىلىك جاساۋ، توعىستىرۋ» قيمىلى بويىنشا قىستاقتا تۇرعان بىرنەشە تۇيىنىنە بارىپ قىستاقتا تۇرۋ قىزمەتىنىڭ جاعدايىن تەكسەرەدى؛ كەلەسى كۇنى تاڭعا جاقىن، اۋدانعا قايتىپ كەلەدى.
مىنە بۇل ۋاڭ چياڭنىڭ ءومىرىنىڭ ەڭ سوڭعى كۇنىندەگى ساپار كارتاسى ەدى.
كوۋ باۋلەي ەسكە الىپ بىلاي دەيدى: سول كۇنى ۋاڭ چياڭدى ۇيگە جەتكىزگەندە ءوڭىنىڭ قۋارىپ تۇرعانىن بايقاپ، ونان جايسىزدانىپ تۇرسىز با، ءدارى اكەلىپ بەرەيىن بە؟ دەپ سۇرادىم، اۆتوكولىكتىڭ ارت جاعىندا ءبىر قوراپ ءدارى بار بولاتىن. ۋاڭ چياڭ: «ەشتەڭە ەتپەيدى، ءسال شارشاعاندايمىن، ۇيىقتاپ السام جاقسى بولىپ كەتەمىن»، - دەدى.
«حالىققا قولايلى ساقشى پۋنكتىنىڭ قۇرىلىسى 40 كۇننىڭ ىشىندە ءبىتۋى كەرەك؛ قوجالىق باسقارۋ سەرىكتەستىگىن قۇرىپ، شاعىن رايونداردىڭ قوجالىق ىستەرىن ارنايى باسقارتۋ كەرەك؛ 2017 - جىلعى ءتۇيىندى قىزمەتتەر تاعى مىنالاردى قامتيدى...» ۋاڭ چياڭنىڭ سول كۇنگى كوپشىلىككە ايتقان قىزمەت جونىندەگى ورنالاستىرۋى اۋداندىق ءۇي - قۇرىلىس مەكەمەسى اكىمشىلىك كەڭسەسىنىڭ مەڭگەرۋشىسى شى يۇڭنىڭ ءالى ەسىندە. «ونىڭ كەنەتتەن ارامىزدان كەتۋى جەر سىلكىنگەندەي، كەنەتتەن ءبىر قۋاتتى تىرەگىمىزدەن كوز جازىپ قالعانداي بولدىق»، - دەيدى شى يۇڭ قايعىرا.
«دەنساۋلىق قۇرىپ كەتسە دە قىزمەتتى اقساتپايمىن» بۇل ۋاڭ چياڭ ۇنەمى ايتاتىن ءسوز. ۋاڭ چياڭ جونىنەن العاندا، قىزمەت ومىردەن ماڭىزدى. ارتىندا قالعان زاتتارىن جيناقتاعان كەزدە، شى يۇڭ ونىڭ ۇستەلىنەن ءبىرتالاي ءدارى قۇمىرالارىن كوردى، ۇستەلدەگى قالا - قالاشىق قۇرىلىسى جوسپار - جوباسىنىڭ ۇستىندە ءبىر تال قالام جاتىر، جوسپار - جوباعا شارتتى بەلگىلەر جىپىرلاتا قويىلىپتى.
«اۆتونوميالى رايوندىق پارتكومنىڭ، ايماقتىق پارتكومنىڭ ءبىر قىدىرۋ ورنىقتىلىقتى قورعاۋداعى كەشەندى شارالارىن جاپپاي دايەكتى تياناقتاندىرىپ، قوعام ورنىقتىلىعى سىندى ارقاۋدى ءاردايىم مىقتى يگەرۋ كەرەك...» ۋاڭ چياڭنىڭ كوز جۇمعان حابارىن ەستىگەندە، شايار اۋداندىق ءۇي - قۇرىلىس مەكەمەسى جۇمىسشى ۇيىمىنىڭ ءتوراعاسى، جاڭا ءمالى قالاشىعىنىڭ جاڭا ءمالى قىستاعىندا تۇرعان «ۇعىسۋ، تيىمدىلىك جاساۋ، توعىستىرۋ» قىزمەت اترەتىنىڭ باستىعى وسمان ءىمىت داۋىس سالىپ جىلاپ جىبەردى: «تۇستەن كەيىن عانا وسىندا ورنىقتىلىقتى قورعاۋ قىزمەت جيىنىن اشىپ، بىزگە تاپتەشتەپ قىزمەت تاپسىرىپ ەدى، كەشكى تاماقتى دا قىستاقتا بىزبەن بىرگە ىشكەن بولاتىن، قالاي عانا ومىردەن وتەدى!».
ءتىلشى ۋاڭ چياڭنىڭ ءبىر دوسىنىڭ قول تەلەفونىنان 21 - ناۋرىز كۇنى تاڭعا جاقىن ۋاڭ چياڭنىڭ دوستار شەڭبەرىندە ءبىر ساپتاسىنىڭ «مەن ءوزىمنىڭ شينجياڭداعى ءبىر جاۋىنگەر بولعانىمدى ماقتانىش ەتەمىن» دەگەن شالقىماسىن ورتاقتاسقانىن كوردى. مەيلى قانداي قىزمەت ورنىندا تۇرسادا ول قۇلشىنا ىستەدى
شايار اۋدانى ورمان شارۋاشىلىعى مەكەمەسىنىڭ كادرى لي حايشيانىڭ ەسىندە قالۋىنشا، نىسانعا ءوتىنىش ەتۋ ماتەريالىن وزگەرتۋ بارىسىندا ۋاڭ چياڭ ۇنەمى تاڭ اتقانعا دەيىن ۇستەمە جۇمىس ىستەيدى ەكەن. كوپشىلىك وعان دەنساۋلىعىڭىزعا كوڭىل ءبولىڭىز دەسە، ول ۇنەمى جىميىپ قانا: بۇقاراعا يگىلىك جەتكىزەتىن نىساندارعا كوبىرەك قول جەتكىزسەك الاڭسىز بولامىز عوي! - دەيدى ەكەن. ۋاڭ چياڭ اۋداندىق ورمان شارۋاشىلىعى مەكەمەسىنىڭ باستىعى مىندەتىن وتەپ جاتقان كەزدە اۋدان بويىنشا 55 مىڭ مۋ جەرگە ورمان ەگىلىپ، 24 مىڭ مۋ جەرگە جاڭعاق، 30 مىڭ مۋ جەرگە شىلان تولىقتاپ ەگىلگەن، جەمىس ورمانىنان ۇلگى كورسەتەتىن 882 باق قۇرىلىپ، 10 ميلليون يۋان قارجى قوسىلعان جەمىس - جيدەك وڭدەۋ كاسىپورىننان ەكەۋىن ەنگىزىپ، ورمان شارۋاشىلىعىنىڭ ءونىمىن ارتتىرۋعا، شارۋالاردىڭ كىرىسىن مولايتۋعا مىعىم نەگىز قالاعان.
«شارۋالاردىڭ كىرىس كوزى قايدا بولسا، ءبىز سول جۇمىستى ىستەۋىمىز كەرەك»، - بۇل ۋاڭ چياڭنىڭ ەگىن شارۋاشىلىعى مەكەمەسىنىڭ باستىعى بولىپ تۇرعان كەزدە كادرلارعا ۇنەمى ايتاتىن ءسوزى ەكەن. 2012 - جىلى شارۋالاردىڭ كىرىسىن تۇبىرىنەن ارتتىرۋ ءۇشىن ول كوپپەن اقىل - كەڭەس قوسۋ نەگىزىندە، اۋداندىق پارتكومعا، ۇكىمەتكە ەگىس داقىلدارىن ەگۋ جۇلگەسىنە رەتتەۋ جۇرگىزۋ جوباسىن تاپسىرىپ، 120 مىڭ مۋ جەرگە ءبىر جىلدا 2 رەت پىساتىن ەرەكشە ەگىس داقىلىن ەگۋدى، 100 مىڭ مۋ جەرگە ماقتا مەن بەدياندى قوسىپ ەگۋدى، 20 مىڭ مۋ جەرگە قىزىل ميانى ادام كۇشىمەن ەگۋدى جالپىلاستىرىپ، ءاربىر شارۋانىڭ جىلدىق جان باسىندىق ورتاشا كىرىسىنە 160 نەشە يۋان ۇستەدى. «شارۋالاردىڭ كىرىسىن ارتتىرۋ سىندى وسى ۇلكەن تاقىرىپقا ول زەيىن - زەردەسىن سارقا جۇمسادى دەسەك تە بولادى»، - دەدى شايار اۋدانى ەگىن شارۋاشىلىعى مەكەمەسىنىڭ ورىنباسار باستىعى مۇقتار يساق.
ۋاڭ چياڭ اۋداندىق ءۇي - قۇرىلىس مەكەمەسىنىڭ باستىعى بولىپ تۇرعان كەزدە ءتۇيىندى قۇرىلىس نىساندارىن نەمەسە ينجەنەريانىڭ ماڭىزدى بۋىندارىن ءوزى تەكسەرىپ وتىرادى. ءبىر جولى ول جاۋىپ تۇرعان جاۋىنعا قاراماي قۇرىلىس الاڭىن توساتتان تەكسەرۋگە بارادى، ول قىزمەتكەرلەردەن: قۇرىلىس جۇرگىزۋ تالابىنا ساي حاۋىپسىزدىك تەكسەرۋى ءجۇرىلدى مە؟ - دەپ سۇرايدى، قىزمەتكەرلەر: تۇگەلدەي تەكسەرىلدى، - دەپ جاۋاپ بەرسەدە، ول الاڭسىز بولا الماي، ءۇش قاباتتىق عيماراتتىڭ توبەسىنە شىعىپ، كولدەنەڭ ارقالىققا سەمەنت قۇيۋدان بۇرىن بولات شىبىقتىڭ استىندا ءبىراز قۇرىلىس قوقىستارى قالعانىن كورىپ، اشۋعا باسىپ: حاۋىپسىزدىك تەكسەرۋدە نەمقۇرايدىلىققا سالىنۋعا بولا ما! دەرەۋ قۇرىلىستى توقتاتىڭدار! - دەيدى، كەيىن ول تاعى بىرنەشە رەت تەكسەرىپ بارادى.
الايدا، ۋاڭ چياڭ بارلىق ىستە «قىتىمىر» ەمەس. قىزمەتتەن اعاتتىق بايقالسا، ول كادرلاردى جازعىرعاننان گورى ولارعا قالاي ىستەۋ كەرەكتىگىن بايىپپەن تۇسىندىرەدى. «ۋاڭ مەكەمە باستىعى جىلى ءجۇزدى ادام، ادامدارعا وتە مەيىرلى. ءبىز سياقتى جاي كادرلاردىڭ ءوزى وعان قاي - قاشان دا تەلەفون شالىپ، قىزمەتتەن مالىمەت بەرىپ وتىرامىز، بۇل مەكەمەمىز بويىنشا ماقتانۋعا تاتيتىن ءىس»، - دەدى اۋداندىق ءۇي - قۇرىلىس مەكەمەسىنىڭ كادرى ي چۇنيان. ۋاڭ چياڭنىڭ باسشىلىعىندا بىرنەشە جىل ىشىندە شايار اۋدانى قالا، اۋىل نەگىزدىك قۇرىلعىلارىنا 435 ميلليون يۋان قارجى قوسىپ، 19 مىڭ 852 بەيقۇت ءۇي، 2409 الەۋمەتتىك جالعا بەرىلەتىن ءۇي، لاشىقتار رايونىنان وزگەرتىپ سالىنعان 1305 تۇرعىن ءۇي، جاڭادان 17 مىڭ 145 تۇرعىن ءۇي سالدى. جياشيڭ تاجىريبە مەكتەبى سياقتى قۇرىلىس نىساندارى ىلگەرىندى - كەيىندى اۆتونوميالى رايوننىڭ «تيانشان ساۋىتى» اتىنداعى ساپالى قۇرىلىس سيلىعىن الىپ، شايار اۋدانىنىڭ وسى جاعىنداعى اق تاڭداعىن تولتىردى.
شى يۇڭ بىلاي دەدى: ۋاڭ چياڭ ءۇي - قۇرىلىس مەكەمەسىندە قىزمەت ىستەگەن 3 جىلدان استام ۋاقىتتا ءىسساپارعا كەتكەن كۇندەرىنەن باسقا سەنبى، جەكسەنبىلەردە ەجەلدەن دەمالىپ كورگەن ەمەس. كۇندىز قۇرىلىس الاڭىنا بارىپ، تەكسەرۋ - زەرتتەۋ جۇرگىزسە، تۇندە دەرلىكتەي كەڭسەگە كەلىپ، ءتۇن ورتاسىنا دەيىن ۇستەمە قىزمەت ىستەيدى. ءبىز ول كىسىنىڭ جوعارى قان قىسىم ناۋقاسى بار ەكەنىن بىلەتىنبىز، ول كىسىگە شيپاحانا بارىپ ەمدەلىڭىز دەسەك، ءار جولى: ەشتەڭە ەتپەيدى، بۇل جاي ناۋقاس. ءوز دەنساۋلىق جاعدايىم وزىمە ءمالىم، بۇگىنگى قىزمەتتى بۇگىن بىتىرمەسەم، ەرتەڭ ءتىپتى كوبەيەدى، - دەيتىن.
«ونىمەن كوپ جىلدان بەرى تانىسپىن، مەيلى قانداي قىزمەت ورنىندا ىستەسەدە، ول سونشالىقتى قۇلشىنادى! ول قاي - قاشان دا وزىنە پارتيا مۇشەسىنە ءتان ولشەمىمەن تالاپ قويادى، بۇكىل مەكەمەمىزدەگى كادر - جۇمىسشىلاردىڭ ۇيرەنەتىن ۇلگىسى»، - دەدى اۋداندىق ءۇي - قۇرىلىس مەكەمەسىنىڭ ورىنباسار باستىعى شيە جيڭرىن. بۇكىل اۋدانداعى پارتيالى كادرلاردىڭ ۇلگىسى
اكەسىنىڭ ەسىندە قالۋىنشا، ۋاڭ چياڭ شاياردا قىزمەت ىستەگەن كەزىندە، ولارمەن بىرگە بولعان ۋاقىتى ەشقاشان 2 ساعاتتان اسىپ كورمەپتى، ونىڭ ۇستىنە بىرگە بولعان كەزدە دە قولىنان تەلەفون تۇسپەي، قىزمەت جايلى سويلەسىپ جاتادى ەكەن. «ول ارمياداعى قالىپتاسقان اسكەري ادەتىن ساقتاپ ءوتتى، باستىعى قىزمەت ورنالاستىرىپ قوڭىراۋ شالا قالسا، كۇن دەمەي، ءتۇن دەمەي تياناقتاندىرادى. ۇيدەگىلەر جىل اسىن بىرگە جەيمىز دەپ ۋادەلەسىپ قويساق، ول قىزمەت سەبەبىنەن كەلە المادى»، - دەدى ۋاڭ چۇنشان.
ءبىر ايدان ارتىق ۋاقىت ۋاڭ چياڭنىڭ ءجۇزىن كورمەگەن اكەسى مەن شەشەسى ۇلدارىن ساعىنعان سوڭ، تاماق دايىنداپ، ونى ۇيدەن ىستىق اس ءىشىپ كەت دەپ نەشە مارتە شاقىرادى. ءبىراق، ول بايىز تابا المايدى، تەلەفون كەلە تاماعىن قويا سالىپ، شىعا جونەلەدى. «ەسىكتىڭ <تارس> ەتكەن دىبىسىن ەستىپ، ءبىز اس ۇيدەن قوناق بولمەگە اتىپ شىعىپ، ونى شاقىرىپ الىپ قالايىق دەگەنشە، ول عيماراتتىڭ ەسىگىنەن شىعىپ بولىپتى، ءوستىپ ءبىز ۇنەمى ءتىل قاتىسا الماي قالامىز»، -دەدى اقساقال.
ۋاڭ چۇنشان مەن جۇبايى ۋاڭ چياڭنىڭ دەنساۋلىعىنان الاڭداپ، وعان لايىقتى دەمالۋدى ەسكەرتەدى. «ءار جولى ول تۇك تە ەتپەيدى، مىنا قاربالاستىق ءوتىپ كەتكەن سوڭ كورەيىك»، - دەپ جۇرە سويلەپ، ءبىزدىڭ مىسىمىزدى قۇرتاتىن، - دەيدى قاريا.
ۋاڭ چياڭ ومىردەن وتكەننەن كەيىن، ايەلى ۋاڭ جينيۇن قايعىدان كوكىرەگى قارىس ايىرىلىپ، نەشە مارتە ەسىنەن تاندى. ونىڭ ايتۋىنشا، ۋاڭ چياڭنىڭ جوعارى قان قىسىم اۋرۋىنا شالدىققانىنا ۇزاق بولىپتى، ىلعي باسىم اۋىرادى، جايسىزداندىم دەگەن سوڭ، شيپاحاناعا بارۋدى تالاي ەسكەرتەدى، سوندا ۋاڭ چياڭ: قولىم بوساماي ءجۇر، ءدارى ىشسەم، ەشتەڭە ەتپەيدى، - دەيدى ەكەن. كەيدە ول نەشە كۇن ۇيگە قايتپاي، ءدارىسىن ءىشۋدى ۇمىتىپ كەتەدى ەكەن.
ۋاڭ جينيۇننىڭ ايتۋىنشا، قانشا شارشاپ جۇرسە دە، قىزمەتكە كەلگەندە ۋاڭ چياڭ رۋحتانىپ كەتەدى ەكەن. ۇيلەنگەننەن بەرى، ول تەك ۇلى ۋنيۆەرسيتەتكە شىعاردا 7 كۇن رۇقسات الىپتى، شەشەلى - بالالى ەكەۋىن ەش ۋاقىتتا شايار اۋدانىنان باسقا جەرگە ەرتىپ بارىپ كورمەپتى. كەيدە ۋاڭ جينيۇن دە رەنجىپ، وكپەسىن ايتسا، ۋاڭ چياڭ ونى الداۋسىراتىپ: مەن زەينەتكە شىققان سوڭ، كۇندە سەندەردىڭ جاندارىڭدا بولامىن، - دەيدى ەكەن. «قايتىس بولارىنان بىرنەشە كۇن بۇرىن ول ماعان ءوزىمدى قاتتى جايسىزدانعانداي سەزىپ ءجۇرمىن، - دەدى. مەن وعان شيپاحانا بارىپ تەكسەرىل دەدىم. ءبىراق ول بىرنەشە كۇننەن كەيىن كورەيىك دەدى...»، - دەدى ۋاڭ جينيۇن وكسىك اتىپ.
«اكەم ءار كۇنى تىم جاي قايتىپ، وتە ەرتە تۇراتىن، ءبىر ۇيدە تۇرساق تا كەزىگە المايمىز»، - دەدى ۋاڭ چياڭنىڭ ۋنيۆەرسيتەتكە ەندى وقۋعا تۇسكەن ۇلى ۋاڭ زىشۋان.
بيىل 18 جاستاعى ۋاڭ زىشۋان حاينانداعى سان - يا ينستيتۋتىندا حابارلاسۋ ينجەنەرياسى ماماندىعى بويىنشا 1 - جىلدىقتا وقيدى. ونىڭ ايتۋىنشا، اكەسىمەن اقتىق كەزدەسۋى مەكتەپكە قايتار كۇنى بولىپتى، ول كۇنى اكەسى كەزەكشى ەكەن، اسىعىس - ۇسىگىس كەزدەسۋدە، اكەسى وعان جاقسى وقى، ۇيگە كوبىرەك تەلەفون شالىپ حابارلاسىپ تۇر دەپ تاپسىرىپتى. «بۇل مەنىڭ اكەممەن ەڭ سوڭعى كەزدەسۋىم ەكەنىنە ءالى كۇنگە سەنە الماي كەلەمىن»، - دەدى ۋڭ زىشۋان.
«جاۋىنگەر سەرىگىمىزدى اتتاندىرىپ اقتىق ساپارعا، ءۇنسىز تۇرمىز كوزدەن جاستى پارلاتىپ، ەستىلەدى كەرۋەن ءۇنى قۇلاققا...» ۋاڭ چياڭنىڭ بۇرىنعى جاۋىنگەر سەرىكتەرى ونىڭ قازا بولعانىن ەستىگەن سوڭ، ينتەرنەتتە وعان ازا ءبىلدىرۋ جينالىسىن وتكىزدى. سۇيەك شىعاراتىن كۇنى، ۋاڭ چياڭ اسكەردە تۇرعان كەزدە روتانىڭ جەتەكشىسى بولعان داي يۇڭشياڭ ونى اقتىق ساپارعا ۇزاتىپ سالۋعا ۇرىمجىدەن ارنايى كەلدى. «ۋاڭ چياڭ مەنىڭ كوڭىلىمدە ءارقاشان جاقسى جاۋىنگەر، جاقسى وددەلەنيە باستىعى. اسكەردەگى كەزدە ول تارتىپكە قاتاڭ بويسۇنىپ، پارتياعا ادال بولدى، بۇگىن ول ءومىرىن پارتياعا ارنادى، حالىققا ارنادى، مەن ونى ماقتانىش تۇتامىن!»، - دەدى ول.
«ۋاڭ چياڭ 20 نەشە جىلدىق قىزمەت بارىسىندا، قىزمەتىن اتقارىپ، جاۋاپكەرشىلىگىن ادا ەتىپ، بار ىنتى - شىنتىسىن قىزمەتكە ارناپ، بۇقارانىڭ سەنىمى مەن قولداۋىنا بولەندى. ول ساياسيدى دارىپتەپ، پرينسيپكە تاباندى بولىپ، جالپى جاعدايعا كوز سالىپ، قىزمەت ورنىندا تاپجىلماي 10 جىلدى ءبىر كۇندەي وتكىزىپ، ءۇنسىز ۇلەس قوسىپ، ناقتى ارەكەتىمەن پارتيا مۇشەسىنىڭ ىشكى ءمانىن ايگىلەدى. ول بۇكىل اۋدانداعى پارتيالى كادرلاردىڭ ولشەمى جانە ونەگەسى»، - دەدى شايار اۋداندىق پارتكومنىڭ شۋجيى ۋاڭ شينگى.
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
